Read Nalca MATIUS 2 Bible Online

MATIUS 2 - Nalca bible

MATIUS 2

¹Herodes dubnya dangoka ulumok salek enyek, Yesus ara, Yudea sokok Betlehem heikek beibuk. Dara ban salek enyek, guraʾ beknaʾ ubnaʾ damokaʾ ella ulumek nang era, yali sam abaʾ ara Yerusalem heikek yek.

²Dara sikja, ”Yahudi nimi dubnya danamlaʾ ak beiyimla me nera, har sam beiyimla do? Nunda alja guraʾ lanawokaʾ ak eiyiboka, alak gibnemabaʾ anasa yeilimab bar,” aboka nim ulumekaʾ ak heiru yabalesik.

³Herodes dubnya bera alda ban wenyan yuba kebok dara, alab nimi nidyaʾ Yerusalem heikek ulumek nim era, ganya sam-samab menegosuk.

⁴Dara Herodes bera Yahudi nimi sokok sam Imik Neyung yuba wa gakaʾ dub nang eb, yuba neksin nang eb, ugunda nidyaʾ mamagel yanalum aboka ebmamagosuk. Anya sikenek, ”Imik Neyung adya bokol yanesin asuknya Kristus bera har sam beibnamla do?” aboka heibsuk.

⁵Dara sikja Herodes bek ara, ”Ununumnaʾ lelemoknya bedya ban wenyaro momnya dobokaʾ ara, Wei, anda Betlehem o, Yehuda sokok sam, Yehuda sokok nauba heik ulumak bok, anak ab dubnya ben hnon lanawanamla dara, benedya Israeli nimi bleboka bo diri ulumnesilaʾ anasa, anak dara, gobdo mek heik geknebaʾ unggulumnelam, aro momnya dobokaʾ anasa, wera me nera Yudea sokok Betlehem heikek sam beibnamla,” aboka nekek.

⁷Wera Herodes bera seleb wenyaboka lelewoka nekekaʾ kebok dara, guraʾ beknaʾ ubnaʾ damoka kemelemek nang ek gelelenga yoululum husuk. Anya sikenek, ”Guraʾ eiblumaʾ ara, hek sum ek laga dangamok ak okoka eiblum do?” aboka heibsuk.

⁸Seleb wenyaboka heibgogowosuk dara, ”Ugunda or Betlehem heikek biniboka me nenyek pe keeboka ebnelum. Anya me nera okoka eibnelum dara, naba gibel binimnaʾ anasa, nak men wenyal yananulum,” hyok.

⁹Dara, nang era Betlehem heikek sam byik. Pikek balamek dara, on guraʾ era eibek. Dara hyak ganya eiya dabsuk! Anya guraʾ era men mengewoka me nen ulumokaʾ dub nong ak sam beknaʾ sekemok.

¹¹Wera nang era, e lomok wekel biniboka, me nenyeb aljaʾ genong Maria geb eiyisik. Dara sikda me nen dam oumuwoka koma lumugoka giboka, sikja bonaʾ yokoka, rupiah damok ab, gin-gin song meklaʾ ab, perob senenggom deknaʾ ngiknaʾ mek ab me soruka onomek.

¹²Dara, Imik Neyung adya, Herodes bek saaboka binggunulum aboka lendar pik wenewosuk dara, sikda yok pik uboka sikja mok byik.

¹³Guraʾ kemero yeilimek nang era, sikja mok seleb lanawoka balamek dara, Imik Neyung lero ara Yusuf bek lendar dib yeiniboka, ”Herodes dubnya bera me nenyek obnunaʾ aboka elemnamla anasa, anda bukoka me ab eilinggeb doboka bobmenekanya, Mesir sokok sam berra bo bilom. Wera anyagono ulumunaʾ ara, nadya anak wera or yoululum henya dara, yanalum,” hyok.

¹⁴Dara Yusuf bera bukok dara, al sumen inimnek enyek, me ab eilinggeb doboka, Mesir sokok sam bo murugul busuk.

¹⁵Wera sikda Mesir heikek ulumek salek enyek, Herodes bera somogok. Ban unuwoknya nera, youmaʾ Imik Neyung adya ununumnaʾ lelemoknya bedya, ”Nadya me nera Mesir sokok ab youbnamna,” amoknya nenesa gigiwolulaʾ aboka ubok.

¹⁶Wera Herodes bera guraʾ kemero yeilimek nang edya, alak sondaʾ lebekaʾ eibuk dara, alda hyak yu ganya bobok. Anya alda Betlehem heikek memabo gibnaʾ penya uboka onu sam beibsik mab era nidyaʾ obnelum aboka orugosuk. Ban unuwoknya nera guraʾ kemero yeilimek nang edya, ban salek eiyimoub aboka alak wenyameknya nenesa sunuwoka unuwok.

¹⁷Ban unuwoknya nera youmaʾ ununumnaʾ lelemoknya Yeremia bedya lemokaʾ anyek gigiwok ara,

¹⁸”Rama heikek ara, nim ara omoma leboka nauba engelemakaʾ ak kebna. Rahel gera alaʾ mabo nidyaʾ dengarowekaʾ adya nauba engelamlakanya, yok ganya hekel eleknaʾ ara lek senelamla,” hyok.

¹⁹Yusuf bera anam Mesir sokok ulumok salek enyek, Herodes bera seleb somogok dara, Wenelesilnya bedya lero era Yusuf bek lendar dib yok.

²⁰Lero adya lebokaʾ ara, ”Ban me nen obnobaʾ aboka umek nang era seleb somogekaʾ anasa, me nenyeb eilinggeb doboka bobmenekanya, onsok Israeli sokok sam bo binilam,” hyok.

²¹Dara Yusuf bera maboka bukok dara, me ab Maria geb doboka bobsuk dara, Israeli sokok sam bo yousuk.

²²Bok onoʾ, Herodes bedya yando me Arkelaus bera eilibe lunuwoka Yudea sokok sam dubnya dangoka ulumla an yuba kebok enyek, alda lok ganya boboka, Yudea sam banaʾ ara lobok. Bok onoʾ Wenelesilnya bedya lero edya lendar pik ab anaso unuwanalam aboka lebok dara, alda Galilea sokok sam leiboka byuk.

²³Wera Galilea sokok ara, Nazaret alamek heikek sam ulumek. Ban unumoknya nera, Yesus amba leboka ununumnaʾ lelemek nang edya, ”Alda Nazaret mok ebnya,” henemak ameknya nenyek gigiwolulaʾ aboka umok.