Read Murui Carta a los Hebreos 3 Bible Online

Carta a los Hebreos 3 - Murui bible

Carta a los Hebreos 3

¹Cue amatɨaɨ, jeacɨno anamo omoɨ jai iñena jira, ie dɨbeimo omoɨna Jesús jai fetua jira, naimɨe siño jitona jira, naimɨemo omoɨ comecɨaɨna faca. Naimɨena ja ñaɨtɨcue. Ie rafuena llollena, Jusiñamui naimɨena orede. Naimɨe lloga rafuena jai caɨ ɨɨnuamona, naimɨedɨ Jusiñamui dɨga caɨ facaina nanoca ñaɨraɨma.

²Ie Moo comɨnɨna naimɨe raise sedajanona, naimɨedɨ ie Moo uaina ɨɨnuanona, iena fɨnode. Nana Israel comɨnɨna naimɨe sedajanona, Moisés mɨcorɨ Jusiñamui uaina ɨɨnuanona, iena fɨnode.

³Jusiñamuimona Jesúdɨ Moisés mɨcorɨ baɨfemo faɨte. Moisés mɨcorɨ mare; iadedɨ naimɨe caɨna jillotañede. Jesús caɨna jillotaja jira, Moisés mɨcorɨ baɨfemo Jesúri Jusiñamui iobide. Caɨ jillua jira, Jusiñamui comɨnɨna jaidɨcaɨ.

⁴Buena caɨ fɨnuamona, naimɨe comɨnɨna jaiñedɨcaɨ; iadedɨ naimɨe caɨna ie comɨnɨna dama itatarede.

⁵Naimɨe facaina maɨjɨano, Jusiñamui llua isoi, Moisés mɨcorɨdɨ nana hebreos comɨnɨna raise sedade. Ie comɨnɨmo Moisés mɨcorɨ Jusiñamui naimɨemo lloga uaina raise llote. Naimɨemona Jusiñamui ɨco llolle uaidɨ uanaicɨnona uiñotɨcaɨ.

⁶Jusiñamui facaina maɨjɨanona, Moisés mɨcorɨ ie comɨnɨna sedade; iadedɨ Cristodɨ Jusiñamui Jitona jira, naimɨe ie comɨnɨna sedade. Naimɨena caɨ ɨɨnocana jaia, naimɨemo caɨmare caɨ ocuiria, Jusiñamui ua comɨnɨdɨcaɨ. Jusiñamuimona abɨdo caɨ jaiñellena, bie rafuemona caɨ fueua

⁷Jusiñamui Joreño caɨmo birui lloia, iena cacarei. Ero, Jusiñamui jaie lluana cuetatate:

⁸Omoɨ jaiagaɨ isoi iñeno.Jofue iñenanomo omoɨ jaiagaɨ ia, cue uaina ɨɨnoñedɨmacɨ.

⁹“Naimɨe uaina raise uiñotɨcaɨ” raillanona, cuena facacɨcabitɨmacɨ.Cuarenta años cue siño fɨnoca rana cɨodɨmacɨ; iadedɨ jaca ɨɨnoñedɨmacɨ.

¹⁰Naimacɨmo llotɨcue: “Omoɨ dɨga icɨritɨcue.Cue dɨbeimo omoɨ illamo omoɨ comecɨaɨna facañedomoɨ.Cue lloga uaido jaiacaiñedomoɨ”.

¹¹Omoɨ dɨga cue icɨrilla jira, nainomo uri illena, omoɨmo cue lloga enɨruemo jaca jaiñeitomoɨ.

¹²Cue amatɨaɨ, caɨ jaiagaɨ rafuena caɨ uiñuamona, caɨ fueua. Uanai Jusiñamuimona abɨdo omoɨ jaiñellena, naimɨe jai lloga rafuena omoɨ ɨɨnocana jai. Omoɨmona bu raise ɨɨnoiacaiñenia, naimɨemo llono.

¹³Jusiñamui rafuena omoɨ raise ɨɨnollena, nagarui coninɨ omoɨ comecɨaɨna ocuiñota. Omoɨmona jeacɨnona ebiruiñellemona, jeacɨno anamo omoɨ iñellesa, birui Jusiñamui rafuena raise ɨɨno. Jeacɨno anamo omoɨ dane jaia, Jusiñamui rafuena ɨɨnoñeitomoɨ. Iemona naimɨe rɨicaillafue anamo dane iitomoɨ.

¹⁴Cristomo caɨ duilla jira, naimɨe caɨna jaca canuanona, caɨ comecɨaɨna marena caɨmare jaca itataite. Nana caɨ ille dɨnori naimɨena caɨ nano ɨɨnua isoi, caɨ ɨɨnocana jaia, marena caɨmare iitɨcaɨ.

¹⁵Ie jira naimɨena ɨɨno. Bie jaie cuega:Jusiñamui lloga uaina birui cacarei.Jofue iñenanomo caɨ jaiagaɨ ia, Jusiñamui uaina ɨɨnoñedɨmacɨ cuega. Naimacɨ isoi iñeno.

¹⁶Egiptomona Moisés mɨcorɨ anado jaidɨmacɨ. Dɨga icaiño Jusiñamui uaina cacadɨmacɨ; iadedɨ iena raise ɨɨnoñedɨmacɨ.

¹⁷Cuarenta años jofue iñenanomo itɨmacɨ; iadedɨ naimɨena naimacɨ ɨɨnoñena jira, Jusiñamui naimacɨ dɨga icɨrite. Naimɨena ɨɨnoñena jira, naimacɨmo Jusiñamui llote: “Omoɨmo cue lloga enɨruemo jaca jaiñeitomoɨ” llote. Ie jira jofue iñenanomo naimacɨmo Jusiñamui jai lloga enɨruemo jaiñeno fiodaitɨmacɨ.

¹⁹Jusiñamui uaina naimacɨ ɨɨnoñena jira, naie Canaán railla enɨruemo jaca jaiñedɨmacɨ. Naimacɨ comecɨaɨ jaca uri illana uiñoñedɨmacɨ.