Read Mundani Ètsə 6 Bible Online

Ètsə 6 - Mundani bible

Ètsə 6

¹AfɨꞋa mbɔŋ e me ye Wanjɨ̀ wu nà̧à̧nè àdziꞋa mbì ane èdziꞋi èmènà bu besà̧à̧mbe ane àkatè yu la. Tà nà̧à̧nè ale e me zə àghɨ ko ane èghɨ bu bekwì è wu yu̧ la a ŋȩ ane àtɔŋ ko mbɨ̀Ꞌɨ̀ èfâŋ nê, “KɨꞋɨ!”

²E mè ndɨ̀ŋkè me ye, ndzèa loà kèfə. Wòt tà tsekè a ègwet la bèà nkeꞋ àbu azi, bɔ mè ŋa ntà̧ kèfɔ̧̀ abua tò. Tà dzə nga àbȩ mbɨ̀Ꞌɨ̀ wòt tà nù tê ntsè mè ngu nû e tsè la.

³Mbɨ̀Ꞌɨ̀ tà nà̧à̧nè àdziꞋa àmènà bebe la, e mè me zə àyea bebe ane è eghɨ̀ bu bekwì è wu yu̧ la a nê, “KɨꞋɨ!”

⁴Loà kǒ mè ndzəè àbȩ me beꞋe. Bɔ ŋa mètàŋ abua wòt tà tseke a ègwet la, tàa ghɨ̌ bòt aa baka tsi ngua ntsèka ane àlàŋkè nè bɔnyɨ bɔb a sitsǎꞋ ŋàa, mbɨ̀Ꞌɨ̀ bòt aa me bùŋè bɔnyɨ bɔb. Bɔ ghɨ̀ ale, mè ŋa taꞋà nyi abua tò.

⁵AfɨꞋa tà nà̧à̧nè àdziꞋa àmènà yu, è wù àyea betat la, e mè me zə àyea bekwì ane èghɨ bu bekwì è wu yu̧ la, a nê, “KɨꞋɨ!” E mè ndȩ̀ me ye loà kèfen dzə àbȩ. Wòt tà tseke a ègwet la bèà kilò bɔ̀ɔ nɨ̀a fɨ̀Ꞌtà èghɨ la àbu azi.

⁶E ndzə àghɨa ko mbɨ̀Ꞌɨ̀ àtɔŋ wɔ̀bȩ̂ a dzəa kètsìà èghɨ bu bekwì è wu yu̧ la, a nê, “Ghɨa bòt è me nɨ èkab àfaꞋa àliabȩ ka njû̧a akaŋ flawà wemɔ̀Ꞌ kò njù̧a bakaŋ ngààle babe leꞋ. Ka tsiꞋ mèwet bɔ̀ mèlùꞋ ka mbuŋ.”

⁷AfɨꞋa tà nà̧à̧nè àdziꞋa àmènà yu, è wù àyea bekwì la, e mè me zə àyea bekwì ane èghɨ bu bekwì è wu yu̧ la, a nê “KɨꞋɨ!”

⁸E mè ndȩ̀ ndzea loà kǒ mbɨ̧̀ tò è nɔ̀ŋkè mbɨ̀Ꞌɨ̀ è fəa la, èlen wòt wu tà tseke a ègwet la wu Èvə. ÀlaꞋ a bèmpfəà a me kùŋe atò. Bɔ ŋa wɔb mètàŋ nê bɔ̀ nɨ nyi ebà bebe nè èchɨɨ, nè àghɔ̧, ndɔ̀Ꞌ nè banyaãbàꞋ è ndììme bòt sitsǎꞋ. Bɔ ghàbtà bòt sitsǎꞋ ane ebà bekwì, ko wu àbâ yeamɔꞋ bɔ̀ɔ liime la.

⁹ÀfɨꞋa tà nà̧à̧nè àdziꞋa àmènà yu betà̧â̧ la, e ndze èlɨ̀ŋkè bòt bu bɔ li mbùŋè àwɔb nkàà ndɨ bɔ li ngua ntsɔ̀tà èngǎ̧ Mbɔ̧ɔ̧mà mè me shu nê bɔ̀ bɨ̧ɨ̧ne èngǎ̧ mbɔŋ la. Èlɨ̀ŋkè mbɔŋ e li ngu a èten àdziꞋ yu bɔ̀ɔ ntò̧à banyà̧ ŋa abua Mbɔ̧ɔ̧mà la.

¹⁰Bɔ me ŋȩ kwàꞋ ànyaꞋne shua nê, “Àwɔ̀ Tǎt wa Mbɔ̧ɔ̧mà Àtsèàngɔ̀ŋ, àa tsa ane àghɨ àgème, nkûŋ mè me dzə wuê abua ye. Bàa tseke tê eghǎ ewua ka àfɨꞋa, ka àa saꞋa bòt bu bɔ li mbùŋè awa a sitsǎꞋ la, e zi awɔb a èbem ngoꞋ à?”

¹¹Bɔ mè ŋǎ èmà̧ kèfə abua wòt ègème ane yɔb. Bɔ ŋa ale mbɔ̂ shu abua yɔb nê bɔ̀ mě ntsèke ane àfɨ̀Ꞌ àko, tè kèmpà̧ bɔnyɨ bɔb bu bɔ̀ wu bɔfàꞋ Mbɔ̧ɔ̧mà mɨ̧̂ la ghɨa nkùꞋ. Eyaa wu bòt bɔ li mbɔ ndɨ bɔ̀ɔ bùŋe mbɨ̀Ꞌɨ̀ bɔ li mbùŋè èbaa nè bòt la.

¹²Mbɨ̀Ꞌɨ̀ tà nà̧à̧nè àdziꞋa àmènà yu, è wù àyea bentùa la, e me ye sitsǎꞋ bente kwàꞋ ànyaꞋne. Àtaãnyèm a tsiꞋa fèna mbɨ̀Ꞌɨ̀ ndǐ kèfen, àtaã èŋu a tsiꞋa mbèꞋa mbɨ̀Ꞌɨ̀ àlo̧.

¹³Těnto̧tsə te lɔꞋte a ègwet nkwènte a sitsǎꞋ mbɨ̀Ꞌɨ̀ àfeme à kekweelè àa ngɨ̀ à tsea à nyìꞋì èyɨt tètaãaãtsə te kwentè la.

¹⁴Ègwelebuule e lebe mbɨꞋɨ̀ matà nyɔ̂. Tèbȩtsə tègème nè èdziꞋi si èyuube a èbem *èdzî e lɔꞋte adziꞋi e ghɨ ngu la.

¹⁵AfɨꞋa mbɔŋ bèfɔ̧̀ sitsǎꞋ bàgème, nè bòt nɨ̧, nè bètǎt bèshujà, nè bòt èkab, nè bòt kekweelè, nè bòt bàgème, èbùꞋ, nè bòt kà wu èbùꞋ e ghà ndò̧ò̧tè a èbem mbəèꞋtsə nè èbem tèbȩtsə.

¹⁶Bɔ lò̧ò̧te ale me shu abua tèbȩ tu nè àti yu nê, è kabte awɔb mbɨ̀Ꞌɨ̀ ka wòt wu tà tseke a ègwet àtɨ̧a kèfɔ̧̀ yu la ye awɔb, Wanjɨ̀ wu mè nɔ̀ŋè ngoꞋ a ègwet lɔb.

¹⁷Àlia bɔ̀ɔ nyɨꞋte ntsǒ yɔb la a kùꞋ. Wòt wu betsiꞋa tà ko ntɨ̀ŋe avi zìambɔŋ ane àli yaa la wu wàà?