Read Nalca MATIUS 14 Bible Online

MATIUS 14 - Nalca bible

MATIUS 14

¹Ban salek enyek, Galilea sokok dubnya Herodes bedya Yesus adya unulamla an yuba kebok.

²Anasa leboka, Herodes bedya alja wa wenaʾ dub nang ek, ”Ban benera Yohanes Pembaptis bek seleb embengaʾ suboka ulumla! Anadya wera alda yokaʾ-yokaʾ senenggomaʾ migib ununaʾ unuro yabalamla,” hyok.

³Nera men dara, Herodes bedya Yohanes bera henga gouboka gasa ek sam beiblulum aboka orugosuk. Herodes bedya Yohanes bek unumokaʾ damok ara, alja weis Pilipus dubnya bedya gel Herodias gemba leboka henga goumok.

⁴Wera Yohanes bedya Herodes bek men danyek lemokaʾ ara, ”Anda Herodias gera dobnenggunulam, mem!” hyok.

⁵Herodes bedya dara, Yohanes bera dib obnamna senemok bok, nimi nidyaʾ adya dara, Yohanes bera Imik Neyung adya ununumnaʾ lenya senelemekaʾ ak lok ganya bomokaʾ anasa, loboka heng ok goumok.

⁶Wera onoʾ yok sum enyek, Herodes bera al beiyimek sum bekoka masa youmok dara, Herodias gedya gelma edya nimi longol yeilimekaʾ hnoum, bera sunugoka seblemok. Gelma enedya bera pero seblemokaʾ anasa, Herodes bedya ganya era hyak eiya dabok.

⁷Anasa wera, Herodes bedya ban gelma enyek an, laga okoka, ”Wera, bera pero seblelamaʾ anasa, anja bonaʾ enyek eleganeso senemenaʾ ara, nidyaʾ hyak gigiwoka eleganenggen,” hyok.

⁸Wera gelma en aljaʾ genong gedya wenemokaʾ adya Herodes bek ara, ”Nara Yohanes Pembaptis bedya huk enyek, gwanenga yangawoka beilinaʾ ak beiyiboka wen eleganenelemaʾ anasa molowan,” hyok.

⁹Gelma enedya wenyaboka molowok yub enyek, Herodes be kebok dara, alja ganya angoo senewoka soloma dabok. Bok nimi hnoum ab laga yokaʾ nidyaʾ molowamenaʾ ara hyak eleganenggen amoknya nenesa leboka, wera Yohanes bedya huk era or dakoka bo yanok aboka orugosuk.

¹⁰Wera nimi henga gouboka gasa beillisin ek sam biniboka Yohanes bedya huka garamek.

¹¹Wera Yohanes bedya huk era garawoka, gwanenga yangawoka beilinaʾ ak beiyiboka bo byik dara, bera seblemok gelma ak elegel byik dara, gelma enedya eilinggek bo elegel byuk.

¹²Seleb dara, Yohanes bedya yuba doro diriga ban nang era, Yohanes be nonga dol yeiniboka soko lokek. Dara onoʾ sikda Yesus ak Yohanes bera Herodes bedya seleb ya nganga dako aboka nekel byik.

¹³Wera Yesus ara Yohanes be seleb obong an yuba kebok dara, al ulumokaʾ ak ara loboka, albeyok mek ekla bunaʾ bukoka salyaʾ gakdenaʾ ak sam byuk. Bok nimi nauba ulumek nim edya, Yesus unuwal an yuba kebek dara, sikja heikek ulumekaʾ ak sam ara loboka, Yesus bilimokaʾ ak sam dobol byik.

¹⁴Wera Yesus ara mek ekla bunaʾ ak ab uboka, sokok yingginiboka nimi mandebnaʾ enyek an kemelemok dara, angoo hyak yadyek senewousuk. Dara onoʾ, sik ganggan pik hnon neikdo balameknya nera hwebsuk.

¹⁵Sin dangal yabok dara, alja yuba doro diriga ban nang edya Yesus ak yeiniboka, ”Neyung o, seleb sin dangoka onoʾ anyagan ara salyaʾ gakdenaʾ ak anasa, nimi danara biniboka denaʾ eboka dekdowanokaʾ aboka, binilum aboka orugesilom,” hyek.

¹⁶Yesus adya sikenek ara, ”Sikda binggunumak bok, alda ugunja sikenek denaʾ eboka eleganesulum,” hyok.

¹⁷Wenyek Yesus alja yuba doro diriga ban nang edya alak, ”Nuk anyagan ara roti gwanenga lambadya uboka hadyaʾ penya ok ulumla!” hyek.

¹⁸Dara Yesus adya, ”Wera an nera nak an bo yoululum” hyok.

¹⁹Wera Yesus adya nimi nauba ulumek nim ek, ”Holaʾ eilib buklulum,” hyok. Dara Yesus adya lambadya roti gwaneng eb, penya hadyaʾ eb dara, imik keeboka, Imik Neyung ak perob aboka giboka molowok. Seleb molobgogowok dara, roti gwaneng era Yesus adya soboka alja yuba doro diriga ban nang ek, nimi nidyaʾ ak boknelum aboka elegosuk.

²⁰Wera nimi nidyaʾ ara, hyak muna bukoka jek. Seleb deregoka boklomeknya nera, gwaneng oulyang obadya boklomekaʾ ak neikaʾ mamagemek.

²¹Anyagan bukoka delemek nimi mandebnaʾ era, gelewa ab mek mab eb dara, eininaʾ orok bok, alda nauba nang okaʾ anyek, denga yubaʾ lambadya nang delemek.

²²Seleb debgogowek sab-sab, Yesus ara alja yuba doro diriga ban nang ek, ugunda mek ekla bunaʾ welewoka men balalulum aboka orugosuk dara, alda gwaneng deb elegosuk nimi mandebnaʾ era, ugunja heikek sam balalulum aboka orugosuk.

²³Wera nimi nidyaʾ ara, sikja heikek sam seleb byik dara, Yesus ara albeyok, heng uboka molowoununaʾ aboka, meinik sam welewok. Wera inil yabok bok anyek, Yesus ara meinik sam alak ok ulumok.

²⁴Bok, mek ekla bunaʾ anyek hyak mek hnoumung balamok. Dara mek ekla bunaʾ ara, kaboʾ yalamlaʾ ak sam uruma beiyimokaʾ adyaʾ wera kaboʾ adya luknobom-erebom abgiga balamok.

²⁵Gweleknek yangman salek enyek, Yesus ara alja yuba doro diriga ban nang ek, mek dub pik yan ingibgiga yalamok.

²⁶Wera Yesus ara mek dub pik yan ingibgiga yalamokaʾ ak eibek dara, alja yuba doro diriga ban nang era lok anasa, ”Bisaʾ anyaʾ!” aboka ngoluklemek.

²⁷Bok Yesus adya danyek, ”Nara Yesus ak anasa, ugunda ganya gwelelek hululum. Ugunda lok ganya bonenggom, mem!” hyok.

²⁸Dara onoʾ Petrus bedya Yesus ak, ”Wei, anda aldib Yesus ak yalamen dara, nababya anak an mek eilib pik yan ingibgiga younunaʾ aboka, or oruganelom,” hyok.

²⁹Wenyek Yesus adya Petrus bek, ”Wera, or yalom,” hyok. Dara Petrus bera mek ekla bunaʾ ak ab mek dubuk sekel yingginiboka Yesus ak sam yan ingi byuk.

³⁰Bok Petrus bera mek eilib pik bokjok, kaboʾ ak kemelemok enyek, alda loka dabookanya, al nonga meka si dununaʾ aboka ul yabok dara, ”Wenelesilimnya o, men arawanelom!” aboka lel yabok.

³¹Dara Yesus adya men soruka dorogoka Petrus bek dobsalawoka, lebokja, ”Petrus o, anda mek dib senelelamnya bek ululam. Anda hekasa dib senenaʾ loboka ganya daldom-daldom alam do?” hyok.

³²Wera onoʾ sik penya dara, mek ekla bunaʾ dubuk sam onsok welewoka bukdek dara, mek ara namenaʾ dok.

³³Dara Yesus adya yuba doro diriga ban nang edya, Yesus ak giblemek. Anya lebekaʾ ara, ”Wenelesilimnya o, anda aldib Imik Neyung bedya me ululam!” hyek.

³⁴Wera mek ekla bunaʾ dub pik buka balameknya nera, mek gek sam Genesaret sokok sam bul byik.

³⁵Wera mok enyek an nim era, Yesus nong ak yokaʾ eibek dara, onoʾ yok nim ek wera Yesus nunjaʾ sokok sam yal aboka yuba beibik dara, nimi neiklemek nimi nidyaʾ ara, Yesus ak bo yek.

³⁶Anya sikja, neyung o, nun dam nang anja akleng ek sam mekaʾ bebegananjab dara, merewanamab aboka Yesus ak molowek. Dara, nimi neiklemek nimi nidyaʾ ara, Yesus adya akleng ek bebegemek dara, sikda merewek.