Read Mundani 2 Jɔ̌n 1 Bible Online

2 Jɔ̌n 1 - Mundani bible

2 Jɔ̌n 1

¹Letà Wajûŋ ayɔɔ bòt Yesò, Abua Mè wu Mbɔ̧ɔ̧mà làà atò la bɔ̂ bɔ̧ bi. Maà ndâ nkɔ̀ŋkà àwɨ̧ ane nkûŋ yu ane ànəa Mbɔ̧ɔ̧mà la. È ntsě wuê ndàꞋà mmɔ̌ màa nkɔ̀ŋkà àwɨ̧ la, waa waa tà ko èngǎ̧ nkûŋ la nàà nkɔ̀ŋkà àwɨ̧ mɨ̧̂.

²Ba nkɔ̀ŋkà àwɨ̧ anè nkàà èngǎ̧ nkûŋ yu è wu a mèntɨ̧ɨ̧ ma, mè ngu etseke a mèntɨ̧ɨ̧ ma ane àlia nè àlia la.

³Maà shù̧ù̧ta Tǎt wa Mbɔ̧ɔ̧mà bɔ̂ Waã vi Yesò Klistò nê bɔ̀ nyɨꞋte a ntsɔ̧̀ wɔb abua ya, nkù tèsȩ ta mè ngɨ̀ bà bɔ àlàŋkè. Èghɨ baa è wu abua ya wu ba ko nkûŋ mè me kɔ̀ŋkè bɔnyɨ ba la.

⁴Mâ taꞋa wùꞋtè am ndɨ̀ wu mâ ye nê bɔ̧ bè ko aà nkùŋà mènəè nkûŋ wuê mbɨ̀Ꞌɨ̀ Tǎt wa li shuê nê bà me ghɨ̀ la.

⁵È wu ale, e me shu̧u̧te awê, àwɔ̀ Mè waa màa nkɔ̀ŋkà la nê, bà me kɔ̀ŋkè bɔnyɨ ba. Ànəê yaa e shɨa la ntsě ànəa fi Mbɔ̧ɔ̧mà laꞋnê bà me ghɨ̀ la. Wu ànəa ba li ndzə ebùꞋù tê ane àlia mbì yu ba li ndzì mèntɨ̧ɨ̧ ma ane Yesò la.

⁶Àghɨa àa nyɨꞋte nê baa nkɔ̀ŋkà Mbɔ̧ɔ̧mà la wu màngɨa mènəè tà shu la. Ànəê yaa bɨ li ndzə tê ane àlia mbì yu la, wu ndɨ bɨ̀a me tseke mbɨꞋɨ̀ bòt bɔ̀ɔ nkɔ̀ŋkà Mbɔ̧ɔ̧mà nè bɔnyɨ bɔb la.

⁷Bòt mèfà̧ e taꞋa wu àbȩ àfɨ̀Ꞌ yaa. Bèŋût wu bòt bu bɔ̀ɔ ka bɨ̧̀ɨ̧̀ne laꞋ nê Yesò Klistò li ntsìꞋi wɔ̀bȩ̂ la. Èwuu bòt mbɔŋ wu bòt mèfà̧, mè ngu bɔmbù̧ Yesò Klistò.

⁸È wu ale, bɨ̀ me ko awɨ̧ mbɨ̀Ꞌɨ̀ bɨ bi àghɨa bɨ fàꞋà tê mbɔŋ la. Bɨ bɔ ndɨ bɨ̀a bɔ àghɨ àgème Mbɔ̧ɔ̧mà taŋke abua yɨ̧ la.

⁹Bɨ̀ ko nê, waa waa tàa ka ghɨ mbɨꞋɨ̀ èngǎ̧ Yesò Klistò e shu la, me làꞋa nkwèꞋnà àghɨ la, bakà ko a Mbɔ̧ɔ̧mà. Waa waa tàa ngɨ̀à mbɨ̀Ꞌɨ̀ èngǎ̧ mbɔŋ e shu la, è koê a Tǎt wa Mbɔ̧ɔ̧mà bɔ̂ Waã vi.

¹⁰È wu ale, wòt kɨ̀Ꞌɨ̂ a lob yê me làꞋa èngǎ̧ ko tsa ka nè è waa Yesò li nyɨ̀Ꞌte la, à ka sèè atò. À ka ndem ntsàꞋte atò.

¹¹E shua awê nkàà nê, wòt tà tsaꞋte a ŋut la ko nê ye tsiꞋi wòt kàbɔ̀ŋ mbɨ̀Ꞌɨ̀ tòà.

¹²Mâ taꞋa bɔ mènəè ma wuê eshu awɨ̧ la, ka è nka wu eshɨ a èbem àkatè. Maà nkwàꞋtà wuê nê, mâ wuê kɨꞋɨ eye awɨ̧ ba nɨ̧̀ ba aa mù mènəè mbɔŋ ane ètsəê, mbɨ̀Ꞌɨ̀ mèngùꞋte naa paa elu̧u̧ a mèntɨ̧ɨ̧ ma.

¹³Bɔ̧ wanyɨ wè, Mè wu Mbɔ̧ɔ̧mà làà la, aà ntsàꞋtà awê.