Read Murui Apocalipsis 10 Bible Online

Apocalipsis 10 - Murui bible

Apocalipsis 10

¹Ie facaise Jusiñamui illanomona enɨruemo jɨaɨe jaɨenicɨ billana cɨodɨcue. Naimɨemo Jusiñamui uai eo ite. Uillɨe motomo naimɨe ite. Naimɨe ɨfogɨ afemo ameo ite. Naimɨe uieco jitoma isoi quenirede. Naimɨe ɨdaɨ eo boode amena isoi eruaɨde.

²Naimɨe onollɨmo econoga rabenico ite. Enɨruemo naimɨe ria, naimɨe nabei eɨllɨ monaillai emodomo naidaide. Ie jarɨfebei eɨllɨ enɨruemo naidaide.

³León eo ɨrilla isoi, ado llote. Naie facaise siete gurua ñaɨa isoidɨno uai cacadɨcue.

⁴Naimacɨ lluana cacaja mei, iena cueiacadɨcue; iadedɨ monamona damɨe cuemo llote: —Naie lluana lloñeno. Iena cueñeno.

⁵Naie jaɨenicɨ ie nabei onollɨ mona dɨne ñuitajanona,

⁶Jusiñamuimo llote: —Jaca itɨo. Monana nainomo ite ra dɨga fɨnodɨo. Enɨruena nainomo ite ra dɨga jɨaɨ fɨnodɨo. Monaillai nainomo ite ra dɨga jɨaɨ fɨnodɨo. Cue baɨfemo o faɨa jira, uanaicɨnona cue lluana uiñotɨo. O lloga uaina jaca suite.

⁷Iraɨe jaɨenicɨ ie trompeta ja fiite. Filla mei, bie facaise Jusiñamui ie facaina lloraɨnɨ mɨcorɨaɨmo jaie lloga rafue suite. Comɨnɨ naie rafue jaie raise cacaiñedɨmacɨ; ia iena ja raise cacaitɨmacɨ —llote.

⁸Monamona cuemo aillɨ llotɨmɨe dane llote: —Jaɨenicɨ onollɨmo econoga ite rabenicona llɨnuai.

⁹Ie jira jaɨenicɨ dɨne cue jaillanona: —Iena cuemo ine —llotɨcue. Uai ote: —Iena ono. Iena mai guiño. Cɨifo isoi o fuemo iena cacaitɨo; iadedɨ o jebemo erɨrede ra isoi iena cacaitɨo.

¹⁰Llɨnua mei, iena guitɨcue. Cɨifo isoi naɨmerede rana cacadɨcue; ia guilla mei, erɨrede ra isoi cue jebemo ite.

¹¹Cuemo dane llote: —Omo cue llolle rafuena lloitɨo. Ailluena comɨnɨmo ɨco suille rafuena lloitɨo. Illaɨcomɨnɨmo ɨco suille rafuena lloitɨo.