Read Muthuvan എപെശിയിര് 6 Bible Online

എപെശിയിര് 6 - Muthuvan bible

എപെശിയിര് 6

¹കുഞ്ച്‌ലേ, നിങ്ങ കർത്താവീല് നിങ്ങള അപ്പനമ്മമാര ചൊല്ല്ക്ക് നെക്കണം; ഈണ ചെയ്യന്റത് നായമം ആണും.

²“നിക്ക് നെമ്മ ഒണ്ടാവാനിക്കും പൂമിയില് കൊള്ളക്കാലം ഉശ്റോട ഇര്പ്പാനിക്കും

³നിന്റ അപ്പനയം അമ്മീനയം വെക്‌മാനിക്കണം.” ഇത് തെയ്‌വം തന്ത വാക്കും ആത്തീത്തി ഉത്തറവും ആണും.

⁴അപ്പൻമാരേ, നിങ്ങള കുഞ്ച്‌ല്‌ക്ക് മൂച്ച് വെന്റ ശീരിക്കി അവങ്ങളോട പെനിമാറേറ്; അത്ക്ക് പകരം കർത്താവ്ക്ക് ഇട്ടപ്പെടന്റത് പേലയൊള്ള ചൊല്ലീലും പുത്തിപേശത്തീലും അവങ്ങള വളത്തണം.

⁵വേലക്കാറേ[5], നിങ്ങ കിര്ശ്തുവ്ന്റ ചൊല്ല്ക്ക് നെക്കന്റത് പേല ഈ ഒലകത്തീല് നിങ്ങ്ക്കൊള്ള ഏമാൻമാരോട പേടിയിലും വെക്‌മാനത്തീലും കള്ളമില്ലാത്ത മനശോട അവങ്ങള ചൊല്ല്ക്ക് നെക്കണം.

⁶ഏമാൻമാര ഇട്ടം കിട്ട്‌വാനിക്കി വേണ്ടി അവങ്ങ കാണ്വ്നിക്കി മാട്ട്ക്കും വേല ചെയ്യാണ്ടി കിര്ശ്തുവ്ന്റ വേലക്കാറപ്പേല നെല്ല മനശോട തെയ്‌വത്ത്ക്ക് ഇട്ടമൊള്ള ശീരിക്കി ചെയ്യണം.

⁷വേലക്കാറൻ ആഞ്ഞാലും വേലക്കാറൻ ഇല്ലാത്തവൻ ആഞ്ഞാലും അവാവൻ ചെയ്യന്റ നെല്ലകാരിയത്ത്ക്ക് ഒത്തത്പേല കർത്താവീനെന്റ് വരം കിട്ട്മിന്റ് തിക്കൊണ്ടാഞ്ഞ്

⁸മന്ശൻമാര്ക്ക് വേല ചെയ്യന്റത്പേല ചെയ്യാണ്ടി കർത്താവ്ക്ക് ചെയ്യന്റത്പേല നെല്ല മനശോട വേല ചെയ്യൻ.

⁹ഏമാൻമാരേ, ഇത്പേല തിന്ന നിങ്ങള വേലക്കാറൻമാര്ക്ക് ചെയ്യ്‌വാനിക്കൊള്ള കാരിയം ചെയ്യണം. നിങ്ങ്ക്കും നിങ്ങള വേലക്കാറ്ക്കും ഒരേ ഏമാൻ മേലോകത്തീലൊണ്ട്. അവൻ ഒക്കളയം ഒരേ ശീരിക്കി നായംനടത്തന്റവൻ ആഞ്ഞത്കൊണ്ട് നിങ്ങ അവങ്ങള പേടിപ്പിക്കിന്റ വാക്ക്കള് വിട്ട്കളയണം.

¹⁰ഒട്ക്കം നാന് പേശന്റത് എന്തനിന്റെ കർത്താവ്ന്റ ശക്ക്തിയില് ശക്ക്തിപ്പെടട്ടൻ. അവൻ നിങ്ങള അവന്റ വെലിയ ശക്ക്തികൊണ്ട് ശക്ക്തിപ്പെടത്തട്ടൻ.

¹¹നിങ്ങ ഇച്ചരാതീന്റ തന്തറത്തോട എത്റാഞ്ഞ് നെപ്പാനിക്കി ശക്ക്തിയൊള്ളവൻ ആവാനിക്കി വേണ്ടി തെയ്‌വം തെന്റ ഒക്ക ആയതങ്ങളം ഇടണം.

¹²എന്തനിന്റെ നമ്മള പോരാട്ടം മന്ശ്‌ന്ക്ക് എത്റാഞ്ഞ്ല്ല, ഇന്റെ കാണ്‌വാനിക്കി പെറ്റാത്ത അതികാരത്ത്ക്ക് എത്റാഞ്ഞും തുട്ടനാഞ്ഞ ഉശ്റ്ന്റ അതികാരിക്കി എത്റാഞ്ഞും ഇറ്ട്ടൊലകത്ത്ന്റ അതികാരിയോടയം മാനത്തീല് കുടിയിരക്കന്റ ഇച്ചരാതിപ്പടയോടയം ആണും നമ്മ്ക്ക് പോരാട്ടം ഒള്ളത്.

¹³അത്കൊണ്ട് തുട്ടന്റ തെവശം വെര്വ്നിക്കി ഇത്ക്കൊക്ക എത്റാഞ്ഞ് നെപ്പാനിക്കും ഒക്ക നെറവേറ്റ്‌വാനിക്കും ശക്ക്തിയൊള്ള ആള്കള് ആവാനിക്കി തെയ്‌വത്ത്ന്റ ഒക്ക ആയതങ്ങളയം എട്ത്ത് നെവൻ.

¹⁴ശത്തിയം ഇന്റ് പേശന്റ വാര് അരക്കി കെട്ടിയും നീതി ഇന്റ് പേശന്റ പൊറഞ്ചട്ട ഇട്ടും

¹⁵നിമ്മ്തിയിന്റ നെല്ലശേതി വിളിച്ച് പേശ്‌വാനിക്കൊള്ള ഒര്ക്കം ഇന്റ് പേശന്റ ചെറ്‌പ്പ് കാല്‌ക്ക് ഇട്ടും

¹⁶ഇച്ചരാതി എയ്ഞ്ഞ് വിടന്റ തിയ്യമ്പ്ന കെട്ത്തിക്കളവാനിക്കി നമ്പ് ഇന്റ് പേശന്റ ഒക്കക്കും മീതയൊള്ള തടയീന പിടിച്ചും നെവൻ.

¹⁷കാപ്പാത്തത്ത് ഇന്റ് പേശന്റ പടത്തൊപ്പിയിട്ടും തെയ്‌വവയനം ഇന്റ് പേശന്റ ഉശ്റ്ന്റ വാള് കെയ്യീലെടക്കത്തം ചെയ്യൻ.

¹⁸ഒക്ക കുമ്പ്ടത്തീലും ഒക്ക കെഞ്ചിക്കേപ്പീലും ഏത് നേരത്തും ഉശ്റീല് കുമ്പ്ടൻ. ആണ ചെയ്ഞ്ഞ് മനശീല് വെലമൊള്ളാള്കളാഞ്ഞ് ഒക്ക തെയ്‌വത്ത്ന്റാള്കള്ക്കും വേണ്ടി ചെയ്യന്റ കുമ്പ്ടത്തീല് എള്മ്പിയിരവൻ.

¹⁹തെയ്‌വത്ത്ന്റ നെല്ലശേതിക്കി വേണ്ടി ഏല്‌ക്കൂട്ടീല് കെടക്കന്റ കിര്ശ്തുവ്ന്റ പതവിക്കാറനാഞ്ഞ നാന് അത് പേശന്റ ശീരിക്കി തക്‌രിയത്തോട പേശ്‌വാനിക്കി

²⁰നാന് എന്റ വായ് തൊറന്ന് നെല്ലശേതീന്റ മറമ്മത്ത്നപ്പെറ്റി പേശ്‌വാനിക്കൊള്ള വാക്ക് കിട്ട്‌വാനിക്കി വേണ്ടി കുമ്പ്ടണം.

²¹നാന് ഏണയിരക്കന്റൻ ഇന്റൊള്ള എന്റ ശേതി നിങ്ങളോട പേശ്‌വാനിക്കി തികിക്കൊശ്‌ന നാന് നിങ്ങളാട്ടക്കി വിടന്റൻ. അവൻ നമ്മ്ക്ക് ഇട്ടമൊള്ള തമ്പിയും കർത്താവീല് നമ്പ്‌വാനിക്കി പെറ്റന്റ വേലക്കാറനം ആണ്‌മിന്റ് നിങ്ങ്ക്ക് തിക്കൊണ്ടില്ലോ?

²²എങ്ങ ഒക്കളം ഏണയിരക്കന്റം ഇന്റ് നിങ്ങ്ക്ക് തിക്കൊണ്ടാവാനിക്കും നിങ്ങള ചങ്ക്ക്ക് അണവ് ആവാനിക്കും വേണ്ടിയാണും നാന് അവന നിങ്ങളാട്ടക്കി വിട്ടത്.

²³അപ്പനാഞ്ഞ തെയ്‌വമം കർത്താവാഞ്ഞ ഏശുകിര്ശ്തുവും നമ്പ്കാറാഞ്ഞ നിങ്ങ്ക്ക് ഒക്കളക്കും നിമ്മ്തിയും നമ്പോടൊള്ള ശ്‌നേകമം തെരട്ടൻ.

²⁴നമ്മള കർത്താവാഞ്ഞ ഏശുകിര്ശ്തുവ്ന ഒരകാലത്തം നയിച്ച് പോകാത്ത ശ്‌നേകത്തോട ശ്‌നേകിക്കിന്റ ഒക്കളയം കൂട്ടത്ത് തെയ്‌വത്ത്ന്റ കിറ്പ ഒണ്ടാക്‌ട്ട്.