Read Murui Carta a los Efesios 4 Bible Online

Carta a los Efesios 4 - Murui bible

Carta a los Efesios 4

¹Cárcelmo nia cue illamona, omoɨmo rafuena nia lloitɨcue. Cristo rafuena cue llofuia jira, cárcelmo itɨcue. Creyentiaɨna omoɨ jai jailla jira, Cristo jitailla isoi omoɨ i. Jusiñamui omoɨna jai fetode naimɨe jitailla rafuena omoɨ fɨnollena.

²Ie muidona abɨna jaca ɨedoñeno. Raɨre icɨriñeno. Jɨaɨmɨe ona duere fɨnoia, ɨbana oñeno; iadedɨ uai oñeno naimɨena jaca isirui.

³Jusiñamui Joreño omoɨmo illamona, omoɨ comecɨaɨ daje isoi lloicana jai. Daje isoi omoɨ comecɨaɨ lloillamona, omoɨ jitaillamona danɨ uri omoɨ i.

⁴Iena nia lloitɨcue. Cristona caɨ ɨɨnuamona, daajena naimɨemo jaɨnaɨaɨdɨcaɨ. Jusiñamui Joreño nana caɨmo illamona, danɨ omoɨ comecɨaɨ lloicana omoɨ jai. Jusiñamui caɨna jai fetode. Ie muidona naimɨe dɨga jaca caɨ illena, naimɨe isoi caɨ illemo ocuiridɨcaɨ.

⁵Jaca dajede Nama sedacabidɨcaɨ. Caɨna jilloitallena, da naimɨena ɨɨnotɨcaɨ. Dama naimɨe facaina bautizaganodɨcaɨ.

⁶Caɨ Moo Jusiñamui jaca dajede. Jaca dajede Jusiñamuina nana caɨ creyentiaɨdɨcaɨdɨ sedadɨcaɨ. Naimɨe anamo nana itɨcaɨ. Naimɨe jitaillacɨnona caɨ fɨnollena, caɨna canocabide. Caɨna canollena, naimɨe Joreño caɨmo jaca ite.

⁷Naimɨe jitailla dɨese, caɨna fetuanona, naimɨe facaina caɨ maɨjɨllena, ie uai caɨmo fecade. Jɨaɨe creyentiaɨna naimɨemo ɨɨnotacana jaillena, ie uai caɨmo fecade.

⁸Iena caɨ raise uiñollena, David mɨcorɨ jaie cuegafuemona fueoitɨcaɨ. Naimɨe cuega: “Monamo abɨdo naimɨe jaillanona, illaɨmana naimɨe illamona, ie comɨnɨna naimɨe ɨfuanona, naimacɨmo rana fecade”. Cristona ñaɨte. Iemona Cristo caɨ maɨjɨacɨno caɨmo illana uiñotɨcaɨ.

⁹Biemo omoɨ comecɨaɨna faca. Monamo abɨdo naimɨe jailla jira, monamona enɨruemo Cristo nano billana uiñotɨcaɨ.

¹⁰Enɨruemo bite; iadedɨ monamo abɨdo jaide. Nana comɨnɨna birui sedade. Naimɨe baɨfemo jaca buna iñede.

¹¹Ie jira caɨmo ie uai jai fecajanona, caɨmona ie llofueoicaiganona fetuanona, ie rafue raise llofuellena, naimacɨna oretate. Damɨeriemo ie facaina ie rafuena jino llollena, ie uaina fecade. Ie rafuena nia ɨɨnoñedɨnomo llollena, damɨeriemo ie uaina fecade. Creyentiaɨna ie rafuena llofuellena, damɨeriemo ie uaina fecade.

¹²Iese ie uaina fecade, naimɨe facaina raise caɨ maɨjɨllena, nana jɨaɨe creyentiaɨna caɨ canollena, Ie mei Cristo rafuena daajena ɨɨnocana jaitɨcaɨ.

¹³Iena caɨ ɨɨnuamona, Jusiñamui Jitona raise uiñocana jaitɨcaɨ. Caɨ comecɨdɨ daje isoi lloicana jaitɨcaɨ. Naimɨe jitaillacɨnodo raise jaitɨcaɨ. Naimɨe marena icana illa isoi jaitɨcaɨ.

¹⁴Caɨ uruiaɨ facaise caɨ comecɨaɨ naganomo ite. Naie facaise nɨe isoide rafuena caɨ cacajia, iena raɨre ɨɨnotɨcaɨ. Cristo ɨɨnocana caɨ jaillamona, uruiaɨ isoi caɨ iacaiñena. Damɨerie naga llofueraɨma uaido jaidɨmacɨ. Damɨerie llofueraɨnɨdɨ Cristo rafuena raise llofueñedɨmacɨ; iadedɨ jɨfuetɨmacɨ. Taɨnona llotɨmacɨ. Iedo caɨ jaiñena;

¹⁵iadedɨ jɨaɨe comɨnɨna caɨ isiruillamona, uanaicɨnodo caɨ jailla. Cristo isoi icana caɨ jaillamona, abɨna uiñoitɨcaɨ. Cristodɨ caɨ illaɨmana jira, caɨna ocuide.

¹⁶Naga creyente naimɨemo jaɨnaɨaɨde. Aillosiedɨcaɨ; iadedɨ daajena naimɨemo jaɨnaɨaɨdɨcaɨ. Daajena naimɨemo caɨ jaɨnaɨaɨllamona, naimɨe jitaillacɨno caɨ fɨnoia, naimɨena ɨɨnocana jaitɨcaɨ. Iemona danɨ coninɨna isiruicana jaitɨcaɨ. Daajena naimɨemo caɨ jaɨnaɨaɨlla jira, caɨ comecɨaɨ daje isoi lloicana caɨ jailla. Cristomo jai caɨ duilla jira, naimɨe rafuedo birui jaidɨcaɨ

¹⁷Omoɨmo nia lloitɨcue. Caɨ Namamo cue duilla jira, biena lloitɨcue. Jusiñamuina ɨɨnoñedɨno isoi dane omoɨ iñeno. Jaie naimacɨ isoi itomoɨ. Naimacɨ comecɨaɨdɨ taɨnomo jai jaide isoide. Cacarefiacaiñedɨmacɨ.

¹⁸Jusiñamui rafuena uiñoñedɨmacɨ. Iena cacaiñedɨmacɨ. Abɨna naimacɨ uiñoñena jira, Jusiñamui dɨbeimo illana jaca uiñoñedɨmacɨ. Uanaicɨnona uiñoiacaiñedɨmacɨ.

¹⁹Jearede rafuena naimacɨ fɨnoia, meiruiñedɨmacɨ. Naimacɨ comecɨaɨ oiacana rafuedo jai jaidɨmacɨ. Naga jearede isoide rafuena eo fɨnocana jaidɨmacɨ;

²⁰iadedɨ Cristo rafuena omoɨ cacajamona, naimɨena omoɨ raise uiñuamona, naimacɨ isoi omoɨ illena fueoñedomoɨ. Cristo rafuena omoɨ cacajamona, jɨaɨena illena jai fueotomoɨ.

²¹Naimɨena cacajanona iena ɨɨnotomoɨ. Naimɨena cue llofuiamona, naimɨena Cristo facaina lloraɨnɨ llofuiamona, danomo omoɨ roracomo omoɨ ofia, Cristo uanaicɨnona cacadomoɨ.

²²Biena omoɨna llofuecabitɨcue. Cristona jaie nia omoɨ ɨɨnoñena isoi, omoɨ jaiñeno. Omoɨ comecɨaɨmo jaie itɨcɨnodo jaiñeno. Naga jearede rafue omoɨ comecɨaɨ oiacanamona faɨficana jaie jaidomoɨ. Iedo birui jaiñeno;

²³iadedɨ Cristo dɨbeimo omoɨ jai illanona, naimɨemo omoɨ comecɨaɨ facajano, Jusiñamui omoɨna canuamona, omoɨ comecɨaɨ iuaillaɨna meidocana jai.

²⁴Cristo rafuena birui ɨɨnotomoɨ. Naimɨe jitaillacɨnodo omoɨ mai jai. Jusiñamuidɨ jeacɨno fɨnocana omoɨ jaiñenana jitaide. Naimɨe marena isoi, marena icana omoɨ jaillana jitaide.

²⁵Ie jira taɨnona lloñeno. Cristomo daajena jai jaɨnaɨaɨlla jira, coninɨmo uanaicɨnona jaca omoɨ llono. Jɨaɨnona omoɨ jɨfueñeno.

²⁶Maraiñedɨcɨnona bu fɨnoia, naimɨemo rɨire llono; iadedɨ iese o lloia, naimɨena jeare ñaɨñeno. Jɨaɨmɨe ona icɨia, naimɨena jeare ñaɨñeno. Naimɨe dɨga o rafue ia, naie rafue nairuido marena fɨno,

²⁷Taɨfe ramo o faɨ raillano. Bu dɨga o nɨcɨno ia, iena raɨre marena o fɨnoñenia, ɨbana oiacanitɨo. Naie raɨre o feitañena jira, Taɨfe ona jeacɨnona fɨnotaite. Iese suiñellena, naicɨno raɨre marena fɨno. Iena feita. Iena dane abɨdo llɨnoñeno.

²⁸Naimɨemo ra illena, fɨɨamona omoɨmona navui bu ia, creyentena naimɨe jai jailla jira, naimɨe dane fɨɨñena; iadedɨ ra naimɨe jitaia, naimɨe maɨjɨite. Ie maɨjɨamona ie ra ollena, ucubena feiñoite. Ie mei dueredɨnona naimɨe jɨaɨ canoite.

²⁹Jeare ñaɨñeno; iadedɨ nɨe isoide rafue ia, marecɨnona ñaɨno. Ie mei naiemona jɨaɨe comɨnɨna canoitomoɨ, Jusiñamui dɨbeimo naimacɨ raise illena.

³⁰Jusiñamuimo omoɨ jai jaɨnaɨaɨlla jira, jeacɨnona fɨnoñeno. Jeacɨno omoɨ fɨnoia, Jusiñamui Joreñodɨ sunaite. Naimɨena sunaitañeno. Naimɨe caɨmo illamona, caɨna jillotajana uiñotɨcaɨ. Cristo dane abɨdo billemona, naimɨe dɨne caɨ jaca illena, caɨna jai jillotate.

³¹Jɨaɨe comɨnɨna icɨñeno. Icɨriñeno. Uaina uaitañeno. Jɨaɨe comɨnɨna jeare ñaɨñeno. Naimacɨna duere jeare fɨnoñeno;

³²iadedɨ coninɨna canua. Jɨaɨe comɨnɨna duenai. Jɨaɨmɨe dɨga omoɨ nɨcɨno ia, naimɨe fɨnoca rafuena feitajanona, naimɨe dɨga marena ñaɨno. Naie rafuena dane abɨdo llɨnoñeno. Cristo fɨnoca rafue muidona, Jusiñamui omoɨ jeacɨnona jai feitaja isoi, jɨaɨmɨe dɨga omoɨ rafue ia, naifuena omoɨ feita.