Read Mundani Ètsə 15 Bible Online

Ètsə 15 - Mundani bible

Ètsə 15

¹ÀfɨꞋa mbɔŋ e mè ndze nkɨ̀Ꞌnè àghɨa ko a ègwelebuule a ghe la, bɔntu̧ Mbɔ̧ɔ̧mà basà̧à̧mbe bɔ̂ bèa èbɨꞋte ngoꞋ tesà̧à̧mbe la. Wu èbɨꞋte ngoꞋte te lià, nkàà ndɨ è wu tùà Mbɔ̧ɔ̧mà nàa nɨ elìa ntsǒ zi la.

²E ndze àghɨa ko a nɔ̀ŋkè mbɨ̀Ꞌɨ̀ taꞋà èlemè, me fəəte mbɨ̀Ꞌɨ̀ àlùgɨ̀lâ la, nè èwet adù̧. Bòt bu bɔ nuê nyà̧mɔ̀Ꞌ yu bɔ̂ wamâlem tò wu tè ntsè, mè ntu̧u̧ enɨ nɔmbà èlen tò lu la, e tɨ̧ɨ̧tè a ngèt èdzî wu aa fəèəèta mbɨ̀Ꞌɨ̀ àlùgɨ̀lâ la. Bɔ li mbèà bèlèkɨŋ àbu bɔb Mbɔ̧ɔ̧mà ŋa la.

³Me kɔ̧ɔ̧ ètsəkù̧ wu Musì, wɔ̀fàꞋ Mbɔ̧ɔ̧mà li nkɔ̧ la, nè è wu Wanjɨ̀ wu li nkɔ̧ la shua nê, “Mbɔ̧ɔ̧mà Lefɨ̀Ꞌ Àtsèàngɔ̀ŋ leꞋ, Mènəè mê è ghe mè ntsè bòt. Àwɔ̀ fɔ̧̀ ngɔ̀ŋ leꞋ, mènəè mê wu nkûŋ, mè ngu ndɨŋndɨ̀ŋ.

⁴Lefɨ̀Ꞌ, wòt wu kà wu bɔa awê, ewùꞋte èlen lê la wu wàà? Wu ndàꞋà àwɔ̀, à wu Mbɔ̧ɔ̧mà la. Bòt ngɔ̀ŋ bàgème àa li kɨꞋɨ wùꞋtè àwê, nkàà nê wòt ègème ye ndɨ mènəè mê nàa ndɨŋndɨ̀ŋ la.”

⁵Mbɨ̀Ꞌɨ̀ àyaa a tsè la, e ndȩ̀ me ye àtsəalob ntsèm a Mbɔ̧ɔ̧mà yu a èbem àyòa mènkàꞋa kèkweele tò a ègwet la, a tɨ̧ɨ̧ jìa.

⁶Bɔntu̧ Mbɔ̧ɔ̧mà bu basà̧à̧mbe bɔ̀ li nɨ èbɨꞋte ngoꞋ tu tesà̧à̧mbe nɨŋ nkɨ̀Ꞌɨ̂ la, e dzəè a èbem lob nɨ̧ Mbɔ̧ɔ̧mà yu, nkwaãaã ndìte tèa nkàꞋtà la, mè nkwaãaã nkàndatsə bɔ ghɨ ane goêl la a bèghèmnà bɔb.

⁷Àghɨa ko ane èghɨ bu bekwì è wu yu̧ la, à ŋa tèpfəꞋtsə tesà̧à̧mbe bɔ ghɨ ane goêl la, abua bɔntu̧ Mbɔ̧ɔ̧mà bu basà̧à̧mbe la. TèpfəꞋte mbɔŋ te lu̧u̧ ne ntsǒ kèkweelè Mbɔ̧ɔ̧mà wu tà wu ane àlia nè àlia la.

⁸Lob nɨ̧ Mbɔ̧ɔ̧mà yu mè ndù̧u̧ ne ndiꞋ è dzə ane ènɨ̧ Mbɔ̧ɔ̧mà nè mètàŋ tò la. Wòt li tà kà wu eko nyi a èbem lob nɨ̧ Mbɔ̧ɔ̧mà yu kà èbɨꞋte ngoꞋ tu tesà̧à̧mbe bɔntu̧ Mbɔ̧ɔ̧mà bu basà̧à̧mbe be nɨŋ nkɨ̀Ꞌɨ̂ la, te tsè.