Read Nalca MATIUS 12 Bible Online

MATIUS 12 - Nalca bible

MATIUS 12

¹Dara onoʾ, Yahudi nim edya Sabat mem sum enyek, Yesus ara gandum weboka memek masa ak sam yabalamok dara, alja yuba doro diriga ban nang era, gwaneng ok ubsukaʾ anasa, gandum hnon dakoka delemek.

²Parisi nim edya ban unulumekaʾ anyek eiyiboka, sikja Yesus ak, ”Kendelom! Anja yuba doro diriga ban nang era, sikda nunja yub ek sam momnya dobokaʾ yuba blekoka, Sabat mem sum ununggom mem hyoknya nenyek blekoka unulumak,” hyek.

³Dara, Yesus adya sikenek lebsukaʾ ara, ”Ugunda Daud beb alab neikaʾ ulumek nang eb, sikda gwaneng ok usukaʾ amba umekaʾ momnya dobokaʾ ara ugunda seleb einiwanggulum de?

⁴Daud bera Imik Neyung ek sam wekoka, Imik Neyung amba aboka beillilemek roti gwaneng era doboka delemok. Alda nunja yub ak sam momnya dobokaʾ ara, Daud beneba, alab neikaʾ ulumek nang eb dara, gwaneng era denggunuseng, alda Imik Neyung yuba lenaʾ gak nang edya ok deneseng gwaneng enyekaʾ, anyek delemek.

⁵Goma, Musa bedya unuwanalum an yub ek sam momnya dobokaʾ ara, Imik Neyung yuba wa gak nang era, sikda Imik Neyung gibnaʾ ek sam Sabat mem sum wa welemna dara, Sabat mem sum yuba blekoka, Imik Neyung ek sam wa welemak bok, sikenek ara malya ululum anggulumakaʾ ara einiwanggulum de?

⁶Ugunda nadya ban lebnesinaʾ anyek, keeboka pe ella danalum: Anyagan ara nimi hnon alda Wenelesilnya bedya e nera mek so bok, alak danyek hyak senenggomnya bek ulumla.

⁷Imik Neyung yuba bukuk sam momnya dobokaʾ ara, Nara pam oboka gibil yangganaʾ ak perob senenggulunabok, alda angoo yadyek senen ganya ek perob senelamna, ara momnya dobok. Ugunda ban yuba damok enyek, damok ara anasa lebok senewoka dib ella ubsom dara, nimi yok nimi malya unggulumak nim ek ara malya nenewanggunusom.

⁸Anasa nimi dibaʾ me ara, Sabat mem sum emba dubnya ulumla,” hyok.

⁹Wera Yesus ara anyagan ara loboka, yok Yahudi nim edya yuba don ek sam byuk.

¹⁰Wera ban bilimok Imik Neyung ek ara, nimi soruka darasam heimoknya hnon ulumok. Dara nimi wene nim, Yesus ara meknemla aboka malya gebnok senen ganya bomek nang edya sene Yesus ak, ”Sabat mem sum era nim ara, or hwebnesom gom, mem gom?” aboka heibek.

¹¹Anasa Yesus adya dara, ”Nimi ben hnon ugun gangganek ara, alja domba pama Sabat mem sum bok, selengaʾ lomok sam malyingginimso dara, pam damnya bedya dara, salawoka dobnenggunumso de?

¹²Yo, anasa wera, domba ara domdigum soʾ bok, nim ak dara, hyak dib perob nongaʾ ak ulumak! Anasa wera, Sabat mem sum bokaʾ anaba, or perob unaʾ unuwaneseng,” hyok.

¹³Dara onoʾ Yesus ara soruka darasam heimoknya bek, ”Anja soruk nginigalom,” hyok. Wera bera soruk nginigok dara, darasam eik soruk enesoʾ anyek eikaʾ dok.

¹⁴Bok Parisi nim ek dara, Yesus ak obnemab aboka, yuba sabnobaʾ aboka, Imik Neyung ek ara loboka yokok mamagel bilimek.

¹⁵Yesus ara Parisi nim edya obnenyak hogunga seleb ella ubok. Anasa alda anyagan anyebaʾ ara loboka bok dara, nimi nauba alab neikaʾ balamek. Dara nimi neiklemeknya nera nidyaʾ hwebsuk.

¹⁶Bok Yesus adya dara, alak yeilimek nim ek, Yesus an ulumla aboka yok nim ek neknaʾ ara mem, hyok.

¹⁷Nera ununumnaʾ lelemoknya Yesaya bedya Yesus unuwanamla aboka orowek geklewoka momnya domokaʾ anyek gigiwolulaʾ aboka umok.

¹⁸Momnya dobokaʾ ara, ”Nadya weboka doboka bokol bilimsa me nera an. Nadya alak wanaʾ ulumnakanya, alja nadya ganya hekel eleklenel. Nadyaʾ ganya era alak gologanamlakanya, jong unaʾ damok ara, alja yok-yok mok soko nim ek lero binimla.

¹⁹Alda yuba yalab hwiboka, nim ab obdangoka ubnenggunumak; salyaʾ pik hnoum sekoka yuba saro yabenggulumnamla.

²⁰Gokoka eleklamla leiya eneba leboka dobnenggunumla, dara saranggonunaʾ aboka delemlya uk eneba sarangganggunumla. Bok, jong uboka pe ununaʾ anyek oblamaganggunumla salek era, alda anaso ulumnamla.

²¹Dara, mok soko me nidyaʾ ara, alja si nek perob amba leboka ganya welemnemak,” ara momnya dobok.

²²Wera Yesus ak heng lum uboka bisaʾ wekoka yuba gomnya dangamoknya bek bo yek. Wera Yesus adya hwebok dara, bera yuba saboka heng gwelegoka eibuk.

²³Nimi nidyaʾ eiyimek nim era, ganya loka daboka, ”Ban benera Daud nang yilaʾ an goma?” aboka lelemek.

²⁴Wera wenyan yub enyek, Parisi nim edya keboka sikja dara, ”Ban benera bisaʾ dubnya Beelzebul bedya unulumnelam aboka alja migib elegokaʾ adya, bisaʾ arobaʾ yakoka ulusil,” aboka lelemek.

²⁵Yesus adya Parisi nimi ganya dukduk ara seleb eiyisuk. Anasa alja sikenek lebsukaʾ ara, ”Mok soko hnon nimi dub nang ulumakaʾ gigiro isaʾ nang gebdanaseng dara, mok era goʾ pe senenya loboka ubnenggunumso. Anya nauba heika hnon gom, nim e hnon dolubdangoka, yok-yok isaʾ neneldalaseng dara, sikda hyak gobdo dengheneseng.

²⁶Anasonya neikek, bisaʾ dubnya Satan adya alja aran mabo yaknamso dara, wera bisaʾ dub heik era dolubdangoka, eimik gobdo denghenemso.

²⁷Ugunja dara, nara Beelzebul bisaʾ dubnya migib adya bisaʾ yaklamla hunulum. Wera danyek dara, hek migib edya ugunja mab era, sikda bisaʾ yaklamak do? Anasa, sikja ugunuk yana lelewanasak.

²⁸Bok nak dara, Imik Neyung Geisinya migib adya, bisaʾ ara yaklamna dara, wera anara Imik Neyung adya seleb ugun gangganek wenelesilaʾ ara an seleb yal an,” hyok.

²⁹”Onoʾ nimi ben hnon hyak migib nongnya bedyaʾ ek wekoka bonaʾ dobnunaʾ senewoka, migibnya bek men bera henga goubnaʾ orok bok dara, ek or salyaʾ weknamso de? Seleb al nong anyek men henga goubsodyok, wera eimik era bonaʾ or hokaʾ dobnamso.”

³⁰”Nak perobaʾ leboka mala donenaʾ orok nim era, nak lek senewoka lolonyak. Nak aranenaʾ orok nim era, sikda nadyinya nenyek bolomak!

³¹Anasa wera, ugunda pe ella danalum, nimi ben hnon yok-yok malya unulamlakanya, yok nimi si ak malyaʾ nenewanamla dara, alja malya unaʾ era or alja sobaʾ meewanamla bok, alda Imik Neyung Geisinya bek malya nenewanamla malya unaʾ era alak ab dibaʾ meewanggunumla!

³²Nimi ben hnon nimi dibaʾ me nek malya leboka walamla dara, wenyamso malya unaʾ era, or alja sobaʾ memelamla bok, alda Imik Neyung Geisinya ak walamla dara, wene salek gom, soko sidyaʾ daknamla sum eneba, benedya malya unaʾ era alak ab dibaʾ meewanggunumla!” hyok.

³³”Perob gal doka moubnamla aboka dara, gal nong ara mesaʾ pe bleblamla. Gal nong anyek pe mesaʾ denaʾ orok dara, gal dok anaba malya ura moulumla. Gal nonga pe mesaʾ ulumla gom, orok gom ara, gal dok adya ella dangalamak.

³⁴Ugunda malya unaʾ hwam nim ek ululumaʾ anasa, ugunda malya unaʾ nim ululum bok dara, perob yuba goboka sabnesom de? Sibamaʾ ak ab laga salamakaʾ ara, ganya lomok sam seleb ulumlaʾ ara an.

³⁵Nimi nidyaʾ perob yub ok saro ulumak nim era, sikda perobnya nok deknewoka ulumak adya pe saro ulumak. Dara onoʾ malya unaʾ adya ok deknewoka ulumak nim era, sikjaʾ sibamaʾ ak abaʾ anaba malya yub ok saro ulumak an.

³⁶Anasa ugunda pe seiniwoka beknelum: Soko sidyaʾ daknamla sum era, nimi wen salyaʾ yuba saro ulumaknya nidyaʾ amba, Imik Neyung adya, anaso lelemek aboka, laga yana lelewanasil.

³⁷Anasa ugunja yuba sanaʾ enedya, anda pe unulum gom, malya unulum gom ara, laga danamla,” hyok.

³⁸Dara onoʾ hnonda Yahudi yuba neklesik nang eb, Parisi nim eb dadya, Yesus ak, ”Neklesilimnya o, neyung lok so beknaʾ hnon meewalom, wenyek nunda eibnemab bar,” aboka molowek.

³⁹Anasa Yesus adya dara, ”Wenyek ulumak nim era, hyak malya unaʾ hwam nim uboka, ganya uka oboka jok nim ek ulumak!” hyok. Onoʾ, ”Ugunda nak yok senenggom damoka hnon meewalom aboka molowounulum de? Ugunuk ara yok damok era hnon eleganggunusin bok, alda ununumnaʾ lelemoknya Yunus bek unumokaʾ anyek hnonok eleganesin.

⁴⁰Yunus bera senenggom hadyaʾ mon lomok sam inimnek yubyek lika winilya mabmorumok. Anasonya neikek, eimik era onoʾ nimi dibaʾ me neneba soko lomok sam inimnek yubyek lika winilya mabmoruwanamla.

⁴¹Soko sidyaʾ daknamla sum era, Niniwe heikek ulumek nim era, wene salek an ulumak nim eblaboka neikaʾ suboka buknemaakanya, Niniwe nim edya wen ulumak nim ek malya ululum aboka yana kibnemak. Nera Niniwe nim era, Yunus be sikenek Imik Neyung yuba leb elegosuk sum era, sikda ganya dangawoka domekaʾ anasa ubnesak. Bok anyaganera Yunus bek alda mek so bok, wera nauba sonya ben hnon ulumla!

⁴²Soko sidyaʾ daknamla sum era, woru sam ab soko dub gel gera sekoka, wenyek an ulumak nimi nidyaʾ ak malya ublum aboka yana kibnesil. Ban soko dub gel gera, alda Salomo bek ab perob el danganaʾ dobnamna aboka dara, gel gera mok sam ab yanggan pika jakgiga yeilimok. Bok wenyek dara, anyagan Salomo bera mek so bok, ben hnon naubenya hnon ulumla!” hyok.

⁴³”Bisaʾ ganya yamaʾ ara, nim ek ab loboka balamla dara, gelelom arobaʾ ak sam dek-deka sobnamna aboka ero yabalamla bok, oulyanga eilinggulumla.

⁴⁴Anasa, wera bisaʾ adya dara, Nadya youmaʾ lo yeilimsa ek sam onsok saaboka binimna. Wenyaboka lanawoka e nenyek an yalamna enyek, e nera e dem uboka, sembejaʾ orokaʾ anyek perobaʾ ak ulumnaʾ ak eillilamla.

⁴⁵Anya onoʾ eimik era, yok sekbadya bisaʾ era alda mek so bok, hyak yu nong bisaʾ enyek el balamla. Anya wera sikda benedya lomok an wekna dara, sikda anyagan ulumak. Dara bisaʾ dan weknanya bedya nong unaʾ era, youmaʾ dara, or mek so bok, wenyek dara, hyak gobdo malya dangalamla. Ban nenyekaʾ anyek, wene salek an ulumak nim era unuwanasil,” hyok.

⁴⁶Wera Yesus ara wenyaboka anyagan ulumek nimi mandebnaʾ eb anam yuba salamek sab-sab, alja genong geb, alja weisab eb yeilimek. Sikda beiyik sam sekoka, Yesus ab eibdangoka yuba sabsibya senewoka ulumek.

⁴⁷Dara, nimi ben hnonja Yesus ak, ”Neyung o, neyung anja genong geb, anja weisab eb dara, beiyik sam anak diri seklenjak,” hyok.

⁴⁸Dara Yesus adya lebnemokaʾ ara, ”Nadya genong gera heknya do? Nadya weisab era hek nang ek do?” hyok.

⁴⁹Dara Yesus ara alja yuba doro diriga ban nang ek, soruka okoka, ”Nadyaʾ genong geb nadya weisab eb dara, ban.

⁵⁰Nadya neyung be imik heikek ululanya bedya alja unuwanok senelamlaʾ anyek, unulumak nim era, nadya weisabo, nadya hmal gelewa, nadyaʾ genong yab ulumakaʾ ara an,” hyok.