Read Murui San Juan 8 Bible Online

San Juan 8 - Murui bible

San Juan 8

¹Naie facaise Jesúdɨ Olivos railla anedumo jaide.

²Ie areruido jitɨramo Jusiñamui jofomo abɨdo dane jaide. Ailluena comɨnɨ naimɨe dɨne billa jira, naimɨe ana raɨta, naimacɨna llofuete.

³Naie facaise Moisés mɨcorɨ llogacɨnona llofueraɨnɨmona dajerie bitɨmacɨ. Fariseuaɨmona dajerie jɨaɨ bitɨmacɨ. Daje rɨño atɨdɨmacɨ. Ie ɨniñede ɨima dɨga naiñaiñona jai eidatɨmacɨ. Comɨnɨ illa uicomo atɨano,

⁴Jesúmo llotɨmacɨ: —Llofueraɨma, biñaiño ie ɨniñede ɨima dɨga eidatɨcaɨ.

⁵Moisés mɨcorɨ jaie cuega: “Bie isoidɨñaiñodɨ nofɨcɨ dɨga faɨrɨnoga, meinellena”. ¿Nɨese naiñaiñona o raitɨo?

⁶Naimɨena facacɨllena, naimɨe raise uai oñenia, naimɨena llogɨdollena, iese jɨcanotɨmacɨ. Iena cacajano, Jesús ana jɨtadacaida, enɨruemo ie onocaɨ dɨga cuete.

⁷Naimɨemo dɨga icaiño jɨca-jɨcanuano, naimɨe naidacaida, naimacɨmo llote: —Omoɨmona jeacɨno iñedɨmɨe naiñaiñomo nano nofɨcɨna faɨrɨno.

⁸Dane ana jɨtadacaida, enɨruemo dane cuete.

⁹Naimɨe lluana cacajano, dajerie jino jaidɨmacɨ. Nano eo einamacɨdɨ jino jaidɨmacɨ. Ie mei coniruenɨ jino jaidɨmacɨ. Nana comɨnɨ tuua mei, nainomo Jesús fɨebide, naie rɨño dɨga ñaɨllena.

¹⁰Eruaɨllano naiñaiñomo jɨcanote: —¿Nɨ nai o llogɨdotɨno?

¹¹Naiñaiño uai ote: —Jaca iñedɨmacɨ. Cuena jai llogɨdoiacaiñedɨmacɨ. Jesús uai ote: —Jɨaɨ ona duere fɨnoñeitɨcue. Mai jai. Jeacɨno dane fɨnoñeno. Jesúdɨ comɨnɨ comecɨaɨ llɨgaiñua rafue

¹²Jesúdɨ comɨnɨna dane llofuianona, raite: —Jeacɨno oni jaillena, comɨnɨ comecɨaɨna llɨgaiñotɨcue. Cuena ɨɨnotɨmɨe jitɨredɨnomo jaca iñeite. Jeacɨno anamo jai iñedɨmɨe Jusiñamui dɨga ɨco jaca iite.

¹³Fariseuaɨ dɨnena uai otɨmacɨ: —Dama o abɨna ñaɨtɨo. Ie jirari uanaicɨnona lloñedɨo.

¹⁴Jesús uai ote: —Dama cue abɨna llotɨcue; iadedɨ uanaicɨnona llotɨcue. Nɨnena cue billanona uiñotɨcue. Nɨne cue jaillɨnona jɨaɨ uiñotɨcue. Nɨnena cue billanona uiñoñedomoɨ. Nɨne cue jaillɨnona jɨaɨ uiñoñedomoɨ.

¹⁵Abɨ raise uiñoñeno cuena jeare ñaɨtomoɨ. Iese omoɨna ñaɨñedɨcue;

¹⁶iadedɨ omoɨna cue ñaɨa, uanaicɨnona llotɨcue. Dama cue uaina omoɨna lloñedɨcue. Cuena oretatɨmɨe omoɨna jɨaɨ llote.

¹⁷Moisés mɨcorɨ iena jɨaɨ jaie cuega: “Menamɨe daje isoi lloia, naie iaɨmaiaɨ lluacɨnodɨ omoɨ ɨɨnua” cuega.

¹⁸Cue facaina llollena, menamɨe jai ite. Cue facaina llotɨcue. Cue Moo cue facaina jɨaɨ llote.

¹⁹Fariseuaɨ dɨnena jɨcanote: —¿Nɨ o moo? Jesúdɨ uai ote: —Cuena uiñoñedomoɨ. Cue Moona jɨaɨ uiñoñedomoɨ. Cuena uiñotomoɨna, cue Moona jɨaɨ uiñotomoɨ.

²⁰Jusiñamui jofomo ucube eenoracomo bicɨnona siadotɨmacɨ. Jesús fiodaille facaise nia riñena jira, jaca buna naimɨena gaɨtañede. Jesúna comɨnɨ ɨɨnoñenia, naie jeacɨno dɨga fiodailla rafue

²¹Naimacɨmo Jesús dane llote: —Ɨco oni jaitɨcue. Cuena jenoitomoɨ; iadedɨ cuena baiñeitomoɨ. Na omoɨmo jeacɨno nia itemo, fiodaitomoɨ. Cue jaillɨnomo jainitomoɨ.

²²Ie jira judíuaɨ illaɨcomɨnɨ dɨnena iena siadotɨmacɨ: —Dama ie abɨna meineite. “Cue jaillɨnomo jainitomoɨ” Jesús railla jira, iese siadotɨmacɨ.

²³Jesúdɨ uai ote: —Jusiñamuimo ite rafuemo duiñedomoɨ. Naimɨemo ite rafuemo duidɨcue. Naimɨe dɨbeimo iñedomoɨ; ia naimɨe dɨbeimo itɨcue.

²⁴Cue Jusiñamui Jitonana omoɨ ɨɨnoñena jira, na omoɨ jeacɨno dɨga fiodaitomoɨ.

²⁵Jɨcanosɨde: —¿Budɨo? Jesús uai ote: —Nano omoɨ motomo cue illamona bumɨedɨcuena omoɨna raicabitɨcue.

²⁶Dɨga rafue omoɨmo lloiacadɨcue. Maraiñede rafuena omoɨ fɨnuana omoɨmo nia lloiacadɨcue; iadedɨ omoɨmo cuena oretatɨmɨe uaina dama llotɨcue. Nai uaidɨ uanaicɨno —llote.

²⁷Naimɨedɨ ie Moo Jusiñamuina llote; iadedɨ cacaiñedɨmacɨ.

²⁸Ie jira Jesús llote: —Cuena omoɨ meinia mei, bumɨedɨcuena uiñoitomoɨ. Cue uaido dama lloñedɨcue; iadedɨ cue Moo cue llofuia uaido llocabitɨcue.

²⁹Cuena oretatɨmɨe cue dɨga ite. Naimɨe jitaille rafuena cue fɨnua jira, cuena faɨnonocaiñede.

³⁰Iese Jesús llotemo, dɨga illaɨcomɨnɨ naimɨe uaina como ɨɨnoiacadɨmacɨ. Comɨnɨ Taɨfe anamo illa rafue

³¹Jesúdɨ naimɨe uaina como ɨɨnoiacadɨnomo llote: —Cue lluana ɨɨnocana omoɨ jaia, cue ua comɨnɨdomoɨ.

³²Uanaicɨnona uiñoitomoɨ. Ie mei jɨaɨmɨe anamo dane iñeitomoɨ.

³³Uai otɨmacɨ: —Abraham mɨcorɨ ie uruiaɨdɨcaɨ. Jɨaɨmɨe anamo jaca iñedɨcaɨ. ¿Bue ñellena llotɨo: “Jɨaɨmɨe anamo iñeitomoɨ”?

³⁴Jesúdɨ uai ote: —Uanai llotɨcue. Jeacɨno fɨnocabidomoɨ. Naga jeacɨno fɨnoraɨma ie jeacɨno anamo jai ite. Omoɨ jeacɨno anamo omoɨ illana ñaɨtɨcue.

³⁵Jɨaɨe rafuedo iena lloitɨcue. Ie patrón anamo itɨmɨemo ie patrón rafuedɨ duiñede; iadedɨ naie patrón jitomo ie rafuedɨ duide.

³⁶Ie isoide. Jusiñamui Jitona cue illamona, naimɨe rafuemo duidɨcue. Ie jira omoɨmo cue lloia, omoɨ jeacɨno anamo ua iñeitomoɨ.

³⁷Abraham mɨcorɨ ie uruiaɨdomoɨ. Iena uiñotɨcue; iadedɨ cue lluana omoɨ raise ɨɨnoñena jira, cuena meineiacadomoɨ.

³⁸Cue Moo dɨga jaie cue illamona, cue cɨua rafuena llocabitɨcue. Omoɨ moomona cacaja rafuena fɨnocabidomoɨ.

³⁹Uai otɨmacɨ: —Caɨ moodɨ Abraham mɨcorɨ. Jesús dane uai ote: —Abraham mɨcorɨ uruiaɨdomoɨdena, Abraham mɨcorɨ fɨnoca rafue isoi fɨnodomoɨ. Abraham mɨcorɨ uruiaɨñedomoɨ. Ie jira Abraham mɨcorɨ fɨnoca rafue isoi fɨnoñedomoɨ.

⁴⁰Uanai cue llua jira, cuena meineiacadomoɨ; iadedɨ Abraham mɨcorɨ iese fɨnoacaiñede. Cue lluacɨno Jusiñamuimona otɨcue.

⁴¹Jusiñamui uruiaɨ fɨnoca rafuena fɨnoñedomoɨ; iadedɨ omoɨ moo fɨnoca rafuena fɨnocabidomoɨ. Uai otɨmacɨ: —Jamai naɨraɨ ie uruiaɨñedɨcaɨ. Caɨ Moodɨ Jusiñamui.

⁴²Jesús dane llote: —Jusiñamuidɨ omoɨ moodena, cuena isiruitomoɨ, naimɨemona cue billa jira. Cue jitailla jira, biñedɨcue; iadedɨ cuena oretate.

⁴³¿Bue ñellena cue lluana cacaiñedomoɨ? Cacareiraɨnidomoɨ.

⁴⁴Omoɨ moodɨ Taɨfena jira, cue lluana ɨɨnoñedomoɨ. Naimɨe jitailla rafuena fɨnoacacabidomoɨ. Nano dofomona naimɨedɨ comena meineraɨma. Naimɨe taɨno jaca llua jira, uanaicɨnona naimɨe jaca gaɨñede. Naimɨe taɨnona lloia, ie comecɨ llua isoi llote. Naimɨemona taɨno lluacɨnodɨ comuicabide. Naimɨe isoidomoɨ.

⁴⁵Uanai cue llua jira, cuena ɨɨnoñedomoɨ.

⁴⁶¿Nɨe isoide jeacɨno fɨnodɨcue? Cuemo llono. Uanai cue llia, ¿bue ñellena cuena ɨɨnoñedomoɨ?

⁴⁷Jusiñamuina mooredɨmɨedɨ Jusiñamui uaina cacade. Jusiñamui uruiaɨñedomoɨ. Ie jira cue lluana cacaiñedomoɨ.

⁴⁸Naimɨena jearuillanona, naie illaɨcomɨnɨ dɨnena iese raitɨmacɨ: —Samaritano naɨraɨ imɨedɨo. Janaba illamɨedɨo. Uaɨritaidɨo.

⁴⁹Jesús uai ote: —Janaba illamɨeñedɨcue. Cue fɨnoca rafuemona cue Moona iobitadɨcue; iadedɨ iese cuena omoɨ ñaɨamona cuena iobitañedomoɨ.

⁵⁰Omoɨmona iobillacɨnona feiñollena, cue rafuena fɨnoñedɨcue; ia cue Moo iena oiacade. Cuena omoɨ ɨɨnoñenia, cuemo iobillacɨnona omoɨ fecañenia, cue Moo omoɨna duere fɨnoite;

⁵¹ia bu cue lluana ua ɨɨnoia, jaca ua fiodaiñeite.

⁵²Naie illaɨcomɨnɨ dɨnena uai otɨmacɨ: —Janaba illamɨedɨona jai uiñotɨcaɨ. Abraham mɨcorɨ jaie fiodaite. Jusiñamuina lloraɨnɨ mɨcorɨaɨ jɨaɨ jaie fiodaitɨmacɨ; iadedɨ: “Bu cue lluana ɨɨnoiadedɨ, fiodaiñeite” raitɨo.

⁵³Caɨ usuma Abraham mɨcorɨ baɨfemo faɨñedɨo. Jusiñamuina lloraɨnɨ mɨcorɨaɨ baɨfemo faɨñedɨo. ¿Bumɨedɨota?

⁵⁴Jesúdɨ uai ote: —Dama cue abɨna birɨñedɨcue; ia cue Moo cuena marena ñaɨamona, cuena iobitate. “Caɨ Moodɨ Jusiñamui” raicabitomoɨ;

⁵⁵iadedɨ naimɨena uiñoñedomoɨ. Naimɨena uiñotɨcue. “Naimɨena uiñoñedɨcue” cue raia, omoɨ isoi taɨno llotɨcue. Naimɨena uiñotɨcue. Naimɨena jɨaɨ ɨɨnotɨcue.

⁵⁶Omoɨ usuma Abraham mɨcorɨ enɨruemo cue ɨco billena jaie uiñote. Iena uiñuamona, naimɨe iobide.

⁵⁷Illaɨcomɨnɨ dɨnena uai otɨmacɨ: —Odɨ cincuenta años nia iñedɨo. ¿Nɨese Abraham mɨcorɨna cɨodɨo?

⁵⁸Jesús uai ote: —Abraham mɨcorɨ nia iñena facaiseconi jaca itɨcue.

⁵⁹Iena cacajanona, naimɨe faɨrɨnollena, naie illaɨcomɨnɨ nofɨcɨna llɨnotɨmacɨ; iadedɨ Jesús reirillanona, Jusiñamui jofomona oni jaide.