Read Murui San Juan 4 Bible Online

San Juan 4 - Murui bible

San Juan 4

¹Naie facaise ailluena comɨnɨ Jesúmona fueotɨmacɨ. Iemei naimɨe dɨbeido bautizadɨmacɨ. Naimacɨna naimɨe bautizallena, janore comɨnɨ Juan dɨne jaide. Jesúdɨ bautizañede. Danɨ ie llofueoicaiganodɨcaɨ bautizadɨcaɨ. Fariseuaɨ bie rafuena fɨdɨano, iena Jesús uiñua jira,

³Judeamona Galileamo Jesús caɨ dɨga dane abɨdo jaide. Samaria iñaiño dɨga Jesús ñaɨa rafue

⁴Galileamo jaillena, Jesúdɨ Samaria railla enɨrue dɨbeido jaiacade.

⁵Samariamo caɨ ria, Sicar railla naɨraɨmo iaɨrei rillano, daje pozomo ridɨcaɨ. Naie pozodɨ Jacob mɨcorɨ jaie fɨnoca. Jacob mɨcorɨ naie pozo illano ie jito José mɨcorɨmo jaie fecade.

⁶Jitoma naidai itemo, naie pozo fuemo caɨ rillano, Jesús ana raɨde. Are macarillanona, jafaicɨ ote.

⁷Jesús pozomo fɨebicailla meinona, Sicarmo jaidɨcaɨ, guille ollena. Caɨ jailla mei, Samaria iñaiñodɨ jɨnui ollena, pozomo bite. Jesús naiñaiñomo jɨcade: —Jɨnuina cue ine, cue jirollesa.

⁹Naiñaiñodɨ uai ote: —Judío imɨedɨo. Samaria iñaiñodɨcue. ¿Nɨese cuemo jɨnuina jɨcadɨo? —Naiñaiño iese raite, judíuaɨ Samaria comɨnɨ dɨga ñaɨraɨnina jira.

¹⁰Jesús dɨnena dane uai ote: —Jusiñamui omo fecaacalle ra uiñotɨodena, o dɨga ñaɨtɨmɨena uiñotɨona, cuemo jaca itataite jɨnuina cuemo jɨcadɨo. Iemei omo iena fecadɨcue.

¹¹Naiñaiño uai ote: —¿Nɨese bie pozomona jɨnuina oitɨo? Eo ana ite. ¿Nɨnomona jaca itataite jɨnuina oitɨo?

¹²Caɨ usuma Jacob mɨcorɨ bie pozo caɨmo jaie iñonocaiga. Naiemona naimɨe mɨcorɨ jaie jirode. Ie uruiaɨ mɨcorɨaɨ jɨaɨ naiemona jirodɨmacɨ. Ie ocainaɨaɨ dajemona jɨaɨ jirodɨmacɨ. Caɨ usuma mɨcorɨ baɨfemo faɨñedɨo —raite.

¹³Jesús uai ote: —Nagamɨiaɨ bie jɨnui jirua mei, dane jiroacanite;

¹⁴iadedɨ cue fecalle jɨnuina jirua mei, dane jiroacaiñenite. Cue fecalle jɨnui, torafo illa isoi, naimɨemo jaca iite. Jusiñamui dɨne illena, naimɨena jaca itataite.

¹⁵Naiñaiño naimɨe uai ote: —Ero, cue dane jiroacaiñellena, bene dane cue biñellena, o lloga jɨnui cuemo ine.

¹⁶Jesús dɨnena uai ote: —O jofomo mai jai. O ɨni dɨga abɨdo bene bi.

¹⁷Naiñaiño uai ote: —Ɨninidɨcue. Jesús dɨnena uai ote: —Uanai llotɨo. Ua ɨninidɨo.

¹⁸Cinco dɨga ɨnina jai faɨcaidɨo. Birui o dɨga itɨmɨedɨ jɨaɨ o ɨniñede. Uanaicɨnona ua llotɨo.

¹⁹Iemona abɨna uiñocaillamona, naiñaiño dɨnena uai ote: —Odɨ Jusiñamui ie lloraɨmadɨo. Iena uiñotɨcue.

²⁰Caɨ jaiagaɨ baɨ bene ite anedumo Jusiñamuina sedauidɨmacɨ. Ie jira nainomo Jusiñamuina nia sedadɨcaɨ; iadedɨ omoɨ judíuaɨ dɨnena raitomoɨ: “Jerusalémo Jusiñamuina caɨ sedauilla”.

²¹Jesús dɨnena dane uai ote: —Cuena ɨɨno. Jɨaɨruido baɨ bene ite anedumo caɨ Moona sedañeitomoɨ. Jerusalémo naimɨena jɨaɨ sedañeitomoɨ.

²²Raise uiñoñeno Jusiñamuina biruido sedadomoɨ; iadedɨ caɨ naɨraɨmona caɨ Jilloitaraɨma illa jira, naimɨena raise uiñuana sedadɨcaɨ.

²³Jɨaɨruido, ua birui, comɨnɨdɨ: “¿Nɨnomo Jusiñamuina sedaitɨcaɨ?” raillamo comecɨaɨna facañeitɨmacɨ. Naimacɨ comecɨaɨ jitaillamona, naimacɨ illanomo Jusiñamuina ua sedaitɨmacɨ. Naie isoide comɨnɨ naimɨena sedajana Jusiñamui jitaide.

²⁴Jusiñamui comeñede. Naimɨedɨ jafaicɨ. Omoɨ comecɨaɨ jitaillamona naimɨena omoɨ sedajana jitaide.

²⁵Rɨño uai ote: —Caɨ Jilloitaraɨma billena uiñotɨcue. Naimɨedɨ Cristo. Naimɨe bia, nana bie isoide rafuena caɨna raise uiñotaite.

²⁶Jesús raite: —Naimɨedɨcue.

²⁷Ieconi abɨdo ridɨcaɨ. Rɨño dɨga Jesús ñaɨa jira, raijicaidɨcaɨ; iadedɨ: “¿Buena naiñaiño jitaide?” raillano jɨcanoñedɨcaɨ. “¿Buena ñaɨtomɨco?” raillano jɨaɨ jɨcanoñedɨcaɨ.

²⁸Ie lleroda pozo ecɨmo raɨnanocaida, Jesús llua isoi, naie facaise naiñaiño ie naɨraɨmo abɨdo jaide. Nainomo abɨdo rillanona, naiñaiño comɨnɨmo llote:

²⁹—Aillɨ pozo fuemo cue jaca cɨoiraɨninamɨe dɨga dafaɨfidɨcue. Nana cue fɨnouiga rafue dɨese cuemo llote. Mai, caɨ jɨbuisaillɨ. Naimɨedɨ pozo fuemo ite. Nɨbaɨ naimɨedɨ caɨ Jilloitaraɨma. Naimɨedɨ nɨbaɨ Cristo.

³⁰Ie jira Jesús dɨne ailluena comɨnɨ bitɨmacɨ.

³¹Naie rɨño ie naɨraɨ dɨne jailla mei, abɨdo caɨ dɨne nia riñenia, Jesúna raitɨcaɨ: —Maestro, mai guiño.

³²Naimɨe uai ote: —Cuemo guille illana uiñoñedomoɨ.

³³Coninɨri siadotɨcaɨ: —Jai nɨbaɨ bu ecajaɨbiga.

³⁴Jesús uai ote: —Jusiñamui cuena oretate. Naimɨe jitailla rafuena fɨnocana jaidɨcue. Naimɨe rafuena cue lluamona, jai guitɨcue isoidɨcue.

³⁵Comecɨna facadomoɨ: “Jusiñamui uaina nia lloñeitɨcaɨ. Ɨco iena lloitɨcaɨ”. Ie isoide. Illɨmo riara nia llisiñenia, comecɨaɨna facadomoɨ: “Riara einaillena, naga amaga fɨvui fɨebite. Naie facaise maɨjɨitɨcaɨ”. Omoɨmo llotɨcue: Omoɨ ecɨmo eruaɨ. Riara jai einaite isoide. Naimacɨmo Jusiñamui rafue llollena, iena naimacɨ ɨɨnollena, ailluena comɨnɨ jai itɨmacɨ.

³⁶Naie llɨsillamo maɨjɨitɨmɨedɨ ie ucubena feiñoite. Ie isoide. Jusiñamui rafuena damɨerie llocabillamona, comɨnɨ iena cacadɨmacɨ. Jɨaɨno billamona, iena dane cacajamona, iena ɨɨnotɨmacɨ. Naie mare rafue lloraɨnɨ ɨbana feiñoitɨmacɨ. Jusiñamui dɨbeimo naimacɨ dajena maɨjɨa jira, dajena iobitɨmacɨ.

³⁷Caɨ comɨnɨ iena raicabitɨmacɨ: “Damɨe iduaɨna rite; ia jɨaɨmɨe llɨsillana ote”.

³⁸Ie isoide. Omoɨna oredɨcue, comɨnɨ cue dɨbeimo itatallena. Naimacɨmo cue uaina nano lloñedomoɨ; iadedɨ nano jɨaɨno naimacɨmo cue uaina llotɨmacɨ. Ie jira nana omoɨ llofuiamona cue uaina ɨɨnoitɨmacɨ.

³⁹Samaria iñaiño lluamona, naiñaiño naɨraɨmona ailluena comɨnɨ Jesúna ɨɨnotɨmacɨ. “Naimɨedɨ nana cue fɨnoca rafuena cuemo llote” naimacɨmo naiñaiño llote. “Naimɨedɨ caɨ Jilloitaraɨma” raillanona Jesúna ɨɨnotɨmacɨ.

⁴⁰Jesús dɨne naimacɨ rillanona, naimacɨ dɨga naimɨe fɨebillena, Jesúmo jɨcanotɨmacɨ. Ie jira Jesús menarui naimacɨ dɨnomo fɨebide.

⁴¹Naimɨe llofuiamona, jɨaɨe ailluena comɨnɨ naimɨena ɨɨnotɨmacɨ.

⁴²Rɨñomo llotɨmacɨ: —Daño o lluamona, navui ɨɨnotɨcaɨ; iadedɨ naimɨe uaina caɨ cacajamona, birui raise ɨɨnotɨcaɨ. Naimɨedɨ comɨnɨ ua Jilloitaraɨma.

⁴³Menarui illanona, nainomona Galileamo Jesús caɨ dɨga jaide.

⁴⁴Caɨmo llote: —Jusiñamuina lloraɨmadɨ ie naɨraɨ illanomo ia, naie comɨnɨ naimɨe lluamo cacarefiacaiñedɨmacɨ;

⁴⁵iadedɨ Galileamo caɨ rillanona, nainomo itɨno naimɨena caɨmare feiñotɨmacɨ. Pascua railla rafue facaise Jerusalémo nana naimɨe fɨnoca rafue navui naimacɨ cɨua jira, naimɨena caɨmare feiñotɨmacɨ. Jesúdɨ illaɨcomɨnɨ jitona jillotaja rafue

⁴⁶Galileamo Jesús caɨ dɨga macaria, dane Canámo ridɨcaɨ. Nainomo jɨnuimona vino navui fɨnode. Nainomo caɨ ia, Capernaum railla naɨraɨmo itɨmɨe jito duide. Duidɨmɨe moodɨ gobierno dɨga maɨjɨuide.

⁴⁷Judeamona Galileamo Jesús illana naimɨe fɨdɨano, Canámo bite. Jesús illanomo billena, ie jito jai fiodaiacana jira, ie jitona jillotallena Jesúmo duere jɨcanote.

⁴⁸Jesús naimɨemo llote: —Siño rafuena omoɨ cɨoiñenia, cuena ɨɨnoñedomoɨ.

⁴⁹Uai ote: —Maestro, cue dɨga bi, cue jito fiodaiñellesa.

⁵⁰Jesús uai ote: —Mai jai. O jito jai fiodaiñeite —llote. Naie ɨima Jesús uaina ɨɨnuano, ie jofomo abɨdo jaide.

⁵¹Naɨsona naimɨe jaidemo, ie mullaɨaɨ dɨga afeedo beicɨ dafaɨfide. Llotɨmacɨ: —O jito jai jillode.

⁵²Ie jira naimɨe jɨcanote: —¿Nɨno jitoma itemo, jillode? Uai otɨmacɨ: —Navui are jitoma oni lluaɨ caidemo, abɨ cuarilladɨ faɨnonocaide.

⁵³Ie comecɨna facade: “Navui are naie facaise Jesús cuemo llote: ‘O jito jai jillode’ ”. Ie mullaɨaɨ lluana cacajamona, naimɨedɨ Jesúdɨ caɨ Jilloitaraɨmana ɨɨnote. Nana naimɨe jofomo itɨno jɨaɨ ɨɨnotɨmacɨ.

⁵⁴Judeamona Galileamo Jesús abɨdo billano, siño rafuena iese jai fɨnode.