Read Murui San Lucas 22 Bible Online

San Lucas 22 - Murui bible

San Lucas 22

¹Naie facaise pascua railla rafue iaɨrei ite. Naie facaise llomenico guille rafue jɨaɨ ite. Naie rafue ia, sɨritate rana jaca guiñedɨmacɨ. Egiptomona naimacɨ jaiagaɨ jillobillana comecɨllena, naie rafue ite.

²Judíuaɨ illaɨcomɨnɨ Jesúna meineiacadɨmacɨ; iadedɨ comɨnɨna jacɨruillanona, naimɨena nia meineñedɨmacɨ.

³Ie facaiseconi Taɨfe ie anamo Judas Iscariote mɨcorɨna itatate. Judadɨ Jesús ie doce llofueoicaigano imɨe.

⁴Jusiñamui dɨga nanoca ñaɨraɨnɨ dɨne jaide. Jusiñamui jofona sedaraɨnɨ dɨne jɨaɨ jaide. Jesúna gaɨtatallena, naimacɨ dɨga ñaɨaide.

⁵Iobillanona, naimɨemo ucubena fecaacadɨmacɨ.

⁶Judas dɨnena: —Jee —raite. Jesús dɨga ailluena comɨnɨ iñena facaiseconi naimɨena gaɨtatallena sedade. Jesúdɨ ie fiodaille rafuena llua rafue

⁷Llomenico guille rafue illanona, judíuaɨ comɨnɨ toɨca llauda fauillarui ride.

⁸Jesúdɨ Pedro iaɨmaiaɨ Juan dɨga oretajano, raite: —Caɨ rafue guille uicodo fɨnollesa omɨco jai.

⁹Naimɨemo jɨcanotɨiaɨmaiaɨ: —¿Nɨnomo naiena coco fɨnuana jitaidɨo?

¹⁰Uai ote: —Ero, Jerusalémo omɨco ria, nogodo jɨnuina uitɨmɨena cɨoitomɨco. Naimɨe jailla jofomo naimɨena raca.

¹¹Jofo namamo llono: “Coco llofueraɨma cocona omo jɨcanotade: ‘¿Nɨmai cue guiraco? ¿Nɨnomo guitɨcue, cue llofueoicaigano dɨga?’ ” Iese llono.

¹²Ie mei omɨcomo afebebamo ite aillue cuartona acataite. Na raruiaɨ dɨga ite. Nainomo caɨ guille fɨno.

¹³Jaidɨaɨmaiaɨ. Naimɨe llua isoi baitɨiaɨmaiaɨ. Pascua rafue guille fɨnodɨaɨmaiaɨ.

¹⁴Guille facaiseconi ia, Jesús ie llofueoicaigano dɨga nainomo guisaide.

¹⁵Mesamo guitɨmacɨmo, ie llofueoicaiganomo llote: —Nia cue fiodaiñenia, omoɨ dɨga bie rafue guillena eo jitaidɨcue.

¹⁶Ie comɨnɨna cue Moo ɨco sedalle facaise ia, nana bie rafue fuite.

¹⁷Jiroracomo jai totaca vino llɨnocaida, Jusiñamuimo iobillacɨnona fecaja mei, raite: —Mai llɨno. Biemona nana dajena omoɨ jiro.

¹⁸Omoɨna bene dane iese caɨmare nabaiñeitɨcue. Cue Moo sedajanomo omoɨ dɨga ɨco cue ia, nainomo omoɨna dane iese caɨmare marena nabaitɨcue. —Iena jirodɨmacɨ.

¹⁹Llomenicona llɨnuanona, Jusiñamuimo iobillacɨnona fecaja mei, iena taɨrude. Naimacɨmo fecajano raite: —Biedɨ cue abɨ facai ie. Omoɨ facaina fiodaitɨcue. Cue abɨmo omoɨ comecɨna facajano, iena guiño.

²⁰Naimacɨ guilla fuilla mei, jiroracomo vino dɨga dane oruitajanona, naimacɨna jirotate. Raite: —Cue fiodaillamona, dama cue dɨaillamona, jeacɨno anamona jilloitomoɨ. Jusiñamuidɨ omoɨmo jɨaɨe rafue birui itatajanona, omoɨ jeacɨno oni dotajana jai llote. Bie vinodɨ naie rafue facai ie. —Iena jirodɨmacɨ.

²¹Jesús llote: —Ero, cuena gaɨtataitɨmɨe caɨ dɨga guite.

²²Monamona billanona ɨimana jaidɨcue. Jusiñamui jitailla isoi jai jaioicaidɨcue; iadedɨ Jusiñamuimona cuena gaɨtataitɨmɨe eo duere sefuite.

²³Iemei: “¿Nɨmɨe Jesúna gaɨtatalle?” danɨ coninɨri siadosɨde. Naimacɨ moto imɨena bu ille rafue

²⁴Ie facaise coninɨri siaduana raitɨmacɨ: —¿Caɨ moto imɨena bu ille?

²⁵Iena cacajanona, Jesús raite: —Naimacɨ jitailla ra fɨnollena, judíuaɨñedɨno illaɨmaɨaɨdɨ naimacɨ anamo itɨnona ocuicabide. “Caɨ anamo itɨnona canocabidɨcaɨ” raitɨmacɨ;

²⁶iadedɨ omoɨmo iese iñede. Omoɨ moto itɨmɨe omoɨ moto imɨeñedɨmɨena jailla. Omoɨmona bu imɨena iacania, omoɨ mullaɨmana naimɨe jaicabillasa. Omoɨmona bu imɨena iacania, omoɨna naimɨe canocana jaicabillasa.

²⁷Ero, jɨaɨe rafuedo iena lloitɨcue. Naimɨena ecallena, naimɨena canollena, patrón anamo ie mullaɨaɨ itɨmacɨ. Naimacɨ baɨfemo patrón illamona, naimacɨna canollena, ie mullaɨaɨ facaina maɨjɨñede. Cue anamo itomoɨ; ia omoɨna canollena, omoɨ mullaɨma isoi itɨcue.

²⁸Birui duere cue sefuidɨcuemo, cuena faɨnonocaiñedomoɨ.

²⁹Cue Moo cuena illaɨmana jai itatate. Omoɨna fetodɨcue,

³⁰jɨaɨruido cue illaɨma illa facaiseconi cue ecɨmo omoɨ caɨmare marena iocɨre illena. Nainomo omoɨ judíuaɨ doce naɨraɨaɨna sedaitomoɨ. Jesúdɨ Pedro naimɨena januana llua rafue

³¹Jesús llote: —Simón Pedro, ero, Taɨfedɨ Jusiñamuimo ona jɨcanote, o ramo faɨllena;

³²iadedɨ ori jai jɨɨdɨcue, cuena nia ɨɨnocana o jaillena. Ɨco cuena raise o ɨɨnoñena mei, cue dɨbeimo o comecɨ iuai dane o meidoia, iemona jɨaɨe creyentiaɨ comecɨaɨna ocuiñotaitɨo.

³³Pedro uai ote: —Nama, cárcelmo o ia, nainomo jɨaɨ iitɨcue. O fiodaia, jɨaɨ fiodaitɨcue. Ona faɨnonocaiñeitɨcue.

³⁴Jesús uai ote: —Pedro, jitɨramo ɨitava nia ñaɨñenia, dacaiño amani cuena janoitɨo. Jesús fiodailla facaise iaɨrei illa rafue

³⁵Ie llofueoicaiganomo Jesús llote: —Omoɨmo ite rafuena uiñoiacadɨcue. Cue rafue llollena, navui omoɨna oredɨcue. “Ucubena uiñeno, bolsa uiñeno, meidolle zapatos uiñeno” omoɨmo llotɨcue. Naie facaiseconi omoɨ, ¿bue rana jitaidomoɨ? Uai otɨmacɨ: —Caɨ buena jitaiñedɨcaɨ.

³⁶Jesús raite: —Biruimona omoɨ duere sefuitomoɨ. Ie jira abɨna rairuicana jai. Birui ucube omoɨmo ia, nɨne omoɨ jaia, iena uiño. Bolsa bumo ia, iena uiño. Abɨna rɨidollena, omoɨmo lloebɨ iñenia, janore ɨniroina feca, lloebɨ ollena.

³⁷Cuena jaie cuegafuiaɨ ja suite. Isaías mɨcorɨ cuena jaie cuega: “Maraiñede rafue fɨnoraɨma isoi naimɨe duere sefuite”.

³⁸Raitɨmacɨ: —Ero, Nama, mena lloebɨ caɨmo birui ite. Jesús uai ote: —Mena ia, macaɨbaite. Jesúdɨ Getsemanímo Jusiñamuimo jɨɨa rafue

³⁹Guille mei, ie llofueoicaigano dɨga, Jesús jino jaide. Olivos railla anedumo naimɨe jaisoilla isoi jaide.

⁴⁰Nainomo ria, naimacɨmo llote: —Taɨfe omoɨna ramo faɨ raillano, iena omoɨ ɨɨnoñellena, Jusiñamuimo jɨɨ —llote.

⁴¹Naimɨe janorede nofɨcɨ baɨ faɨa uailla dɨnori baɨ jaide. Caiñɨcɨ ɨfodo ana raɨta, Jusiñamuimo jɨɨde:

⁴²—Ore Moo, o jitaia, cue duere sefuillamona cuena jillota. Cue jitailla isoi cuena fɨnoñeno; iadedɨ o jitailla isoi cuena fɨno.

⁴³Naimɨe comecɨna ocuiñotallena, ie facaiseconi monamona Jusiñamui jaɨenicɨ bite.

⁴⁴Jesús comecɨ jarire illamona, naimɨe rɨocɨ faɨtemo, dɨfai dɨruena enɨruemo uaide.

⁴⁵Jɨɨa mei, ie llofueoicaigano dɨne abɨdo bite. Ocosinaillamona, jai ɨnɨdɨmacɨ.

⁴⁶Naimacɨmo jɨcanote: —¿Bue ñellena ɨnɨdomoɨ? Mai casi. Taɨfe ramo omoɨna faɨ raillano, iena omoɨ ɨɨnoñellena, Jusiñamuimo jɨɨ. Jesúna gaɨtalle rafue

⁴⁷Nia Jesús lloia, dɨga comɨnɨ naimɨe dɨne bitɨmacɨ. Judas Iscariote mɨcorɨ naimacɨna ɨfode. Naimɨedɨ Jesús llofueoicaigamɨe. Naimɨena llibanollena. Jesús dɨne iaɨrei bite.

⁴⁸Jesús raite: —Judas, cuena llibanuanona, cuena gaɨtataiacadɨo.

⁴⁹Ie llofueoicaigano naie rafuena jai cɨodɨmacɨ. Jɨcanotɨmacɨ: —Nama, ¿caɨ atɨca lloebɨ dɨga ona rɨidoitɨcaɨ?

⁵⁰Ie facaise naimacɨmona damɨedɨ Jusiñamui dɨga nanoca ñaɨraɨma ie mullaɨma ie nabei jefona jaɨbonote.

⁵¹Jesús dɨnena raite: —Dama ite. —Ie jefona naimɨe jetajamona, naimɨena jillotate.

⁵²Dɨga illaɨcomɨnɨ Judas dɨga Jesús dɨne bitɨmacɨ. Naimacɨmo Jesús llote: —Fɨɨriraɨmadɨcueta cuena omoɨ gaɨtajaɨbilla. Omoɨ lloebɨna atɨdomoɨ. Omoɨ butaralluna jɨaɨ atɨdomoɨ.

⁵³Nagarui Jusiñamui jofomo omoɨ motomo llofuecabitɨcue; iadedɨ cuena gaɨtañedomoɨ. Jusiñamui jitailla jira, cuena omoɨ gaɨtaja facaise jai ride. Taɨfe anamo jai itomoɨ. Pedrodɨ Jesúna janua rafue

⁵⁴Naimɨena gaɨtaja mei, Jusiñamui dɨga nanoca ñaɨraɨma jofomo uitɨmacɨ. Pedro aarena naimacɨ jɨnafona racade.

⁵⁵Naɨraɨbɨrɨ motomo irai bonua mei, ana raɨdɨmacɨ. Pedro naimacɨ dɨga jɨaɨ raɨde.

⁵⁶Nainomo ite mullaɨñodɨ irai bouamona, Pedromo eruaɨllano raite: —Bimɨedɨ Jesús dɨga jaisoɨdɨmɨe.

⁵⁷Pedro abɨ janote: —Naimɨena uiñoñedɨcue.

⁵⁸Dallu illanona, jɨaɨmɨe Pedrona cɨuanona llote: —Jesús ie llofueoicaigano imɨedɨo. Pedro dɨnena uai ote: —Imɨeñedɨcue.

⁵⁹Daje hora illanona, jɨaɨmɨe raite: —Bimɨe galileo imɨena jira, bimɨedɨ Jesús dɨga ua jaisoidɨmɨe.

⁶⁰Pedro dɨnena raite: —O lluana uiñoñedɨcue. —Ieconi naimɨe ñaɨtemo, ɨitava ñaɨte.

⁶¹Jesús dobaidacaida, Pedromo erodacaide. Iemei Pedro Jesús lluana uibiñote. Jesús naimɨemo jaive llote: “Ɨitava nia ñaɨñenia, dacaiño amani cuena janoitɨo”.

⁶²Pedro jino jaillanona, eo sunaillamona, eo eede. Jesúna jɨfanodua rafue

⁶³Ie facaise Jesúna gaɨtadɨno naimɨena jɨfanododɨmacɨ. Naimɨena jɨaɨ fatɨmacɨ.

⁶⁴Ie uisɨna maɨtɨmacɨ. Llotɨmacɨ: —Siño jitodɨosa, ¿bu o faja? caɨmo llono.

⁶⁵Iese jɨfanodocana uitɨmacɨ. Jesúdɨ judíuaɨ illaɨcomɨnɨ dɨne illa rafue

⁶⁶Monaidemo judíuaɨ illaɨcomɨnɨ ofidɨmacɨ. Jusiñamui dɨga nanoca ñaɨraɨnɨ ofidɨmacɨ. Moisés mɨcorɨ llogacɨno llofueraɨnɨ ofidɨmacɨ. Naimacɨ dɨne naimɨena gaɨtadɨno Jesúna uitɨmacɨ. Naie illaɨcomɨnɨ dɨnena raitɨmacɨ:

⁶⁷—Ua Cristodɨona, iena caɨmo llono. Jesús uai ote: —Omoɨmo iena cue lloia, ɨɨnoñeitomoɨ.

⁶⁸Buena omoɨmo cue jɨcanoia, cue uaina oñeitomoɨ.

⁶⁹Monamona jaie billanona, ɨimana jaidɨcue. Cuena omoɨ meiniamona, illaɨma isoi Jusiñamui ecɨmo raɨre iitɨcue.

⁷⁰Nana jɨcanotɨmacɨ: —“¿Jusiñamui Jitodɨcue” raitɨo? Uai ote: —Raise cacadomoɨ. Imɨedɨcue.

⁷¹Iena cacajano, raitɨmacɨ: —Naimɨe lluana jai cacadɨcaɨ. Jɨaɨe comɨnɨ naimɨena llogɨduana jai jitaiñedɨcaɨ. “Jusiñamui Jitona itɨcue” naimɨe llua jira, Jusiñamuina jai jeare ñaɨte. Naimɨe Jusiñamui Jitoñede.