Read Mundani 1 Pità 5 Bible Online

1 Pità 5 - Mundani bible

1 Pità 5

¹E ngua shù̧ù̧ta wɨ̧ bɔɔjuŋ ayɔɔ bòt Mbɔ̧ɔ̧mà mbɨ̀Ꞌɨ̀ wajûŋ kǒ, mè ngua ndàꞋà mbɨ̀Ꞌɨ̀ wòt tà ye ngoꞋ Yesò Klistò li ndze la; mè ngu ebɔ wɔ̧ nê èghàb ane ènɨ̧ tò wu tàa li kɨꞋɨ nê wùà la.

²E ngua shù̧ù̧ta awɨ̧ nê bɨ̀ me baabe bòt bu Mbɔ̧ɔ̧mà zi a tèkitebu tɨ̧ la, mbɨ̀Ꞌɨ̀ mbaabà njɨ̀ nàa mbààba njɨ̀ ti la. Mbɔ̧ɔ̧mà nàà nkɨà nê bɨ̀ me baãaã awɔb ane mɨ̧ nê mènkɔ̀ŋke, è ka ngu ngaa mbɨ̀Ꞌɨ̀ bɔ ŋwèèlè àwɨ̧ ŋwèèle. Bɨ̀ ka me fàꞋà mbɨꞋɨ̀ bòt nkɨà wuê èkab la, bɨ̀ me fàꞋà nè èntɨ̧ɨ̧ ntsɔ̧̀.

³Bɨ̀ ka me tseke a ègwet bòt bu bɔ̀ wu a èten lɨ̧ la. Bɨ̀ me ghɨ̀ wuê èghɨ bɔ̀ɔ ye e me kùŋe teka tɨ̧ la.

⁴Bɨ me ghɨ̀ ale, ko naa li ngu àfɨꞋa Yesò Klistò wu tà wù àtsəa bèmbaabà njɨ̀ la è kɨꞋɨ la, tà tsɔ̀Ꞌɔ àfàꞋ àyɨ̧ nè ènɨ̧ vi wu kà wu li elìa la.

⁵È me wu awɨ̧ wu bɨ̀ bele e be techɨɨle la, e me shu abua yɨ̧ nê, bɨ̀ me zə bɔɔjuŋ. E mè ntsiꞋa shua abua bòt bàgème àfɨ̀Ꞌ yaa nê bɨ̀ me nɨ awɨ̧ a si ane ndɨ bɨ̀a mbà̧à̧ta bɔnyɨ bɨ̧ la, nkàà nê Àkata Mbɔ̧ɔ̧mà a laꞋnê, “Mbɔ̧ɔ̧mà nàà shuka bòt bu bɔ̀ɔ ŋèꞋa tèkwȩ tɔb ègwet la a si, mbɔ̂ me tɨŋe bòt bu bɔ̀ɔ nɨa wɔb a si la.”

⁶Mbɨ̀Ꞌɨ̀ àa ale la, bɨ̀ nɨ awɨ̧ a si a èten Mbɔ̧ɔ̧mà, mbɨ̀Ꞌɨ̀ àfɨꞋa atò à ghɨa à kuꞋa, tà lɔ̀kè àwɨ̧ ntsàà ègwet.

⁷Bɨ̀ me zì mènəè ègème nàa ntsèà wɨ̧ la a tèkitebu Mbɔ̧ɔ̧mà, nkàà nê wu tòà ka tàa ndɨ̀ŋkà wɨ̧ la.

⁸Bɨ̀ me baabe ènyit yɨ̧ mè nkoa wɨ̧, nkàà nê Satàn wu tà wu wɔ̀mbù̧ wɨ̧ la, nàà ngèèba mbɨ̀Ꞌɨ̀ sambàŋ ndzìte tò tèa nkua la, nkɨà wòt tàa kwele la.

⁹Bɨ̀ teme kwen tɨ̧ ŋǎ abua tò, ndzì mèntɨ̧ɨ̧ mɨ̧ wuê ane Mbɔ̧ɔ̧mà me kweele, ngu nê bɔnyɨ bɨ̧ a èdzìꞋ ègème a ngɔ̀ŋ ŋaa aà ndzea èwuu ngoꞋ mbɔŋ mɨ̧̂.

¹⁰Bɨ̀ ko nê ngoꞋ yaa bɨ yea la wu wuê ane àtem àfɨ̀Ꞌ àko, mbɔ̂ Mbɔ̧ɔ̧mà wu tàa ntsèka nkua tèsȩ tɨ̧ la naa tsì àwɨ̧ a èbem tùà. Tà li nɨ̀ àwɨ̧ ngɨ̀ bɨ Yesò Klistò ba e tsiꞋi àghɨ yeamɔꞋ mbɨ̀Ꞌɨ̀ bɨa li ebɔ mèngùꞋte tò mu kà wu li elìa la. Taa ghɨ̌ bɨa kùꞋu ane mènəè tò etɔ̀kè àwɨ̧ bɨa nèète ntɨ̧ɨ̧ me kweele ka wu ekwene.

¹¹Wu tòà ka tà bɔ mètàŋ ègème ane àlia nè àlia la. Àmèn.

¹²Wu wanɔ̧ Silvanùs ka tà tɨŋe am è shɨ̀ kètem àkatè faa la. Mâ lâ nko nê tàà nkuŋa Yesò Klistò nkûŋ nkûŋ. E shɨa anè mbɨ̀Ꞌɨ̀ elɔ̀ktè mèntɨ̧ɨ̧ mɨ̧, e mě shua wɨ̧ ndɨ Mbɔ̧ɔ̧mà nàa ndâ nkɔ̀ŋkà àwɨ̧, nkua tèsȩ tɨ̧ la. Ale, bɨ̀ baãaã ànəê yaa ntsɔ̧̀ mè ndɨ̀Ꞌà wɨ̧ wuê ane Mbɔ̧ɔ̧mà.

¹³Ènɔ̧̂ bòt Yesò bu a Babilɔ̀n la aà ntsàꞋtà wɨ̧. Bɔ wu ènɔ̧̂ bòt Mbɔ̧ɔ̧mà làà wɔb mbɨ̀Ꞌɨ̀ bɨ̀a la. Mak wu tà wù waã am la, nàà ntsàꞋtà wɨ̧ mɨ̧̂.

¹⁴Bɨ̀ taꞋa bɔnyɨ bɨ̧ ntsàꞋtè àwɔb nè èkɔŋ. Maà shù̧ù̧ta nê Mbɔ̧ɔ̧mà ghɨa bɨ̀agème wu bɨ̀ wu bòt Yesò Klistò la, è bɔ àlàŋkè a mèntɨ̧ɨ̧ mɨ̧.