Read Murui San Lucas 24 Bible Online

San Lucas 24 - Murui bible

San Lucas 24

¹Domingo jitɨramo monaidemo, naie rɨñonɨaɨ raɨafomo jaidɨmacɨ, iñaiñuaɨ fɨnoca soride rana uillena.

²Raɨafo ɨbailla nofɨcɨ oni joillana cɨodɨmacɨ.

⁴Uainicaidɨmacɨ. Ieconi menamɨe naiñaiñuaɨ ecɨmo bairedɨiaɨmaiaɨ. Iaɨmaiaɨ ɨniroi eo quenirede.

⁵Iaɨmaiaɨna jacɨnaillamona, ɨfogɨ ana jɨtadacaidɨmacɨ. Naie iaɨmaiaɨ dɨnena jɨcanote: —¿Bue ñellena fiodaitɨmɨe illanomo cajedɨmɨena jenodomoɨ?

⁶Galileamo navui naimɨe omoɨmo llogacɨnona comecɨñedomoɨ.

⁷Naimɨe raite: “Monamona billanona, ɨimana jaidɨcue. Jusiñamui jitailla jira, maraiñede rafue fɨnoraɨnɨ anamo iitɨcue. Cuena coraɨitɨmacɨ. Darui amani illanona, fiodaillamona jilloitɨcue” raite.

⁸Iemona ie llogacɨnona jai comecɨtɨmacɨ.

⁹Raɨafomona abɨdo jaidɨmacɨ. Ie once llofueoicaiganomo naiñaiñuaɨ cɨua rafuena llotɨmacɨ. Naie llofueoicaigano dɨga itɨnomo jɨaɨ llotɨmacɨ.

¹⁰Naie rɨñonɨaɨmona María Magdalena ite. Juana ite. María ite. Naiñaiñodɨ Jacobo ei.

¹¹Naie rɨñonɨaɨdɨ iena llotɨmacɨ; iadedɨ ie rafuena cacadɨnodɨ iena ɨɨnoñedɨmacɨ. —Jamaifuena ñaɨtomoɨ —raitɨmacɨ.

¹²Iena cacajano, Pedro aisɨcana raɨafomo jaide. Nainomo ria, ana jɨtadacaida, fo erodate. Useroi joillana cɨode. Iemo ie comecɨna facajano, jofomo abɨdo jaide. Mena llofueoicaiganomo Jesús bairia rafue

¹³Jesús jilluarui mena llofuega iaɨmaiaɨ Emaús railla naɨraɨmo jaidɨaɨmaiaɨ. Jerusalémona nɨbaɨ once kilómetros ite.

¹⁴Nana Jesúmo suide rafuena ñaɨano jaidɨaɨmaiaɨ.

¹⁵Iaɨmaiaɨ ñaɨanona, Jesús iaɨmaiaɨ dɨga dafaɨfillanona, iaɨmaiaɨ dɨga jaide.

¹⁶Jusiñamuidɨ iaɨmaiaɨna naimɨena uiñotañena jira, naimɨena uiñoñedɨaɨmaiaɨ.

¹⁷Iaɨmaiaɨmo Jesús jɨcanote: —¿Buena ñaɨtomɨco? —Ieconi naidadatɨiaɨmaiaɨ. Sunaitɨiaɨmaiaɨ.

¹⁸Naie iaɨmaiaɨmona damɨedɨ Cleofas. Naimɨe uai ote: —¿Nɨese Jerusalémo birui suide rafuena uiñoñedɨo? Nɨbaɨ como ridɨo. Nana jɨaɨ comɨnɨ iena uiñotɨmacɨ.

¹⁹Uai ote: —¿Nɨe isoide rafue suide? Uai otɨiaɨmaiaɨ: —Nazaret ie Jesús rafue. Naimɨedɨ Jusiñamui facaina lloraɨma. Dɨga siño rafuena fɨnode. Comɨnɨna raise llofuete. Jusiñamuimona naimɨedɨ maremɨe. Comɨnɨmona naimɨe maremɨe;

²⁰iadedɨ caɨ illaɨcomɨnɨ naimɨena gaɨtatatɨmacɨ. Naimɨena cruzmo coraɨtatɨmacɨ.

²¹Jusiñamui naimɨe caɨ dɨne orecamɨemo comecɨna facadɨcoco. Naimɨe caɨ illaɨmana illemo ocuiridɨcoco; ia naimɨe jai fiodaite. Naimɨe fiodaillamona darui amani jai ite.

²²Caɨ comɨnɨmona dajerie rɨñonɨaɨbirui caɨna jacɨnaitadɨmacɨ. Jitɨramo Jesús raɨafomo jaidɨmacɨ;

²³iadedɨ naimɨe abɨna cɨoiñedɨmacɨ. Abɨdo naimacɨ bia: “Jusiñamui jaɨenisaɨna cɨodɨcaɨ” raitɨmacɨ. Naie jaɨenisaɨ naimacɨmo llote: “Naimɨedɨ caje”.

²⁴Iemei caɨmona dajerie raɨafomo jaidɨmacɨ. Rɨñonɨaɨ llua isoi cɨodɨmacɨ. Jesús abɨna cɨoiñedɨmacɨ.

²⁵Jesús dɨnena uai ote: —Abɨ uiñoñedomɨco. Nana Jusiñamui facaina lloraɨnɨ mɨcorɨaɨ cuegafuiaɨna ɨɨnoiacaiñedomɨco.

²⁶Cristo duere sefuillena cuetɨmacɨ. Jusiñamui iena jitaillena cuetɨmacɨ. “Naimɨe nia illaɨmana jaiñenia, duere sefuite” cuetɨmacɨ.

²⁷Iemei Jesús iaɨmaiaɨna llofuete. Moisés mɨcorɨ cuegafuiaɨna llofuete. Jusiñamui facaina lloraɨnɨ mɨcorɨaɨ cuegafuiaɨna jɨaɨ llofuete. Nana Cristona cuegafuiaɨna llofuete.

²⁸Emaús dɨne iaɨrei naimacɨ ria, Jesús nia jaiacademo,

²⁹naimɨena caidɨdɨaɨmaiaɨ. Raitɨiaɨmaiaɨ: —Coco dɨga fɨebi. Jitoma jai ana ite. Jai abɨ juanide, nia o jaillena. —Ie muidona iaɨmaiaɨ dɨga fɨebillena fo jaide.

³⁰Naillɨ guitɨmacɨmo, llomenicona Jesús llɨnuano, Jusiñamuimo iobillacɨnona fecade. Iena taɨruano, iaɨmaiaɨmo fecade.

³¹Jusiñamui jitailla jira, ieconi Jesúna uiñotɨiaɨmaiaɨ. Iemei iaɨmaiaɨmona naimɨena jai cɨoicaiñena.

³²Daɨmaiaɨ ñaɨtɨiaɨmaiaɨ: —Coco dɨga naimɨe ñaɨa, coco comecɨ caɨmare ite.

³³Naie dacaiño Jerusalémo abɨdo jaidɨaɨmaiaɨ. Jesús llofueoicaigano naimacɨ nabaiñɨaɨ dɨga danomo illana baitɨiaɨmaiaɨ.

³⁴Iaɨmaiaɨmo llotɨmacɨ: —Caɨ Nama fiodaillamona jai jillode. Simón Pedromo jai bairede.

³⁵Ie mei naɨsona iaɨmaiaɨ jailla rafuena llotɨiaɨmaiaɨ: —Caɨ guitɨcaɨmo, naimɨena uiñotɨcoco —llotɨiaɨmaiaɨ. Jesús ie llofueoicaiganomo bairia rafue

³⁶“Jesúna cɨodɨcoco” llotɨiaɨmaiaɨmo, ie llofueoicaigano motomo Jesús bairede. Llote: —Jai bitɨcue. Uri omoɨ i.

³⁷Naimɨena cɨuamona, jacɨnaitɨmacɨ. “Joreñona cɨodɨcaɨ” comecɨaɨna facajanona, jɨaɨ jacɨruitɨmacɨ.

³⁸Naimacɨmo Jesús jɨcanote: —¿Bue ñellena jacɨruitomoɨ? ¿Bue ñellena cue bene illana ɨɨnoñedomoɨ?

³⁹Cue onollɨmo eruaɨ. Cue eɨllɨmo eruaɨ. Jesúdɨcue. Cuena jeta, raise uiñollena. Cuemo llɨcɨsi ite. Cuemo illaicɨ ite. Jamai joreño isoiñedɨcue.

⁴⁰Iena llua mei, coraɨafona naimacɨ cɨoillena, ie onollɨ ie eɨllɨ dɨga acatate.

⁴¹Iobiacadɨmacɨ; iadedɨ nia raise ɨɨnoñedɨmacɨ. Iemo comecɨaɨna nia facadɨmacɨmo, naimacɨmo jɨcanote: —¿Bue illa, cue guillena?

⁴²Naimɨemo janorede jai ruica llɨcɨaɨna fecadɨmacɨ.

⁴³Iena feiñuanona, rɨte. Iena cɨodɨmacɨ.

⁴⁴Naimacɨmo llote: —Navui omoɨ dɨga cue ia, dɨga rafue omoɨmo llotɨcue. Moisés mɨcorɨ cuena cuete. Jusiñamui facaina lloraɨnɨ mɨcorɨaɨ cuena cuetɨmacɨ. Jusiñamui jitailla jira, iena jai suide.

⁴⁵Naie facaiseconi naimacɨna naie cuegafuiaɨna raise uiñotade.

⁴⁶Naimacɨmo llote: —Jusiñamui facaina lloraɨnɨ mɨcorɨaɨ cuena jaie cuetɨmacɨ: “Cristo duere sefuite. Fiodaillamona darui amani illanona, jilloite.

⁴⁷Naimɨe muidona comecɨaɨ iuai meiduamona, Jusiñamui naimacɨ jeacɨnona oni dotaite. Naimɨe rafue nana naɨraɨmo damɨerie lloitɨmacɨ”. Omoɨmo biena lloitɨcue. Cue rafuena llollena, Jerusalémo taɨneitomoɨ.

⁴⁸Bie rafuena cɨodomoɨ. Iena lloitomoɨ.

⁴⁹Ero, navui naimɨe llua isoi, cue Moo Joreño omoɨ dɨne oretaitɨcue. Jerusalémo fɨebi, naimɨe Joreño omoɨ feiñolle dɨnori. Cue rafuena omoɨ llollena, naimɨe Joreño omoɨ comecɨaɨna ocuiñotaite. Jesús monamo jailla rafue

⁵⁰Betania railla naɨraɨ dɨne Jesús naimacɨna ɨfode. Marecɨnona naimacɨmo llote. —Jusiñamui omoɨna raise marena canoite —llote.

⁵¹Iena naimacɨmo lluanona, monamo jaide.

⁵²Jerusalémo eo caɨmare abɨdo jaidɨmacɨ.

⁵³Jusiñamuimo iobillacɨno fecajano, Jusiñamui jofomo nagarui itɨmacɨ. Mai. Macaɨbaite. Lucadɨcue.