Read Mundani 2 Pità 3 Bible Online

2 Pità 3 - Mundani bible

2 Pità 3

¹Bèshu̧ bɔ̧, eyaa wu ngò̧ tebe e shɨa àkatè abua yɨ̧. E shɨa èkatè mbɔŋ enɨ ku̧u̧te awɨ̧ mènəè mu bɨ ko tê ndɔ̀Ꞌ la, mbɨ̀Ꞌɨ̀ elɔ̀ktè mèntɨ̧ɨ̧ mɨ̧ bɨa bɔ mèmɨ̀ɨ̀te ntsɔ̧̀.

²E nkɨa bɨa ku̧u̧te mèngà̧ mu ngule bèndàꞋàtɔŋ Mbɔ̧ɔ̧mà e li ndàꞋ àfɨꞋa mbì la, nè ànəa Lefɨ̀Ꞌ Mpemnà wa li ngɨ̀ bɔntu̧ tò elàꞋ la.

³Bɨ̀ bɨa ndzì àyaa a mèntɨ̧ɨ̧ mɨ̧ nê, naa li ngu àfɨꞋa ngɔ̀ŋ tsìꞋa ndɨ̀à lìa la, bòt bɔ̀ɔ nkɨ me ghɨ̀ wuê èghɨ mbɨ̧te ènyit tèa nkɨà la aa kɨꞋɨ e me wȩ̀ȩ̀tè àwɨ̧.

⁴Bɔɔ li nkɨ̀Ꞌɨ̂ me shu nê, “Yesò Klistò wu tà li nkàꞋ nê yea li emèe kɨꞋɨ la naa wa à? Tea àfɨꞋa bètǎt ba e li mpfəèꞋte la, ekɨꞋɨ dzəè àfɨ̀Ꞌ yaa, mènəè bèla ntsèà wuê mbɨ̀Ꞌɨ̀ ngɔ̀ŋ li me bùꞋù è wu la.”

⁵Ka bɔɔ ndàꞋà ale mbê ntu̧u̧ e ku̧u̧te laꞋ nê Mbɔ̧ɔ̧mà li ndɔ̀Ꞌ ndàꞋ èngà̧, ègwet ewuê, tà mè ngɨ̀ sitsǎꞋ dzə a èbem mèleb mu tà yaã nɨŋ ngɨ̀ yùà la mpùùlà.

⁶Tà li mè nɨ̀ mèleb mbɔŋ è li ndù̧u̧ sitsǎꞋ la ndììme ngɔ̀ŋ mbɔŋ.

⁷Mbɔ̧ɔ̧mà li ndàꞋ wuê èngǎ̧ vi mbɔŋ nɔ̀ŋè ègwet làa bɔ̂ sitsǎꞋ yàa àfɨ̀Ꞌ yaa la me chɨ̀Ꞌɨ èwet àa tò̧o̧. Aa li ghɔ̀Ꞌɔ ane àli yu tàa li esaꞋa bòt bu bɔ tu̧u̧ atò la eliime awɔb la.

⁸Bèshu̧ bɔ̧, bɨ̀ ka ndèènè ànəê yaa yeamɔꞋ la nê, aa abua Mbɔ̧ɔ̧mà àliabȩ yeamɔꞋ à ka kubte ane èngùꞋebȩ tɔsì. Àliabȩ ngaa yeamɔꞋ la, nè èngùꞋebȩ ngaa tɔsì la abua tò bê ngu wuê àghɨ yeamɔꞋ. [2]

⁹Mbɔ̧ɔ̧mà nàà kà lȩ̀ȩ̀tè a màngɨa àghɨa tà kàꞋà la mbɨ̀Ꞌɨ̀ bòt ko àa nkwàꞋtà la. Ànəa àa və la wu nê tà kuule èntɨ̧ɨ̧ vi me chɨ̀Ꞌà wɨ̧ nê bɨ̀ waꞋa mènəè kàbɔ̀ŋ mɨ̧, kùŋè àvi, nkàà nê tàa kà kɨ nê wòt kǒ nyɔ.

¹⁰Ka àli yu Tè Yesò Klistò nàa kɨꞋɨ la, aa li kɨꞋɨ kà wòt koê, wuê mbɨ̀Ꞌɨ̀ tsɔŋ nàa ngɨ̀ tà kɨ̀Ꞌɨ̂ la. Naa li ngu ane àlia mbɔŋ ègwet e jùꞋ ane ètɨ̧̂ nyɔ̂, àghɨ àgème àa ègwet və la, a ghɔ̀Ꞌ ndzàne, sitsǎꞋ nè àghɨa àgème àa adù̧ la è ghɔ̀Ꞌ nyɔ̂ mɨ̧̂.

¹¹Ndɨ̀ wu Mbɔ̧ɔ̧mà nàa li eliime èghɨ bàagème a èlɨ̀ waa la, bɨ̀a chɨɨme wu kà èwuu bòt à? Bɨ bɔ ndɨ bɨ̀a ŋa awɨ̧ nènkèm abua Mbɔ̧ɔ̧mà, e me ghɨ̀ mbɨꞋɨ̀ tàa nkɨà la,

¹²mbɨ̀Ꞌɨ̀ bɨ̀a nchɨ̀Ꞌà àli yu tàa kɨꞋɨ la, mè ngɨ̀à ndɨ tàa yàŋe ekɨꞋɨ la. Naa li ngu ane àlia mbɔŋ èwet eshɨɨ ègwet, àghɨa àgème àa ègwet və la a ghɔ̀Ꞌ ndzàne a èbem èwet.

¹³Ka ba wua nchɨ̀Ꞌà ègwet fi nè sitsǎꞋ fi yu Mbɔ̧ɔ̧mà kàꞋà la, è wù àdziꞋa waa waa nàa tsiꞋa ntsèka ngɨ̀à wuê àghɨa Mbɔ̧ɔ̧mà nàa nkɨà la.

¹⁴È wu ale à bèshu̧ bɔ̧, mbɨ̀Ꞌɨ̀ bɨ̀a nchɨ̀Ꞌà èghɨ bàa la, bɨ̀ la ndzì àtsə ndze nê bɨa ntsèka ntsɔ̧̀ nè Mbɔ̧ɔ̧mà tè tà ka ndzè ka wuê adziꞋi kàbɔ̀ŋ ane yɨ̧.

¹⁵Bɨ̀ ko nê Lefɨ̀Ꞌ wa kuule èntɨ̧ɨ̧ vi me chɨꞋɨ àfɨꞋa yèa kɨꞋɨ la, ale ngua ŋa awɨ̧ èlu̧ bɨa bɔ mèmpème, wuê mbɨ̀Ꞌɨ̀ ngule wanyɨ waa Pɔ̂l li nɨ èyì wu Mbɔ̧ɔ̧mà ŋa abua tò la, shɨ̀ àkatè abua yɨ̧ ane ànəa mbɔŋ la.

¹⁶Tà làꞋa ànəê yaa a èbem èkatè ègème tà shɨ la. Mènəè ko naa a èbem èkatè mbɔŋ nàa nkwèèla a mànkoa la. Eyaa mènəè bòt bu kà ko àghɨa nkûŋ wu yùà la, bɔ̀ ka mê nko àdziꞋa bɔ tɨ̧ɨ̧ la, àa mbà̧aã nəèꞋà wuê mbɨ̀Ꞌɨ̀ bɔ̀ɔ ngɨa ane èdzìꞋ ko a èbem Àkata Mbɔ̧ɔ̧mà la. Bɔɔ ngɨ̀à àyaa ale ngua ngaꞋa èlu̧ abua Mbɔ̧ɔ̧mà taa li eliime awɔb.

¹⁷Bèshu̧ bɔ̧, ndɨ̀ waa bɨ ko mènəè maa tè ndɔ̀Ꞌ la, bɨ̀ me baabe awɨ̧ mbɨ̀Ꞌɨ̀ ka bòt kàbɔ̀ŋ baa bɔ fà̧à̧tè èka bɔb la, e tsòkè ètsə bɨ̧ ngɨ̀ èka bɨ̧ e lɔŋ, èntɨ̧ɨ̧ wɨ̧ wu bɨ zi ane Mbɔ̧ɔ̧mà la è ka tsi ngua nkwèèla.

¹⁸È me wu awɨ̧ ko bɨ̀ tsiꞋ èkɔŋ wɨ̧ ane Yesò Klistò Lefɨ̀Ꞌ wu tà wu Mpemnà wa la è me tsə, bɨ̀ mèe me ko atò nɨa ngà nè mbì. TsiꞋ mèngùꞋte wu abua Yesò Klistò ebùꞋu àfɨ̀Ꞌ yaa egha wu ane àlia nè àlia. Àmèn.