Read Muthuvan തിത്തോശ് 3 Bible Online

തിത്തോശ് 3 - Muthuvan bible

തിത്തോശ് 3

¹അതികാരികള്ക്കും അതികാരത്ത്ക്കും താന്നിര്ന്ന് ചൊല്ലൊള്ള ആള്കളും നെല്ലകാരിയം ചെയ്യന്റാള്കളും ആഞ്ഞ്

²ഒരത്തനച്ചിട്ടും കെട്ടവാക്ക്കള് പേശിക്കാണ്ടിയും ഒരത്തനോടയും ചണ്ടയൊണ്ടാക്കാണ്ടിയും എളിമയോടയും എടിയോട ആള്കളോട തായ്‌മയോടയം ഇരപ്പാനിക്കി നിയ്യ് ഇന്നിയും അവങ്ങളോട പേശണം.

³തെയ്‌വത്ത്ന തിക്ക്‌ലാഞ്ഞത്കൊണ്ട് മുന്തി നമ്മ പുത്തിയില്ലാത്ത ആള്കളും ചൊല്ലില്ലാത്ത ആള്കളും വെയ്‌തെല്ലി നടക്കന്റ ആള്കളും പലശീരി ഇട്ടമം ചാട്ടാത്ത കാരിയമം ചെയ്ഞ്ഞ് നടക്കന്റ ആള്കളും ആഞ്ഞ്ത്. അത്‌മാട്ട്ക്ക്മില്ല അങ്ങക്കും ഇങ്ങക്കും വെറ്ത്ത് കുശ്‌മ്പും കുന്നായ്‌മയും എട്ത്ത് പൊളയ്‌ക്കന്റ ആള്കളും ആഞ്ഞ്ത്.

⁴ഇന്റെ നമ്മള കാപ്പാത്ത്ന്റ തെയ്‌വം നമ്മളോട കനിവും ശ്‌നേകമം കാട്ടിയാര്.

⁵നമ്മ ചെയ്ഞ്ഞ നെല്ലകാരിയം കൊണ്ടില്ല നമ്മള അവങ്ങ കാപ്പാത്തീത്; അവങ്ങള കനിവീലാണും നമ്മള കാപ്പാത്തീത്. തെയ്‌വത്ത്ന്റ ഉശ്റീല് പിന്നയം പൊറപ്പിനിക്കി നമ്മള തെറ്റ്കുറ്റത്ത്ന കെയ്‌കി തെയ്‌വത്ത്ന്റ ഉശ്റീല് നമ്മള പുത്തനാക്കത്തം ചെയ്ഞ്ഞാര്. ആണയാണും അവൻ നമ്മള കാപ്പാത്തീത്.

⁶ഏശുകിര്ശ്തുവീല് തെയ്‌വം തെയ്‌വത്ത്ന്റ ഉശ്റ്ന നമ്മ്ക്ക് ഇട്ടം പേല തന്താര്.

⁷ആണ തെയ്‌വത്ത്ന്റ കനിവീല് നമ്മളയും തെയ്‌വത്ത്നിയും ഒന്റിച്ച് ചേത്താര്; നമ്മ ആശയോട കാത്തിരക്കന്റ എപ്പനം ഒള്ള ഉശ്റ്ക്ക് അവകാശി ആക്കത്തം ചെയ്ഞ്ഞം.

⁸ഇത് നമ്പ്‌വാനിക്കി ഒള്ള വയനം ആണും. നെല്ലകാരിയം ചെയ്യ്‌വാനിക്കി തെയ്‌വത്ത്ന പാത്തിരക്ക്ന്റ ആള്കള് അവങ്ങളത്തിന്ന കൊടക്കണം. നിയ്യ് ഈ കാരിയം ഒക്ക അവങ്ങളോട ഒറപ്പായിട്ടും പേശണം. ഈ കാരിയം ഒക്ക എടിയോട ആള്കള്ക്കും നെല്ലതും ഓകാരമൊള്ളതം ആണും.

⁹പുത്തിയില്ലാത്ത പിര്പ്പ്ത്തി ചെമ്മം പേശത്ത് മോശീന്റ നായപ്റമാണത്ത്നപ്പെറ്റിയൊള്ള പേശിപ്പടത്ത്, ചണ്ട ഇതിനെന്റൊക്ക നിയ്യ് മാറിനെക്കണം. എന്തനിന്റെ ഇതൊക്ക ഓകാരമില്ലാത്തതം വെലയില്ലാത്തതം ആണും.

¹⁰പള്ളിയില് ചണ്ടപടന്റ ഒരത്തൻ ഒണ്ട് ഇന്റെ ഒന്റ് റണ്ട് തടവ് പേശി പാക്കണം; അത് അവൻ കേക്കാണ്ടിയിര്ന്നെ അവന വിട്ട പാട്ട്ക്ക് വിടണം.

¹¹ഈണത്തിവൻ കുന്നായ്‌മ ഒള്ളവനം തെറ്റ്കുറ്റം ചെയ്യന്റവനം ആണും. അവന്‌ക്ക്‌തിന്ന ശിച്ചവെരത്ത്ന്റവനും ആണും ഇന്റ് നിക്ക് തിക്കൊണ്ടില്ലോ.

¹²നാന് അറത്തമാശിനിയോ തികിക്കൊശ്‌നിയോ നിന്റ കിട്ട വിട്‌വിൻ; അവങ്ങളീല് ഒരത്തൻ അവട എത്തിയേ അപ്പത്തിന്ന നിക്കൊപോലിശിയില് എന്റ കിട്ട വെര്‌വാൻ പാക്കണം. അവട നെര്ങ്ക്കാലം കെയിച്ച് വിട്‌വാൻ നാന് നെനച്ചിര്ക്കന്റൻ.

¹³വക്കീലാഞ്ഞ ശേനാശും അപ്പല്ലോശും അവടനെന്റ് പോവിനിക്കി പോന്റ വെയിക്കി അവ്ങ്ങ്ക്ക് ആവശമൊള്ളതൊക്ക കൊട്ത്ത് നിയ്യ് നിക്ക് പെറ്റന്റത് പേല ഓകാരം കെട്ടണം.

¹⁴നമ്മള ആള്കള് ഓകാരം ഇല്ലാത്താള്കള് ആകാണ്ടിയിരപ്പാനിക്കി ആവശം വെന്റ ശമയത്തൊക്ക ഒതവി ചെയ്ഞ്ഞ് നെല്ലകാരിയം ചെയ്യ്‌വാനിക്കി പടിക്കട്ടൻ.

¹⁵എന്റ കിട്ടയൊള്ള ഒക്കളം നിയ്യ് നെന്റാക്‌ട്ട് ഇന്റ് പേശന്റാര്. തെയ്‌വനമ്പീല് എങ്ങള ശ്‌നേകിക്കിന്റ ഒക്കളോടയം എങ്ങ കേട്ടതിന്റ് പേശണം. തെയ്‌വത്ത്ന്റ കിറ്പ നിങ്ങള ഒക്കളയം കൂട്ടത്ത് ഇര്ക്ക്ട്ട്.