Read Murui San Lucas 1 Bible Online

San Lucas 1 - Murui bible

San Lucas 1

¹Teófilo, cue isiruiga nabai. ¿Nɨgacɨno? Omo bie cartana oredɨcue. Caɨ motomo birui dɨga rafue jai suide. Jesucristo rafuena omo cuetɨcue. Naimɨe billa mei, dɨga comɨnɨ naimɨemo suide rafuena cɨodɨmacɨ. Iena llocana jɨaɨ jaidɨmacɨ. Naimacɨmona bie rafue raise uiñotɨcue. Bie rafuena fɨdɨanona, damɨerie iena jai cuetɨmacɨ. Bie rafuena jɨaɨ jai cacadɨo. Bie rafuena cue raise uiñua jira, uanaicɨnona o raise uiñollena, bie cartana jai cuetɨcue. Iese birui cue comecɨ jitaide. Jusiñamui jaɨenicɨ Juan Bautista mɨcorɨ jeicɨllena llua rafue.

⁵Jesucristo nia jeicɨñenia, Zacarías illa facaise Herodena mamecɨrede illaɨmadɨ. Judea railla enɨruena sedade. Zacarías Jusiñamui dɨga ñaɨraɨma. Abías raillasie facaimo duillamona, Jusiñamui jofomo maɨjɨuide. Naimɨe aɨdɨ Elisabet. Naiñaiño jaie ite usumadɨ Aarón mɨcorɨ. Aarón mɨcorɨdɨ Jusiñamui dɨga nano ñaɨraɨma.

⁶Jusiñamuimona iaɨmaiaɨ mare, nana naimɨe lloga uaina raise iaɨmaiaɨ ɨɨnua jira.

⁷Naiñaiño oɨniñona jira, uruenidɨaɨmaiaɨ. Jɨaɨ jai uaɨcɨma iaɨmaiaɨ.

⁸Zacarías facai ite comɨnɨ maɨjɨa facaise ia, Jusiñamui jofo dɨne naimɨe maɨjɨaide.

⁹Nainomo naimɨe maɨjɨia, caɨmare soride ra fo jobaillena, naimɨena fetodɨmacɨ. Naimacɨ fɨnouilla isoi, jobaillanona danɨ Jusiñamui dɨga ñaɨraɨnɨ naimɨena fetodɨmacɨ. Iemei naimɨe fo jaide.

¹⁰Fo jailla mei, naie caɨmare soride ra boa facaiseconi, Jusiñamui dɨga naimɨe ñaɨano, ailluena comɨnɨ Jusiñamui jofo ecɨmo itɨmacɨ.

¹¹Ieconi caɨ Nama Jusiñamui jaɨenicɨdɨ naie ra boano nabeimo Zacaríamo bairede.

¹²Naimɨena cɨuanona, Zacarías jacɨnaite.

¹³Jaɨenicɨ naimɨemo llote: —Zacarías, jacɨnaiñeno. Jusiñamui o jɨɨacɨnona jai cacade. Iemona o aɨ uruesite. Ɨimana jocoite. Juan o jɨtalle naimɨe mamecɨdɨ.

¹⁴Iemona o comecɨ caɨmare iite. Iobitɨo. Ailluena comɨnɨ naimɨe jeicɨari iobitɨmacɨ.

¹⁵Jusiñamuimona naimɨe jamai bue isoiñeitɨmɨena jaite. Jɨfaitate rana jiroñeite. Naimɨe jeicɨamona Jusiñamui Joreño naimɨena namataite.

¹⁶Caɨ Nama Jusiñamui dɨbeimo ailluena Israel comɨnɨna naimɨe itataite.

¹⁷Jusiñamui jitaillacɨnona fɨnocana jaite. Elíamo Jusiñamui Joreño jaie siño uai illa isoi, naimɨemo iite. Jusiñamui rafuena naimɨe lluamona, damɨerie, naimacɨ jaiagaɨ isoi, Jusiñamuina ɨɨnoitɨmacɨ. Ailluena Jusiñamui uaina jai ɨɨnoñedɨmacɨ; ia damɨerie birui ɨɨnoitɨmacɨ. Naimacɨ comecɨaɨ Jusiñamui dɨbeimo meidoitɨmacɨ. Iemona caɨ Nama Jesucristo bia, naimɨena ɨɨnoitɨmacɨ.

¹⁸Zacarías dɨnena jɨcanote: —¿Nɨese o llua suillena uiñoitɨcue? Jai uaɨcɨmadɨcoco.

¹⁹Jusiñamui jaɨenicɨ dɨnena uai ote: —Gabrieldɨcue. Jusiñamuimona bitɨcue. Cuena oretate, bie mare rafuena omo llollena.

²⁰Ero, cue uaina o ɨɨnoñena jira, uainitɨo, o jito jeicɨlle dɨnori. Jɨaɨruido bie rafue suite.

²¹Jusiñamui jofomo jino itɨno Zacarías jino billena sedadɨmacɨ. “¿Bue ñellena naimɨe are biñede?” comecɨaɨna facadɨmacɨ. Naimɨe jino are biñena jira, raijicaidɨmacɨ.

²²Naimɨe jino bitemo, naimacɨ dɨga jai ñaɨnide. Ie onollɨ dɨga facajamona, Jusiñamui jaɨenicɨ naimɨemo jai lluana uiñotɨmacɨ. Naimɨe ñaɨñeno ite.

²³Jusiñamui jofomo naimɨe maɨjɨa facaise fuilla mei, ie jofomo abɨdo jaide.

²⁴Dɨgarui illanona, ie aɨdɨ urueside. Ie jira jofomo naiñaiño cinco fɨvui fɨebide, comecɨna facajanona:

²⁵“Cue uruesilla jira, iena nia buna lloiacaiñedɨcue. Cue Nama cuena jai duenaillana uiñotɨcue. Navui cue urue iñena jira, meiruitɨcue. Jai meiruiñeitɨcue. Comɨnɨ cue joreñona jai ñaɨñeitɨmacɨ”. Jusiñamui jaɨenicɨ Jesús jeicɨllena llua rafue

²⁶Elisabet seis fɨvui uruesilla mei, Jusiñamuidɨ Galileamo ie jaɨenicɨ Gabrielna orede. Nazaretmo María dɨne naimɨena orede. María nia ɨninide; ia jai José jɨcanogañaiño. Naimɨe usumadɨ David mɨcorɨ.

²⁸Rillanona, naiñaiñomo llote: —Itɨo. Caɨ Nama Jusiñamui ona eo duenaite. Ona jai fetuamona, nana jɨaɨe rɨñonɨaɨ baɨfemo naimɨedɨ ona marena itatate.

²⁹Iena cacajanona, naiñaiño jacɨnaite. Iena naiñaiño raise cacaiñena jira, iemo comecɨna facade.

³⁰Gabriel dɨnena llote: —Jacɨnaiñeno. Jusiñamui ona duenaite.

³¹Birui uruesitɨo. Ɨimana jocoitɨo. Naimɨe mamecɨna jɨtaitɨo Jesúna.

³²Siño Jitona jaite. Nanoca Itɨmɨe Jitona jaite. Ie usuma David mɨcorɨ illaɨma illa isoi, Jusiñamuidɨ naimɨena illaɨmana itataite.

³³Illaɨmana illamona, Israel railla naɨraɨna jaca sedaite. Naimɨe ifomo jɨaɨmɨe jaca iñeite.

³⁴María uai ote: —Ɨima dɨga nia iñedɨcue. ¿Nɨese bie nɨbaɨlle?

³⁵Gabriel llote: —Jusiñamui Joreño omo iite. Ie siño uai dɨga iena fɨnoite. Jusiñamui marena isoi naimɨe jɨaɨ marenite. Naimɨedɨ Jusiñamui Jito.

³⁶O comɨnɨ iñaiño, Elisabet, ie uaɨcɨtailla facaise jɨaɨ jai urueside. Naiñaiño jai jionaide; ia jai seis fɨvui naiñaiño uruesilla ite.

³⁷Jusiñamui nana bie isoide rafuena fɨnorede.

³⁸María uai ote: —Jee. Jusiñamui anamo itɨcue. O lluacɨno cuemona mare. Ie facaise Gabriel naiñaiñomona oni jaide. Maríadɨ Elisabet dɨne jailla rafue

³⁹Ie facaiseconi María aneduaɨ dɨne Judea railla enɨruemo Zacarías illanomo raɨre jaide. Elisabetna cɨoillena, jaide.

⁴⁰Zacarías jofomo rillano: —Itɨo —raillanona, Elisabetna uaidote.

⁴¹Elisabet naiñaiño uaina cacajano, ieconi naiñaiño jeraimo ite urue iena jɨaɨ uiñuamona, niraɨde. Ie facaise Jusiñamui Joreño anamo Elisabet jai ite.

⁴²Iese illamona, María uruesillana uiñote. Naiñaiño ado llote: —Jusiñamui ona eo marena canoite. O uruena marena itataite.

⁴³Jamai bue isoidɨcue; ia, odɨ cue Jilloitaraɨma ei illanona, cue dɨne bitɨo. Iena cuemo nia lloñedɨo;

⁴⁴ia, cuena o uaiduanona, iobillamona cue jeraimo ite uruedɨ niraɨde.

⁴⁵Caɨ Nama omo llotataga uaina suillana o ɨɨnua jira, Jusiñamui ona eo marena canoite. —Jusiñamui Joreño naiñaiñomo illamona, iena llote.

⁴⁶María dɨnena uai ote:Caiñaɨ Nama eo mare. Naimɨemo iobillacɨnona fecaacadɨcue.

⁴⁷Naimɨedɨ cue Jilloitaraɨmana jira, naimɨeri iobidɨcue.

⁴⁸Jamai bue isoidɨcue; iadedɨ cuena fetode.Ie jira biruimona nana comɨnɨ cuena marena ñaɨtɨmacɨ.

⁴⁹Naimɨedɨ siño. Naimɨedɨ mareuidɨmɨe. Cue facaina eo mare rafuena fɨnode.

⁵⁰Naimɨena ɨɨnotɨnona jaca duenaite. Caɨ jaiagaɨna jaca duenaite. Caɨna birui jaca duenaite. Ua nana naimɨena ɨɨnotɨnona duenaite.

⁵¹Dɨga siño rafuena fɨnoite. Abɨ ɨedotɨno comecɨaɨ facajacɨnona llɨɨcaitaite.

⁵²Naimɨedɨ illaɨcomɨnɨna oni dotaite; ia jamai bue isoidɨnona jamai bue isoiñedɨnona itataite.

⁵³Dueredɨnona eo canoite; ia duenidɨnomo buena fecañeite.

⁵⁴Duenaillamona, caɨ Israel comɨnɨna feitañeite.

⁵⁵Caɨ jaiagaɨmo naimɨe jaie llua isoi, birui caɨna canoite.Abraham mɨcorɨmo jaie llote: “Ona duenaitɨcue. O comɨnɨna jaca duenaitɨcue” María llote.

⁵⁶Elisabet dɨga davui amani naiñaiño fɨebide. Ie mei ie jofomo abɨdo jaide. Zacarías jito jeicɨa rafue

⁵⁷Elisabet jocuarui jai ridemo, ɨimana jocode.

⁵⁸Naiñaiño ecɨmo ite comɨnɨ, naiñaiño comɨnɨ dɨga, iena fɨdɨamona, caɨ Nama naiñaiñona eo duenaillana uiñotɨmacɨ. Naiñaiño dɨga iobidɨmacɨ.

⁵⁹Ocho dɨgarui jeicɨa mei, naimacɨ fɨnouilla isoi, urue abɨna dia rafuemo bitɨmacɨ. Ie moo mamecɨna jɨtaacadɨmacɨ;

⁶⁰iadedɨ Elisabet llote: —Dama ite. Jitaiñedɨcue. Naimɨe mamecɨdɨ Juan caɨ jɨtalle.

⁶¹Uai otɨmacɨ: —¿Bue ñellena iese raitɨo? O comɨnɨmona jaca bu Juan mamecɨredɨmɨena iñede.

⁶²Jefona cacaiñena jira Zacaríamo onollɨ dɨga jɨcanotɨmacɨ, ie jito mamecɨna jɨtallena.

⁶³Onollɨ dɨga Zacarías faɨriuano, rabena jɨcade. Cuete: “Naimɨe mamecɨdɨ Juan”. Ieri raijicaidɨmacɨ. “¿Bue ñelle iena jɨtade?” comecɨaɨna facadɨmacɨ.

⁶⁴Ieconi Zacarías jai dane ñaɨte. Ie jira Jusiñamuimo iobillacɨno fecade.

⁶⁵Nana iaɨmaiaɨ ecɨmo itɨno raijicaidɨmacɨ. —Jusiñamui muidona naie rafue suide —llotɨmacɨ. Bie rafuena fɨdɨano, nana Judea railla aneduaɨmo itɨnodɨ iena ñaɨoidɨmacɨ.

⁶⁶Iena cacajano, comecɨaɨna facadɨmacɨ: “Bimɨe jamai bue isoiñeitɨmɨena jaite”. Caɨ Nama naimɨena marena jaca canua jira, iese llotɨmacɨ. Zacarías Jusiñamuimo iobillacɨnona fecaja rafue

⁶⁷Ie facaise Jusiñamui Joreño Zacaríana llotatajanona, Zacarías llote:

⁶⁸Caɨ Nama Jusiñamuidɨ mare.Caɨ Israel comɨnɨ dɨne biite, caɨna jilloitallena.

⁶⁹David mɨcorɨ Jusiñamuina jaie sedade.David mɨcorɨ comɨnɨmona siño Jilloitaraɨmana caɨ dɨne oretaite.

⁷⁰Ie facaina lloraɨnɨdo naimɨe jaie llua isoi, caɨ Jilloitaraɨmana oretaite,

⁷¹Taɨfemona, Janabamona caɨ jilloillena.

⁷²Caɨ usumatɨaɨ mɨcorɨaɨmo: “Omoɨna duenaitɨcue” llote.Caɨ usuma Abraham mɨcorɨmo jaie llogacɨnona feitañede.

⁷³Taɨfemona caɨ jilloillena, caɨ Jilloitaraɨmana oretaite.Nana caɨ ille dɨnori Jusiñamuina jacɨruiñeno sedajana jitaide.Naimɨe jitailla isoi caɨ illena, naimɨe jitaillacɨnona caɨ fɨnollena, caɨ Jilloitaraɨmana oretaite.

⁷⁶Cue jito, ona lloitɨcue. Jusiñamui ie lloraɨmana jaitɨo.Caɨ Nama uicomo jaitɨo, comɨnɨ comecɨaɨ o raise fɨnollena.

⁷⁷Ie comɨnɨmo jeacɨnomona jilluacɨnona lloitɨo.Iena naimacɨ ɨɨnoia, Jusiñamui naimacɨ jeacɨnona feitaite.

⁷⁸Jeacɨno anamo jai caɨ illa jira, jitɨredɨnomo itɨcaɨ isoidɨcaɨ.Jusiñamuina caɨ nia ɨɨnoñenia, fiodaillana jacɨruitɨcaɨ.Naimɨe caɨna duenaillamona, caɨ Jilloitaraɨma billena o llofuellena, ona oretaite.Naimɨena caɨ ɨɨnoia, jitɨredɨnomo iñeitɨcaɨ; ia Jusiñamui dɨga caɨ comecɨaɨ uri iite.

⁸⁰Zacarías jito sairide. Jusiñamuina ɨɨnocana jaide. Comɨnɨmo naimɨe nia marefodo lloñenia, jofue iñenanomo ite.