Read Mundani Ètsə 17 Bible Online

Ètsə 17 - Mundani bible

Ètsə 17

¹ÀfɨꞋa mbɔŋ wekǒ ane bɔntu̧ Mbɔ̧ɔ̧mà bu basà̧à̧mbe bɔ li mbɔ̀ tèpfəèꞋ tu tesà̧à̧mbȩ la kɨꞋɨ̀ shu abua am nê, “KɨꞋɨ è nyɨꞋte awê ngoꞋ Mbɔ̧ɔ̧mà nàa nɔ̀ŋe àtsəa àghɨꞋna ghȩ̀ȩ̀nè ghȩ̀ȩ̀nè wu, è wù taꞋa àpfəèà nɨ̧ yu a nget mèdzî nyaŋ la.

²Bèfɔ̧̀ sitsǎꞋ e paꞋte atò, bòt bàgème a sitsǎꞋ e mè mbe mèlùꞋ àbɨ̧ atò yu tàa mpàꞋta la.”

³Fo Mbɔ̧ɔ̧mà kɨꞋɨ ane yaã, wantu̧ Mbɔ̧ɔ̧mà wu ŋeꞋe am nɨŋ ngà àbâ àlaꞋ àyuube, e ndze àvi kǒ tà tseke a ègwet nyà̧mɔ̀Ꞌ kǒ mèmbaŋ la. Bɔ shɨ tèlente tèa ntsɔ̧̀ɔ̧̀tà a Mbɔ̧ɔ̧mà la a èdziꞋ ègème a mbɨ̧̀ tò. Tà bɔ ètsə besà̧à̧mbe nè ndɔŋtsə èghem.

⁴Àvi mbɔŋ kwaãaã ndìte membaŋ tèa mbɔ̀ la, mè nɨ èghɨ nyànga nɨŋ ngwèè àvi. Mbèà ndɔŋ bɔ ghɨ ane goêl la àbu azi. Ndɔŋ mbɔŋ lu̧u̧ nê èbɨꞋte èghɨ e dzəê ane àbɨ̧ yu tàa mpàꞋta la.

⁵Bɔ shɨ èlen a èsi tò e bɔ lə ndò̧ la nê, “TaꞋà àpfəèà nɨ̧ a Babilɔ̀n, nyɨ̌ bèghȩ̀ȩ̀nè ghȩȩne, nè èbɨꞋte èghɨ ègème àa ngɔ̀ŋ la.”

⁶E mè me ye àvi ngaa be àlo̧ a bòt Mbɔ̧ɔ̧mà tà nu la, nè àyea bòt bu bɔ bùŋè àwɔb nkàà ndɨ bɔ̀ɔ ndàꞋà èngǎ̧ Yesò la. Mâ ye atò ale a taꞋa tsè am.

⁷Ka wantu̧ Mbɔ̧ɔ̧mà wu biite am nê, “Ànəa mbɔŋ a ghɨ̀ na ka me tsè àwê à? Maa shu àwê lə ànəê ndò̧ ane àvi wu, nè nyà̧mɔ̀Ꞌ yu è ŋeꞋe atò mbɔ̀ ètsə besà̧à̧mbe nè ndɔŋtsə èghem la.

⁸Nyà̧mɔ̀Ꞌ mbɔŋ à li ndze la li ndzaã ngu yu̧, ka nè àfɨ̀Ꞌ yaa tà te ntsě yu̧. È bele nyaŋe edzəâ a èbem ebɨ lu kà ye ndìa la, eghǎ bɔɔ bùŋè atò. AfɨꞋa bòt sitsǎꞋ bu bɔ̀ le kaꞋa shɨ tèlen tɔb a èbem àkata mèmpème a mèmbùꞋu ngɔ̀ŋ la àa ye nyà̧mɔ̀Ꞌ yu la, aa taꞋa tsè àwɔb, nkàà nê tà li ndzaã ngu yu̧, ka nè àfɨ̀Ꞌ yaa tà kà tsi ngu yu̧, mbɔ̂ ngu è li e mě kɨꞋɨ.

⁹“Wòt bɔ ndɨ tàa bɔ èyì ka ko ànəê yaa la. Ètsə bu besà̧à̧mbe la e wua nyɨ̀Ꞌta tèbȩtsə tesà̧à̧mbe àvi wu è tseke adù̧ la.

¹⁰E mè ngua nyɨ̀Ꞌta bèfɔ̧̀ basà̧à̧mbe. È be batà̧â̧ be te ntse bèfɔ̧̀, wemɔ̀Ꞌ bɔ̂ mbèle a ègwet atɨ̧, wekǒ ka ziꞋì nkɨ̀Ꞌɨ̂. Tà kɨ̀Ꞌa ka wu tseke a ègwet atɨ̧ ane àfɨ̀Ꞌ à seè.

¹¹È me wu nyà̧mɔ̀Ꞌ yu è li ndzaã ngu yu̧, ka è kà tsi ngu yu̧ la, ko wu we bafà̧aã ane bèfɔ̧̀ bu, mbɔ̂ ngu ayɔɔ bèfɔ̧̀ bu basà̧à̧mbe la, mbɔ̂ ngu ghǎ adzìꞋa bɔ̀ɔ bùŋè atò àyea tò aa mì la.

¹²“Ndɔŋ tu èghem à li ndze la, wu bèfɔ̧̀ èghem bɔ̀ baka zìꞋì nɨ àtɨ̧a kèfɔ̧̀ àyɔb la. Ka bɔ̀ɔ ŋa awɔb mètàŋ bɔ̀ɔ me baãaã èlaꞋ mbɨ̀Ꞌɨ̀ bèfɔ̧̀ bɔ̂ nyà̧mɔ̀Ꞌ ba yu ane nyèm yemɔ̀Ꞌ.

¹³Bɔ̀ɔ wàa èghem la e wu ane ètsəê wemɔꞋ mè ŋa mètàŋ mɔb nè lèfɔ̧̀ wɔb abua nyà̧mɔ̀Ꞌ yu.

¹⁴Bɔɔ nù èbet nè Wanjɨ̀ wu, ka Wanjɨ̀ wu bɔ̂ ngu tsè àwɔb, nkàà nê tà wu Tǎt bètǎt bàgème mè ngu Fɔ̧̀ bèfɔ̧̀ bàgème. Bòt tò bu tà làà àwɔb bɔ mèe me kùŋe atò nè èntɨ̧ɨ̧ wɔb wemɔꞋ la aa li wu bɔ̂ tò ba nɔ̂.”

¹⁵Wantu̧ Mbɔ̧ɔ̧mà wu mè shu abua am nê, “Mèleb mu à li ndze ghȩ̀ȩ̀nè ghȩȩne wu tseke adù̧ la wua nyɨ̀Ꞌta èlaꞋ nyaŋ nè bòt nyaŋ bɔ̀ɔ ndàꞋà ndɨ̧tsə tsa tsa la, mè nè èndà̧ nyaŋ.

¹⁶Ndɔŋ tu èghem à li ndze la, nè nyà̧mɔ̀Ꞌ yu, aa me pààbe a ghȩ̀ȩ̀nè ghȩȩne wu. Bɔ̀ɔ̀ba wàa aa nɨ èghɨ tà bɔ la ègème tè tàa tsiꞋi tseke ka kwaãaã ndǐ, e kwele nyaãte tò e mě tô̧ atò a èbem èwet.

¹⁷Mbɔ̧ɔ̧mà zi a mèntɨ̧ɨ̧ mɔb nê bɔ ghɨ̀ wuê àghɨa yèa nkɨ̀a nê à wu la, ngu ane ètsəê wemɔꞋ, ŋa lèfɔ̧̀ wɔb abua nyà̧mɔ̀Ꞌ yu, mbɨ̀Ꞌɨ̀ àghɨ àgème aa ghɨ̀ mbɨ̀Ꞌɨ̀ ye li shu nê aa wu la.

¹⁸Àvi wu à li ndze la, è wu taꞋa àpfəèà nɨ̧ yu a bɔ mètàŋ a ègwet bèfɔ̧̀ sitsǎꞋ bàgème la.”