Read Nalca MATIUS 10 Bible Online

MATIUS 10 - Nalca bible

MATIUS 10

¹Dara onoʾ yok sum enyek, Yesus ara alja yuba doro diriga ban nang ek yoululum aboka ebmamagosuk. Anya sikenek bisaʾ yakoka, nimi nonga malya uboka neiknaʾ salalesuknya hwen damba migib elegosuk.

²Ban obadya yuba lenaʾ gak nang dadya sikja si nera, mennya bera Simon (yok si nera Petrus alamek), hnonda alja weis Andreas, anya hnonda Yakobus, onoʾ alja weis era Yohanes, sikda penya dara, Zebedeus bedya mabo.

³Dara onoʾ Pilipus beb Bartolomeus beb Tomas beb, mok soko amba rupiah molowoka dolomoknya Matius beb, Alfeus bedya me Yakobus beb, anya hnonda Tadeus.

⁴Wera hnonda asaʾanya alameknya Simon beb, eimik Yesus ak obnelum aboka yuba dil bilimoknya Yudas Iskariot beb, ulumek.

⁵Wera ban obadya yuba len nang era Yesus adya wa webnelum aboka boksuukanya lebsukja, ”Ugunda Yahudi gom nimi sokok sam ara binggunulum. Samaria nim edyaʾ heik pik ara binggunulum.

⁶Alda Israeli nim ek ok binilum, dib nong ara sikenek malya dangoka weiningdangamek nim ek anyek okoka binilum.

⁷Sikenek ara, Imik Neyung adya eimik wenelemnesilaʾ oka yal aboka nekdo yabalemnelum.

⁸Anya neiklemeija nimi hwelemnelum, somogomeija nim embengaʾ suboka bukillilemnelum, nimi bokaʾ malya ulusil neiknaʾ delesilya nimi bokaʾ donaʾ elegoka bisaʾ gologesilinya nera yaklemnelum. Ugunda ban unulumakaʾ damok amba dara, deknenggublum, or salyaʾ dob loblum. Anasa ugumbabya deknaʾ loboka, or salyaʾ eleganalum.

⁹Anasa ugunda meklaʾ rupiah gom, girik rupiah gom, meilik yubaʾ gom bonaʾ loboka or salyaʾ binilum.

¹⁰Nimi wa welemak nang era, denaʾ ara nim adya eleklemak bok anasa, ugun binilumaʾ amba, gwaneng lin akleng eb, boksoma penya so gom, yan ongonaʾ gom, gamaʾ dungunaʾ gom ara bobnenggunulum,” hyok.

¹¹”Ugunda yok heikek bumun dara, pe ululanya bedya nub neikaʾ ulumnemab henesilnya bek ebnalum. Dara wenyhesilinya benyeb ulmorulumunaʾ ara, onoʾ yok heikek binilum.

¹²Ugunda ulumnemab hisilya ek an wekel bumunuk ab dara, e dam nim ek, Imik Neyung adya ugunuk perob eleknaʾ elegosulul, wenyalamnelum.

¹³Ugunuk neikaʾ ulumnemab aboka, dobnesak nim ek ara, ugunja gibemunaʾ damok ara, sob e nenyek an ulumnamla. Bok neikaʾ ulumnemab henggunusak ek nim edyaʾ ek ara, gibemun gibnaʾ damok era, ugun damnya saaboka dobnelum.

¹⁴Alda heika hnon, yok e hnon ugunuk perobaʾ leboka dobnenggunusak dara, heik enyek gom, e nera loboka yibinelumukanya, ugunja yan hamaʾ ara heika habengge yibinelum.

¹⁵Ban dib lebsin, Soko sidyaʾ daknamla sum era, Sodom heik nim eb, Gomora heik nim era, Imik Neyung adya dara, sikenek igina kwesinaʾ ara mek so bok, ugunuk lek henesak nim ek dara, igina nauba danamla!” hyok.

¹⁶”Ugunda banyek pe beknelumaʾ ara: Nara ugunuk bei gam hnoum domba pam anasoʾ ak boknesin. Anasa ugunda bagaʾ adya geremsengaʾ ulumla sok hnon, yalma wining namen ulumla anasoʾ ak ulululum.

¹⁷Ugunda henga geregoka dub nang e pik bo biniboka yana lelewoka, onoʾ hnonda Yahudi nim edya yuba don e pik ab nauba lobaʾ nenewoka oboka ulumnesak anasa, ugunda pe keeboka ulumnelum.

¹⁸Ugunda nadya yuba donaʾ nang ulumnelumaʾ amba leboka, ugunuk heng geregoka senenggom soko dub nang ek hnon bo binisak. Wera ban unuwanasak salek, perob salek era anya anasa, ugunda nasamba hnon yuba sikenek nekoka, hnonda Imik Neyung ak elgom ulumak nim ek hnon neklemnelum.

¹⁹Bok ugunuk henga geregoka yana lelewanasab aboka, nimi yana lelesinaʾ ek sam bo binisak dara, ugunda hekaʾ huboka yuba sekdanamna do, yuba harsonya pe sabnamna senen ganya bonaʾ ak sam ara ugunda lok ganya bonggom, mem. Anasemba dara, ugunja yuba sabnemunaʾ damok ara, eleganesin senemlyaʾ sum eleganesululaʾ.

²⁰Anasa ban unuwanasak salek enyek yuba sabnelumnya nera, ugunja sibamaʾ adya sabnelum bok, neyung imik heikek ululanya alja Geisinya adya ugunuk uboka yuba sabnamla,” hyok.

²¹”Nimi nidyaʾ nadya weis ek obnelum aboka, yok nim ek lebdangdo yibinemak salek hnon yanamla. Neiksonya nera hnonda eili bedya alaʾ me ak gom, alja me nedya eili bek gom unubdangdo yibinemak. Meneng mab edya, sikjaʾ genong neyung ak yok nang ek obnelum aboka yuba dibdangdo yibinemak.

²²Ugunda nadya si nenesa leboka, nimi nidyaʾ ara, ugunuk hyak lek senelemnesak, bok pe sekmouboka ulumlyaʾ ara sidyaʾ dagalongnaʾ salek ubnelanya bera blebnamla.

²³Ugunda yok heikek ab, yana lelewoka obnesak dara, men yok heikek berra binilum. Nara ugunda ban dib lebnesin, Ugunda Israeli nim ulumak heikek nidyaʾ ara, anam kemero yibinggumun salek, nimi dibaʾ me nera men yanamla.”

²⁴”Neklesak mab era nauba so uboka, neksinya benyek mek soʾ ak unggulumla; ek wanya bera nauba so uboka, alja wa welelanya bera mek soʾ ak unggulumla.

²⁵Neklamna me nera, eilibe neklenanya beneso dan dara, anya arawoka wa welenanya bera, alja wa welenanya beneso dan dara, nera al seleb perob dangalamla. Sikjaʾ neyung benyek babya si Beelzebul aboka sibuk dara, wera nidyaʾ aljaʾ ek an ulumak nim era wanok,” hyok.

²⁶”Ugunda nim ek lok ganya bonaʾ ara mem. Eimik laga danalanya nera hnon lomok doknowoka unggulumlakanya, eimik laga golowanggunulanya hnon gunuwoka unggulumla.

²⁷Nadya ugunuk gunaʾ lomok ab sam lel eleklesinya nera, ugunja dara, laga dilinaʾ ak yubyek enyek, laga lero yabalemnelum. Anya ugunuk o lomok gelelenga lelonglosaknya nera, ugunja dara, laga senenggomaʾ nenewoka lero balamnelum!

²⁸Ganya nong anyek on nim era hnon unggulumakaʾ anasa, alda nong bolaʾ dem anyek olomak nim ek, ugunda lok ganya bonggom, mem. Alda Imik Neyung ak hnonok, nong dem ab, ganya nong ab, nidyaʾ hiboka, oboka somoknaʾ dub heikek sam uka desin heikek dabnesilnya bek ok lok ganya bololulum.

²⁹Senero wininga penya anaba neik mek rupiah edya ok dekesomaʾ anaba, neyung bedya or unuwoulul senewanggusubok dara, sokok sam ara mekaʾ malyingginggunumso.

³⁰Ugunjaʾ hukuk sam ulumla hong mandebnaʾ eneba, Imik Neyung ara alda seleb einilamla.

³¹Wining ara or mek so bok, ugunuk dara, hyak senenggomaʾ perobaʾ ak ululumaʾ anasa, ugunda lok ganya bonggom, mem!” hyok.

³²”Heknedya nimi hnoum ab, nara Yesus yuba doboka diriga balananya aboka laga lelemla dara, nababya neyung imik ululanya saramek sam ab uboka albabya laga lebnamna.

³³Bok heknedya nimi hnoum ab, nara Yesus adya yuba donggulunanya aboka sondaʾ lelenel dara, nababya alak neyung be imik heikek ululanya bedyaʾ saramek ab uboka sondaʾ amba bobnenewoka laga lebnamna,” hyok.

³⁴”Ugunja dara nak ara, alda nim ek nim nenenaʾ bo yok senenggom, mem. Nara nim ek nang nenenaʾ ak bo yanggubsebok, alda nim isaʾ nang nenenaʾ ak bo yasa.

³⁵Nak sokok an yasaʾ adya, wera me adya eilib eb mala weboka obdanarak, gelma adya eilinggeb mala weboka obdanarak, me adya gel gedya nenya eilinggeb mala weboka obdanarak.

³⁶Yo, anasa eimik senenggomaʾ isaʾ gebdangoka obdanamak nim era, meneng ek nim edya nauba unu obdanamak,” hyok.

³⁷”Heknedya nak ara loboka, aljaʾ neyung genong ak wanaʾ nauba ululanya bera, nadya yuba donaʾanya henggunuseng. Anasonya neikek, heknedya alja mabo gelmabo ek wanaʾ nauba ululanya bera, nadya yuba donaʾanya dibaʾ henggunuseng.

³⁸Anya heknedya aljaʾ igin yakaʾ doboka, nak diriga yanggananaʾ oroknya bera, alda nadya yuba donaʾanya henggunuseng.

³⁹Nadya ganya nonga namok senelelanya bera, alja nong era weiningganamla bok, alda nasamba leboka, alja nong era weininglelanya bera, eimik era alja ganya nong era eibnamla,” hyok.

⁴⁰”Heknedya ugunuk perobaʾ leboka dolosinya bera, alda anara nak dolonel. Anya nak dolonelnya bera, alda nak sokok bokol yeilinyoknya bek dolomla.

⁴¹Heknedya ununumnaʾ lelenanya bek, alda ununumnaʾ lelelanya bek bar aboka, perobaʾ leboka dololanya bera, albabya lunuwoka ununumnaʾ lenaʾ deknaʾ ak dobnamla. Onoʾ nimi ben hnon yoknya bek benyek pelelanya anasa aboka, perobaʾ leboka dololanya bera, albabya lunuwoka perobnya anasa dolomak deknaʾ dobnamla.

⁴²Heknedya alda nadya yuba doro diriga bannya ulumlaʾ anasa leboka, ban mek nim ek or mek dem ak eleklamla dara, eimik era ban nenesa leboka deknaʾ nauba dobnamlaʾ anyek, ugunuk dib lebsin!” hyok.