Read Nalca MATIUS 18 Bible Online

MATIUS 18 - Nalca bible

MATIUS 18

¹Ban sum enyek, Yesus alja yuba doro diriga ban nang edya Yesus ak yeiniboka, ”Imik Neyung wenesin heikek sam ara, heknyek naubenya ubnamla do?” aboka heibek.

²Wenyek Yesus adya mek me hnon nak an yalom aboka, sik gangganek sam laga sekiyiwok.

³Anya Yesus adya dara, ”Ugunda hyak dib senewanalum! Ugun nong ara dangawoka, saaboka mekmab anasa danggubmun dara, wera aldib Imik Neyung alja wenesin heikek binggunulum.

⁴Nimi ben hnon alda ganya daklinggoka sokok gebdangoka ban mek me nenesoʾ anyek ulumla dara, benyek Imik Neyung wenesin heikek sam alak senenggomnya ubnamla.

⁵Anasa nimi ben hnon nadya si nemba leboka, ban unurub so mab enyek, perobaʾ leboka doro dililamla dara, alda nak doro dillilinel,” hyok.

⁶”Heknedya ban unurub so mekmab enyek, Yesus ak dib seneweijek senewoka pika garawoka malya nenelamla dara, unululanya bera, dabom girik adya aljaʾ ngang ak geregoka senenggom mek gwanek sam dal biniseng dara, perob so.

⁷Ban sokok an ara nimi malya ubnokaʾ aboka, malya nenelesilaʾ damok anyek, hyak omom nongaʾ ak ulumla. Ban unulusilaʾ damok ara sob ulumnelabok, alda unul eleklamla nim enyek, hyak omom nongaʾ ak ulumak!

⁸Anja meneng soruk edya gom, anja yan edya gom, anak malya ul eleklenggelya dara, unulunggelenya nera garawoka boboganalam. Imik Neyung ab unuruwaʾ orokaʾ anyek un dara perob so anasa, men malya ul eleklenggelyaʾ digum ara men garawoka bobogalom. Orok dara, anja yan soruk gekman nidyaʾ uk ak gokgelyek bar.

⁹Alda heng adya an nong ak malya ul eleklenggelya dara, heng era men gurugoka bobogalom. Anadya henga darasam orokaʾ anyek, Imik Neyung ab un dara perob, alda eimik an nong anyek heng ab neikaʾ uk desin heikek gokgelyek anasa, gurugoka boboganalam,” hyok.

¹⁰”Ban unurub mekmab enyek, malye dolbalek senewoka unaʾ ara hyak mem nong! Anasa ugunda banyek beknelum, sikja lero era nadyaʾ neyung be imik heikek ululanya bedya aljaʾ saramek sam sobaʾ ulumak.

¹¹Anasa nimi dibaʾ me ara weiningdangamek nim ek blebnunaʾ aboka yeilimok!”

¹²”Ugunja dara, hekaʾ senelum do? Nimi ben hnon alda pama denga winilya ebdobnya soubna daraʾ badya beiyimso bok, hnonok weiningdaso dara, pam damnya bera, hekaʾ hubnamso do? Bera alda denga winilya ebdobnya lindaraʾ badya dara, mok meinik sam gerek loboka, hnonok weiningdangamso pam enyek el binimso.

¹³Pam damnya bera elemsoʾ ara, pam en eibso dara, ugunda nak dib lebla senewananulum, yok pam dara, or malya bok, ban weiningdangamso pam enyek, eibnamso dara, hyak ganya nauba eiya dabnamso.

¹⁴Anasonya neikek, nadya neyung be imik heikek ululanya bedya dara, nimi nidyaʾ nak an wenyek dib senelenyak nim era mek nim bok, hnon weiningdeijek senelamla,” hyok.

¹⁵”An kabo edya anak malya ubgelya dara, anda malya ubgelenya bek an biniboka, ban nak malya ubnelem aboka laga neknelam. Ban nenera geleleng aboka ugun penya ok unubdanarum. Anja lebnelam yub enyek, an kabo edya dib senewanenggel dara, wera anda an kabo ek pe doboka perobaʾ ak bo yalalam.

¹⁶Bok nenyek kebnenggubla dara, Imik Neyung yub ek ara, hnon momnya dobokja, Nimi penya nang gom, winilya nang edya, benera aldib malya ubok aboka, laga neknemak dara, bera aldib alda malya umokaʾ ara laga dangalamla, hyokaʾ anasa, nimi yok nanga penya nang gom, winilya nang eboka bo yanalamakanya, heiboka wenewanalam.

¹⁷Wera ban nang enedya anda aldib malya ublum aboka lebnemak bok, bera kebnenggunusil dara, alja malya umlyaʾ ara, Imik Neyung yuba donaʾ nim ek laga lebnelum. Wera onoʾ Imik Neyung yuba donaʾ nim edya, wenewanamak bok, kebnenggunusil dara, alda Imik Neyung ak elgomnya gom, mok soko amba rupiah molowoka doro unya gom, anaso ak ulumla senelemnelum,” hyok.

¹⁸”Ugunda banyek ella danalum: Ugunja sokok anyeb, nera memnya wenyalalumnya nera, imik heikek anaba memnya danamla. Alda sokok anyeb, ugunja nera or wenyalalumnya nera, imik heikek anaba nera or danamla.”

¹⁹”Anya hnonda ban nenyek ella danalumaʾ ara, Sokok anyeb ugun gangganek sam nimi penya nanga, yokaʾ neiknya nemba leboka, Imik Neyung ak heng uboka molowananam aboka ganya hnonok ganya boboka adya mololerak dara, sikja molonaʾ era, nadya neyung be imik heikek ululanya bedya kebnesil.

²⁰Anasa or hekmok ok, nadya si nemba leboka nimi penya nang gom, winilya nang gom, longolomak dara, nara sikeneblaboka ulumab,” hyok.

²¹Wera onoʾ Petrus bera Yesus ak yeiniboka, ”Wenelesilimnya o, nadya hem bedya nak malya umnenel dara, nara lika hekbadya anaso meebdananam do? Lika sekbadya anaso meebdananam de?” hyok.

²²Dara Yesus adya Petrus bek ara, ”Lika sekbadya gom, alda lika denga sekbadya sum doboka boboganalam!”

²³”Anasa Imik Neyung adya wenelemnesilaʾ ara, hogung ara ban sununaʾ enesoʾ ak ubnamla ara, Nimi soko dubnya ben hnon, alja wa wen nang edya deblomek bonaʾ amba meewanamna sum eneso ubnamla.

²⁴Wera dubnya bera alja wa wen nang ek anda hekbadya rupiah anaso doboka deb loblum aboka yana lelelesuk sum era, hyak senenggom einiwamenggom rupiah gobdo deblomoknya bek bo yek.

²⁵Anasa saaboka lunuwamenggom so ulumok anasa, dubnya bedya dara, benyeb alaʾ gela mab ab, nidyaʾ alja bonaʾ gekman hiboka rupiah deknamnakanya, alja deb lobok rupiah emba lunuwanamna aboka orugomok.

²⁶Dara ban wa wenya bedya dara, dubnya bek, Neyung o, anda or diri umnelam, dara nadya deb lobsaʾ ara, onsok lunuwoka deknenabok anasa, or diri unelom, aboka molowok.

²⁷Dara dubnya bedya, yub enyek keboka, angoo yadyek senewookanya, lunuwanggununelem, or salyaʾ deb lobnenelem, hyok.

²⁸Wera ban wa wenaʾanya alda goboka yabok dara, onoʾ yok wa wenaʾanya bek alak an rupiah hnon deblomoknya bek eibuk. Wera benyek nganga weneb salawoka ol yabookanya, lebokja, Nadya rupiah deb lobnulumaʾ ara men deknenelem! hyok.

²⁹Bok al kab edya dara, alak gibookanya, perob-perobaʾ lebok ara, Hem o, nidyaʾ lunuwanenggenaʾ anasa, or diri ululom! hyok.

³⁰Bok benedya dara, anjinya nera kebnenggunenggen aboka lek hyok. Dara, alja rupiah deblomokaʾ ara, hyak nidyaʾ senenya loboka deklul aboka, bera henga gereksin ek sam doronggok.

³¹Wera ban nidyaʾ unuwokaʾ anyek eiyiboka, yok wa wen nim edya hyak angoo senewoka soloma dabsuukanya, soko dubnya bek unuwal aboka nekel byik.

³²Dara dubnya bedya, ban malya umoknya bek yalom aboka, Anda hyak malya unaʾ hwam wa wenya bek ululam! Anja nadya rupiah deb lobnulumaʾ ara, eimik lunuwanenggenaʾ anasa, diri ululom wenyalalumaʾ amba dara, nadya deknenggununelem hegesa.

³³Anasa, nadya anak angoo yadyek senewagesa sok, onoʾ anja dara, an kab ek ara, unu angoo yadyek senewanasom gom? hyok.

³⁴Dara, dubnya bera hyak yu ganya bobookanya, alja nidyaʾ deblomoknya nera gigiwoka lunuwolul aboka, henga gubsin nim ek saboka obnokaʾ aboka doboka elegok,” aboka Yesus adya lebok.

³⁵Dara Yesus ara alja neklemok neknaʾ era ban yub enedya saboka nekdakdobokaʾ ara, ”Ugun kabo nim edya malya unaʾ anyek, pe meebdanggunulum dara, nadya neyung be imik ululanya beneba, ugumbabya yok-yok sunuwoka unuwoka, malya nenewanasil,” hyok.