Read Murui Primera Carta a Timoteo 3 Bible Online

Primera Carta a Timoteo 3 - Murui bible

Primera Carta a Timoteo 3

¹Bicɨnodɨ uanaicɨno. Creyentiaɨna llofueraɨmana bu jaiacania, naimɨe comecɨmo mare jitaillacɨno ite.

²Bie isoide llofueraɨmana jaiacadɨmɨena jitaidɨcue. Naga comɨnɨ naimɨe mare raillamɨe. Dañaiñona aɨredɨmɨe. Abɨ eenotɨmɨe. Ebena iñedɨmɨe. Ɨɨnogamɨe. Jɨaɨe comɨnɨ naimɨe jofomo riadedɨ, raise nafuecabitɨmɨe. Jusiñamui uaina raise llofuecabitɨmɨe.

³Jɨfairuiñedɨmɨe. Fuiriraɨnidɨmɨe. Raɨre icɨriraɨnidɨmɨe. Ucubena nɨcɨdoñedɨmɨe.

⁴Naimɨe comɨnɨna raise sedadɨmɨe. Naimɨe anamo naimacɨ illanona, naimɨe uruiaɨ ie uaina raise ɨɨnotadɨmɨe. Ie isoidɨmɨe llofueraɨmana jaillana jitaidɨcue.

⁵Iese naimɨe iñenia, ie anamo itɨnona naimɨe raise sedañenia, ¿nɨese jɨaɨe creyentiaɨna raise sedaite?

⁶Como creyentena jaidɨmɨena creyentiaɨna llofueraɨmana fetoñeno, naie dɨga naimɨe abɨ ɨedoi raillano. Abɨ ɨeduamona, Taɨfe isoi jeacɨno fɨnoite.

⁷Llofueraɨmana jaiacadɨmɨena creyenteñedɨno: “Mare” raiñenia, naimɨena fetoñeno. Iese naimɨena raiñenia, naimɨe joreñona jeare ñaɨtɨmacɨ. Iemei Taɨfe ramo jɨaɨ faɨte, naimɨe abɨdo danomo uaillena. Ie muidona naimɨe uaina jaca cacarefiñeitɨmacɨ. Diáconuaɨ illa rafue

⁸Diáconuaɨ creyentiaɨ llofueraɨnɨ isoi marena illa. Ɨɨnouiganona illa. Jɨfairaɨeñena. Ucubena nɨcɨdoñena.

⁹Naimacɨdɨ Cristona caɨ ɨɨnua rafuena jeanide comecɨaɨmona ɨɨnua.

¹⁰Bu omoɨ fetoacania, naimacɨna nano facacɨ. Roracomo jɨaɨe rana nano maɨjɨta. Iena raise fɨnoia, diáconuaɨna jaite.

¹¹Diáconuaɨ aɨnɨaɨ jɨaɨ ɨɨnogañaiñuaɨna illa. Jɨaɨe comɨnɨ joreñona ñaɨñena. Jiroraɨnina. Naga rafuena marena raise fɨnua.

¹²Nana diáconuaɨ aɨdɨ dañaiñoriede. Diáconuaɨ uruiaɨ naimacɨ uaina raise ɨɨnua. Diáconuaɨ imacɨ anamo itɨnona raise sedajana uiñua.

¹³Diáconuaɨ marena maɨjɨia, comɨnɨ naimacɨmo iobillacɨnona fecaitɨmacɨ. Cristo Jesúna ɨɨnuano, naimɨena marefodo jɨaɨ lloitɨmacɨ. Jusiñamuina ɨɨnotɨno

¹⁴Timoteo, raɨre o dɨne jaiacadɨcue; iadedɨ uicodo bie rafuena omo cuetɨcue.

¹⁵Are cue riñenia, danɨ omoɨ creyentiaɨ dɨese ofia, Jusiñamui ie comɨnɨna marena omoɨ illana omoɨ uiñollena, omo cuetɨcue. Cajede Jusiñamuina jai sedadɨcaɨ. Uanaicɨnona rɨidotɨcaɨ.

¹⁶Jusiñamui caɨna Cristona jai uiñotagafuedɨ jɨaɨe rafue baɨfemo faɨte. Iena caɨ uiñuanona, raitɨcaɨ:Enɨruemo Cristodɨ ɨimana jai bairede.Jusiñamui Joreñodɨ caɨna naimɨe uai siñonana uiñotade.Jusiñamui jaɨenisaɨ naimɨena jɨaɨ cɨodɨmacɨ.Jɨaɨe naɨraɨaɨmo naimɨena llotɨcaɨ.Iena cacajamona, ailluena comɨnɨdɨ dɨga naɨraɨmona naimɨena birui ɨɨnotɨmacɨ.Monamo naimɨe abɨdo jai jaide.