Read Muthuvan ലൂക്കോശ് 16 Bible Online

ലൂക്കോശ് 16 - Muthuvan bible

ലൂക്കോശ് 16

¹ഏശു അവന്റ ശിശിയൻമാരോട പേശീത്, “ഒര താവീല് ഉറവായ്‌ക്കാറനാഞ്ഞ ഒരത്തന്ക്ക് ഒര കങ്കാണി ഒണ്ടാഞ്ഞ്ത്; ഈ കങ്കാണി ഉറവായ്‌ക്കാറന്റ ശൊത്ത്ശൊകന്തറമൊക്ക നയിപ്പിച്ച് കളയന്റാൻ ഇന്റ് ചെല ആള്കള് അവനപ്പെറ്റി കുറ്റം പേശിയാര്.

²അത്കൊണ്ട് ആ ഉറവായ്‌ക്കാറൻ കങ്കാണീന വിളിച്ച് അവനോട കേട്ടാൻ, ‘നാന് നിന്നപ്പെറ്റി എന്തനാണും കേക്കന്റത്? നിന്റ വേലീന്റ കണക്ക് ഏപ്പിച്ചിട്, നിക്ക് ഇന്നി കങ്കാണി ആഞ്ഞിരപ്പാൻ പെറ്റ്ത്ത്‌ല’ ഇന്റ് പേശിയാൻ.

³ആ കങ്കാണി ശൊന്തം പേശിയാൻ, ‘നാന് ഇന്നി എന്തൻ ചെയ്‌വിൻ? എന്ന കങ്കാണി വേലയിനെന്റ് മാറ്റ്‌വ്റ്; കെളപ്പാനിക്കി എക്ക് ശക്ക്തിയില്ല; എരന്ന് നടപ്പാനിക്കി നാന് നാണിക്കിന്റൻ.

⁴എന്ന ഏമാൻ കങ്കാണി വേലയിനെന്റ് മാറ്റ്‌വിനിക്കി ആള്കള് എന്ന അവങ്ങള വീട്ട്ക്ക് കെയ്യേപ്പാനിക്കി വേണ്ടി നാന് എന്തൻ ചെയ്യണമിന്റ് എക്ക് തിക്കൊണ്ട്.’”

⁵“പിന്ന ആ കങ്കാണി അവന്റ ഏമാന്റ കടക്കാറ ഓരോരത്തനയം വിളിച്ച് ആത്തീത്തീവനോട, ‘നീ എന്റ ഏമാന്റ കെയ്യിനെന്റ് എത്തറ കടം വാങ്ങിയ’ ഇന്റ് കേട്ടാൻ.

⁶‘നൂറ് കൊടം എണ്ണ’ ഇന്റ് അവൻ കങ്കാണിയോട പേശിയാൻ. കങ്കാണി അവനോട, ‘പിടിയിന്റ് നിന്റ പറ്റ് പുക്ക് വാങ്ങി ഇര്ന്ന് അമ്പത് ഇന്റ് തിര്ത്തി എയ്‌ത്’ ഇന്റ് പേശിയാൻ.

⁷പിന്ന കങ്കാണി വേറ ഒരത്തനോട, ‘നിയ്യ് എന്റ ഏമാനോട എത്തറ കടം വാങ്ങിയ ഇന്റ് കേട്ടാൻ നൂറ് പെടി കോതമ്പ്’ ഇന്റ് അവൻ തിരിച്ച് പേശിയാൻ; കങ്കാണി അവനോട, ‘നിന്റ പറ്റ് പുക്ക് എട്ത്ത് എമ്പത് ഇന്റ് എയ്‌ത്’ ഇന്റ് പേശിയാൻ.”

⁸“ഈ നേരില്ലാത്ത കങ്കാണി ഈണ പുത്തിയോട ചെയ്ഞ്ഞത് കൊണ്ട് ഏമാൻ അവന പൊക്കിപ്പേശിയാൻ; എന്തനിന്റെ ഈ ലോകത്തീല ആള്കള് തെയ്‌വം വായന്റ ഒലകത്ത്ക്കൊള്ള ആള്കളക്കായും പുത്തിയോട അവങ്ങള കാരിയങ്ങള ചെയ്യന്റാര്.”

⁹“ഈ ലോകത്തീല് നിങ്ങ്ക്കൊള്ള ഉറവായ് വേറാള്കള്ക്ക് കൊട്ത്ത് ഒതവി ചെയ്ഞ്ഞ് കൂട്ട്കാറ ശേത്ത് കൂട്ടണം; ആണയിന്റെ അത് ഇല്ലാണ്ടിയാവിനിക്കി അവങ്ങ നിങ്ങള എപ്പനം ഒള്ള കടവീട്ടീല് കെയ്യേപ്പ്റ്.

¹⁰ഒര കുഞ്ചി കാരിയം നേരോട ചെയ്യന്റവൻ വെലീ കാരിയമം നേരോട തിന്ന ചെയ്യും; അത്പേലതിന്ന കുഞ്ചിക്കുഞ്ചികാരിയത്തീല് നേര്കാട്ടാത്തവൻ വെലീ കാരിയങ്ങളീലും നേര്കാട്ട്ത്ത്‌ല.

¹¹ഈ ഒലകത്തില ശൊത്ത്ശൊകന്തറം പാത്ത് എട്ത്ത് നടക്കന്റതീല് നിങ്ങ നമ്പ്‌വാനിക്കി പെറ്റന്റ ആള്കള് ഇല്ലന്റെ ശത്തിയമാഞ്ഞ കാരിയങ്ങള് ഏവൻ നിങ്ങള ഏപ്പിക്കും?

¹²അത്പേലതിന്ന വേറ ആള്കള്ക്ക് ഒള്ളതീനെന്റ് നിങ്ങ നമ്പ്‌വാനിക്കി പെറ്റന്റ ആള്കള് ഇല്ലന്റെ നിങ്ങ്ക്ക് ശൊന്തമാഞ്ഞ് ഏവൻ തെരും?”

¹³“റണ്ട് ഏമാൻമാര്ക്ക് വേലയെടപ്പാനിക്കി ഒര വേലക്കാറന്ക്കും നോക്കണ്ട; അവൻ ഒരത്തന വെറ്ത്ത് മെറ്റീവന ശ്‌നേകിക്കും; ഇല്ലന്റെ ആത്തീത്തീവനോട ചേന്ത് നെന്റ് മെറ്റീവന തള്ളിക്കളയത്തം ചെയ്യും. ഒരേ ശമയത്ത് തെയ്‌വത്ത്ക്ക് വേണ്ടി വേല ചെയ്‌വാനും ഉറവായ്‌ന ശ്‌നേകിപ്പാനിക്കും നോക്കണ്ട.”

¹⁴ഉറവായ്‌ക്കൊതിയൻമാരാഞ്ഞ ചെല പരീശൻമാര് ഏശു പേശന്റതൊക്ക കേട്ട് അവന നാണംകെട്ത്തിയാര്.

¹⁵ഏശു അവങ്ങളോട പേശിയാൻ, “നിങ്ങ ആള്കള മൊകത്ത് നിങ്ങളത്തിന്ന നേരൊള്ളാള്കള് ആക്കന്റര്; ഇന്റെ തെയ്‌വത്ത്ക്ക് നിങ്ങള ചങ്കീലൊള്ള നെനപ്പ് തിക്കൊണ്ട്; മന്ശൻമാര മൊകത്ത് പൊക്കിപ്പേശന്റത് തെയ്‌വത്ത്ന്റ മൊകത്ത് ഒന്റുമില്ലാത്തത് ആവ്റ്.”

¹⁶ഓകന്നാൻ വെന്റത്‌വെരയം നായപ്റ്മാണമം വ്‌ലാത്തിമാരും നിങ്ങള വെയ്‌കാട്ടികളാഞ്ഞ്ത്; അന്റീ കാലം തൊട്ട് തെയ്‌വം വായന്റ ഒലകത്ത്ന പെറ്റിയൊള്ള നെല്ലശേതി പേശത്തം ഒക്കളം ഏണയിങ്കിലും അതീല് കടപ്പാൻ പാക്കത്തം ചെയ്യന്റാര്.

¹⁷ഇന്റെ മോശീന്റ നായപ്റമാണത്തീല ഒര അച്ചടത്ത്ന്റ വള്ളിപുള്ളിയെങ്കിലും മായപ്പെട്ട് പോന്റതീക്കായും മാനമം പൂമിയും മായപ്പെട്ട് പോന്റത് എള്പ്പം.

¹⁸ഏവനീങ്കിലും ശൊന്തം വീട്ട്കാറീന വിട്ട്കളഞ്ഞ് വേറ ഒര്ത്തീന കൂടിയേ അവൻ കെടന്ന്പട്ട് നടക്ക്ന്റവനാണം; ഏവനീങ്കിലും വീട്ട്കാറൻ വിട്ട്കളഞ്ഞ ഒര്ത്തീന കൂടന്റതിന്റെ അവനം കെടന്ന്പട്ട് നടക്ക്ന്റവനാണം.

¹⁹ഉറവായ്‌ക്കാറനാഞ്ഞ ഒരത്തൻ ഒണ്ടാഞ്ഞ്ത്; അവൻ ഒക്ക തെവശമം വെലീ വെലപിടിപ്പൊള്ള ഉട്പൊടവകള് ഇട്ട് നെല്ലപാട്ട്ക്ക് പൊളച്ചിരന്നാൻ.

²⁰ലാശ്റ് ഇന്റ് പേരൊള്ള തേകം ഒക്ക വെര്ത്തമാഞ്ഞ ഒര പിച്ചക്കാറൻ ഉറവായ്‌ക്കാറന്റ വീട്ട് വാച്ചെടിക്കി കെടപ്പാഞ്ഞ്ത്,

²¹അവൻ ഉറവായ്‌ക്കാറൻ തിനന്റ തട്ട്ന്റ എടിക്കി വിയ്യന്റ ശാപ്പാട് തിന്റ് പെഞ്ച് മാറ്റ്‌വാനിക്കി ആശിച്ചാൻ; നായ്‌പട വന്ത് അവന്റ വെര്ത്ത്ത്ത്ന നക്കത്തം ചെയ്ഞ്ഞത്.

²²ആ ഉറവായ് ഇല്ലാത്ത മന്ശൻ വീന്നപ്പൻ തൂതൻമാര് അവന അപ്പ്റ്കാമ്‌ന്റ മെടിക്കി എട്ത്ത് പിയ്യാര്. ഉറവായ്‌ക്കാറനം വീന്നാൻ; അവന മറവ്‌ചെയ്ഞ്ഞാര്.

²³അവൻ പാതാളത്തീല് കെടന്ന് പുത്തിമുട്ടി മിതാനക്കി പാത്തപ്പൻ തൂര അപ്പ്റ്കാമ്‌ന്റ മെടിയില് ലാശ്റ് ഇര്ക്കന്റത് കണ്ടാൻ.

²⁴“അപ്പാ അപ്പ്റ്കാമേ, എന്നോട കരണ കാട്ടണമേ; അവന്റ വെറ്ള്ന്റ അറ്റം തണ്ണിയില് മുക്കി എന്റ നാക്ക് നനപ്പാനിക്കി ലാശ്റ്ന എന്റ താവ്ക്ക് വിടണമേ; എന്തനിന്റെ നാന് ഈ തിയ്യീല് കെടന്ന് കട്ടപ്പടന്റൻ ഇന്റ് ശക്ക്തിക്കി ആറത്താൻ.”

²⁵കയ്യാ നിയ്യ് ഉശ്റോടിരന്ന കാലത്തീല് നിക്ക് നെമ്മയം അത്പേലതിന്ന ലാശ്റ്ക്ക് തിമ്മയും കിട്ടീത് നെനയ്‌ക്കണം; ഇന്റെ ഇപ്പൻ അവൻ ഇവട നെല്ലപാട്ട്ക്ക് ഇര്ക്കന്റാൻ; നിയ്യ് അവട പുത്തിമുട്ടന്റ ഇന്റ് അപ്പ്റ്കാമ് പേശിയാൻ.

²⁶അത്‌മാട്ട്ക്കും ഇല്ല എങ്ങ്ക്കും നിങ്ങ്ക്കും നെട്വ്ക്ക് ഒര വിട്ട വെടവ് ഒണ്ട്; അത് കടന്ന് നിങ്ങളാട്ടക്കി വെര്‌വാനിക്കി എങ്ങ്ക്ക് ഒരത്തന്ക്കും നോക്കണ്ട; അത്പേലതിന്ന അവടനെന്റ് ഒരത്തന്ക്കും ഇവടക്കി വെര്‌വാനിക്കും നോക്കണ്ട.

²⁷അപ്പിനിക്കി ഉറവായ്‌ക്കാറൻ, “അപ്പ്റ്കാമ് അപ്പാ, അവന എന്റ അപ്പന്റ വീട്ട്ക്ക് പേശി വിടണമേ,

²⁸എന്തനിന്റെ എക്ക് അഞ്ച് കൂടപ്പൊറപ്പ്കളൊണ്ട്; അവങ്ങയം ഈ പാതാളത്തീ വന്ത് എന്നപ്പേല കട്ടപ്പടാണ്ടിയിരപ്പാനിക്കി വേണ്ടി അവൻ അവ്ങ്ങ്ക്ക് താക്കീത് കൊട്ക്ക്ട്ട് ഇന്റ് നാന് നിന്നോട കെഞ്ചിക്കേക്കന്റൻ” ഇന്റ് പേശിയാൻ.

²⁹ഇന്റെ അപ്പ്റ്കാമ് പേശിയാൻ, “അവ്ങ്ങ്ക്ക് മോശയും വ്‌ലാത്തിമാരും ഒണ്ട്; അവങ്ങ പേശന്റത് അവങ്ങ കേക്കട്ടെ.”

³⁰ഉറവായ്‌ക്കാറൻ പേശിയാൻ, ഇല്ല അപ്പനാഞ്ഞ അപ്പ്റ്കാമേ, വീന്നാള്കളീനെന്റ് ഒരത്തൻ പിയ്യ് പേശിയെ അവങ്ങ മനശ് മാറ്റ്‌വ്റ്.

³¹ഇന്റെ അപ്പ്റ്കാമ് അവനോട പേശീത്, “മോശയും വ്‌ലാത്തിമാരും പേശന്റത് അവങ്ങ നമ്പിയില്ലങ്ങി വീന്ന ആള്കളീനെന്റ് ഒരത്തൻ ഉശ്റ്‌വന്ത് എള്മ്പി പിയ്യ് പേശിയാലും അവങ്ങ അത് നമ്പ്ത്ത്‌ല.”