Read Nalca MATIUS 19 Bible Online

MATIUS 19 - Nalca bible

MATIUS 19

¹Yesus ara seleb wenyaboka nekgogowousuk dara, alda Galilea moka loboka, Yudea sam Yordan meka gema eer sam byuk.

²Nimi nauba Yesus ak diriga balamek dara, neiklemeknya nera anyaganyeb hwebsuk.

³Dara Parisi nim era, Yesus ak sene sunuwanobaʾ aboka yek. Anya, sikja Yesus ak, ”Nunja yub edya dara, nimi ben hnon gela lobnamla aboka dara, yok-yok damok orok bok, salyaʾ lobnamso de?” aboka heibek.

⁴Wenyek Yesus ara sikenek, ”Men soko uyimoknya bera, men sum era, nengma ab gel ab uyisuk aro momnya dobokaʾ ara, ugunda anam einiwanggom de?

⁵Wenhyookanya lebokaʾ ara, Anasa nengma ara, alja genong neyung ak loboka, alda gela dolomla dara, wera sikda penya bok, hnonok nong dangoka ulurak, hyok.

⁶Anasa wera sik penya danera, penya unggulurak bok, alda hnonok nong dangoka ulurak. Ban era Imik Neyung adya hnonok nenelelabok anasa, nim adya bokoka penya nenenaʾ ara hyak mem,” aboka Yesus adya wenyhusuk.

⁷Dara Parisi nim edya Yesus ak, ”Wera anaso bok dara, Musa bera hekasa gela lobnamla dara, lobgen an momnya donaʾ enyek weboka eleganalam aboka orugosuk do?” wenyaboka heibek.

⁸Dara Yesus adya sikenek, ”Men ununggulumek bok, ugun nong ak unuwanalum aboka wenesinaʾ anyek hyak ganya gasa nong anasa, wera momnya doboka eleganalum asuk.

⁹Anasa ugunda banyek pe keblulum: Alja gel gera meknewoka malya unaʾ orok bok, nimi ben hnon alja gel gek loboka, onoʾ eimik yok gel ge dolomla dara, bera malya unaʾ unulamla,” husuk.

¹⁰Dara Yesus alja yuba doro diriga ban nang edya alak, ”Gela ab nenya ab doldanaʾ anyek, anasoʾ ak ululabok dara, wera nim ara gela doldanaʾ loboka salyaʾ ulunok,” hyek.

¹¹Wenyek Yesus adya dara, ”Nimi nidyaʾ ara, ban yub era keboka dobnamenggom bok, alda alba Imik Neyung adya unuwanamla senemna nim ok keboka dolomak.

¹²Anasa nim ara unu ulumnamla aboka beillilemakaʾ adya, hnonda gela donggulumak. Hnonda nim adya unumekaʾ adya gela donggulumak. Hnonda nimi ganya adya ok, Imik Neyung amba pe welenob senewan dara, gela don ganya bonggulumak. Anasa nimi nidyaʾ ban yub enyek keboka dobnamna seneweija nim era or dobnemak,” hyok.

¹³Nimi sikja mabo Yesus adya soruk diyiboka, heng uboka Imik Neyung ak molowosululaʾ aboka bo yeilimek. Bok Yesus adya yuba doro diriga ban nim edya, memabo bo yeilimek nim ek wabsik.

¹⁴Dara Yesus adya, alja yuba doro diriga ban nang ek, ”Banaso mab enyek, Imik Neyung wenesin heikek weknemak nim era anaso ulumnemakaʾ anasa, ugunja sikenek nak yangganaʾ mem aboka yuba seknenggom, mem. Alda or nak yalanok,” husuk.

¹⁵Dara Yesus adya mabo danyek an sikja hukuk sam alja soruka diyiboka, perobaʾ leboka onobgogowosuk dara, alda anyaganyebaʾ ara loboka yokok sam byuk.

¹⁶Dara onoʾ yok sum enyek, nimi ben hnon Yesus ak yok. Anya alja dara, ”Neklesilimnya o, nara dib embeng ulmoubnaʾ dobnamna aboka dara, hek perob unaʾ ak ubnyaʾ adya dobnamna do?” aboka heibok.

¹⁷Wenyek Yesus ara benyek an, ”Hekasa anda nak hek perob unaʾ ak heibnelem do? Ben hnonok ok perob nongaʾ ak ulumla. Anda embengaʾ ulumnamna senelam dara, Imik Neyung yub ak pe keboka unulumnalam,” hyok.

¹⁸Dara benedya, ”Har yub ek leblam do?” aboka heibuk. Dara Yesus adya, ”Nimi onggom, mem, gela hokaʾ salenggom, mem, hokaʾ donggom, mem, sondaʾ lenggom, mem,

¹⁹anjaʾ genong neyung ak pe gibeldololom, an damnya wanaʾ uldalalam sok, onoʾ an kabo nim ek wanaʾ ululom,” hyok.

²⁰Dara goubenenya benedya Yesus ak, ”Ban yub en nidyaʾ ara, seleb gigiwoka unulamnaʾ anasa, har nerek hnon lolomna do?” aboka heibuk.

²¹Danyek Yesus adya alak, ”Anda munaʾ pe ulumnamna aboka dara, anjaʾ ek biniboka, anjaʾ bonaʾ nidyaʾ ara rupiah amba beibnelam. Dara, anedya imik heikek perob bonaʾ dobnelamaʾ anasa, anjaʾ unu dobmen rupiah era bonaʾ garan ulumak nim ek eleganesilim. Unubgogowamen dara, anda nak or diriga yananelem!” hyok.

²²Wenyek goubenenya bera, alda bonaʾ dubnya ulumok bok adya, Yesus adya alak an wenyaboka lebok anyek kebok dara, ganya igina daboka ek byuk.

²³Dara onoʾ Yesus ara alja yuba doro diriga ban nang ek, ”Nara ugunuk dib lebnesin, Bonaʾ dub nang enyek, Imik Neyung wenesin heikek sam weknaʾ ara okna ulumla.

²⁴Anya onoʾ hnon lebnesin, Nim abaksin pam unta ara, imir lom pik wekna dara, or weknamso bok, alda bonaʾ dub nang enyek, Imik Neyung wenesin heikek sam weknaʾ ara hyak okna nong ak ulumla,” hyok.

²⁵Yesus adya yuba doro diriga ban nang edya Yesus adya ban wenyaro lelemok yub enyek, keboka sikda hyak loka dabsukaʾ anasa, sikja dara, ”Wera anaso dara, heknyek blebnamla do?” hyek.

²⁶Anasa Yesus adya sikenek keeboka lebokaʾ ara, ”Nimi ak dara, nera okna nong! Bok Imik Neyung ak dara, nidyaʾ ara or unuwanamso ok,” hyok.

²⁷Anasa onoʾ Petrus bedya, ”Neyung o, nunda yokaʾ-yokaʾ loboka, anak diriga yeilinjuba. Dara nunda eimik era, hekaʾ ak dobnemab do?” aboka heibuk.

²⁸Wenyek Yesus adya sikenek, ”Ugunda hyak dib senewanalum: Imik Neyung bedya heikek ara, nimi dibaʾ me nera, alak imik nenemlyaʾ adya hyak perob nang ekla bunaʾ ak buknamla. Ban sum enyek, ugunda nadya yubaʾ donaʾ dibaʾ ululum nim era, senenggom obadya nang yilaʾ bun ekla bunaʾ ak sam bukoka, obadya Israeli nang yilaʾ ak yana lelelemnelum.

²⁹Nimi nidyaʾ nasamba leboka, alja e gom, al nang yilaʾ nengmabo gom, gelewa gom, genong neyung gom, memabo gom, wa masa gom, nasamba leboka loboka nak yalalanya bera, lunuwoka dengaʾ yubaʾ dombadya anaso dobnamla. Anya hyak sidyaʾ nong ara, eimik era embengaʾ ulmoubnaʾ damoka dobnamla.

³⁰Bok, nimi nauba wenyek men mengewoka ulumak nim era, eimik dangoka, onoʾ wenyek eimik ulumak nim era, men danamak,” hyok.