Read Muthuvan ലൂക്കോശ് 5 Bible Online

ലൂക്കോശ് 5 - Muthuvan bible

ലൂക്കോശ് 5

¹ഏശു കെന്നേശരത്ത് കടല്ന്റ കിട്ട നെപ്പാഞ്ഞ്ത്; അപ്പിനിക്കി തെയ്‌വവയനം കേപ്പാനിക്കി ആള്കള് ഏശുവ്ന്റ കിട്ട വന്ത് അവന നെശ്ക്കിയാര്.

²റണ്ട് വെഞ്ചി കരക്കി കിട്ട കെടക്കന്റത് ഏശു കണ്ടാര്; മീൻ പിടിക്കിന്റ ആള്കള് ആ വെഞ്ചിയിനെന്റ് എറങ്ങി വല കെയ്‌കി നെന്റാക്കത്താഞ്ഞ്ത്.

³ശിമോന്റ വെഞ്ചിയില് ഏറി അത് കരയില് നെന്റ് ഇത്ത്റി നീക്കണമിന്റ് ഏശു അവനോട പേശിയാൻ; പിന്ന അവൻ അതീല് ഇര്ന്ന് ആള്കള്ക്ക് നെല്ലപുത്തി പേശി കൊടത്താൻ.

⁴അവൻ പിര്പ്പ്ത്തിയിട്ട് കെയിഞ്ഞപ്പൻ, തായിച്ചിയൊള്ള താവ്ക്ക് വെഞ്ചി നീക്കി വലയിട് ഇന്റ് ശിമോനോട പേശിയാൻ.

⁵“ഏമാനേ, എങ്ങ രായ് പൂര കട്ടപ്പട്ടപ്പനം ഒര കുഞ്ചിമീന് പോലും കിട്ടീല; ഇന്റാലും നിങ്ങ പേശീത്കൊണ്ട് നാന് വല ഇടാം” ഇന്റ് ശിമോൻ തിരിച്ച് പേശിയാൻ.

⁶അവൻ പേശീത്പേല അവങ്ങ ചെയ്ഞ്ഞപ്പൻ, വലകീറിപ്പോന്റ അത്തറക്കും മീനേറീത്.

⁷അത്കൊണ്ട് അവ്ങ്ങ്ക്ക് ഒതവി ചെയ്യ്‌വാനിക്കി മെറ്റീ വെഞ്ചിയില ആള്കള കെയ്‌കാട്ടി വിളിച്ചാര്. അക്കൂട്ടറ് വന്ത് റണ്ട് വെഞ്ചികളും മുങ്ങ്‌വാനിക്കി ആകന്റ വെരയം മീൻ വെഞ്ചിയില് കോരി നെറച്ചാര്.

⁸ഇന്റെ ശിമോൻ പത്ത്റോശ് ഇത് കണ്ട് ഏശുവ്ന്റ കാലീല് വീന്ന്, “കർത്താവേ, നാന് തെറ്റ്കുറ്റം ചെയ്യന്റ ഒരത്തനാഞ്ഞ്ത് കൊണ്ട് എന്ന വിട്ട്പോ” ഇന്റ് പേശിയാൻ.

⁹അവങ്ങ പിടിച്ച മീൻ കണ്ട് അവനം അവന്റ കൂട്ടത്തൊള്ള ഒക്കളം അത്‌ശകപ്പെട്ടാര്.

¹⁰ശിമോന്റ കൂട്ട്കാറും ശെവതീന്റ കുഞ്ച്‌ലും ആഞ്ഞ ശാക്കോവും ഓകന്നാനും അത്പേലതിന്ന അത്‌ശകപ്പെട്ടാര്; ഏശു ശീമോനോട, “പേടിക്കിണ്ട, ഇന്റ്തൊട്ട് നിയ്യ് തെയ്‌വലോകത്ത്ക്ക് വേണ്ടി ആള്കള ചേക്കന്റവനാവ” ഇന്റ് പേശിയാൻ.

¹¹പിന്ന അവങ്ങ വെഞ്ചികള കരക്കി എട്ത്ത് വന്ത് അവ്ങ്ങ്ക്ക് ഒള്ളത് ഒക്ക വിട്ട് ഏശുവ്ന്റ പിറ്റ പിയ്യാര്.

¹²ഏശു ഒര പട്ടണത്തീല് ഇര്ന്നപ്പൻ തേകം മൊത്തം വെള്ളപിടിച്ച ഒരത്തൻ ഏശുവാട്ടക്കി വന്ത് കാലീല് വീന്ന്, “കർത്താവേ, നിക്ക് ഇട്ടമൊണ്ടങ്ങി എന്ന ശുത്തിയാക്ക്‌വാനിക്കി പെറ്റും” ഇന്റ് കെഞ്ചിയാൻ.

¹³പിന്ന ഏശു കെയ്യ് നീട്ടി അവന പിടിച്ച്, “എക്ക് ഇട്ടമൊണ്ട്, നിയ്യ് ശുത്തിയൊള്ളവനാക്” ഇന്റ് പേശിയാൻ. അപ്പത്തിന്ന അവനീനെന്റ് വെള്ളചീക്ക് വിട്ട്മാറീത്.

¹⁴ഏശു അവനോട, ഇത് ഒരത്തനോടയും പേശേറ് ഇന്റെ നിയ്യ് പിയ്യ് നിന്നത്തിന്ന പുരോകിതന കാട്ടത്തം അവ്ങ്ങ്ക്ക് ഒര അടയാളമാവാനിക്കി വേണ്ടി മോശീന്റ ഉത്തറവീല് പേശീത്പേല നിയ്യ് ശുത്തിയൊള്ളവനാഞ്ഞ ഇന്റ് കാട്ട്‌വാനിക്കി വയ്‌വാട് കെയിക്കത്തം ചെയ്യണമിന്റ് അവനോട ഉത്തറവിട്ടാൻ.

¹⁵ഇന്റെ ഏശുവ്നപ്പെറ്റിയൊള്ള ഈ ശേതി കൊള്ള പരന്ന്ത്. കൊള്ള ആള്കള് ഏശു പടിപ്പിക്കിന്റത് കേപ്പാനിക്കും അവങ്ങള ചീക്ക് മാറന്റത്ക്കും വേണ്ടി അവനാട്ടക്കി വന്താര്.

¹⁶ഇന്റെ അവൻ പലപ്പനം ഒന്റ്‌മില്ലാത്ത താവീല് പിയ്യ് കുമ്പ്ട്ട്തിന്ന ഇര്ന്നാൻ.

¹⁷ഒരനാളക്കി ഏശു തെയ്‌വവയനം പടിപ്പിച്ചിര്പ്പാഞ്ഞ്ത്, അവട കെലീലയിലും എകൂതിയിലും ഒള്ള പൂര കുടിയിനെന്റും എര്ശലേമിനെന്റും പരീശൻമാരും മതത്ത്നപ്പെറ്റി പടിപ്പിക്കിന്റാള്കളും ഒണ്ടാഞ്ഞ്ത്. ചീക്ക്മാറ്റ്‌വാനൊള്ള കർത്താവ്ന്റ ശക്ക്തി അവന്റ കൂട്ടത്തൊണ്ടാഞ്ഞ്ത്.

¹⁸അപ്പിനിക്കി ചെല ആള്കള് തളന്ന് കെടന്ന ഒരത്തന തൊട്ടിയോട എട്ത്ത് വന്ത് ഏശുവ്ന്റ മൊകത്ത് വെപ്പാനിക്കി പാത്താര്.

¹⁹ഇന്റെ ആള്കള് തിറ്റടിച്ച് നെന്റത്കൊണ്ട് അവ്ങ്ങ്ക്ക് അവന അകത്തിക്കി എട്ത്ത് പോവാനിക്കി നോക്കണ്ടാഞ്ഞ്ത്. അത്കൊണ്ട് അവങ്ങ വീട്ട് മീത ഏറി മൊക്ള് പൊളിച്ച് മാറ്റി ചീക്ക്കാറന തൊട്ടിയോട കിള്ളാനിക്കി എറക്കി ആള്കള നെട്വ്തിന്ന ഏശുവ്ന്റ മൊകത്ത് വെച്ചാര്.

²⁰ഏശു അവങ്ങള നമ്പ് കണ്ട്, “കൂട്ടേ, നിന്റ തെറ്റ്കുറ്റങ്ങള് പൊറ്ത്ത് തന്തിരക്കന്റൻ” ഇന്റ് പേശിയാൻ.

²¹“തെയ്‌വകുറ്റങ്ങള് പേശന്റ ഇവൻ ഏവൻ? തെറ്റ്കുറ്റങ്ങള് പൊറ്പ്പാൻ തെയ്‌വത്ത്ക്ക് ഇല്ലാണ്ടി വേറ ഏവന്ക്ക് പെറ്റും?” ഇന്റ് പരീശൻമാരും മതത്ത്നപ്പെറ്റി പടിപ്പിക്കിന്റാള്കളും നെനച്ചാര്.

²²അവങ്ങ ഈണ നെനയ്‌ക്കിന്റാര് ഇന്റ് ഏശുവ്ക്ക് തിക്കൊണ്ടാഞ്ഞ്, “നിങ്ങ ഈണ മനശീല് നെനയ്‌ക്കിന്റത് എന്തന്ക്ക്?”

²³“‘നിന്റ തെറ്റ്കുറ്റങ്ങള് പൊറ്‌ത്തിരക്കന്റൻ’ ഇന്റ് പേശന്റതോ ‘എള്മ്പിനടവ്’ ഇന്റ് പേശന്റതോ ഏതാണം എള്പ്പം?” ഇന്റ് കേട്ടാൻ.

²⁴ഇന്റെ പൂമിയില് തെറ്റ്കുറ്റങ്ങള് പൊറ്പ്പാനിക്കി മന്ശ്‌നാഞ്ഞ് വന്ത എക്ക് അതികാരമൊണ്ട് ഇന്റ് നിങ്ങ്ക്ക് തിക്കൊണ്ടാവാനിക്കി വേണ്ടി, തളന്ന് കെടന്നവനോട, “എള്മ്പി തൊട്ടി എട്ത്ത് വീട്ട്ക്ക് പോ” ഇന്റ് നാന് നിന്നോട പേശന്റൻ ഇന്റ് പേശിയാൻ.

²⁵അപ്പത്തിന്ന അവൻ അവങ്ങള മൊകത്ത് എള്മ്പി അവൻ കെടന്ന തൊട്ടി തിറ്ത്ത് എട്ത്ത് തെയ്‌വത്ത്ന പൊക്കിപ്പേശി അവന്റ വീട്ട്ക്ക് പിയ്യാൻ.

²⁶അവന കണ്ട് അവങ്ങ ഒക്കളം അത്‌ശകപ്പെട്ട് തെയ്‌വത്ത്ന പൊക്കിപ്പേശി, “ഒര നാളയ്‌ക്കും കാണാത്ത കാരിയം ഇന്റ് നമ്മ കണ്ടം” ഇന്റ് പേശിയാര്.

²⁷ഏശു അവടനെന്റ് പിയ്യപ്പൻ, പിയ്യ വെയിക്കി രാശാവ്ക്ക് ഉറവായ് തെറട്ട്ന്റവനാഞ്ഞ ലേവി ഇന്റ് പേശന്റ ഒരത്തൻ രാശാവ്ക്ക് ഉറവായ് തെറട്ടന്റ താവീല് ഇര്ക്കന്റത് കണ്ടാര്; “എന്റ പിറ്റ വാ” ഇന്റ് ഏശു അവനോട പേശിയാൻ.

²⁸അവൻ എള്മ്പി ഒക്ക ഇട്ടെറിഞ്ഞ് ഏശുവ്ന്റ പിറ്റ പിയ്യാൻ.

²⁹അത്കെയിഞ്ഞ് ലേവി അവന്റ വീട്ടീല് ഏശുവ്ക്ക് വേണ്ടി ഒര വെലിയ വിര്ന്ത് വിട്ടാൻ. വിര്ന്ത്കാറ കൂട്ടത്തീല് രാശാവ്ക്ക് ഉറവായ് തെറട്ടന്റ കൊള്ളാള്കളും വേറ കൊള്ളാള്കളും ഒണ്ടാഞ്ഞ്ത്.

³⁰ഇന്റെ പരീശൻമാരും മതത്ത്നപ്പെറ്റി പടിപ്പിക്കിന്റാള്കളും ഏശുവ്ന്റ ശിശിയൻമാരോട: “നിങ്ങ രാശാവ്ക്ക് ഉറവായ് തെറട്ടന്റ ആള്കള കൂട്ടത്തം തെറ്റ്കുറ്റം ചെയ്യന്റ ആള്കള കൂട്ടത്തം തിന്റ് കുടിക്കിന്റത് എന്തന്ക്ക്” ഇന്റ് പേശി കുശ്കുശ്ത്താര്.

³¹ഏശു അവങ്ങളോട, “ചീക്ക്കാറന്ക്കാണും മെര്ന്ത്കാറനക്കൊണ്ട് ആവശം ചീക്ക് ഇല്ലാത്തവന്ക്ക് മെര്ന്ത്കാറനക്കൊണ്ട് ആവശം ഇല്ല.

³²നാന് നീതിയൊള്ള ആള്കള വിളിപ്പാനിക്കില്ല തെറ്റ്കുറ്റം ചെയ്യന്റ ആള്കള മനശ് തില്‌പ്പി വിളിപ്പാനിക്കാണം വന്ത്ത്” ഇന്റ് പേശിയാൻ.

³³“തെയ്‌വകുളി കൊടക്കന്റ ഓകന്നാന്റ ശിശിയൻമാര് പലപ്പനം തെയ്‌വനോയ്‌മ്പോട പെഞ്ചിര്ക്കത്തം കുമ്പ്ടത്തം ചെയ്യന്റാര്; പരീശൻമാര ശിശിയൻമാരും ആണതിന്ന ചെയ്യന്റാര്. ഇന്റെ നിന്റ ശിശിയൻമാര് തിന്റ്കുടിച്ച് നടക്കന്റാര്” ഇന്റ് പരീശൻമാരും മതത്ത്നപ്പെറ്റി പടിപ്പിക്കിന്റാള്കളും ഏശുവോട പേശിയാര്.

³⁴പെണ്ണ്കാറൻ കൂട്ടത്ത് ഒണ്ടാവ്നിക്കി വിര്ന്ത്കാറ്ക്ക് പെഞ്ചിര്പ്പാനിക്കി പെറ്റ്മാ? ഇല്ല ഒരകാലത്തം ഇല്ല.

³⁵“പെണ്ണ്കാറൻ അവങ്ങള വിട്ട് പോന്റ നാള് വെരും അപ്പിനിക്കി അവങ്ങ തെയ്‌വനോയ്‌മ്പോട പെഞ്ചിര്പ്പ്റ്” ഇന്റ് ഏശു തിരിച്ച് പേശിയാൻ.

³⁶ഏശു അവങ്ങളോട ഒര കത പേശീത് ഏണയിന്റെ, “ഒരത്തനം പളകി ചട്ടയില് പുത്തൻ തുണ്ട് ചേത്ത് തെക്ക്ത്ത്‌ല. ആണ തെച്ചെ പുത്തൻ തുണ്ട് പളകീതോട ചേരാണ്ടിയിരക്കത്തം ചെയ്യും.

³⁷അത്പേലതിന്ന പുത്തൻ വീഞ്ഞ് ഒരത്തനം പളകീ തൊകല് പെയ്യീല് വീത്തി വെക്ക്ത്ത്‌ല. ആണ ചെയ്ഞ്ഞെ തൊകല് പെയ്യ് പൊട്ടി വീഞ്ഞ് തെട്ടിപ്പോകും.

³⁸പുത്തൻ വീഞ്ഞ് പുത്തൻ തൊകല് പെയ്യീല് മാട്ട്ക്ക്മേ വീത്തി വെക്ക്ത്തൊള്ള്.

³⁹പളകി വീഞ്ഞ് കുടിക്കിന്റ ഒരത്തനം പുത്തൻ വീഞ്ഞ് കുടിപ്പാനിക്കി ഇട്ടപ്പെട്ത്ത്‌ല; പളകീത് തിന്നയാണും നെല്ലതിന്റ് പേശ്‌വ്റ്.”