Read Mundani Ètsə 13 Bible Online

Ètsə 13 - Mundani bible

Ètsə 13

¹E ndze nyà̧mɔ̀Ꞌ nkɔ̀Ꞌa a èbem *èdzî, è bɔ̀ ndɔŋtsə èghem nè ètsə besà̧à̧mbe. Ntà̧ nàà nyɨ̀Ꞌta mètàŋ tò la è wu a ègwet ndɔŋ ègème, àtsə àgème a bɔ èlen ko tsa àa ndàꞋa kàbɔ̀ŋ adù̧ èlen Mbɔ̧ɔ̧mà la.

²Nyà̧mɔ̀Ꞌ mbɔŋ e ndi ndze la li ngu mbɨ̀Ꞌɨ̀ ngwìnyà̧, nkabte tete èka tò te wu mbɨ̀Ꞌɨ̀ è te sambàŋ, ètsəê tò e mè ngu mbɨ̀Ꞌɨ̀ we sambàŋ. Nyà̧kàbɔ̀ŋ yu ŋa mètàŋ mi nè àtɨ̧a kèfɔ̧̀ àzi mè nè àtɔŋ kekweelè àzi abua nyà̧mɔ̀Ꞌ yu.

³Àtsə àko ane ètsə nyà̧mɔ̀Ꞌ yu a bɔ fɨŋ kǒ è nɔ̀ŋkè mbɨ̀Ꞌɨ̀ è li ngua nga bùŋè yùà la, ka fɨŋ mbɔŋ è li ngua nga mbùŋè yùà la è bɔ nyɔ̂. Ànəa nyà̧mɔ̀Ꞌ yu a tsè bòt sitsǎꞋ bàgème, bɔ tsiꞋi me kùŋe atò.

⁴Wòt ègème me wùꞋte nyà̧ yu è fəə a dlagɔ̀n la, nê tà ŋa àtɔŋ àzi abua nyà̧mɔ̀Ꞌ yu, mè me wùꞋte nyà̧mɔ̀Ꞌ yu shua nê, “Wa bɔ mètàŋ mbɨ̀Ꞌɨ̀ nyà̧mɔ̀Ꞌ yu à? BetsiꞋa wa nùa tò à?”

⁵Bɔ li sà nyà̧mɔ̀Ꞌ yu tà me ghɨ̀ ètsəê ndàꞋà mèngǎ̧ kàbɔ̀ŋ ane èlen Mbɔ̧ɔ̧mà, bɔ bɔ̂ ŋa atò mètàŋ nê tà me ghɨ̀ ale ane èŋu èghem yekwì ntsɔ̀b yebe.

⁶Tà bùꞋ me làꞋa kàbɔ̀ŋ adù̧ Mbɔ̧ɔ̧mà, ndàꞋà mènəè kàbɔ̀ŋ ane èlen Mbɔ̧ɔ̧mà nè àdziꞋa tàa ntsèka la, mè nè bòt bu bɔ̀ɔ ntsèka a ègwet la.

⁷Bɔ mè sa atò nê tà màꞋà èbet adù̧ bòt Mbɔ̧ɔ̧mà nù àwɔb ntsè. Mè ŋa atò mètàŋ nê tà me baãaã èndà̧ ègème, nè èlaꞋ ègème, nè bòt bɔ̀ɔ ndàꞋà ndɨ̧ tègème la.

⁸Waa waa a sitsǎꞋ bɔ̀ le kaꞋa shɨ èlen tò a èbem àkata mèmpème ka ngɔ̀ŋ naa li bùꞋu la naa wùꞋte atò. [7] Àkata mbɔŋ wu àkata Wanjɨ̀ wu bɔ li mbùŋe atò la.

⁹Wòt bɔ àtû̧ tà yùte èngà̧ waa.

¹⁰Wòt a li ngu nê bɔɔ baãaã atò la, bɔɔ bê baãaã atò. Wòt a li ngu nê bɔɔ bùŋe atò ane nyi la, bɔɔ bê bùŋe atò ane nyi. Ale, a nyɨꞋtè nê, bòt Mbɔ̧ɔ̧mà è kuule mèntɨ̧ɨ̧ mɔb, mè me kùŋe atò nè èntɨ̧ɨ̧ wɔb wemɔꞋ.

¹¹E mè me ye nyà̧mɔ̀Ꞌ kǒ kɔꞋɔ a èbem sitsǎꞋ, ndɔŋke tò tebe te nɔ̀ŋkè mbɨ̀Ꞌɨ̀ te wanjɨ̀, tà mè me bȩȩta ŋȩ̀a ndàꞋà mbɨ̀Ꞌɨ̀ dlagɔ̀n.

¹²Nyà̧mɔ̀Ꞌ mbì yu ŋa mètàŋ kèkweelè mi abua tò, tà me ghɨ èghɨ a mbì tò. Ngɨ̀ sitsǎꞋ nè bòt bu bɔɔ ntsèka a sitsǎꞋ la bàgème e me wùꞋte nyà̧mɔ̀Ꞌ mbì yu fɨŋ yu li ngua nga mbùŋe atò la li nyɔ̂ la.

¹³Nyà̧mɔ̀Ꞌ kwèn yaa li ngɨ̀ mènəè ngɨŋa kwàꞋ ànyaꞋne, ngɨ̀ èwet e lɔ̀Ꞌɔ a ègwet nchu a sitsǎꞋ tè bòt e ye.

¹⁴Tà nɨ ngɨŋa mènəè mu bɔ sa atò nê tà ghɨa a mbì nyà̧mɔ̀Ꞌ mbì yu la, nɨŋ fɨ̀te bòt sitsǎꞋ bàgème. Nyà̧mɔ̀Ꞌ yu ghɨ̀ bɔ kɔ̧ wamâlem kǒ bɔ̀ɔ me nɨa ngùꞋtà nyà̧mɔ̀Ꞌ mbì yu bɔ li nɨ nyi ndzì fɨŋ ane tò, tà bɔ mbèle yû̧ la.

¹⁵Bɔ sà nyà̧mɔ̀Ꞌ kwèn yu tà yèènè fo mèmpème ane wamâlem wu bɔ̀ɔ nɨa ngùꞋtà nyà̧mɔ̀Ꞌ mbì yu la, mbɨ̀Ꞌɨ̀ ghɨ̌ tàa me làꞋa, e mě ghɨ̌ tàa bùŋe bòt bɔ tu̧u̧ wùꞋte atò la.

¹⁶Nyà̧mɔ̀Ꞌ kwèn yu ghɨ̀ bɔ zi àlȩê ane wòt ègème, bòt techɨɨle nè bòt ènɨ̧, bòt èkab nè bòt ntseb, èbùꞋ nè bòt kà wu èbùꞋ. Nê bɔ̀ zia àlȩê yu ane àbualu̧ a wòt ègème kò a èsi tò leꞋ.

¹⁷Bɔ li nê wòt ka njû̧ àghɨ, kò fɨ̧ɨ̧nè leꞋ, kà wu wòt tà bɔ àlȩê yu, è wu èlen nyà̧mɔ̀Ꞌ yu kò nɔmbà wu è tɨ̧ɨ̧ àdziꞋa èlen mbɔŋ la leꞋ.

¹⁸Wòt bɔ ndɨ tàa bɔ èyì ka ko ànəê yaa la. Wòt tà bɔ èyì la naa ko ànəa nɔmbà nyà̧mɔ̀Ꞌ mbɔŋ shua la. Nɔmbà mbɔŋ wua ntɨ̧a adzìꞋa èlen wɔ̀bȩ̂. Nɔmbà tò mbɔŋ wu 666.