Read Mundani 2 Pità 1 Bible Online

2 Pità 1 - Mundani bible

2 Pità 1

¹Letà Simùn Pità, wɔ̀fàꞋ nè wantu̧ Yesò Klistò, Abua bòt bu bɔ̀ɔ nkùŋà alu̧ Mbɔ̧ɔ̧mà, è wù alu̧ bàa bɔntu̧ àà nkùŋà la. Wu Yesò Klistò ka tà ghɨ̂ bɨ me kùŋè ale la, nkàà nê tàà ngɨ̀à mènəè wuê mbɨ̀Ꞌɨ̀ Mbɔ̧ɔ̧mà nàa nkɨà la. Wu Mbɔ̧ɔ̧mà bɔ̂ Yesò Klistò Mpemnà wa.

²Maà ntsàꞋtà nê, bɨ̀ me ko a Mbɔ̧ɔ̧mà bɔ̂ Yesò Lefɨ̀Ꞌ wa nɨa ngà nè mbì, mbɨ̀Ꞌɨ̀ bɔɔ paa me nyɨꞋte a ntsɔ̧̀ wɔb abua yɨ̧, e mě ghɨ̌ bɨa bɔ àlàŋkè a mèntɨ̧ɨ̧ mɨ̧.

³Mètàŋ Mbɔ̧ɔ̧mà è ghɨ ndɨ bàa me koa ntsèka àfɨ̀Ꞌ àgème mbɨ̀Ꞌɨ̀ Mbɔ̧ɔ̧mà kɨa la. Ba tsiꞋi a èlɨ̀ waa nkàà ndɨ ba ko a Mbɔ̧ɔ̧mà àfɨ̀Ꞌ yaa la. Wu tòà tà nɨ awa ane bòt bi ngɨ̀ ba bɔ ènɨ̧ tò mè ngu bòt mènəè ntsɔ̧̀ mbɨ̀Ꞌɨ̀ tòà la.

⁴Eyaa wu ndɨ Mbɔ̧ɔ̧mà tse ngɨ̀ ba bɔ ngule èghɨ ntsɔ̧̀ bu tà li ndzàŋe kàꞋà la. BetsiꞋa ba peme àfɨ̀Ꞌ yaa ane èbɨꞋte ènəê bu mèntɨ̧ɨ̧ bòt nàa ŋwèèlà wɔb bɔ ghɨa a ngɔ̀ŋ ŋaa la, tè ntsìꞋa ntsèka ndzəa wuê a Mbɔ̧ɔ̧mà ngɨ̀à mènəè mbɨ̀Ꞌɨ̀ tòà.

⁵Ndɨ̀ wu Mbɔ̧ɔ̧mà ghɨ̀ mènəè ma ègème ane yɨ̧ tè bɨ me kweele ane mèntɨ̧ɨ̧ mɨ̧ mu bɨ zi ane tò la, bɨ̀ paa me nyɔ̀Ꞌta ngɨ̀à mènəè ntsɔ̧̀ nàa mbɔ̀ a Mbɔ̧ɔ̧mà la, mè ndzì mèntɨ̧ɨ̧ mɨ̧ nko a Mbɔ̧ɔ̧mà ngà nè mbì.

⁶Bɨ̀ mě me nèèta nkùùla ènyit yɨ̧, nèètà nkùùla mèntɨ̧ɨ̧ mɨ̧, mè ntsèka mbɨ̀Ꞌɨ̀ Mbɔ̧ɔ̧mà nàa nkɨà la,

⁷mbà̧à̧ta bɔnyɨ bɨ̧ nè èkɔŋ, mè me kɔ̀ŋkè bòt bàgème.

⁸Bɨ me ghɨ̌ èghɨ bàa ntsɔ̧̀ nɨa ngà nè mbì, ko bɨa paa eko a Yesò Klistò Lefɨ̀Ꞌ wa, èghɨ tà ghɨ ane yɨ̧ la è ka wu etsè àku.

⁹Èghɨ baa e bakà wu ane wòt, tà bɔ̌ ndɨ tàa ko nê yea kà ye èdziꞋ ntsɔ̧̀, mè ndèène nê Mbɔ̧ɔ̧mà li shùù bèkàbɔ̀ŋ bu tà li ngua ngɨ̀à la.

¹⁰È wu ale a bɔnyɨ bɔ̧, bɨ̀ la nyɔ̀Ꞌtè ngɨ̀ bòt e ye nê wu nkûŋ nê Mbɔ̧ɔ̧mà làà àwɨ̧, nɨ̀ àwɨ̧ ane bòt bi. Bɨ me ghɨ èghɨ bàa, ko èntɨ̧ɨ̧ wɨ̧ è ka li lɔ̀Ꞌɔ edzə ane Mbɔ̧ɔ̧mà a,

¹¹tà mè ngu esèè awa ntsɔ̧̀ a kèfɔ̧̀ Lefɨ̀Ꞌ wa. Wu tòà tà wu Mpemnà wa la. Kèfɔ̧̀ tò naa wu ane àlia nè àlia.

¹²Bɨ batè nko èghɨ bàa, tè ndâ me kweele ane nkûŋ yu bɔ li shu awɨ̧ la, ka e mbɔ̂ ngu me tseka nkù̧ù̧ta wɨ̧ ànəa èghɨ mbɔŋ.

¹³Mâ mɨɨtè nê aa mbɔ̀ nê è ndɔ̀ktè mèntɨ̧ɨ̧ mɨ̧ nɨŋ nkù̧ù̧te awɨ̧ mbɨ̀Ꞌɨ̀ è mbele yû̧ a nkem yaã la.

¹⁴Maà ngɨ̀à ale ngu nê mâ ko nê è mbele yàŋe epfə sǎ sitsǎꞋ yàa mbɨ̀Ꞌɨ̀ Yesò Klistò Lefɨ̀Ꞌ wa nyɨꞋte am la.

¹⁵Maa nyɔ̀Ꞌte e ghɨ̌ ndɨ màa me ghɨ̀ tê mpfə, bɨ me tseka nkù̧ù̧ta mènəè maa àfɨꞋa àgème la.

¹⁶Ba li me shu awɨ̧ ndɨ Yesò Klistò Lefɨ̀Ꞌ wa nàa li kɨꞋɨ ane mètàŋ mi la ale, è kà wu mènəè ba dèbè mètaã ma è kɔꞋ baa shu la, ba li ndâ nɨ̀ àghɨa ya ndze ènɨ̧ tò.

¹⁷Ba li ngu a si àfɨꞋa Tǎt tò Mbɔ̧ɔ̧mà li nyɨ̀Ꞌte ndɨ ènɨ̧ tò e ghe la. Mbɔ̧ɔ̧mà wu tà wu àtsəa bèfɔ̧̀ bàgème la li ndaꞋa adù̧ tò nê, “Eyaa wu ngule Waã èkɔŋ am, mâ taꞋa wua nkɔ̀ŋkà to.”

¹⁸Bàa mbɔŋ e li dzə àtɔŋ yaa a chu a ègwet la, àfɨꞋa ba tò ba e li ngu a ègwet èbȩ Mbɔ̧ɔ̧mà la.

¹⁹Àyaa a ghɨ̂ ba paa nko nê èngǎ̧ bèndàꞋàtɔŋ Mbɔ̧ɔ̧mà e li ndàꞋ la wu nkûŋ. Bɨ̀ baãaã èngǎ̧ mbɔŋ ntsɔ̧̀. Aà mbɨ̀Ꞌɨ̀ èkaꞋà àa mbàŋà bòt a èbem ndzěm la. Ale, bɨ̀ baãaã wùà ntsɔ̧̀ tè ètsəꞋ è tsi bɨ̀ ye èkaꞋà Yesò Klistò mbèꞋa a mèntɨ̧ɨ̧ mɨ̧̂. Aa wu mbɨꞋɨ̀ sàŋ yu nàa ngɨ̀ è saꞋa ntɔtetsɔ̌Ꞌ ka àbȩ a zìꞋ mpaa ghaꞋte la.

²⁰Bɨ bɨa ndzì àyaa a mèntɨ̧ɨ̧ mɨ̧ nê betsiꞋa wòt kà nɨ wuê èyì vi zìambɔŋ nɨŋ nko àghɨa bèndàꞋàtɔŋ Mbɔ̧ɔ̧mà e li shɨ a èbem Àkata tò la.

²¹Ànəa ko a ntsě a èbem Àkata Mbɔ̧ɔ̧mà bèndàꞋàtɔŋ Mbɔ̧ɔ̧mà e li ndàꞋ è wû ànəa a dzəè àtsəa wɔ̀bȩ̂ la. Wu Fo Kèfə ka è li ŋwèèlè ngule bòt Mbɔ̧ɔ̧mà bɔ làꞋà mèngǎ̧ è dzə abua Mbɔ̧ɔ̧mà wu la.