Read Murui Apocalipsis 17 Bible Online

Apocalipsis 17 - Murui bible

Apocalipsis 17

¹Naie facaise naie siete copas dɨga ite jaɨenisaɨmona cue dɨne damɨe billanona cuemo llote: —Cue dɨga bi. Eo maraiñede rɨño duere sefuillana omo acataitɨcue. Monaillai emodomo naiñaiño jai raɨde isoide. Naiñaiñodɨ nanoca naɨraɨ illano mamecɨdo ite. Nana illaɨcomɨnɨ naie naɨraɨ anamo itɨmacɨ.

²Naiñaiñona sedajamona, naiñaiño dɨga, illaɨcomɨnɨdɨ jearede rafuena fɨnocabidɨmacɨ. Naiñaiñona nabaillamona, enɨruemo ite comɨnɨ jearede rafuena eo ebiruitɨmacɨ —llote.

³Nɨcaɨrilla isoi, jaɨenicɨ cue joreñona uillanona, jofue iñenanomo cue joreñona uite. Eo jiaɨrede rɨirede ocaina emodomo naie rɨño raɨllana cɨodɨcue. Jusiñamuina eo jearede ñaɨacɨno ocaina abɨmo eo ite. Ocainamo siete ɨfogɨaɨ ite. Diez sigaɨ jɨaɨ ite.

⁴Naie rɨño jiduirede ɨniroi, jiaɨrede ɨniroi dɨga jɨtade. Eo raifide quenirede ra dɨga, naiñaiño abɨ eo fɨnobide. Dajerie ra oromona fɨnoca. Dajerie perlas railla ramona fɨnoca. Ie dɨga ie abɨ eo fɨnobide. Naiñaiño onollɨmo oromona fɨnoca copana uite. Nainomo eo maraiñede jearede rafuena fɨnocana uite isoide.

⁵Jusiñamui naiñaiño fɨnoca rafuena uiñotaiacana jira, naiñaiño uiecomo mamecɨ jai cuetataga: “Nanoca Babilonia raillañaiñodɨcue. Cuemona eo jearede rafue comuicana jaicabide. Cue muidona comɨnɨ jearede rafuena fɨnocabide”.

⁶Naiñaiñodɨ ailluena Jusiñamuimo duidɨnona, ailluena ua Jesúna ɨɨnotɨnona meinetajana eo ebiruite. Naiñaiñona cue cɨoia, eo raijicaidɨcue.

⁷Jaɨenicɨ cuemo jɨcanote: —¿Bue ñe raijicaidɨo? Naiñaiñomo ite rafuena omo lloitɨcue. Naiñaiñodɨ ocaina emodomo raɨde. Naie ocaina rafuena jɨaɨ lloitɨcue.

⁸Naie ocaina navui ite; ia birui jai iñede. Ɨco enɨruemona, eo ana ite ifomona, dane biite; iadedɨ faɨfite. Ieri Jesucristona ɨɨnoñedɨno raijicaitɨmacɨ. Jesucristona naimacɨ ɨɨnoñena jira, monamo Jusiñamuidɨ ie rabenicomo enɨrue nia fɨnoñena facaise naimacɨ mamecɨaɨna jaca cueñede. Naimɨe illanomo jaca iñeitɨmacɨ.

⁹Ocaina rafuena omo ja lloitɨcue. Jusiñamui ona uiñotajanona iena cacaitɨo. Bie siete ɨfogɨdɨ siete anedu mamecɨdo ite. Rɨño nainomo raɨde.

¹⁰Ie siete ɨfogɨdɨ siete illaɨcomɨnɨ mamecɨdo ite. Naimacɨmona cinco illaɨcomɨnɨ jai iñede. Damɨe comɨnɨna birui sedade. Jɨaɨmɨe comɨnɨna nia sedañede. Comɨnɨna naimɨe sedaia, are naimacɨna sedañeite. Dallu sedaite.

¹¹’Ifomona bite ocainana dane lloitɨcue. Comɨnɨna jɨaɨ sedaite; ia bie siete illaɨcomɨnɨ sedajacɨnomo duite. Comɨnɨna naimɨe sedaja mei, naimɨe faɨfite.

¹²Ie diez sigaɨdɨ diez illaɨcomɨnɨ mamecɨdo ite. Diez naɨraɨna sedaitɨmacɨ; iadedɨ nia sedañedɨmacɨ. Comɨnɨna dallu sedallena, ocainamona naimacɨ uaina feiñoitɨmacɨ.

¹³Daje isoi comecɨna lloitɨmacɨ. Ocainana nabaitɨmacɨ. Naimɨe jitailla rafuena fɨnuanona, naimɨe anamo iitɨmacɨ.

¹⁴Toɨca Llauda isoidɨmɨe dɨga jobairitɨmacɨ; ia Llauda isoidɨmɨe ie comɨnɨ dɨga emodofite. Llauda isoidɨmɨe nana illaɨcomɨnɨ baɨfemo faɨa jira, nanoca imɨena jira, naimacɨna emodofite. Ie comɨnɨna naimɨe fetode. Naimɨena ɨɨnotɨmacɨ. Jai emodofitɨmacɨ —llote.

¹⁵Jaɨenicɨ nia llote: —Rɨño monaillai emodomo raɨllana aillɨ cɨodɨo. Monaillaidɨ nana comɨnɨ mamecɨdo ite. Naga naɨraɨ mamecɨdo ite.

¹⁶Naie diez illaɨcomɨnɨdɨ, ocaina dɨga rɨñona enoitɨmacɨ. Naiñaiñona duere fɨnoitɨmacɨ. Jusiñamui jitailla jira, naimɨe jitailla rafue fuidollena, naimɨe lloga uai suillena, naimacɨ comecɨna daje isoi lloitaite. Ocaina anamo naimacɨna itataite. Rɨñona iese fuidoitɨmacɨ. Naiñaiño ɨniroina oni dotatajanona, naiñaiño taɨñaiñona iite. Naiñaiñona meineitɨmacɨ. Ie llɨcɨsina rɨitɨmacɨ. Ja muidomo iraimo naiñaiñona dotaitɨmacɨ. Iese naiñaiñona duere fɨnuanona, naiñaiñona fuidoitɨmacɨ.

¹⁸Bie rɨñodɨ nanoca naɨraɨ illano mamecɨdo ite. Naie naɨraɨ anamo nana enɨruemo ite illaɨcomɨnɨ iitɨmacɨ —llote.