Read Murui Apocalipsis 14 Bible Online

Apocalipsis 14 - Murui bible

Apocalipsis 14

¹Naie facaise Jerusalémo Sion railla anedu muidomo Toɨca Llauda isoidɨmɨe naidaillana cɨodɨcue. Naimɨe dɨga ciento cuarenta y cuatro mil comɨnɨ itɨmacɨ. Naimacɨ uiecuaɨ itofiaɨmo naimɨe mamecɨ, ie Moo mamecɨ dɨga, jai cuega.

²Monamona damɨe ñaɨana cacadɨcue. Aillue ille surua isoi, eo fɨcɨrede. Eo gurua isoi jɨaɨ fɨcɨrede. Ailluena comɨnɨ arpas tailla isoi, naimɨe ñaɨana cacadɨcue.

³Jusiñamui illanomo bie ciento cuarenta y cuatro mil comɨnɨ comue ruana rotɨmacɨ. Naie cuatro cajedɨno nainomo ite. Naie veinticuatro einamacɨ nainomo itɨmacɨ. Danɨ bie ciento cuarenta y cuatro mil comɨnɨ bie comue ruana rotɨmacɨ. Jɨaɨno iena fueonidɨmacɨ. Bie ciento cuarenta y cuatro mil comɨnɨ enɨruemona naimacɨ dɨbeimo iñedɨnomona jai jillodɨmacɨ.

⁴Bie ciento cuarenta y cuatro mil comɨnɨ jearede rafuena ebiruiñedɨmacɨ. Llauda isoidɨmɨe rafuena ɨɨnocana jaidɨmacɨ. Llauda isoidɨmɨe fiodailla jira, enɨruemo itɨnomona naimacɨdɨ nano jillodɨno Jusiñamui iena, Llauda isoidɨmɨe iena.

⁵Cristo rafuedo jeacɨnona fɨnocabiñeno raise jaidɨmacɨ. Juan daje amani jaɨeniaɨ rafue lluana cacade

⁶Naie facaise mona motomo jaɨenicɨ feiana cɨodɨcue. Naga naɨraɨmo, nana enɨruemo itɨnomo mare rafuena lluaide.

⁷Ado llote: —Jusiñamuina ɨɨnuanona naimɨena seda. Naimɨemo iobillacɨnona feca. Naimɨemo ɨɨnoñedɨnona ja duere fɨnoite. Monana, enɨrue dɨga, monaillai dɨga, ille dɨga, naimɨe fɨnua jira, naimɨena seda.

⁸Jɨaɨe jaɨenicɨ billanona llote: —Babilonia railla naɨraɨ illano eo aillue; iadedɨ ja iñeite. Nainomo itɨno ja fuitɨmacɨ. Jeacɨnona nainomo itɨno eo fɨnua jira, jɨaɨe naɨraɨaɨna jeacɨnona jɨaɨ eo fɨnotatɨmacɨ. Babiloniamo jaie itɨno isoi, Jusiñamuimona duere sefuitɨmacɨ.

⁹Naie facaise jɨaɨe jaɨenicɨ billanona, ado llote: —Monaillaimona bite ocainana bu sedaia, ie joreñona bu sedaia, ie uieco itofemo, ie onollɨmo ocaina cuetataga ra bumo ia,

¹⁰Jusiñamui rɨicaillafuemona, naimacɨna duenaiñenamona, jaca eo duere sefuitɨmacɨ. Irai motomo jaca duere sefuitɨmacɨ. Azufre boa isoi irai boode. Jusiñamui jaɨenisaɨdɨ Llauda isoidɨmɨe dɨga, iena cɨoitɨmacɨ.

¹¹Naie irai illano jaca bouamona, ie uillɨe jaca baireite. Nainomona naie duere sefuidɨno jaca jilloñeitɨmacɨ. Iese naimacɨ fiodaiñeno jaca duere sefuitɨmacɨ —llote.

¹²Bie rafue suille facaise Jusiñamui lloga uaina raise ɨɨnuanona, Jesús dɨbeimo raise illanona, comecɨaɨ ocuiñocana naimacɨ jaille.

¹³Iemei monamona Jusiñamui Joreño llote: —Biena cueno: “Biruimona Jesúna ɨɨnuamona, meineganodɨ caɨmare iitɨmacɨ. Jesús dɨbeimo naimacɨ illamona, navui duere sefuidɨmacɨ. Iemona uri iitɨmacɨ. Ieri Jusiñamuimona ɨbana feiñoitɨmacɨ”. Juan Jusiñamui enɨruemo itɨnona duere fɨnua rafuena cacade

¹⁴Naie facaise monamo cue eruaɨa, userede uillɨena cɨodɨcue. Uillɨe emodo Cristo raɨde. Ɨimana eruaɨde. Naimɨe ɨfogɨmo oromona fɨnoca nuicɨrai ite. Ie onollɨmo jairede lloebɨ ite.

¹⁵Jusiñamuina sedajanomona jɨaɨe jaɨenicɨ billanona, Cristomo ado llote: —O lloebɨ dɨga enɨruemo ite riarana cota, iena ollena. Jai einaite —llote. Iese llote; ia comɨnɨna duere fɨnollena ñaɨte. Naimacɨ duere fɨnua facaisena ñaɨte.

¹⁶Jaɨenicɨ llua isoi, ie lloebɨ dɨga Cristo cotade. Nana iena fɨnode. Comɨnɨna duere fɨnode.

¹⁷Jusiñamuina sedajanomona naie facaise jɨaɨe jaɨenicɨ bite. Naimɨe onollɨmo jairede lloebɨ jɨaɨ ite.

¹⁸Ieconi Jusiñamuimo jobaisoillanomona jɨaɨe jaɨenicɨ bite. Enɨruemo boode ra dotaja uaidɨ naimɨemo ite. Lloebɨredɨmɨemo ado llote: —Jai einailla jira, naimacɨna o ollena, o lloebɨ dɨga illɨmo ite uvaɨaɨna tɨno. Iese llote; iadedɨ comɨnɨna duere fɨnollena ñaɨte.

¹⁹Jaɨenicɨ llua isoi, ie lloebɨ dɨga tɨnode. Uvas ua mei, Jerusalén ecɨmo iji ollena ifomo dotade. Naie iji jino eo tote. Comɨnɨna ñaɨtɨcue. Jusiñamui rɨicaillafue anamo eo duere sefuitɨmacɨ. Eo dɨaitɨmacɨ. Trescientos kilómetros dɨrue enɨrue emododo toite. Caballo ɨfogɨ facaise a llerite.