Read Muthuvan അപ്പൊശ്തലൻമാര തെയ്‌വവേലകള് 20 Bible Online

അപ്പൊശ്തലൻമാര തെയ്‌വവേലകള് 20 - Muthuvan bible

അപ്പൊശ്തലൻമാര തെയ്‌വവേലകള് 20

¹എകളയൊക്ക കെയിഞ്ഞ് പവ്‌ലോശ് നമ്പ്കാറ വിളിച്ച് കൂട്ടി അവങ്ങള തക്‌രിയപ്പെട്ത്തിയാൻ; അത്കെയിഞ്ഞ് അവൻ അവങ്ങളോട പേശി മക്കതോനിയക്കി പിയ്യാൻ.

²ആ താവീലൊക്ക ചിറ്റി നടന്ന് ആള്കള കൊള്ള പടിപ്പിച്ച് തക്‌രിയപ്പെട്ത്തി പവ്‌ലോശ് അകായില് എത്തിയാൻ.

³അവട മൂന്റ് മാശം അവൻ കുടിയിരന്നാൻ; പിന്ന അവൻ ശുറിയിക്കി കപ്പല് ഏറ്‌വാൻ തൊടങ്ങീപ്പൻ എകൂതൻമാര് അവന്ക്ക് എത്റാഞ്ഞ് കൂട്ടം കെട്ടത്ത് നടത്തന്റാര് ഇന്റ് കേട്ടാൻ; അത്കൊണ്ട് മക്കതോനിയ വെയിക്കി തില്‌മ്പി പോവാൻ അവൻ പാത്താൻ.

⁴വെരോവയില പുറോശ്‌ന്റ കയ്യൻ ശോപത്ത്റോശും തെശലോനിക്കക്കാറാഞ്ഞ അരിശ്തർകോശും ശെക്ക്‌ന്തോശും തെർവക്കാറനാഞ്ഞ കായോശും തിമ്ത്തിയോശും ഏശിയ താവീലൊള്ള തുകിക്കോശും തൊറോപിമോശും അവന്റ പിറ്റ പിയ്യാര്.

⁵അവങ്ങ എങ്ങ്ക്ക് മൊകത്ത് പിയ്യ് എങ്ങ വെന്റവെരയം തൊറവാശീല് പാത്തിരന്നാര്.

⁶എങ്ങ പുളിയില്ലാത്ത അടയിന്റ ഉലശവം കെയിഞ്ഞ് പില്‌പ്പിയില് നെന്റ് കപ്പല് ഏറി അഞ്ച് നാള്കൊണ്ട് തൊറവാശീല് അവങ്ങള കിട്ടയെത്തിയം; അവട എങ്ങ ഏയ് നാളക്കി ഇരന്നം.

⁷ആയച്ചീന്റ ആത്തീത്തി നാളീ[8]അന്തിക്കി [9]അട മുറിപ്പാൻ കൂടിയപ്പൻ പിറ്റീ നാളക്കി പവ്‌ലോശ് അവടനെന്റ് പോവാനിക്കി ഇരന്നത്കൊണ്ട് രായ് നെട്ക്കൂറ് ശാമം വെരയം അവങ്ങളോട പിര്പ്പ്ത്തിയിട്ടിരന്നാൻ.

⁸എങ്ങ കൂടിയിരന്ന വീട്ട്ന്റ മിതാനൊള്ള മുറിയില് ഒരിന്ന വെളക്ക്കള് ഒണ്ടാഞ്ഞ്ത്.

⁹പവ്‌ലോശ്‌ന്റ പിര്പ്പ്ത്തി നീണ്ട് പിയ്യപ്പൻ യൂത്തിക്കൊശ് ഇന്റ് പേശന്റ ഒര എളന്താരിക്കയ്യൻ വെലീ തൊമ്പറത്ത്ന്റ കിട്ട തൂങ്ങി ഇടിച്ച് ഇര്പ്പാഞ്ഞ്ത്; അവന്ക്ക് പയങ്കരമായിട്ട് തൂക്കം വന്തപ്പൻ വീട്ട്ന്റ മൂന്റാമത്തി നെലയില് നെന്റ് കിള്ളാനിക്കി വീന്നാൻ; അവന തട്ടിയെട്ത്ത് പാത്തപ്പനം അവന്ക്ക് ഉശ്റ് പീത്.

¹⁰പവ്‌ലോശ് പിടിയിന്റ് എറങ്ങിപ്പിയ്യ് അവന്റ മീത കെടന്ന് അവന കൂട്ടിപ്പിടിച്ചാൻ, “പേടിക്കിണ്ട, ഇവന്ക്ക് ഉശ്റ് ഒണ്ട്” ഇന്റ് പേശിയാൻ.

¹¹പിന്ന പവ്‌ലോശ് ഏറിപ്പിയ്യ് അട മുറിച്ച് തിനത്തം വ്‌ലാട്ടിവെരയം പിര്പ്പ്ത്തിയിടത്തം ചെയ്ഞ്ഞാൻ; അത്കെയിഞ്ഞ് അവൻ അവടനെന്റ് പിയ്യാൻ.

¹²അവങ്ങ ആ എളന്താരിക്കയ്യന ഉശ്റോട വീട്ട്ക്ക് എട്ത്ത് പിയ്യാര്; അവങ്ങ ഒക്കളം നെല്ല പേല കൂയ് എടത്താര്.

¹³അശോശ് വെരയം നടന്ന് പോവാനിക്കി പവ്‌ലോശ് പാത്താൻ അവൻ പേശീത്പേല അശോശില് വെച്ച് അവന കപ്പലീല് ഏറ്റിവിട്‌വേളിന്റ് എങ്ങ നെനച്ചം; ആണ എങ്ങ മൊകത്ത് കപ്പലീല് പിയ്യം.

¹⁴അശോശില് വെച്ച് എങ്ങ പവ്‌ലോശ്‌ന കണ്ട് മുട്ടീപ്പൻ അവന കപ്പലീല് ഏറ്റി മിത്‌ലേന നാട്ട്ക്ക് പിയ്യം.

¹⁵അവടനെന്റ് എങ്ങ കപ്പല് നീക്കി ആത്തീത്തി നാളക്കി കിയോശ് ചുര്ത്തീന്റ കിട്ട എത്തിയം, അവടനെന്റ് പിറ്റീ നാളക്കി എങ്ങ ശാമോശ് ചുര്ത്തീയിലം ഒരന്തിവെളിച്ച് മിലേത്തൊശീലും എത്തിയം.

¹⁶ഏണയിന്റാലും പെന്തക്കോശ് ഉലശവത്ത്ക്ക് മുന്തി എര്ശലേമില് എത്ത്‌വാൻ പവ്‌ലോശ് തിട്ക്കം കാട്ടിയാൻ; അത്കൊണ്ട് ഏശിയ താവീല് നെന്റ് അപ്പത്തിന്ന എപശോശില് എറങ്ങാണ്ടി കപ്പലോട്ടി പോവാനിക്കി പവ്‌ലോശ് പാത്താൻ.

¹⁷ഇന്റെ മിലേത്തൊശീല് വെച്ച് അവൻ എപശോശില പള്ളിയില മൂപ്പൻമാര ആള വിട്ട് വെര്ത്തിയാൻ.

¹⁸അവങ്ങ വന്തപ്പൻ ഈണ പേശിയാൻ, “നാന് ഏശിയില് കാല്‌കുത്തി നാള് തൊട്ട് നിങ്ങള എടയില് ഏണ ഇരന്നതിന്റ് നിങ്ങ്ക്ക് തിക്കൊണ്ട്

¹⁹ചെല എകൂതൻമാര കൂട്ടം കെട്ടത്ത് കാറണം എക്കൊണ്ടാഞ്ഞ കട്ടപ്പാട്ന്റ ശമയങ്ങളില് കർത്താവ്ന്റ ഒര വേലക്കാറനാഞ്ഞ് ഏറ്റമം താഞ്ഞ് കണ്ണ്നീരോട എന്റ വേല ചെയ്ഞ്ഞൻ.

²⁰നിങ്ങ്ക്ക് ഓകാരമൊള്ള കാരിയങ്ങളൊക്ക ഒളിച്ച് വെക്കാണ്ടി ഒക്കളം കൂടന്റ താവീലും വീട്കളീലും വെച്ച് നെല്ലപുത്തി പേശിത്തെരത്തം പടിപ്പിക്കിത്തം ചെയ്ഞ്ഞനില്ലോ.

²¹തെയ്‌വത്തോട ചെയ്യന്റ കുറ്റത്തീനെന്റ് തിരിഞ്ഞ് കർത്താവാഞ്ഞ ഏശുകിര്ശ്തുവീല് നമ്പണമിന്റ് എകൂതൻമാരോട മാട്ട്ക്ക്മില്ല എകൂതൻമാരില്ലാത്ത ആള്കളോടയം പേശിയിൻ.

²²നാന് തെയ്‌വത്ത്ന്റ ഉശ്റ് പേശീത്പേല എര്ശലേമ്ക്ക് പോവിൻ അവട എക്ക് എന്തൻ പെറ്റ്മിന്റ് തിക്ക്‌ല.

²³ഏല്‌ക്കൂടും കട്ടപ്പാട്കളും എന്ന കാത്തിര്ക്ക്ന്റ് ഇന്റ് ഓരോര നാട്ടീലും വെച്ച് തെയ്‌വത്ത്ന്റ ഉശ്റ് എക്ക് മുന്തിമുന്തിയേ കാട്ടിത്തന്തത് ഇത് ഇല്ലാണ്ടി വേറൊന്റും എക്ക്‌ തിക്ക്‌ല.

²⁴ഇന്റാലും എന്റ ഉശ്റ് നാന് വെലയൊള്ളതിന്റ് നെനയ്‌ക്കില; തെയ്‌വകിറ്പ ഇന്റൊള്ള നെല്ലശേതി വിളിച്ച് പേശ്‌വാൻ എക്ക് കർത്താവാഞ്ഞ ഏശുവാട്ട് നെന്റ് കിട്ടിയ വേല ചെയ്ഞ്ഞ് തീറക്കണം ഇന്റാണും എന്റ ആശ.”

²⁵“നിങ്ങള നെട്‌വീല് തെയ്‌വം വായന്റ ഒലകത്ത്നപ്പെറ്റി പേശി നടന്ന എന്ന ഇന്നി നിങ്ങ കാണ്ത്ത്‌ലിന്റ് ഇപ്പൻ എക്ക് തിക്കൊണ്ട്.

²⁶അത്കൊണ്ട് നിങ്ങ ഏവനീലും നാശമാഞ്ഞ് പിയ്യെ അത്ക്ക് എന്ന കുറ്റം പേശേറ്തിന്റ് കട്ടായത്തോട പേശന്റൻ.

²⁷എന്തനിന്റെ തെയ്‌വം പേശിയ ശേതി ഒന്റും മറച്ച് വെക്കാണ്ടി നാന് നിങ്ങളോട പേശിക്കാട്ടിയിൻ.

²⁸അത്കൊണ്ട് നിങ്ങ നിങ്ങള തിന്ന പാക്കണം; തെയ്‌വത്ത്ന്റ ഉശ്റ് നിങ്ങള കെയ്യീല് തന്ത പള്ളിക്കാറാഞ്ഞ ആള്കളയം പാക്കണം; തെയ്‌വം അവന്റ ശൊന്തം കയ്യന്റ എലത്തംകൊട്ത്ത് വാങ്ങിച്ച തെയ്‌വത്ത്ന്റ ആള്കള പെര്കാരിക്കിന്റ ആള്കളാകണം.

²⁹നാന് പിയ്യ് കെയിഞ്ഞ് ചെന്നായ്‌കളപ്പേലയൊള്ള തുട്ടൻമാരാഞ്ഞ ആള്കള് നിങ്ങളാട്ടക്കി വെര്വ്റ്; അവങ്ങ നിങ്ങള ഇല്ലാണ്ടിയാക്ക്വ്റ് ഇന്റ് എക്ക് തിക്കൊണ്ട്.

³⁰നമ്പ്കാറാഞ്ഞ നിങ്ങള നൊണ പേശി അവങ്ങള പിറ്റ എട്ത്ത് പോവാനിക്കി നിങ്ങള കൂട്ടത്തീനെന്റ് തിന്ന ചെലാള്കള് ഒണ്ടാകും.

³¹അത്കൊണ്ട് നിങ്ങ എള്മ്പിയിരവൻ; മൂന്റ് വെരിശം രായും പൊള്തും കണ്ണ്നീരോട നാന് നിങ്ങ്ക്ക് പുത്തിപേശി തന്തത് നെനയ്‌ക്കണം.”

³²“നിങ്ങള വളത്ത്ന്റത്ക്ക് അവന്റാള്കള്ക്ക് വെച്ചിരക്കന്റ നെമ്മ തെര്‌വാനിക്കും ശക്ക്തിയൊള്ള തെയ്‌വത്ത്ന്റ കാപ്പാത്തീലും തെയ്‌വകിറ്പയിന്റ വയനത്തീലും ഇപ്പൻ നാന് നിങ്ങള ഒപ്പടയ്‌ക്കന്റൻ.

³³നിങ്ങള ഒരത്തന്റയും തങ്കമോ വെള്ളിയോ ഉട്പൊടവകളോ എക്ക് വാണ്ടാ.

³⁴എക്കും എന്റ കൂട്ടത്തൊള്ള ആള്കള്ക്കും വേണ്ടി ഈ കെയ്‌കൊണ്ട് നാന് വേല എടത്തതിന്റ് നിങ്ങ്ക്ക് തിക്കൊള്ളതില്ലയാ.

³⁵വാങ്ങന്റതീക്കായും കൊടക്കന്റതാണും നെല്ലതിന്റ് കർത്താവാഞ്ഞ ഏശുകിര്ശ്തു പേശീത് നെനയ്‌ക്കിലിയാ? നമ്മ വേല എട്ത്ത് ചീക്ക്കാറാഞ്ഞ ആള്കള പാക്കണം അത് നാന് നിങ്ങ്ക്ക് കാട്ടി തന്തൻ.”

³⁶ഈണ പേശിക്കെയിഞ്ഞ് അവൻ അവങ്ങള കൂട്ടത്ത് മുട്ട്കുത്തി കുമ്പ്ട്ടാൻ.

³⁷അവങ്ങ ഒക്കളം പയങ്കരമായിട്ട് കേന്ന് വീന്ന് കെട്ടി പിടിച്ച് മൊത്തത്തം ചെയ്ഞ്ഞാര്.

³⁸ഇന്നി അവന്റ മൊകം കാണ്ത്ത്‌ലിന്റ്, അവൻ പേശീത്കൊണ്ടാണും അവ്ങ്ങ്ക്ക് പുത്തിമുട്ട് വന്ത്ത്; അവങ്ങ കപ്പല്ന്റ എര്കീല് വെരയം അവന്റ പിറ്റ പിയ്യാര്.