Read Mundani 1 Jɔ̌n 3 Bible Online

1 Jɔ̌n 3 - Mundani bible

1 Jɔ̌n 3

¹Bɨ̀ ye èwuu èkɔŋ ko Tǎt wa Mbɔ̧ɔ̧mà bɔ ane ya la! Tà kɔ̀ŋkè àwa nyaŋ tè bɔ ntsiꞋa ntɔ awa ane bɔ̧ tò, ba bɔ mbê ngù bùà. Àghɨa a ghɨ̂ ka bòt ngɔ̀ŋ yaa è ka ko èwuu bòt bà wu bùà la, wu ndɨ̀ wu bɔ̀ bakà ko wòt Tǎt wa Mbɔ̧ɔ̧mà wu wùà la.

²Ngule bèshu̧ bɔ̧, ba wu bɔ̧ Mbɔ̧ɔ̧mà àfɨ̀Ꞌ yaa, kò tètsɔꞋ nàa sàꞋa ewu na leꞋ, ko ànəa ba ko la wu nê Yesò Klistò naa li mè nkɨ̀Ꞌɨ̂, ba tsiꞋi mbɨ̀Ꞌɨ̀ tòà, nkàà nê baa li ye atò mbɨ̀Ꞌɨ̀ tàa la.

³Waa waa tà nɔ̀ŋe ntɨ̀ zi ane Yesò Klistò la, nàà nɔ̀ŋà èntɨ̧ɨ̧ vi è kèfə wuê mbɨ̀Ꞌɨ̀ èwe Yesò Klistò àa fəèa la.

⁴Waa waa tàa ngɨ̀à kàbɔ̀ŋ la ko nê ye pààte mbɨ̧te Mbɔ̧ɔ̧mà, ngu nê màngɨa kàbɔ̀ŋ wu màntu̧a Mbɔ̧ɔ̧mà bɔ̂ mbɨ̧te tò.

⁵Bɨ ko nê Yesò Klistò li ngua nkɨ̀Ꞌa a ngɔ̀ŋ ŋaa mbɨ̀Ꞌɨ̀ etsì a kàbɔ̀ŋ bòt, mbɔ̂ kàbɔ̀ŋ kà bê ngu a èntɨ̧ɨ̧ tò.

⁶Àyaa a nyɨꞋte awa nê, waa waa bɔ̂ Yesò Klistò è tsiꞋi àghɨ yeamɔꞋ la, bakà baãaã a kàbɔ̀ŋ e me ghɨa ngà wuê nè mbì. Ka è wu nê wòt è baãaã mènəè kàbɔ̀ŋ, me ghɨa ngà wuê nè mbì, a nyɨꞋte nê ŋut te bakà ye a Yesò Klistò, tà kà li tè mè ko atò.

⁷Bɔ̧ bɔ̧, ko mbɨ̀Ꞌɨ̀ wòt kǒ fɨte awɨ̧. Waa waa tàa ngɨ̀à mènəè ntsɔ̧̀ la wu wòt tà tɨ̧ɨ̧ ndɨŋndɨ̀ŋ a mbì Mbɔ̧ɔ̧mà, wuê mbɨ̀Ꞌɨ̀ Yesò Klistò tɨ̧ɨ̧ ndɨŋndɨ̀ŋ la.

⁸Ka waa waa tàa ngɨa kàbɔ̀ŋ la wu waã Satàn wòt kàbɔ̀ŋ, nkàà nê Satàn lè yaŋe wua ngɨa a kàbɔ̀ŋ ka ngɔ̀ŋ naa li lɔ̀Ꞌɔ ebùꞋu. Waã Mbɔ̧ɔ̧mà li ngua nkɨ̀Ꞌa a ngɔ̀ŋ ŋaa mbɨ̀Ꞌɨ̀ etsòke àfaꞋa Satàn wòt kàbɔ̀ŋ.

⁹Waa waa tà wù Waã Mbɔ̧ɔ̧mà la nàà kà tsi ngɨ a kàbɔ̀ŋ, nkàà nê ŋut e nɔ̀ŋe èngǎ̧ Mbɔ̧ɔ̧mà a èntɨ̧ɨ̧ vi, tà kà tsi ngu e ghɨ̌ a kàbɔ̀ŋ nkàà nê tà wu Waã Mbɔ̧ɔ̧mà.

¹⁰Ngule àghɨa àa ghɨ̌ bòt aa lȩ̀ bɔ̧ Mbɔ̧ɔ̧mà ane bɔ̧ Satàn wòt kàbɔ̀ŋ la wu nê, waa waa tàa ka ghɨ àghɨa Mbɔ̧ɔ̧mà nàa nkɨà la, nè waa waa tàa ka kɔ̀ŋkè wanyɨ vi la, ntsě Waã Mbɔ̧ɔ̧mà.

¹¹Èngà̧ wu bɨ li ndzə àfɨ̀Ꞌ yu bɨ li mbê mbùꞋ me zə Ntu̧ Ntsɔ̧̀ la wu nê, ba bɔ̂ ndɨ bàa me kɔ̀ŋkè bɔnyɨ ba la.

¹²Bà ka ngu mbɨ̀Ꞌɨ̀ Kên, tà li ngu wòt Satàn wòt kàbɔ̀ŋ, mbùŋè wanyɨ vi Abèl la. Bɨ ko àghɨ yu a li ngɨ̀ ka tà buŋè wanyɨ vi la à? Wu nê, tà li ngua ngɨ̀à mènəè kà kùꞋ, wanyɨ tò me ghɨ̀ mènəè e kùꞋù la.

¹³Bɔnyɨ bɔ̧, è wu ale, bòt ngɔ̀ŋ yaa e me pààbè àwɨ̧, ànəa mbɔŋ à kâ ntsè àwɨ̧.

¹⁴Bàa mbɔŋ e ko nê ba dzə a èbem èvə tè mbɔ̀ mèmpème nkàà nê baà nkɔ̀ŋkà bɔnyɨ ba. Waa waa tàa ka kɔ̀ŋkè wanyɨ vi la nàà ntsèka a èbem èvə.

¹⁵Waa waa tàa mpààbà wanyɨ vi la, wu wòt tàa mbùŋà bɔbȩ la. Bɨ̀ bɔ̂ nko nê, wòt tàa mbùŋà bɔbȩ la bakà bɔ mèmpème kàlìà ane zi.

¹⁶Baa me ko àghɨa èkɔŋ è wu yùà la ale, ngu ndɨ̀ wu Yesò Klistò li ŋà àtsəa zi ane ànəa ya la. È wu ale, bàambɔŋ e bɔ ndɨ bàa ŋa ètsə ba ane ànəa bɔnyɨ ba mɨ̧̂ la.

¹⁷Wòt bɔ èghɨ nyaŋ a ngɔ̀ŋ ŋaa, wanyɨ tò wu ane mbuŋ, tà tu̧ eku tèsȩte tò etɨŋe atò, ŋut ghɨ̀ nà ka mɨ̀ɨ̀tè nê yea nkɔ̀ŋkà Mbɔ̧ɔ̧mà à?

¹⁸Bɔ̧ bɔ̧, mbɨ̀Ꞌɨ̀ àa anè la, bà me nèèta nkɔ̀ŋkà bɔnyɨ ba mè ngɨ̀à èghɨ àa nyɨ̀Ꞌta nê baa ndâ nkɔ̀ŋkà àwɔb la. Bà kà me kɔ̀ŋkè bòt wuê ane mèngǎ̧ ètsəê.

¹⁹Ba me kɔ̀ŋkè bɔnyɨ ba a èlɨ̀ waa, ko baa ko nê ba wu bòt mènəè nkûŋ. Eyaa mè ngu àghɨa àa ghɨ̌ ka mèntɨ̧ɨ̧ ma naa tseke ka wua mbèntâ a mbì Tǎt wa Mbɔ̧ɔ̧mà la.

²⁰Èntɨ̧ɨ̧ wa e saꞋa wa nê ba ghɨa kàbɔ̀ŋ, ba ko nê Mbɔ̧ɔ̧mà e tsè èntɨ̧ɨ̧ wa, tà mè nko ànəê àgème.

²¹Ngule bèshu̧ bɔ̧, è wu ale mèntɨ̧ɨ̧ ma bakà saꞋa wa nê ba ngɨa kàbɔ̀ŋ, ba ko nê ba tɨ̧ɨ̧ e mbì Mbɔ̧ɔ̧mà kà bɔ àtsəa kɔꞋɔ.

²²Bàa ngɨ̀ bà lo̧ àghɨ tè tà ŋa, nkàà nê baa ndzəa tò mè ngɨ̀à àghɨa tàa nkɔ̀ŋkà la.

²³Àghɨa Mbɔ̧ɔ̧mà laꞋnê bà me ghɨ̀ la wu nê, bà zǐ èntɨ̧ɨ̧ wa ane Waã vi Yesò Klistò, mè me kɔ̀ŋkè bɔnyɨ ba wuê mbɨ̀Ꞌɨ̀ Mbɔ̧ɔ̧mà li shu la.

²⁴Waa waa tàa ngɨ̀à ànəa Mbɔ̧ɔ̧mà shu la tsiꞋi àghɨ yeamɔꞋ bɔ̂ tò; Mbɔ̧ɔ̧mà mè ntsìꞋi àghɨ yeamɔꞋ bɔ̂ ŋut. Àghɨa a ghɨ̀ ka ba nê ba tsiꞋi àghɨ yeamɔꞋ nè Mbɔ̧ɔ̧mà la, wu nè tà zi Fo zi a mèntɨ̧ɨ̧ ma.