Read Mundani Ètsə 22 Bible Online

Ètsə 22 - Mundani bible

Ètsə 22

¹Wantu̧ Mbɔ̧ɔ̧mà wu è ghɨ̀ ale, mè nyɨ̀Ꞌte am èdzî ko àa ŋa mèmpème la, e me kàꞋtè mbɨ̀Ꞌɨ̀ àlùgɨ̀lâ. Èdzî mbɔŋ e dzə adù̧ àtɨ̧a kèfɔ̧̀ a Mbɔ̧ɔ̧mà bɔ̂ Wanjɨ̀ wu,

²me chua ntsèà a kètsìà èlu̧ wu a èbem àpfəèà nɨ̧ yu la. Àyɨt yu àa ŋa mèmpème la, a tɨ̧ɨ̧ àbâ èdzî mbɔŋ bebe, me kɔɔle tètaãaãtsə tsa tsa ane èŋu ègème ane èngùꞋebȩ. TèfəꞋte àyɨt a mbɔŋ wu èghɨbə àa mbəa bòt èlaꞋ ègème la.

³Àghɨa ko ndɔ̀ Mbɔ̧ɔ̧mà nɔ̀ŋke a ègwet la, à ka wu ewu a èbem àpfəèà nɨ̧ a mbɔŋ. Àtɨ̧a kèfɔ̧̀ a Mbɔ̧ɔ̧mà bɔ̂ Wanjɨ̀ wu aa wu abot, bɔfàꞋ tò e mè ngu me wùꞋte atò abot.

⁴Bɔɔ li e ye èsi Mbɔ̧ɔ̧mà, èlen tò e mè ngu wu a mèsi mɔb.

⁵Ndzěm ka li tsi wua, bòt è ka wu li tsi e me kɨ mèkàꞋà kò nyèm leꞋ, nkàà nê Mbɔ̧ɔ̧mà Lefɨ̀Ꞌ naa li wu èkaꞋà wɔb, bɔ mè ngu li e me baãaã ngɔ̀ŋ ane àlia nè àlia.

⁶Wantu̧ Mbɔ̧ɔ̧mà wu mè shu abua am nê, “Eyaa wu mèngǎ̧ nkûŋ, è kùꞋu me wòt nàa bɨ̧ɨ̧ne la. Mbɔ̧ɔ̧mà Lefɨ̀Ꞌ wu tàa ndzìà Fo zi ane bèndàꞋàtɔŋ bi, bɔ làꞋà èngǎ̧ tò la, è tsàà wantu̧ vi nê tà kɨꞋɨ nyɨ̀Ꞌte bɔfàꞋ bi àghɨa à bele nyàŋe e ghɨ̀ la.”

⁷Yesò nê, “Bɨ̀ zə, e mbele yàŋe kɨꞋɨ. Ntsɔ̧̀ wu wòt wu tàa nɔ̀ŋà èghɨ bu bɔ li shu bɔ shɨ a èbem àkatè yaa la.”

⁸Wu mmɔ̌ Jɔ̌n e ndi ndzə, mè ndze èghɨ bàa la. Mbɨ̀Ꞌɨ̀ mâ zə mè ndze bùà la, e mbɔ̀te a si a mbì wantu̧ Mbɔ̧ɔ̧mà wu tà nyɨꞋte am èghɨ bàa la, nê e nkɨ wùꞋte atò,

⁹tà shu abua am nê, “Ka ngɨ̀ ale. E ngu wafàꞋ wuê mbɨ̀Ꞌɨ̀ àwɔ̀ nè bɔnyɨ bè bu è wù bèndàꞋàtɔŋ la, mè nè bòt bu bàgème bɔ̀ɔ ngɨ̀à àghɨa bɔ shɨ a èbem àkatè yaa la. WùꞋte wuê a Mbɔ̧ɔ̧mà.”

¹⁰Tà mè shu abua am nê, “À ka ndò̧ mèngà̧ mu bɔ li shu bɔ shɨ a èbem àkatè yaa la, nkàà nê àfɨꞋa èghɨ mbɔŋ àa ghɨ̀ la a tsiꞋa nkùꞋà.

¹¹Waa waa tàa ngɨa kàbɔ̀ŋ la, me ghɨ̀à ngà wuê nè mbì, we tàa ngɨ̀à èbɨꞋte ènəê la, me ghɨ̀à ngà wuê nè mbì. Wòt tàa ngɨ̀à mènəè ntsɔ̧̀ la, me ghɨ̀à ngà wuê nè mbì. Wòt tà wu wòt Mbɔ̧ɔ̧mà la, mě me ŋa avi wuê abua Mbɔ̧ɔ̧mà.”

¹²Yesò nê, “Bɨ̀ zə, e mbele yàŋe kɨꞋɨ nè àbȩ̀, e tsɔꞋɔ àfàꞋa wòt ègème ane àghɨa tà ghɨ̀ la.

¹³E ngu mbì nè kwèn, àtsə nè lə, MèmbùꞋu nè Mèndìa.”

¹⁴Ntsɔ̧̀ wu bòt bu bɔ shùu ndǐ tɔb tè te fəətè la. Wu àdziꞋa yɔb bɔ̀ɔ jɨ tètaãaãte àyɨt yu àa ŋa mèmpème la, e mě tse a ètsəêkaã àpfəèà nɨ̧ yu enyi a èbèm.

¹⁵Bòt bu kà wu li nyi a èbem àpfəèà nɨ̧ yu la, wu bòt bu bɔ̀ɔ ngɨ̀à mbɨ̀Ꞌɨ̀ babə la, nè bɔtebə, nè bòt bɔ̀ɔ njɨ̀a ngò̧ò̧tètsə la, nè bòt bu bɔ̀ɔ mbùŋà bòt la, nè bòt bɔ̀ɔ ngùꞋtà bènàmbəa la, ndɔ̀Ꞌ nè bòt bu bàgème bɔ̀ɔ nkɔ̀ŋkà àfɨte mè ndàꞋà àyùà la.

¹⁶“Mmɔ̌ Yesò mâ tsàà wantu̧ am abua yɨ̧ nê tà kɨꞋɨ shu awɨ̧ mènəè maa, bɨ̀ shu abua bèchɔsì. E ngu èntaãaã e tu a àndǎ̧ Fɔ̧̀ Dàbid la, kěnto̧ ntɔtetsɔ̌Ꞌ kèa nkàꞋtà la.”

¹⁷Fo Mbɔ̧ɔ̧mà bɔ̂ ndzà Wanjɨ̀ wu e nê, “KɨꞋɨ.” Wòt ègème tà zə èngà̧ waa la è bɔ ndɨ tàa shu azi mɨ̧̂ nê, “KɨꞋɨ” la. Wòt àtɔŋ tò a yu̧u̧ la kɨꞋɨ, we tàa nkɨà la kɨꞋɨ nɨ mèleb mu nàa ŋa mèmpème la àku.

¹⁸Maà səèŋkà àtû̧ a waa waa tà zə mèngà̧ maa bɔ li shu bɔ shɨ a èbem àkatè yaa, la nê, wòt kwèꞋnà àghɨ adù̧, ko Mbɔ̧ɔ̧mà nàa kwèꞋne ngoꞋ tu tègème bɔ shɨ a èbem àkatè yaa la adù̧ ngoꞋte tò.

¹⁹Wòt mè ntsì àghɨ ane mèngà̧ maa bɔ li shu bɔ shɨ a èbem àkatè yaa la, ko Mbɔ̧ɔ̧mà nàa tsì èwe tò nè èghàb ane tètaãaãte àyɨt yu àa ŋa mèmpème la, e mě tu̧u̧ nê tà ka nyi a èbem àpfəèà nɨ̧ yu. Eyaa wu èghɨ bɔ shɨ a èbem àkatè yaa la.

²⁰Wòt wu tà shu nê èghɨ bàa wu nkûŋ la, è laꞋnê, “Ane nkûŋ, e mbele yàŋe kɨꞋɨ.” Àmèn, Yesò Lefɨ̀Ꞌ, kɨꞋɨ.

²¹Maà shù̧ù̧ta nê Yesò Lefɨ̀Ꞌ nyɨꞋte a ntsɔ̧̀ vi abua bòt Mbɔ̧ɔ̧mà bàgème. Àmèn.