Read Mundani 2 Pità 2 Bible Online

2 Pità 2 - Mundani bible

2 Pità 2

¹Bòt ko e li ndɔ̀Ꞌte a si ayɔɔ bòt Izəèlȩê me fɨta shua nê bɔ wu bèndàꞋàtɔŋ Mbɔ̧ɔ̧mà. È bê ngu wuê èlɨ bènyɨꞋtà ko àa lɔ̀Ꞌte a si ayɔɔ yɨ̧ e me fɨte awɨ̧ mɨ̧̂ la. Bɔɔ yɨ̧ɨ̧te kɨꞋɨ me làꞋà mèngǎ̧ tsòkè ètsə bɨ̧. Bɔɔ ghɨ̀ ale, te gha ewu àdziꞋa bɔ̀ɔ tu̧ a Tè Yesò Klistò wu tà li njù̧ ètsə bɔb la, ale etɔ ngoꞋ naa bê kwene a ègwet lɔb eliime awɔb.

²Bòt Yesò nyaŋ aa me kùŋe èbɨꞋte ènəê bòt baa, te ghɨ̌ bòt aa me làꞋa kàbɔ̀ŋ ane ànəa alu̧ Mbɔ̧ɔ̧mà wu è wû nkûŋ la.

³BènyɨꞋtà fɨte bàa aa gha ambo èlɨ̀ wu bɔ̀ɔ nkɨ me nɨ nɨ la, me dèbè mètaã mɔb mènəè kɔ̀Ꞌa bɔ shua mbɨ̀Ꞌɨ̀ enɨ èghɨ àku abua yɨ̧. Bɔ li mbê ndzaŋe saꞋa awɔb tè ndɔ̀Ꞌ, tè Mbɔ̧ɔ̧mà wu tàa eliime awɔb la tsiꞋì àtatsi nchɨ̀Ꞌà.

⁴Mbɔ̧ɔ̧mà li tà kà sa bɔntu̧ bi bu bɔ li ngɨa kàbɔ̀ŋ la bɔɔ gha àku. Tà li màꞋà wɔb a èbem nkɨ̀Ꞌnè ngoꞋ, àdziꞋa bɔ kuule awɔb ane fȩtsə nɔ̀ŋè a èbem kèbìꞋà me chɨ̀Ꞌɨ̀ Àlia èsaꞋa Mbɔ̧ɔ̧mà la.

⁵Mbɔ̧ɔ̧mà li tà kà mê sa baliambì bɔɔ ghà àku. Tà li ntsàà mèleb è lù̧u̧ sitsǎꞋ, ndììme bòt bɔ̀ɔ ka ghɨ àghɨa tàa nkɨà la. NdàꞋà bòt tà li ngɨ̀ bɔ pem la li ngu Noà bɔ̂ bòt ko basà̧à̧mbe. Noà waa wu wòt tà li ngua ndàꞋà shua bòt ndɨ Mbɔ̧ɔ̧mà nàa nkɨà nê bɔ̀ me tseke la.

⁶Mbɔ̧ɔ̧mà li saꞋa bòt Sodòm nè Gòmolà mɨ̧̂. Tà li ntsàà èwet e shɨɨ èlaꞋ bàa tè e kwene muttsə. Tà li nɨ̀ àyaa nyɨ̀Ꞌte àghɨa tàa li ghɨ̀ ne bòt bu bɔ tu̧a Mbɔ̧ɔ̧mà la.

⁷Tà li ngɨ̀ Lɔ̂t wu tà li ngu wòt ntsɔ̧̀ la pem. Lɔ̂t waa li nguê tàa ngɨ̀ tà ye èbɨꞋte ènəê bu bòt kàbɔ̀ŋ baa àa ngɨ̀à la, a taꞋa saa atò.

⁸Wòt ntsɔ̧̀ waa li ngua ntsèka ayɔɔ yɔb àli àgème, ndzəa mè ndzea èbɨꞋte ènəê baa, e sɔ̀ɔ̀bà èntɨ̧ɨ̧ tò.

⁹Mènəè maa ègème wua nyɨ̀Ꞌta nê, Mbɔ̧ɔ̧mà ko ndɨ tàa tsǐ bòt bu bɔ̀ɔ ngɨ̀a àghɨa tàa nkɨà la a èbem ngoꞋ tɔb la, mè nko ndɨ tàa nɔ̀ŋe bòt kàbɔ̀ŋ e me chɨ̀Ꞌɨ̀ àlia tàa saꞋa ngɔ̀ŋ e zi àwɔb a èbem ngoꞋ la.

¹⁰Mbɔ̧ɔ̧mà naa ghɨ̀ anè te tsě, ane bòt bu bɔ̀ɔ ngɨ̀à wuê èbɨꞋte èghɨ bu mbɨ̧te ènyit tɔb tèa nkɨà la, bɔ̀ ka mê ngua ndzəa bòt bu bɔ̀ wu àtsəa yɔb la, ka è màà ngu wuê wà leꞋ. BènyɨꞋtà fɨte ngaa e kweele àtsə mè mbɔ̀ mètsəê kàbɔ̀ŋ tè bɔ̀ ka tsi ngua mbɔ̀a elàꞋa kàbɔ̀ŋ adù̧ èghɨ àa ntsèka a ègwet la.

¹¹Bɔntu̧ Mbɔ̧ɔ̧mà be ghe mè mbɔ̀ mètàŋ tè ntsè bènyɨꞋtà fɨte bàa, ka betsiꞋa bè ka lèm ndàꞋ ànəa kàbɔ̀ŋ adù̧ èghɨ mbɔŋ a mbì Mbɔ̧ɔ̧mà.

¹²Ka bòt baa aa ndàꞋa kàbɔ̀ŋ ane mènəè bɔ̀ baka ko la. Bɔɔ mbɨ̀Ꞌɨ̀ nyaãtebàꞋ kà wua kwàꞋtà ànəê, bɔ bi awɔb wuê mbɨ̀Ꞌɨ̀ eliime la. Bɔ̀ɔ wàa aa li eleme wuê mbɨ̀Ꞌɨ̀ nyaãtebàꞋ tèa ndèma la.

¹³NgoꞋ naa nɔ̀ŋke àtsəa yɔb wuê mbɨ̀Ꞌɨ̀ bɔ ghɨ̂ è nɔ̀ŋke àtsəa bòt ko la. Àghɨa àa mbɔ̀ àwɔb la, wu màngɨa àghɨ àgème mbɨ̧te ènyit tɔb tèa nkɨà la kwàꞋ a kètsìà nèngû̧. Bɔ wua ndòa mèkù mɔb mɨ̧̂. Bɔ̀ɔ ngɨ̀ bɔ me fɔte èghɨjɨ bɨ tò ba njɨ̀a àdziꞋa bɨ̀a mbù̧ù̧tà la, mbɔ̂ mènəè mɔb wu èbɨꞋte ènəê àtsəa kɔꞋɔ. Aà mbɔ̀ àwɔb ndɨ bɔ̀ɔ ngɨ̀à èghɨ ngaa a kètsìà wɨ̧ la.

¹⁴Mèmɨ̀ɨ̀te mɔb ègème bê ngu wuê ànəa mànjɨa àbȩ, tè bɔ̀ ka wua nkà̧aã a màngɨa kàbɔ̀ŋ. Bɔɔ səèà bòt bu mèntɨ̧ɨ̧ mɔb nàa njùa ane Mbɔ̧ɔ̧mà la, ngɨ̀à bɔ ghɨa kàbɔ̀ŋ. Bɔ ghe bɔ̀ɔ nkɔ̀ŋkà e me nɨ nɨ la. Mbɔ̧ɔ̧mà nɔ̀ŋe ndɔ̀ àtsəa yɔb tè ndɔ̀Ꞌ.

¹⁵Bɔ sà èlu̧ ntsɔ̧̀ ntsìꞋa nkùŋà èwe kàbɔ̀ŋ. Bɔ tsiꞋi kùŋè wuê tèkate Balààm [1] waã Beò wu tà li nkɔ̀ŋkè e ghɨ a kàbɔ̀ŋ, mbɨ̀Ꞌɨ̀ ebɔ èkab ane àbȩ̀ àzi la.

¹⁶Ka mbɨ̀Ꞌɨ̀ tà ghɨ̀ ale la, jàkâ è wuê anyà̧ kà wua ndàꞋà la ŋȩ atò ane àtɔŋ wɔ̀bȩ̂ ane mènəè kàbɔ̀ŋ tò, nkèle àghɨa ndàꞋàtɔŋ Mbɔ̧ɔ̧mà ngaa li ngua nkɨ e ghɨ̌ mbɨꞋɨ̀ wòt àbààla la.

¹⁷Bòt baa aa mbɨ̀Ꞌɨ̀ badzì be yu̧u̧ la, mè ngu mbɨ̀Ꞌɨ̀ mbɨ̀ŋ è kɨɨlà, àfeme àkekepeelè a me nɨa ndèa la. Mbɔ̧ɔ̧mà taŋke àdziꞋ abua yɔb a èbem kèbìꞋà.

¹⁸Bɔ taꞋa wua ngwàbta mètsəê mɔb ngù̧a nkùꞋ tɔb, mbɔ̂ ngua ndàꞋà mènəè àku. Bɔɔ nyɨ̀Ꞌta nê bòt è me ghɨ̌ àghɨ àgème mbɨ̧te ènyit tɔb tèa nkɨà la, nɨa səèà bòt bu mbèla ndzəèa dzəâ ayɔɔ bòt bɔ fà̧à̧tè èka bɔb la, mè mvəèəè àwɔb a èbèm.

¹⁹BènyɨꞋtà fɨte bàa àa ngɨ̀ bɔ kàꞋà bòt nê bɔ ko ane wɔb ne èyì ndɨ bɔ̀ɔ me tseke ntsɔ̧̀ la, mbɔ̂ mbèle ayɔb èbùꞋ a èbem kàbɔ̀ŋ. Aa ale nkàà nê, àghɨ aa ngɨ̀ a bɔ mètàŋ a ègwet wòt, ŋut tsiꞋi àbùꞋ àghɨa mbɔŋ.

²⁰Wòt bùꞋà tè me ko a Lefɨ̀Ꞌ wa wu tà wu Mpemnà la, tè me luula èbɨꞋte èghɨ bu e li ngua ntsòka tò a ngɔ̀ŋ ŋaa la, mbɔ̂ mè nkua akwèn ngwènè a èbem èbɨꞋte èghɨ mbɔŋ, e mè nkùùle atò, ko mèntsèke tò naa bɨɨ te tsě ndɨ è li ndzaãaã ngu ka tà ko a Yesò la.

²¹A li mbê mbɔ̀ŋ nê, ŋut ka nko ndɨ Mbɔ̧ɔ̧mà nàa nkɨà nê bòt è me tseke la, tè ntsè ndɨ tàa ko, e bɔ̂ mèe gheble tu̧u̧ nkɨ̀a Mbɔ̧ɔ̧mà yu bɔ li ŋǎ abua tò la.

²²Àghɨa a li ngɨ ane èwuu bòt baa la a ghɨ̂ mèngà̧teme màa è te. Nê, “Abə tɨ mè nkua akwèn ngà me jɨ ètɨɨ mbɔŋ”, “Èkunyà̧ bɔ shùù la e kua akwèn ngà me fèlè àvi a èbem àtɔ̀blè.”