Read Mundani Jûd 1 Bible Online

Jûd 1 - Mundani bible

Jûd 1

¹Letà Juêd, wɔ̀fàꞋ Yesò Klistò, wanyɨ Jimsì, Abua bòt bu bàgème Tǎt waa Mbɔ̧ɔ̧mà làà àwɔb ane bòt bi me nèèta nkɔ̀ŋkè àwɔb, Yesò Klistò mè me baabe awɔb la.

²Maà shù̧ù̧ta Mbɔ̧ɔ̧mà nê, tà me paa nkua tèsȩ tɨ̧, ngɨ̀ bɨ̀ me bɔ àlàŋkè a mèntɨ̧ɨ̧ mɨ̧, mè ngɨ̀ èkɔŋ wɨ̧ ane bɔnyɨ bɨ̧ è me ghà ne mbì.

³Ngule bèshu̧ bɔ̧, è ndi ngua nkɨ e shɨ letà waa abua yɨ̧ ane ànəa mèmpème mu ba nɨ̧̀ ba e fɔtè mbɔŋ la. È ngɨ̀ ale èntɨ̧ɨ̧ am e tsiꞋi me ŋwèèlè am nê è shɨŋ ngɨ̀ bɨ̀ neeta mbà̧aã ànəa Ntu̧ Ntsɔ̧̀ yu Mbɔ̧ɔ̧mà ŋa abua bòt bi nènkèm tè ndɔ̀Ꞌ la.

⁴E shɨa ale nkàà nê, bòt ko bɔ tu̧u̧ a Mbɔ̧ɔ̧mà la e yɨ̧ɨ̧tè nyi a kètsìà wɨ̧. Bɔɔ ngèbla èngǎ̧ tò wu àa nyɨ̀Ꞌta èkɔŋ tò la, mbɨ̀Ꞌɨ̀ ebɔ èlu̧ e me ghɨ̌ èbɨꞋte ènəê, mè ntù̧a Yesò Klistò Lefɨ̀Ꞌ wu tà wu Tǎt wa mè ngu ndàꞋ wòt ba bɔ ndɨ bàa me zə atò la. Mbɔ̧ɔ̧mà li ndzaŋe saꞋa ànəa bòt baa, tè nê aa li ebɨɨ abà yɔb.

⁵TsiꞋ è mèe nkù̧ù̧te awɨ̧ ànəê ya bɨ ko tê ndɔ̀Ꞌ la. Mbɔ̧ɔ̧mà li ntsì bòt bi a èbem ngoꞋ a Ejìb, bɔ ghà àfɨ̀Ꞌ a me wu tà lììme èbu bɔ li bɔ̀ ka zi mèntɨ̧ɨ̧ mɔb ane tò la.

⁶Bɨ̀ ku̧u̧te ànəa bɔntu̧ Mbɔ̧ɔ̧mà bu bɔ li ngwaꞋa àdziꞋa tà tsia awɔb la ntsiꞋi me ghɨ a èlɨ tsa la. Tà kuule awɔb ane fȩte kà wu li loote, nɔ̀ŋè àwɔb a èbem kèbìꞋà me chɨ̀Ꞌɨ̀ àli yu tàa li saꞋa ngɔ̀ŋ yaa la.

⁷Bòt Sodòm nè bòt Gòmolà nè èlaꞋ bu a ngèt yɔb la e li ngɨ̀ wuê a èlɨ mbɔŋ. Bɔ li ngua mpàꞋta bòt kà yɔꞋɔ awɔb, njɨ̀a àbȩ, mbâ̧tsə te nɔ̀ŋkà nè è teko, tè Mbɔ̧ɔ̧mà lììme awɔb a èbem èwet nɨŋ nyɨ̀Ꞌte àghɨa tàa li ghɨ̀ ne bòt bu bɔ̀ɔ li eye ngoꞋ a èbem èwet ane àlia nè àlia la.

⁸Eyaa wu ndɨ bènyɨꞋtà àfɨte bàà àa ngɨ̀à la. Bɔɔ shua nê, ndzò̧tsə tea shua wɔb mènəè, nɨa mbɨ̧te ènyit tɔb ngɨa kàbɔ̀ŋ, ntù̧a enyi a èten Mbɔ̧ɔ̧mà mè ndàꞋa kàbɔ̀ŋ adù̧ èghɨ bu a ègwet la.

⁹Ka wuê Mȩkèl wu tà wu àtsəa bɔntu̧ Mbɔ̧ɔ̧mà la li tà ka ghɨ̂ èwuu ànəê ale. È li ngu àfɨꞋa bɔ Satàn àa ndzɔ̀ ane ànəa àpfəꞋta Musì la, tà kà laꞋa kàbɔ̀ŋ adù̧ Satàn wu. Tà li shu wuê nê, “Mbɔ̧ɔ̧mà è ŋȩte awê.”

¹⁰Ka bòt ba aà ndàꞋa kàbɔ̀ŋ adù̧ ànəê àgème bɔ̀ bakà ko la. Bɔɔ ngɨ̀à mènəè mbɨ̀Ꞌɨ̀ mbɨ̧te ènyit tɔb tèa nkɨà la kà kwàꞋtè, wuê mbɨ̀Ꞌɨ̀ banyaãbàꞋ. Bɔɔ ye ngoꞋ nkàà èghɨ bàa.

¹¹Aa li bɨɨ awɔb nkàà nê bɔɔ̀ ngȩȩna ane alu̧ Kên li ngȩ̀ȩ̀nè la. Bɔɔ ngɨa kàbɔ̀ŋ wuê mbɨ̀Ꞌɨ̀ Balààm li ngɨ̀ la ambo èkab, mè nkwèèla àtsə mbɨ̀Ꞌɨ̀ Kolà li nkwèèle la tè Mbɔ̧ɔ̧mà wu li eliime awɔb wuê mbɨ̀Ꞌɨ̀ tòà. [1]

¹²Bòt ba aà ndòa mèkù mɨ̧ ndɨ̀ wu bɔ̀ɔ njɨ̀a bɨ tò ba àdziꞋa bɨ bù̧ù̧te ane èkɔŋ me jɨ èpǎ̧ wɨ̧ la, nkàà nê bɔɔ ngɨ̀à mènəè àtsəa kɔꞋɔ a kètsìà wɨ̧ mè ndzəa wuê è tɔb nè tèbèm. Bɔ wu mbɨ̀Ꞌɨ̀ mbɨ̀ŋ è kɨɨlà àfeme àa nɨa ndèa la, mè ngu mbɨ̀Ꞌɨ̀ èyɨt kà wua nkɔ̀ɔ̀la àfɨꞋa èyɨt àa nkɔ̀ɔ̀la la. Bɔ pfəꞋte nenkèm wuê mbɨ̀Ꞌɨ̀ èyɨt bɔ tsɔꞋte ne tèghàŋtsə la.

¹³Bòt baa e mè ngu mbɨ̀Ꞌɨ̀ èfuu *èdzî èkekweelè, nè mènəè àtsəa kɔꞋɔ mɔb nkɔ̀Ꞌa mbɨꞋɨ̀ àlejuu èfuu *èdzî. Bɔ fəə těnto̧ tu tèa ngà̧aã kà nɔŋe àtsə la. Mbɔ̧ɔ̧mà è taŋke àdziꞋ abua yɔb a èbem kèbìꞋà àa wu ane àlia nè àlia la.

¹⁴Enɔ̀k wu ngute bòt te li ntse akwene Adàm tentùa ka bɔ bi atò la li shu ànəa Mbɔ̧ɔ̧mà nyɨꞋte atò ane ànəa àa li lɔ̀Ꞌɔ eye bòt baa la. Tà li nê, “Bɨ̀ ye a Mbɔ̧ɔ̧mà nkɨ̀Ꞌa nè bɔntu̧ bi ànyaꞋne ànyaꞋne.

¹⁵Tà kɨꞋa esaꞋa bòt bàgème e màꞋa bòt bu bɔ tu̧u̧ atò la a èbem ngoꞋ ane èbɨꞋte ènəê bu bɔ ghɨ̀ la, nè èwuu èbɨꞋte mèngà̧ mu bòt kàbɔ̀ŋ baa e làꞋà adù̧ tò la!”

¹⁶Bòt baa aà ntsèka ndèmà a tèbèm tɔb, fèèlà bòt. Bɔɔ ngɨ̀à mènəè wuê mbɨ̀Ꞌɨ̀ mbɨ̧te ènyit tɔb tèa nkɨà la, ngwàbta mètsəê mɔb ngù̧a nkùꞋ tɔb. Bɔɔ fɨ̀ta bòt mɨ̧̂ mbɨꞋɨ ejɨ àbȩ̀ akwen yɔb.

¹⁷Bèshu̧ bɔ̧, bɨ̀ ku̧u̧te mènəè bɔntu̧ Yesò Klistò Lefɨ̀Ꞌ wa e li shu nê naa li ghɨ̀ la.

¹⁸Bɔ li shu abua yɨ̧ nê, “Naa li ngu ane èli bu ngɔ̀ŋ tsìꞋa nkɨ elìà la, bòt ko e bùꞋ me wȩ̀ȩ̀tè ànəê àgème è wù àyea Mbɔ̧ɔ̧mà la, mè nkùŋà wuê èghɨ mèntɨ̧ɨ̧ mɔb nàa nkɨà, è wù èghɨ àa mbɨ̀a Mbɔ̧ɔ̧mà la.”

¹⁹Bòt mbɔŋ wu bòt bɔ̀ɔ ndzìà àghàbtè a kètsìà bòt la. Bɔɔ ngɨ̀à wuê mbɨ̀Ꞌɨ̀ mbɨ̧te ènyit tɔb te kɨa la, bɔ̀ ka bɔ Fo Kèfə ane yɔb.

²⁰Bèshu̧ bɔ̧, è me wu awɨ̧ ko bɨ̀ baãaã mènəè mu bɨ bɨ̧ɨ̧ne la me kweela ngà nè mbì. Mènəè maa dzə abua Mbɔ̧ɔ̧mà zìambɔŋ. Bɨ̀ me tsàꞋte Mbɔ̧ɔ̧mà ane mètàŋ Fo Kèfə.

²¹Bɨa me chɨ̀Ꞌɨ àfɨ̀Ꞌ yu Yesò Klistò Lefɨ̀Ꞌ wa nàa nɨ tèsȩ ti e ghɨ̌ bɨa bɔ mèmpème kàlìà la, bɨ me tseke ane èlɨ Mbɔ̧ɔ̧mà nàa me kɔ̀ŋkè àwɨ̧ la.

²²È me wu bòt bu mèntɨ̧ɨ̧ mɔb bùꞋù te me yu ane mènəè Mbɔ̧ɔ̧mà la, bɨ bɔɔle awɨ̧ ntɨ̀ŋe awɔb.

²³È me wu e bu ntsìꞋa nga enyi a èwet la, bɨ səè àwɔb ntsì mbɨ̀Ꞌɨ̀ bɔɔ peme. Èbeko nè bòt aa və bɨ bɔ ndɨ bɨ̀a me tɨŋe awɔb la, ka bɨ me ghɨ̌, bɨ me baabe awɨ̧ mbɨ̀Ꞌɨ̀ ka mèntsèke kàbɔ̀ŋ mɔb zì mèkɔb ane yɨ̧.

²⁴MèngùꞋte wu abua Mbɔ̧ɔ̧mà. BetsiꞋa tà ko ngɨ̀ tè bɨ̀ ka faãaãtè èka bɨ̧, mè ngɨ̀ ndɨ bɨ̀a tɨ̧ɨ̧ a mbì tò kà ye àghɨa bɔ̀ɔ fèèlè àwɨ̧ adù̧ la, mbɨ̀Ꞌɨ̀ bɨa ye ènɨ̧ tò ebɔ mèngùꞋte.

²⁵Maà shù̧ù̧ta nê Yesò Klistò Lefɨ̀Ꞌ wa ghɨa bòt è ŋa mèngùꞋte abua tò wu tà wu ndàꞋ Mbɔ̧ɔ̧mà mè ngu Mpemnà wa la. Ètɨ̧̂ ègème, nè mètàŋ ègème e wu abua tò. Kèfɔ̧̀ wu we tò, e bùꞋù tê àfɨꞋa mbì, mè mbèle àfɨ̀Ꞌ yaa, mè ngu ewu ane àlia nè àlia. Àmèn.