Read Mundani 1 Pità 4 Bible Online

1 Pità 4 - Mundani bible

1 Pità 4

¹Ba ko nê Yesò Klistò li ntsìꞋi wɔ̀bȩ̂, ndzě ngoꞋ. Ale, bɨ̀ bɔ èwuu mèmɨ̀ɨ̀te mbɔŋ ntàŋka awɨ̧ eye ngoꞋ mbɨ̀Ꞌɨ̀ tà li ndze la. Bɨ̀ ghɨ̀ ale, nkàà nê wòt tà bɨ̧ɨ̧ne eye ngoꞋ la, bakà tsi mbɔ̀ àghɨa ko tàa ghɨ̀ nê kàbɔ̀ŋ la.

²Bɨ ghɨ̀ ale, ko bɨ̀ ka tsi me tseke a sitsǎꞋ ŋàa ngɨ̀à àghɨa mbɨ̧te ènyit tɨ̧ te kɨa la, ko bɨa tsiꞋi me ghɨ̀ àghɨa Mbɔ̧ɔ̧mà nàa nkɨà la.

³Bɨ li ntaꞋa tsoke àfɨ̀Ꞌ a màngɨa èghɨ bu bòt kà ko a Mbɔ̧ɔ̧mà àa ngɨ̀à la. Bɨ li ngua njɨ̀a mèpǎ̧ màpaꞋta àbɨ̧, mpfəa akwen èghɨ bu mbɨ̧te ènyit tɨ̧ tèa nkɨà la, mbea mèlùꞋ, ngɨ̀à àghɨa àgème èntɨ̧ɨ̧ wɨ̧ àa nkɨà la, mè nɨa èghɨ tsa ane bèmbɔ̧ɔ̧mà bɨ̧, è wu kwàꞋ àbɨꞋte ànəê la.

⁴A taꞋa tsě bòt ngaa kà ko a Mbɔ̧ɔ̧mà la ndɨ̀ wu bɨ̀a ka tsi nkùŋè àwɔb a màngɨa èwuu èbɨꞋte ènəê kèkweelè baa la, ale bɔ tsiꞋi me tsɔ̧̀ɔ̧̀tè àwɨ̧ tsɔ̧̀ɔ̧̀te.

⁵Ka bɔɔ li làꞋa ànəa èghɨ ngaa bɔ̀ɔ ngɨ̀à la abua Mbɔ̧ɔ̧mà wu tàa saꞋa bòt yu̧ nè bèmpfəà la.

⁶Eyaa wu lə Yesò Klistò li ntsɔ̀tè Ntu̧ Ntsɔ̧̀ Mbɔ̧ɔ̧mà fɔ̀ɔ̀le abua bòt bɔ pfəꞋte la. Bɔ li mpfəèꞋte mbɨ̀Ꞌɨ̀ bɔbȩ àa mpfəèꞋta la, nkàà nê wu ngoꞋ Mbɔ̧ɔ̧mà nɔ̀ŋe a ègwet bòt bàgème a sitsǎꞋ la. Ka bɔ li ntsɔ̀tè Ntu̧ Ntsɔ̧̀ yaa abua yɔb, mbɨ̀Ꞌɨ̀ bɔ̀ wu epeme e me tseke nê Mbɔ̧ɔ̧mà.

⁷ÀfɨꞋa ngɔ̀ŋ nàa lìà la a tsiꞋa nkùꞋà, è wu ale bɨ̀ zì àtsə me baabe ènyit yɨ̧ ntsɔ̧̀ mbɨ̀Ꞌɨ̀ me ko ntsàꞋta Mbɔ̧ɔ̧mà.

⁸Ànəa mbì wu nê bɨ̀ me kɔ̀ŋkè bɔnyɨ bɨ̧ nè èntɨ̧ɨ̧ wɨ̧ ègème, nkàà nê èkɔŋ e taꞋa wua nkàba mènəè nyaŋ bòt e fà̧à̧tè la.

⁹Bɨ̀ me lì bègɨ̧̀ ntsɔ̧̀ kà wua nkɨ̀ɨ̀là mèsi mɨ̧.

¹⁰Mbɔ̧ɔ̧mà ŋa èyì a màngɨa èghɨ tsa tsa abua waa waa ane yɨ̧. È wu ale, wòt ègème me ghɨ̀ àzi ne àfàꞋ mbɨ̀Ꞌɨ̀ tà faꞋa abua Mbɔ̧ɔ̧mà, nɨ̀a ntɨ̀ŋa bòt ko.

¹¹ÀfaꞋa wòt wu màndaꞋa èngǎ̧ Mbɔ̧ɔ̧mà, tà làꞋà wuê mbɨ̀Ꞌɨ̀ e dzə abua Mbɔ̧ɔ̧mà la. Àyea wòt wu màntɨŋa banɔ̧̀, tà me tɨŋe wuê ane mètàŋ mu è dzə abua Mbɔ̧ɔ̧mà la. Bɨ̀ me ghɨ̀ ale mbɨ̀Ꞌɨ̀ waa waa naa wùꞋte Mbɔ̧ɔ̧mà ane àghɨ àgème bɨ̀a ngɨ̀à la ane èlen Yesò Klistò. MèngùꞋte nè mètàŋ è wu abua Yesò Klistò ane àlia nè àlia. Àmèn.

¹²Bèshu̧ bɔ̧, bɨ̀ ka nɨ ngoꞋte kekweelè tu ndzèa awɨ̧, nkɨ enyìꞋì àwɨ̧ la, mbɨ̀Ꞌɨ̀ ànəa fi ako.

¹³Ka bɨ̀ wùꞋtè àwɨ̧ nê bɨa ndzea ngoꞋ mbɨ̀Ꞌɨ̀ Yesò Klistò li ndze la, mbɨ̀Ꞌɨ̀ e li taꞋa ewùꞋtè àwɨ̧ àfɨꞋa tàa kɨꞋɨ bɨa ye ènɨ̧ tò la.

¹⁴Bɔ tsɔ̧̀ɔ̧̀tè àwɨ̧ nkàà nê bɨ wu bòt Yesò Klistò, ko ntsɔ̧̀ wu bɨ̀a nkàà nê Fo Mbɔ̧ɔ̧mà yu è ghe la, wu nè nɨ̧̀.

¹⁵Ka wòt ane yɨ̧ ka ndzě ngoꞋ nkàà a kàbɔ̀ŋ tàa ngɨ̀à la, è wû màmbuŋa bòt, nè ètsɔŋ, kò màŋeꞋe avi echɨ̧ɨ̧ a èbem mènəè bòt tsa leꞋ la.

¹⁶Ka wòt me ye ngoꞋ nkàà nê tà wu Klɨtèn, tà ka mbɔ̀ àtsəa kɔꞋɔ, tà ŋa wuê mèngùꞋte abua Mbɔ̧ɔ̧mà nê bɔɔ ntɔ avi ane wòt Yesò Klistò.

¹⁷ÀfɨꞋa Mbɔ̧ɔ̧mà naa saꞋa bòt la a kuêꞋ, tà bɔ̂ ngua nga ebùꞋu ane bòt bi. Tè tà wu ebùꞋu ane ya ko àa li ewu na ane bòt bu bɔ ntu̧ ebɨ̧ɨ̧ne Ntu̧ Ntsɔ̧̀ yu è dzə abua Mbɔ̧ɔ̧mà la à?

¹⁸Àkata Mbɔ̧ɔ̧mà a laꞋnê, “A chɨɨme ngu me kweele bòt bu bɔ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la a mànyia kèfɔ̧̀ tò, ko àa wu na ane bòt kàbɔ̀ŋ bu bɔ̀ɔ ka kuŋe balu̧ tò la à?”

¹⁹È wu ale, wòt me ye ngoꞋ mbɨ̀Ꞌɨ̀ Mbɔ̧ɔ̧mà kɨà la, ŋut me ghɨ̀ wuê àghɨa a kùꞋù la nɨa ngà nè mbì, ndzìà vi nènkèm a tèkitebu Mbɔ̧ɔ̧mà. Wu tòà ka tà ghɨ̀ àwɨ̧ la, ale tà kà wuê ewaꞋa wɨ̧.