Read Muthuvan 1 തെശലോനിക്കിയിര് 5 Bible Online

1 തെശലോനിക്കിയിര് 5 - Muthuvan bible

1 തെശലോനിക്കിയിര് 5

¹ഇന്റെ കൂട്ട്കാറേ, കർത്താവ് വെന്റ കാലത്ത്നയം ശമയത്ത്നിയം പെറ്റി നിങ്ങ്ക്ക് എയ്‌തണ്ട കാരിയമില്ലല്ലോ?

²എന്തനിന്റെ, രായ് കള്ളൻ വെന്റത് പേല കർത്താവ്ന്റ തെവശം വെര്മിന്റ് നിങ്ങ്ക്ക് നെല്ലത്പേല തിക്കൊണ്ടില്ലോ?

³ലോകത്തീല് ആള്കള് നിമ്മ്തിയിന്റും പേടിക്കിണ്ട ഇന്റും പേശി ഇര്പ്പ്നിക്കി പണ്ടിക്കാറിക്കി പിടിയിന്റ് കുഞ്ചിയിട്‌വാനിക്കൊള്ള നോവ് വെന്റത് പേല അവ്ങ്ങ്ക്ക് പിടിയിന്റ് നാശം വെരും; അവ്ങ്ങ്ക്ക് അതീനെന്റ് രച്ചപെട്‌വാനിക്കും നോക്കണ്ട.

⁴ഇന്റെ കൂട്ട്കാറേ, നിങ്ങ ഇറ്ട്ടീലില്ലാത്ത ആള്കളാഞ്ഞ്ത് കൊണ്ട് കള്ളനപ്പേല ആ തെവശം നിങ്ങ നെനച്ചിരക്കാത്ത ശമയത്ത് നിങ്ങള പിടികൂട്ത്ത്‌ല.

⁵എന്തനിന്റെ, നിങ്ങ ഒക്കളം വെട്ടത്ത്ന്റയും പൊള്ത്‌ന്റയും കുഞ്ച്‌ലാണും; നമ്മ ഒക്കളം രായ്‌ക്കോ ഇറ്ട്ട്ക്കോ ഒള്ള ആള്കളില്ല.

⁶അത്കൊണ്ട് നമ്മ വേറാള്കളപ്പേല ഒറങ്ങാണ്ടി എള്മ്പി ഇര്ക്കത്തം പോതമൊള്ളാള്കള് ആഞ്ഞിരക്കത്തം ചെയ്യണം.

⁷ഒറങ്ങന്റവൻ രായ് ഒറങ്ങന്റാൻ; കള്ള് കുടിക്കിന്റവൻ രായ് കള്ള് കുടിക്കിന്റാൻ.

⁸ഇന്റെ നമ്മ പൊള്ത്ക്കൊള്ളാള്കളാഞ്ഞ്ത് കൊണ്ട് പോതമൊള്ളാള്കളാകണം; നമ്പും ശ്‌നേകമം പടച്ചട്ടയാക്കിയും നമ്മള കാപ്പാത്ത്ന്റ ഒറപ്പ് പടത്തൊപ്പിയാക്കിയും ഇടണം.

⁹തെയ്‌വത്ത്ന്റ മൂച്ച് ഏപ്പാനിക്കി വേണ്ടിയില്ല അവൻ നമ്മള തേടിയെട്ത്ത്ത്, പിന്നയാ നമ്മള കർത്താവാഞ്ഞ ഏശുകിര്ശ്തുവീലൊള്ള രച്ച കെയ്യേപ്പിനിക്കി വേണ്ടിയാണും.

¹⁰നമ്മ ഉശ്റോട ഇരന്നാലും ചത്താലും ആ കിര്ശ്തു നമ്മ്ക്ക് വേണ്ടി വീന്നത്കൊണ്ട് നമ്മ അവന്റ കൂട്ടത്ത് പൊളച്ചം.

¹¹അത്കൊണ്ട് നിങ്ങ ഇപ്പൻ ചെയ്യന്റത്പേല തമ്മ്ളിത്തമ്മ്ളി തക്‌രിയപ്പെടത്ത്ത്തം ഒതവി ചെയ്യത്തം ചെയ്യണം.

¹²കൂട്ട്കാറേ, നിങ്ങള എടയില് തെയ്‌വവേല ചെയ്യത്തം നിങ്ങള പാത്ത്ട്ത്ത് നടക്കത്തം കർത്താവീല് നിങ്ങളോട പുത്തിപേശത്തം ചെയ്യന്റാള്കള മാനിക്കണമിന്റ് എങ്ങ നിങ്ങളോട കെഞ്ചിപ്പേശന്റം.

¹³അത്‌മാട്ട്ക്ക്മില്ല, അവങ്ങ ചെയ്യന്റ വേലീന ശെല്ലി അവങ്ങള നെല്ല മാനിക്കത്തം ശ്‌നേകിക്കത്തം ചെയ്യണം; അത്പേല നിങ്ങയും തമ്മ്ളിത്തമ്മ്ളി നിമ്മ്തിയോട ഇരവൻ.

¹⁴കൂട്ട്കാറേ, എങ്ങ നിങ്ങളോട പുത്തിപേശന്റത് മെടിയൻമാരാഞ്ഞ ആള്കള്ക്ക് താക്കീത് കൊടക്കത്തം മനക്കര്ത്ത് ഇല്ലാത്താള്കള്ക്ക് തക്‌രിയം കൊടക്കത്തം നമ്പീല് ഒറപ്പില്ലാത്ത പാവമാഞ്ഞ ആള്കള്ക്ക് ഒതവി ചെയ്യത്തം ഒക്കളോടയും പൊറ്ക്കത്തം ചെയ്യണം.

¹⁵ഒരത്തനം കെട്ടത്ക്ക് പകരം കെട്ടത് ചെയ്യാണ്ടിയിരപ്പാനിക്കി പാക്കണം; ഇന്റെ തമ്മ്ളിത്തമ്മ്ളി ഒക്കളോടയും എപ്പനം നെല്ലത് ചെയ്യണം.

¹⁶എപ്പ്ളും കൂയ് എടവൻ;

¹⁷എപ്പനം കുമ്പ്ടൻ;

¹⁸ഒക്ക കാരിയത്ത്ക്കും നന്നി പേശൻ; ഇതാണും കിര്ശ്തുഏശുവിലൊള്ള നിങ്ങളപ്പെറ്റിയൊള്ള തെയ്‌വത്ത്ന്റ ഇട്ടം.

¹⁹തെയ്‌വത്ത്ന്റ ഉശ്റ് ചെയ്യന്റ കാരിയങ്ങള തടക്കേറ്ത്.

²⁰വേറാള്കളച്ചിട്ട് തെയ്‌വത്ത്ന്റ ഉശ്റ് വെളിപ്പട്ത്തിത്തെന്റ കാരിയങ്ങള തള്ളിക്കളയേറ്.

²¹അതൊക്ക നെല്ല ശീരിക്കി പാത്ത് നെല്ലത് മാട്ട്ക്കും കെയ്യേക്കത്തം

²²ചാട്ടാത്ത വെളിപ്പാട്കള വിട്ട്കളയത്തം ചെയ്യണം.

²³നമ്മ്ക്ക് നിമ്മ്തി തെന്റവനാഞ്ഞ തെയ്‌വം നിങ്ങള പൂര ശുത്തിയൊള്ളാള്കളാക്കത്തം നമ്മള കർത്താവാഞ്ഞ ഏശുകിര്ശ്തുവ്ന്റ തില്‌മ്പി വെരത്തീല് നിങ്ങ കുറ്റമില്ലാത്താള്കളാഞ്ഞ് കാണ്‌വാനിക്കി നിങ്ങള ഉശ്റ്നിയും മനശ്‌നിയും തേകത്ത്നയം കാത്ത്‌വെക്കത്തം ചെയ്യട്ടൻ.

²⁴നിങ്ങള വിളിക്കിന്റവൻ നമ്പ്‌വാനിക്കി പെറ്റന്റവനാഞ്ഞ്ത് കൊണ്ട് അവൻ അത് ചെയ്യും.

²⁵കൂട്ട്കാറേ, എങ്ങ്ക്ക് വേണ്ടിയും കുമ്പ്ടൻ.

²⁶ഏശുവീല് നമ്പന്റ ആള്കള്ക്ക് കൊള്ള ശ്‌നേകത്തോട വണക്കം പേശൻ.

²⁷ഈ എയ്‌ത്ത് ഒക്ക നമ്പ്കാറയം വായിച്ച് കേപ്പിക്കണമിന്റ് കർത്താവ്ന്റ പേരില് നാന് നിങ്ങളോട കെഞ്ചിപ്പേശന്റൻ.

²⁸നമ്മള കർത്താവാഞ്ഞ ഏശുകിര്ശ്തുവ്ന്റ കിറ്പ നിങ്ങള കൂട്ടത്ത് ഇര്ക്ക്ട്ട്.