Read Mundani Ètsə 12 Bible Online

Ètsə 12 - Mundani bible

Ètsə 12

¹Àghɨa ko à ghe la a pùùlà a ègwelebuule. Àvi kǒ wu abot, àtaãnyèm a buule atò, tà tɨ̧ɨ̧ a ègwet èŋu, kwaãaã ntà̧ kèfɔ̧̀ bɔ ghɨ ane těnto̧tsə ntsɔ̀b tebe la.

²Tà li nkɔt àfɨꞋa màmbia a kùꞋ, tà me lu̧u̧ta ndɨ̀à kwàꞋ ànyaꞋne, mbɨ̀Ꞌɨ̀ tàa nkɨ bi la.

³Àyea ko nè àghɨ a ghe la, a mè mpùùlà a ègwelebuule. E ndze taꞋa nyà̧ kǒ mèmbaŋ è fəə dlagɔ̀n la, è bɔ̀ ètsə besà̧à̧mbe, nè ndɔŋtsə èghem, mè nkwaãaã ntà̧ nàà nyɨ̀Ꞌta mètàŋ tò la adù̧ àtsə àgème.

⁴Tà nɨ èku̧ li səè àbâ těnto̧ yeamɔꞋ ntsàà a si, ane těnto̧tsə tègème a ègwelebuule bɔ ghàbte ane èdzìꞋ betat la. Dlagɔ̀n wu tɨ̧ɨ̧ a mbì àvi wu nkɨ bi la, me chɨ̀Ꞌɨ àvi wu naa bi waã wu yea kwele.

⁵Tà ghɨ̀ ale, mbi wambâ̧, è wu wòt tàa me nɨ ambàŋ àtɨ̧ɨ̧na mbà̧aã èlaꞋ ègème kà ku tèsȩ la. Tà bi waã wu ale bɔ bê nɨa tò ndùùlà ngà abua Mbɔ̧ɔ̧mà nè àdziꞋa àtɨ̧a kèfɔ̧̀ atò à wu la.

⁶Àvi wu lùùlà nga àbâ àlaꞋ àyuube, àdziꞋa Mbɔ̧ɔ̧mà e taŋke abua tò, ejɨ atò ane èlibȩ tɔsì nè ènkɨ̀ yebe nè èghem yentùa la.

⁷ÀfɨꞋa mbɔŋ èbet e kwen a ègwet. TaꞋà wantu̧ Mbɔ̧ɔ̧mà wu èlen tò wu Mȩkèl la bɔ̂ bɔntu̧ ko e me nû nkɨ̀Ꞌnè dlagɔ̀n wu. Dlagɔ̀n wu bɔ̂ bɔntu̧ bi e nù àyɔb mɨ̧̂,

⁸ka Mȩkèl bɔ̂ bɔntu̧ ko bu e tsè àwɔb, tè bɔ̀ ka tsi mbɔ̀ àdziꞋa màntseka a ègwet.

⁹Bɔ ghɨ̀ ale, màꞋà taꞋà dlagɔ̀n wu a sitsǎꞋ. Wu dlagɔ̀n wu è li ndzaŋe wu bɔ̀ɔ ntɔ ane fɔ̧̀ fote kàbɔ̀ŋ nè Satàn la, tà mè me fɨte bòt ngɔ̀ŋ bàgème la. Bɔ li màꞋà atò a sitsǎꞋ bɔ̂ bɔntu̧ bi.

¹⁰E me zə àtɔŋ ko a me ŋȩ a ègwet shua nê, “Mèmpème Mbɔ̧ɔ̧mà wa, nè mètàŋ tò nè kèfɔ̧̀ tò è kɨꞋɨ abua ya àfɨ̀Ꞌ yaa. Fɔ̧̀ wu tà yɔꞋ ntsà la è nyɨꞋte mètàŋ mi, nkàà nê bɔ tsì wòt wu tàa ntɨ̧a mbì Mbɔ̧ɔ̧mà àlia àgème ndzìà mènəè àtsəa bɔnyɨ ba la tè maꞋa a si.

¹¹Wu àlo̧ Wanjɨ̀ wu nè èngǎ̧ nkûŋ tò wu bɔ̀ɔ ndàꞋà la ka bɔnyɨ ba e nɨŋ nù atò tè ntsè la. Bɔ li bɔ̀ ka nɨ mèntsèke mɔb mbɨ̀Ꞌɨ̀ àghɨa ko, nê è màà ngu wuê èvə ko bɔɔ pfə.

¹²È wu ale, tsiꞋ ègwet nè bòt bu a ègwet la è wùꞋtè àwɔb! Ka ngoꞋ naa wua sitsǎꞋ nè èbèm èdzî, nkàà nê Satàn e chu a si nè àlɨ̀ŋ àghɨ a zi, ndɨ̀ wu tà ko nê àfɨ̀Ꞌ àzi a nyɨꞋ la.”

¹³Mbɨ̀Ꞌɨ̀ dlagɔ̀n wu ye ndɨ bɔ màꞋà àvi a sitsǎꞋ la, tà bùꞋ me kɨ̀ŋe àvi wu tà bi wambâ̧ wu la.

¹⁴Ka bɔ ŋa tèbaabe taꞋa èfaã kekweelè ko àa ndèa a ègwet la tebe nê tà nɨŋ nde ndùùla dlagɔ̀n wu nga àbâ àlaꞋ àyuube, àdziꞋa bɔ taŋke ejɨɨ atò ane èngùꞋebȩ yetat nè àtem la.

¹⁵Nyà̧kàbɔ̀ŋ yu tɨɨ mèleb a ètsəê vi mbɨ̀Ꞌɨ̀ èdzî ntsàà akwen àvi wu mbɨ̀Ꞌɨ̀ mèleb mu nàa ŋeꞋe atò enɨ gha.

¹⁶Ka sitsǎꞋ tɨŋe àvi wu, ngàꞋa ètsəê vi mɨ̀ɨ̀lè mèleb mu dlagɔ̀n wu è tɨɨ a ètsəê vi la.

¹⁷A ghɨ̀ ale, dlagɔ̀n wu tsǒ ane àvi wu kwàꞋ ànyaꞋne, tè ngà è màꞋà èbet nè àbəꞋa bòt àndǎ̧ atò, è wu bòt bu bɔ̀ɔ nɔ̀ŋà mbɨ̧te Mbɔ̧ɔ̧mà mè bɨ̧̀ɨ̧̀ne nê èghɨ bu Yesò nyɨꞋte la wu nkûŋ la. Dlagɔ̀n wu tɨ̧ɨ̧ a ngèt *èdzî.