Read Murui San Lucas 17 Bible Online

San Lucas 17 - Murui bible

San Lucas 17

¹Ie llofueoicaiganomo Jesús llote: —Dɨga ramo omoɨ faɨcana uitɨnomo riitomoɨ. Omoɨ ramo faɨtɨmɨe duere sefuite. Jusiñamui omoɨ ramo faɨtɨmɨena duere fɨnoite.

²Como creyentena jaidɨmɨena ramo bu faɨa, naimɨe cɨmaɨomo aillue nofɨcɨ maɨanona, joraimo corobaillena naimɨena dotacadena, mare.

³Como creyentena jaidɨmɨena ramo omoɨ faɨñellena, abɨna omoɨ rairui. O ecɨmo itɨmɨe ona jeare fɨnoia, naimɨemo iena llono. Ie comecɨna meidoiacania, naimɨe jearede fɨnoca rafuena feita.

⁴Nagarui dɨga icaiño ona jeare naimɨe fɨnoia, naga icaiño o dɨga naimɨe marena dane ñaɨacania, naie rafuena feita. Jesúdɨ naimɨena ɨɨnuana llua rafue

⁵Ie doce llofueoicaigano Jesúmo llote: —Ona ɨɨnotɨcaɨ; ia caɨna o uaina eo ɨɨnota.

⁶Uai ote: —Jusiñamuina eo janore ɨɨnotomoɨdena, bene ite amenamo omoɨ lloia: “Benomona jai. Joraimo sɨco”, naie amena omoɨ uaina ɨɨnote. Jesúdɨ ie facaina llofueoicaigano maɨjɨa llua rafue

⁷Ie llofueoicaiganomo Jesús llote: —Bie rafuemona omoɨ fueollena, iena lloitɨcue. Illɨmo ie mullaɨma maɨjɨamona, ie toɨnɨaɨ sedajamona jofomo abɨdo naimɨe ria, ie patrón naimɨemo lloñeite: “Mai nano guisaɨbi”;

⁸iadedɨ naimɨemo lloite: “Cueɨena guillena nano fɨno. Cuena eca. Ie mei guitɨo”.

⁹Naie mullaɨma ocuica rana fɨnua muidona, mullaɨmana naimɨe illa jira, ie mullaɨmamo patródɨ iobillacɨnona fecañeite.

¹⁰Ie isoide. Nana cue lluana omoɨ fɨnodomoɨna, danɨ omoɨ maɨjɨadɨ, cue comɨnɨna omoɨ illa jira, cuemona iobillacɨnona feiñoñeitomoɨ. Jesúdɨ diez efonaitɨnona jillotaja rafue

¹¹Jerusalémo ie llofueoicaigano dɨga Jesús jaidemo, naimɨe nabeimo Samaria enɨrue ite. Naimɨe jarɨfebeimo Galilea enɨrue ite.

¹²Naɨraɨ dɨne naimɨe riacania, diez efonaitɨnodɨ naimɨemo dafaɨfidɨmacɨ. Eneno oni naidaidɨmacɨ.

¹³Naimɨena ado uaidotɨmacɨ: —Jesús, Maestro, caɨna duenai. Caɨna ja jillota.

¹⁴Naimacɨna Jesús cɨuanona, naimacɨmo llote: —Mai jai. Jusiñamui dɨga ñaɨraɨnɨmo omoɨ abɨna acata. —Jaidɨmacɨmo, jillodɨmacɨ.

¹⁵Ie abɨ jilluana cɨuano, naimacɨmona damɨe Jesús dɨne abɨdo bite. Jusiñamuimo iobillacɨnona ado fecade.

¹⁶Naimɨemo iobillacɨnona jɨaɨ fecallena, Jesús uicomo ana bɨtadate. Naimɨedɨ judíuñedɨmɨe. Samaritano imɨe.

¹⁷Jesús llote: —Diez dɨgamɨedomoɨ. Omoɨna jai jillotatɨcue. ¿Nɨnomo jɨaɨnodɨ nueve dɨgamɨe itɨmacɨ?

¹⁸¿Nɨese Jusiñamuimo iobillacɨnona fecaacaiñedɨmacɨ? Dama bimɨe fecade. Naimɨedɨ judío imɨeñedɨmɨe.

¹⁹Jesús naimɨemo llote: —A naidada. Mai jai. Cuena o ɨɨnua jira, jai jillodɨo. Jesúdɨ Jusiñamui ie comɨnɨna sedajana llofuia rafue

²⁰Naie facaise fariseuaɨ comɨnɨ Jesúmo jɨcanotɨmacɨ: —¿Nɨruido Jusiñamui caɨna bene sedaite? Jesús uai ote: —Siño rafuena omoɨ cɨuamona, Jusiñamui omoɨna sedallena uiñoñeitomoɨ.

²¹Buena cɨuamona raiñeitomoɨ: “Jadi, Jusiñamui bene caɨna jai sedade”. “Jadi, batɨne caɨna jai sedade”; iadedɨ omoɨ motomo itɨnomona Jusiñamui dɨbeimo damɨerie illamona, Jusiñamui omoɨ motomo jai illana uiñoitomoɨ.

²²Ie llofueoicaiganomo llote: —Jɨaɨruido duere sefuillamona cue dɨga janore jisa iacanitomoɨ; iadedɨ iese nia iñeitomoɨ.

²³Damɨerie raia: “Ero, batɨne Cristo jai bairede” nainomo jaiñeno. Naimacɨ raia: “Ero, bene Cristo jai bairede” iena ɨɨnoñeno.

²⁴Mona borillamona mona jillacɨdɨ usere cɨode. Ie isoide. Cue abɨdo bia, nana comɨnɨ iena uiñoitɨmacɨ.

²⁵Birui iese nia suiñeite. Nano duere sefuitɨcue. Birui ite comɨnɨ cuena jɨaɨ feiñoñeitɨmacɨ.

²⁶Abɨdo cue billɨrui iaɨrei ia, Noé mɨcorɨ facaiseconi itɨno isoi, comɨnɨ iitɨmacɨ. Naimacɨ duere sefuillemo Noé mɨcorɨ facaise itɨnodɨ comecɨaɨna facañedɨmacɨ.

²⁷Naie facaiseconi nia eo nocɨ deiñenia, Noé mɨcorɨ ecɨmo itɨno naimacɨ isoilla isoi icana jaidɨmacɨ. Jamai guicana jaidɨmacɨ. Aɨna ua mei, ɨnina ua mei, jebuicana jaca jamai jaidɨmacɨ. Danɨ iemo comecɨaɨna facauidɨmacɨ. Jusiñamuimo comecɨaɨna facañedɨmacɨ. Iese itɨmacɨ, Noé mɨcorɨ ie balsamo fo jailla dɨnori. Nia nocɨ deiñenia, Noé mɨcorɨ lloga uaina ɨɨnoñedɨmacɨ. Nocɨ deilla mei, ebena nana faɨfidɨmacɨ. Cue abɨdo bia, ie isoite. Ebena biitɨcue.

²⁸Lot mɨcorɨ facaiseconi daje isoidɨmacɨ. Jamai guicana jaidɨmacɨ. Aɨna ua mei, ɨnina ua mei, jebuicana jaca jamai jaidɨmacɨ. Rana ɨbauidɨmacɨ. Iena fecauidɨmacɨ. Illɨmo maɨjɨuidɨmacɨ. Jofona fɨnouidɨmacɨ. Naimacɨ isoilla isoi icana jaidɨmacɨ.

²⁹Danɨ iemo comecɨaɨna facadɨmacɨ. Jusiñamuimo comecɨaɨna facañedɨmacɨ. Iese icana jaidɨmacɨ, Sodomamona Lot mɨcorɨ jailla dɨnori. Nairui monamona boode azufre ebena billanona, nana Sodomamo itɨno jobaide. Ebena nana faɨfidɨmacɨ.

³⁰Ie isoide. Abɨdo cue billɨruimo comɨnɨ iitɨmacɨ. Cue bia, ebena biitɨcue.

³¹Naie facaise bu ie jofo emodomo ia, ie raruiaɨna ollena, naimɨe dɨga uillena, bu fo jaiñena. Illɨmo bu ia, ie raruiaɨna ollena, ie jofomo bu jaiñena.

³²Iemona fueollena, Lot ai mɨcorɨ rafuemo comecɨna faca. Naiñaiño ie raruiaɨmo daño comecɨna facajamona, na ie abɨ dɨga faɨfide.

³³Dama ie raruiaɨmo ie comecɨna bu facaia, ja muidomo faɨfite. Cue dɨga jaca iñeite; iadedɨ cue jitaillacɨnona fɨnuamo ie comecɨna bu facaia, monamo cue dɨga jaca iite.

³⁴Cue bille facaise menamɨe daje cuartomo ɨnɨano iitɨiaɨmaiaɨ. Damɨe jaite. Jɨaɨmɨe fɨebite.

³⁵Mena rɨño danomo doberillanona iitɨiaɨñuaɨ. Dañaiño jaite. Jɨaɨñaiño fɨebite.

³⁶Menamɨe illɨmo maɨjɨano iitɨiaɨmaiaɨ. Damɨe jaite. Jɨaɨmɨe fɨebite.

³⁷Ie llofueoicaigano jɨcanotɨmacɨ: —¿Nɨne jaitɨmacɨ? Uai ote: —Urujaisaɨ rɨfaide ramo ofillana uiñua isoi, nana cuena ɨɨnotɨno cue abɨdo billena uiñoitɨmacɨ. Cuemo duillamona, cue dɨga jaitɨmacɨ.