Read Mundani Ètsə 11 Bible Online

Ètsə 11 - Mundani bible

Ètsə 11

¹AfɨꞋa mbɔŋ bɔ ŋa ambàŋ ko abua am, nàa mbɨ̀Ꞌɨ̀ ayɨ̌t bɔ̀ɔ nɨa fɨ̀Ꞌtà èghɨ la nê, “Lɔ̀Ꞌɔ a si fɨ̀Ꞌte lob nɨ̧ Mbɔ̧ɔ̧mà a Jèlusalèm, nè àdziꞋ yu bɔ̀ɔ ntò̧à èghɨ ŋa abua tò la, mè mpà̧aã bòt bu bɔ̀ɔ ngùꞋtà atò abot la.

²Ka à kà fɨ̀Ꞌtè àsà̧aã yu a mbì lob nɨ̧ Mbɔ̧ɔ̧mà la, nkàà nê bɔ nɔ̀ŋè àdziꞋa mbɔŋ abua bòt kà ko a Mbɔ̧ɔ̧mà. Bɔ̀ɔ li kɨꞋɨ etɔ̀Ꞌte àpfəèà nɨ̧ a mbɔŋ, bòt Mbɔ̧ɔ̧mà àa ntsèka la edàŋke a si ane mèŋu èghem yekwì ntsɔ̀b yebe.

³E mè ngu ŋa mètàŋ abua bòt babe, bɔ̀ɔ ndàꞋà èngǎ̧ am la, bɔ̀ɔ kwaãaã èpfəə elaꞋa èngǎ̧ Mbɔ̧ɔ̧mà ane èlibȩ tɔsì nè ènkɨ̀ yebe nè èghem yentùa.”

⁴Bòt baa babe ndàꞋà èngǎ̧ Mbɔ̧ɔ̧mà la wu èyɨt olìf bu bebe nè èghɨ bu bebe bɔ̀ɔ ntsìta mèkàꞋà adù̧, e tɨ̧ɨ̧te a mbì Tǎt wa Mbɔ̧ɔ̧mà wu tàa mbà̧aã sitsǎꞋ la.

⁵Wòt me kɨ ezi àlɔꞋ ane yɔb, ko èwet àa dzə a ètsəê wɔb ebùŋe bɔmbù̧ bɔb. Ale, bɔ̀ɔ bùŋa waa waa tàa nkɨ ezi àlɔꞋ ane yɔb la.

⁶Bɔ bɔ mètàŋ e kele mbɨ̀ŋ a ègwelebuule, tè naa baka chu ane èli bu bɔ̀ɔ ndàꞋà èngǎ̧ Mbɔ̧ɔ̧mà la. Bɔ mè mbɔ̀ mètàŋ ndɨ betsiꞋa bɔ gheble mèleb è tsìꞋi àlo̧ la, mè mbɔ̀ mètàŋ a màntsaa ngoꞋtsə tsa tsa a sitsǎꞋ, mbɨ̀Ꞌɨ̀ bɔ kɔ̀ŋkè la.

⁷AfɨꞋa bɔ̀ɔ paa a màndaꞋa èngǎ̧ Mbɔ̧ɔ̧mà wu la, nyà̧mɔ̀Ꞌ nàa kɔꞋ a si a èbem èbɨ lu kà ye ndìa la, e nû etsě àwɔb, e mbùŋè àwɔb.

⁸ÈpfəꞋte bɔb aa nɔ̀ŋke a èbùꞋu èlu̧ a èbem àpfəèà nɨ̧ yu bɔ li ngù̧ù̧te a Tǎt wɔb a mbɨ̧̀ mbasa la. Èlen ntsoꞋ bòt àa nɨa ntɔ àpfəèà nɨ̧a mbɔŋ la wu Sodòm bɔ̂ Ejìb.

⁹Bòt bɔ dzəâ ayɔɔ tèwuute bòt tègème la, nè èndà̧ ègème, nè ndɨ̧ tègème, nè èlaꞋ ègème, aa ye èpfəꞋte bɔb ane èli betat nè àtěm, e bɔ tu̧u̧ nê bɔ̀ ka ntu awɔb.

¹⁰Bòt sitsǎꞋ e mě ngu taꞋa wùꞋte àwɔb nkàà èvə bòt baa babe la. Bɔɔ me wùꞋtè àwɔb e ŋa èghɨ abua waa waa, nkàà nê bèndàꞋàtɔŋ Mbɔ̧ɔ̧mà bu babe la be taꞋa ghɨ̧̀ɨ̧̀ne bòt sitsǎꞋ.

¹¹Èli betat nè àtěm e li ntsè, fo nàa ŋa mèmpème la dzəè abua Mbɔ̧ɔ̧mà nchu nyi ane yɔb, bɔ lɔ̀Ꞌ ntɨ̧ɨ̧ a si, kèbɔɔ kekweelè ke baãaã wòt ègème tà ye awɔb la.

¹²AfɨꞋa mbɔŋ bèndàꞋàtɔŋ Mbɔ̧ɔ̧mà bu babe la e zə àtɔŋ ko a dzə a ègwet la a shu abua yɔb nê, “Bɨ̀ kɔꞋɔ àdzìꞋ yaa.” Mbɨ̀Ꞌɨ̀ bɔ̀ɔ kɔ̀Ꞌɔ̀ ngà a ègwet a èbem mbàꞋ la, bɔmbù̧ bɔb e ye awɔb ndɨ bɔ ghà la.

¹³Si bentè ànyaꞋne kwàꞋ àfɨꞋa mbɔŋ, àbâ yeamɔꞋ ane àpfəèà nɨ̧ yu bɔ ghabte ane èdziꞋ èghem la a kwèà. SitsǎꞋ kwèà ale, bòt bètɔsì basà̧à̧mbe be pfəꞋtè. È bu nè bòt kà pfəèꞋte la e bɔɔ kwàꞋ ànyaꞋne tè nkùkte a Mbɔ̧ɔ̧mà wu a ègwet la ane ènɨ̧ tò.

¹⁴NgoꞋ kèkweelè, è wù ye tebe la è tsè, è ye è wù tetat la wua nga eyaŋe ekɨꞋɨ.

¹⁵ÀfɨꞋa mbɔŋ we basà̧à̧mbe ane bɔntu̧ Mbɔ̧ɔ̧mà bu è tɔ è li ne èsɔŋ, ètɔŋ e ŋȩ a ègwet me shu nê, “Mbɔ̧ɔ̧mà Lefɨ̀Ꞌ wa bɔ̂ Fɔ̧̀ tò wu tà li ndzɔꞋ ntsà la, e tsiꞋa mbà̧aã bèlèfɔ̧̀ sitsǎꞋ àfɨ̀Ꞌ yaa. Tàa li wu fɔ̧̀ ane àlia nè àlia.”

¹⁶Bɔɔjuŋ bu èghem yebe ntsɔ̀b bakwì bɔ tsektè a ègwet ètɨ̧ kèfɔ̧̀ bɔb a mbì Mbɔ̧ɔ̧mà la e bɔ̀tè a si, nchuŋe ètsə bɔb a si, ngùꞋtè a Mbɔ̧ɔ̧mà.

¹⁷Bɔ li ngua shua nê, “Baa ŋa mèngùꞋte abua ye, Mbɔ̧ɔ̧mà Lefɨ̀Ꞌ Àtsèàngɔ̀ŋ wu, àa və mè ndzaŋe wu la. Ba kɔ̀ŋkè àwê ndɨ̀ wu a nɨ mètàŋ kèkweelè mê, tê mbùꞋ me baãaã ngɔ̀ŋ la.

¹⁸Bòt èlaꞋ bu kà ko awê la aa ntsòa nkwèèlâ àtsə, mbɔ̂ àfɨꞋa àa nɔ̀ŋe ntsǒ yê a ègwet lɔb la a kɨꞋɨ̀. Wu àfɨꞋa saꞋa bòt bu bɔ pfəꞋte la. AfɨꞋa a kuꞋ àa ŋa àbȩ̀ bèndàꞋàtɔŋ bê è wu bɔfàꞋ bê, nè bòt bê bàgème, mè nè wòt ègème tàa nkùkta wê la, bòt techɨɨle nè bɔɔjuŋ. Eyaa mè ngu àfɨꞋa àa liime bòt bu bɔ̀ɔ ntsòkà sitsǎꞋ la.”

¹⁹ÀfɨꞋa mbɔŋ bɔ tsɔꞋɔ lob nɨ̧ Mbɔ̧ɔ̧mà yu a ègwet la, bɔ ye èkɔb mènkàꞋa kèkweelè Mbɔ̧ɔ̧mà a èbem lob mbɔŋ. MèkàꞋà kàꞋ, èfâŋ e me kwele, sitsǎꞋ bentè, èwèt e kwentè kwàꞋ ànyaꞋne.