Read Mundani Ètsə 18 Bible Online

Ètsə 18 - Mundani bible

Ètsə 18

¹Àyaa a tsè ale, e mè ndze wantu̧ Mbɔ̧ɔ̧mà kǒ nchua a ègwet la. Tà bɔ̀ mètàŋ kèkweelè, èkaꞋà tò e ghɨ̀ sitsǎꞋ fəə kwàꞋ ànyaꞋne.

²Tà ŋȩ ane taꞋa àtɔŋ nɨ̧ nê, “A kwen, TaꞋà àpfəèà nɨ̧ a Babilɔ̀n yu a kwen. È tsiꞋi àpfəa fote kàbɔ̀ŋ. Tèwuute èbɨꞋte fotekàbɔ̀ŋ tègème te dzəâ abua Satàn la, teà ntsèka abot. Tèwuute banɨ̧̀ kàbɔ̀ŋ bàgème bòt aa mpààbà la, be mè me bù̧ù̧te abot.

³Tà ŋa mèlùꞋ àfàꞋa mànjɨa àbȩ, tè bòt sitsǎꞋ e nu mbe, bèfɔ̧̀ sitsǎꞋ e mè mpàꞋte atò. Bòt tèwen e mè ntsìꞋi bòt èkab nkàà èghɨ bu tàa nəèꞋa vi a èbèm la.”

⁴E mè ndzəè àtɔŋ ko a ègwet a me shu nê, “Bòt bɔ̧, bɨ̀ dzəa a èbem àpfəèà nɨ̧ yu, mbɨ̀Ꞌɨ̀ bɨ fɔtè atò me ghɨa kàbɔ̀ŋ, mbɨ̀Ꞌɨ̀ bɨ ye ngoꞋ yu nàa kɨꞋɨ ane tò la.

⁵Mbɔ̧ɔ̧mà ku̧u̧tè a kàbɔ̀ŋ tò, nkàà nê bê bɔ̧ɔ̧ tê nkɔꞋ ngà ndzə a ègwet.

⁶Bɨ̀ ghɨ àghɨa tà ghɨ ane bòt ko la ane tò mɨ̧̂. Bɨ̀ ghɨa tà ye ngoꞋ tà ghɨ̂ bòt ko e ye la ngò̧ tebe. Bɨ̀ nɨ ndɔŋ yu tà nɨŋ ndzì mèlùꞋ ŋa bòt e nu la, ndzì mèlùꞋ kèkweelè è tse me tò mu la ngò̧ tebe ŋa tà nu.

⁷Bɨ̀ ŋa tò ngoꞋ mè ngɨ̀ tà me tseke ane tèsȩ tè è wu mbɨ̀Ꞌɨ̀ ènɨ̧ nè èghɨ bu tàa ntòòlà àvi a èbèm la. Bɨ̀ ghɨ̀à ale ndɨ̀ wu tàa ngù̧a nkùꞋ zi è shua nê, ye tseke mbɨ̀Ꞌɨ̀ fɔ̧̀ àvi, yè ka wu nempfə, yè ka meè ngu li lɔꞋɔ edɨ̀ mèsi la.

⁸Eyaa bê ngu ndɨ ngoꞋ kèkeelè nàà kwene a ègwet tò àli yeamɔꞋ la. NgoꞋ mbɔŋ nàa ghɨ̌ àghɔ̧ aa baãaã atò, tàa tseke ane tèsȩ, ndzìtsə tea me kua tò, èwet aa mě tô̧ atò. Tàa li ye ngoꞋ nkàà nê wu Mbɔ̧ɔ̧mà Lefɨ̀Ꞌ wu tà bɔ mètàŋ la ka tà saꞋa atò la.”

⁹Bèfɔ̧̀ sitsǎꞋ bu bɔ li ngua nɔ̀ŋkà nè tò mè ntòòlà àwɔb a èbem èghɨ bɔ̂ tò ba la, aa me shùà mèsi àfɨꞋa bɔ̀ɔ ye ndiꞋ àpfəèà mbɔŋ bɔ tò̧ la nkɔ̀Ꞌɔ nga a ègwet la.

¹⁰Bɔɔ etɨ̧ɨ̧ a endɨ̌ nè kèbɔɔ ngoꞋ kèkweelè yu è baãaã atò la e me shu nê, “Èe e! Èe e! TaꞋà àpfəa yu, TaꞋà àwɔ̀ àpfəèà nɨ̧a Babilɔ̀n yaa à ghɨꞋne la, bɔ bê nɨ wuê nyèm yemɔ̀Ꞌ ndììme awê.”

¹¹Bòt tèwen a sitsǎꞋ e me dɨa atò shùà mèsi, nkàà nê wòt tàa mě yu̧ èghɨ èwen bɔb la te ntsě.

¹²Wu èghɨ mbɨ̀Ꞌɨ̀ goêl nè silbà, nè èghɨ ngwȩ̀, nè ndìte èkab te bɔ bèkolɔ̀ tsa tsa la, ndìte membaŋ nè tèwuute èyɨt e bɔ èghaa tsa tsa la, nè èghɨ bɔ nɨ àsɔŋ èso̧ ngɨ̀ la, nè èghɨ ègème bɔ nɨ èyɨt àà ntsòa ètsəê la ngɨ̀ la, mè nè èghɨ bɔ nɨ ngule ètɨ̧ɨ̧na nè ngule àti ngɨ̀ la.

¹³Nè èghɨ e bɔ èghaa ntsɔ̧̀ la, mbɨ̀Ꞌɨ̀ àyɨt ko bɔ̀ɔ ntɔ ane sinamɔ̀n la, nè tènùꞋatsə, nè mèwet kǒ bɔ̀ɔ nto̧a la, nè məə, nè èwuu èlȩê ko, nè mèlùꞋ nè mèwet, nè flawà ntsɔ̧̀ nè èwuu ntsəètè ko nè mpɔ̀ŋtsə nè njɨ̀tsə, nè bèloà, nè bèmatùà ko bèloà àa səèà la, ndɔ̀Ꞌ nè èbùꞋ, è wu bɔbȩ la.

¹⁴Bòt tèwen bu e shu abua tò nê, “Èghɨ bu ègème à zi èntɨ̧ɨ̧ wê adù̧ la e te ntsě, èghɨ bu à li ngua nəèꞋà àwê a èbèm la, e ghà tè à ka wu li tsi ye bùà.”

¹⁵Bòt tèwen bu bɔ li ngua nta èwen bɔ̂ tò ba tè ntsìꞋi bòt èkab la, aa tɨ̧ɨ̧ a èndɨ̌ bɔ̀ɔ mbɔ̀ɔ ngoꞋ yu ndzea tò la. Bɔɔ me dɨ̀a shùà mèsi shua nê,

¹⁶“Èe e! Èe e! A bɨa àpfəèà nɨ̧ yu ɔɔ̀! Àpfəèa nɨ̧ yu a li ngwèà àvi mbɨ̀Ꞌɨ̀ àvi nè ngule ndìte kèfə, nè ète membaŋ, nè èghɨ bɔ ghɨ ane goêl, nè àti àa nkàꞋtà la, ndɔ̀Ꞌ nè pel, è wu èghɨ ngwȩ̀ la.

¹⁷Èghɨ tò bu ègème e bê mbɨ̌ ane nyèm yemɔ̀Ꞌ.” Bòt bu àtsə ènkànuꞋ la, nè bòt bu ngȩ̀ȩ̀nà a èbem ènkànuꞋ la, mè nè bòt bu àfàꞋ àyɔb à wu a èbem *èdzî la, e tɨ̧ɨ̧tè a endɨ̌ mɨ̧̂,

¹⁸me ŋȩ mbɨ̀Ꞌɨ̀ àpfəèà nɨ̧ yu àa shɨa ndiꞋtsə te kɔꞋɔ ngà a ègwet la. Bɔ li ngua ŋȩa shua nê, “Àpfəè àko a te bakà wu mbɨ̀Ꞌɨ̀ àpfəèà nɨ̧ yàa.”

¹⁹Bɔ ghɨ̀ ale, me pfəèꞋə àbeb a ètsə bɔb ndɨ̀à shùà mèsi ŋȩ̀a shua nê, “Èe e! Èe e! A bɨa àpfəèà nɨ̧ yu ɔɔ̀! Àpfəèa mbɔŋ a li ngɨ̀ bòt bɔ bɔ taꞋa ènkànuꞋ àa ngȩȩna a èbem *èdzî la, e tsiꞋi bòt èkab nkàà èghɨ tò. Èghɨ bu ègème e bê ntɨ̧ɨ̧ ane nyèm yemɔ̀Ꞌ mbɨ.

²⁰Ègwet, wùꞋtè àwê nkàà ndɨ tà kwen la. Bòt Mbɔ̧ɔ̧mà nè bɔntu̧ Mbɔ̧ɔ̧mà, nè bèndàꞋàtɔŋ Mbɔ̧ɔ̧mà leꞋ, bɨ̀ wùꞋtè àwɨ̧, Babilɔ̀n è kwen. Mbɔ̧ɔ̧mà nɔ̀ŋe ngoꞋ a ègwet tò nkàà àghɨa tà li ngɨ̀ ane yɨ̧ la.”

²¹ÀfɨꞋa mbɔŋ àghɨꞋna wantu̧ Mbɔ̧ɔ̧mà kǒ a vi èti ko àa mbɨꞋɨ̀ taꞋa èti màngɔꞋɔ èghɨ la, màꞋa a èbem *èdzî me shu nê, “Eyaa wu ndɨ bɔ̀ɔ màꞋa àpfəèà nɨ̧ a Babilɔ̀n a si ane ètɨ̧̂, tè wòt kà wu li tsi e ye yùà la.

²²Àtɔŋ bèlèkɨŋ, nè bènduꞋa àben, nè bòt màntɔ bafɨ̀, mè nè èbe màntɔ tèsɔnkendɨk, è ka li tsi ŋwȩ a èbem àpfəa mbɔŋ a. Bɔ̀ kà li tsi ye ka wuê wòt wemɔ̀Ꞌ ane bòt bɔ̀ɔ nkɔ̧̀a èghɨ kò mbàꞋa èghɨ la abot a. Bɔ̀ ka meè ngu tsi e zə ndɨ èti màngɔꞋɔ èghɨ àa ndàꞋà la.

²³ÈkaꞋà è ka li tsi e beꞋe abot a, bɔ̀ ka wu tsi e li zə àtɔŋ ndzà bɔ̂ lu̧ vi. Bòt bɔ li ngua nta èwen bɨ tò ba la li ngu bòt kekweelè a sitsǎꞋ, à mè nɨ tèkàŋ tê nɨŋ fɨ̀te bòt ngɔ̀ŋ bàgème.

²⁴Àlo̧ a bèndàꞋàtɔŋ Mbɔ̧ɔ̧mà, nè àyea bòt Mbɔ̧ɔ̧mà, ndɔ̀Ꞌ nè àyea waa waa bɔ li mbùŋe a sitsǎꞋ la, à le wu a èbem àpfəèa mbɔŋ.”