Read Murui Hechos de los Apóstoles 25 Bible Online

Hechos de los Apóstoles 25 - Murui bible

Hechos de los Apóstoles 25

¹Naie provinciamo darui amani rilla mei, Cesareamona Jerusalémo Festo jaide.

²Nainomo Jusiñamui dɨga nanoca ñaɨraɨnɨdɨ, jɨaɨe judíuaɨ illaɨcomɨnɨ dɨga, Festomo Pablona llogɨdotɨmacɨ.

³Festomo daje rafuena jɨcanotɨmacɨ, naimacɨ iena. Pablona Jerusalémo atɨllena jɨcanotɨmacɨ. Naɨso motomo naimɨena meinellemo comecɨaɨna facadɨmacɨ.

⁴Festo uai ote: —Pablo Cesareamo fɨebiite. Raɨre nainomo abɨdo jaitɨcue.

⁵Omoɨ illaɨcomɨnɨmona damɨerie cue dɨga jaitɨmacɨ, nɨcɨno naimɨemo ia, naimɨena llogɨdollena.

⁶Nɨbaɨ ocho, nɨbaɨ diez dɨga irui nainomo illa mei, Cesareamo naimɨe abɨdo jaide. Ɨco are ie comɨnɨmo llouillanomo raɨde. Pablo atɨllena llote.

⁷Pablo billa mei, Jerusalémona bite judíuaɨ naimɨe ecɨmo ofidɨmacɨ. Dɨga fododɨcɨnona naimɨena llogɨdotɨmacɨ; iadedɨ taɨnuaɨdo llogɨdotɨmacɨ.

⁸Pablo uai ote: —Judíuaɨ llogacɨnuaɨna jaca jeare fɨnoñedɨcue. Jusiñamui jofona jeare fɨnoñedɨcue. Caɨ nanoca illaɨmamo jearede rafuena jɨaɨ fɨnoñedɨcue.

⁹Iena cacade; iadedɨ Festo judíuaɨna iobitaacana jira, Pablomo jɨcanote: —¿Jerusalémo cue dɨga jaiacadɨo? Nainomo nana bie rafuena siadoitɨcue.

¹⁰Pablo uai ote: —Llogɨdoracomo jai itɨcue. Caɨ nanoca illaɨma facaina comɨnɨmo llotɨo, naimacɨna duere fɨnollena. Benomo cue llolle. Judíuaɨmo jaca buena fɨnoñedɨcue. Iena raise uiñotɨo.

¹¹Romanuaɨ railla naɨraɨ illaɨcomɨnɨ llogacɨnona cue ɨɨnoñenia, damamei jearede rafuena cue fɨnoia, cue fiodaillemo jaca ocuiridɨcue; iadedɨ cuemo nɨcɨno iñenia, cuena meinellena bu cuena judíuaɨmo fecañeite. Cue rafue naimɨe siadollena, Romamo caɨ nanoca illaɨma dɨne jaiacadɨcue.

¹²Ie ecɨmo ite canoraɨnɨ dɨga Festo ñaɨa mei, Festo raite: —Caɨ nanoca illaɨma dɨne o jaiacana jira, nainomo jaitɨo. Agripamo Pablo llua rafue

¹³Dɨga irui illa mei, Agripadɨ Festo dɨne, ie mirɨño Berenice dɨga, Cesareamo bitɨiaɨmaiaɨ. Agripadɨ naie enɨrue illaɨma.

¹⁴Dɨga irui nainomo itɨiaɨmaiaɨ. Naimɨemo Festodɨ Pablo ie rafuena llote: —Félix Pablona cárcelmo bene faɨnonocaide.

¹⁵Jerusalémo navui cue ia, Jusiñamui dɨga nanoca ñaɨraɨmadɨ, judíuaɨ einamacɨ dɨga, naimɨena llogɨdote. Naimɨena duere fɨnollena cuemo jɨcanotɨmacɨ.

¹⁶Naimacɨ uai otɨcue: “Caɨ Romanos comɨnɨdɨ llogɨdogamɨena jamai taɨnomo duere fɨnoñedɨcaɨ; iadedɨ llogɨdogamɨedɨ ie llogɨdotɨno uai nano cacareitɨcaɨ. Ie mei ie abɨ rɨidollɨcɨnomo jɨaɨ cacareitɨcaɨ”.

¹⁷’Ie jira naimacɨ cue dɨne benomo navui bia, ie are comɨnɨmo cue llouillanomo raɨdɨcue. Pablona cue dɨne uaidotɨcue.

¹⁸Naimɨena llogɨdotɨnodɨ lloia, naimɨena maraiñede fɨnoca rafue cue facaja isoi, llogɨdoñedɨmacɨ.

¹⁹Danɨ naimacɨ ɨɨnuacɨnona llotɨmacɨ. Jesús raillamɨe rafuena llotɨmacɨ. “Jesús jai fiodaite” raitɨmacɨ; iadedɨ Pablodɨ: “Jesús jai cajede” raite.

²⁰Bie rafuena raise cue uiñoñenia, naimɨemo navui jɨcanotɨcue: “¿Jerusalémo jaiacadɨo, nainomo bie rafuena siadollena?”;

²¹iadedɨ Pablo nainomo jaiacaiñede. Caɨ nanoca illaɨma dɨne jaillena jɨcanote. Nainomo ie rafuena siadollena jitaide. Ie jira naimɨe sedajana llotɨcue, caɨ nanoca illaɨma dɨne naimɨena cue nia oretañenia.

²²Agripadɨ Festomo llote: —Naimɨe ñaɨana cacaacadɨcue. Festo uai ote: —Ɨco are naimɨe ñaɨana cacareitɨo.

²³Ie jira ie are Agripa, iaɨmaiaɨ Berenice dɨga, gobernador ofiracomo bitɨiaɨmaiaɨ. Fɨnobillano ebire bitɨiaɨmaiaɨ. Soldaduaɨ imacɨ illaɨcomɨnɨ jɨaɨ bitɨmacɨ. Naie naɨraɨmo ite nanoca comɨnɨ jɨaɨ bitɨmacɨ. Ofilla mei, Festo Pablona atɨllena llote.

²⁴Festo llote: —Agripa, nana beno itɨno, bimɨena cɨodomoɨ. Jerusalémo ailluena judíuaɨ naimɨena llogɨdotɨmacɨ. Bene cue dɨne jɨaɨ bitɨmacɨ. Naimɨe meiniana eo jitaidɨmacɨ;

²⁵iadedɨ naimɨemo nɨcɨnodɨ iñenana jai uiñotɨcue. Naimɨena meinellena cue llollena, nɨcɨnodɨ naimɨemo iñede. Augusto dɨne naimɨe jaillena naimɨe jɨcanua jira, naimɨena oretaitɨcue.

²⁶Nɨcɨnodɨ nia iñede, caɨ illaɨmamo cue cuellena. Ie muidona omoɨ dɨne naimɨena jai atɨdɨcue. Agripa, naimɨe ñaɨamo raise cacarei. Naimɨemo caɨ jɨcanua mei, nɨbaɨ nɨcɨno naimɨemo illana uiñoitɨcaɨ. Iemona Augustomo cueitɨcaɨ.

²⁷Augusto dɨne llavecamɨe cue oretaia, naimɨemo nɨcɨno iñenia, cuemona maraiñede.