Read Nalca MATIUS 20 Bible Online

MATIUS 20 - Nalca bible

MATIUS 20

¹”Imik Neyung adya wenelemnesilaʾ ara, hogung ara banasoʾ ak ubnamla: Nim anggur dok wa damnya ben hnon, alja wak sam webnenyak aboka, lugunaʾ nong enyek goboka el yibilemok.

²Wera lika hnonok webnumunaʾ amba dara, denarius rupiah hnonok-hnonok deknesin aboka lebgogowok dara, wera nadya wak sam or welenululum aboka orugosuk.

³Dara onoʾ wa damnya bera, gwelek sirigoka dukduk henemok sab-sab, deknaʾ gasaʾ pik nimi hnon salyaʾ pelemek ak eibsuk.

⁴Dara eibsuukanya sikenek, Nadya wa webnumun dara, deknaʾ sunuwoka pe eleganesinaʾ anasa, wera nadya wa wel bininulum, hyok.

⁵Dara nim era, wak sam byik.” ”Wera onoʾ wa damnya bera hyak dukdukanek salek hnon, henga dalebnenewoka, sin dangalamla salek hnon, neik sonya nenyek unuwok.

⁶Dara onoʾ, bles henemok salek benera yibiniboka kemelemok enyek, nimi hnon wa wenaʾ orokaʾ anyek, salyaʾ pelemek nim hnon eibsuk. Anya sikenek, ugunda yokaʾ-yokaʾ ununaʾ orokaʾ anyek, hekasa anyagan anyek ok pelelum do, aboka heibsuk.

⁷Wenyek nim enedya benyek an, Nimi adya nadya wa webnenulum aboka oruksinaʾ orok anasa ulumab, hyek. Dara anggur wa damnya bedya sikenek, Wera salyaʾ ululumaʾ anasa, ugumba nadya anggur dok wak sam wel bininulum, aboka orugosuk.”

⁸”Wera hyak sin dangoka inibok dara, wa damnya bedyaʾ alja wa keeboka unya bek, Anda nadya wa welenyak nimi nidyaʾ yoululum aboka, sikja deknaʾ era, eimik wel yeilimak nim ek ab dekgiga yeilimenaʾ ara, men wel yeilimak nim ek dekdaknesilim, aboka orugok.

⁹Dara hyak eimik salek enyek, salawoka wemek nanga yek dara, wera denarius rupiah hnonok-hnonok doro yibek.

¹⁰Wera onoʾ hyak lugunaʾ so orugosuk nanga yek. Sikja dara, nauba dobnemab senemek bok, men elegosuk nang elegosuk sok, neik so hnonok-hnonok elegosuk.

¹¹Wera nang era sikda rupiah en seleb dobek dara, wa damnya bek yo yaboka leb yaboka,

¹²Nunda lugunaʾ ek moruwoka welmab bok, eimik yak nang era sikda mek soʾ wemak. Nuk dara, henga yu omom bokaʾ anyek babya goluwoka welmab bok, sikda elegeisilim sok, numbabya anaso elegeisilim! hyek.”

¹³”Dara wa damnya bedya, wenyaboka lebek nang ek ben hnonoknya bek, Hem o, nara anak malya ubnenggunggen. Anja nara lika hnonok wa webnyaʾ amba rupiah hnonok henggubmalem de?

¹⁴Anasa wera, anja welamnya nemba deknaʾ doboka bobmenekanya, bilom. Nadya unuwanamna senemnaʾ ara, eimik wel yeilinyak nang eneba, amba elegenggen so rupiah enyek eleganesin senebman bar, hyok.

¹⁵Nadya bonaʾ ek gom anaba unuwanamna senewanasinyaʾ ok unuwanasinya goma? Nak heknaʾ nong anasa, anda solom ganya bobnesom gom, wenyamok,” hyok.

¹⁶Dara onoʾ Yesus adya, ”Anasonya neikek, eimik ulumak nim era mengewoka, onoʾ mengewoka ulumak nim era, eimik dangoka ubnemak,” hyok.

¹⁷Wera Yesus ara anam Yerusalem heikek bununaʾ aboka pikek balamok dara, alja yuba doro diriga ban nang eb sikbeyok yuba sabek. Dara sikenek,

¹⁸”Ugunda keblulum! Nunda wenera Yerusalem heikek balamab. Wera Yerusalem heikek ab dara, nimi dibaʾ me nera Imik Neyung yuba wa gakaʾ dub nang ek hnon, yuba neksin nang ek hnon, doboka eleganamak. Dara alak obnok aboka yuba sabnemak.

¹⁹Hnon ara, Yahudi gom nim ek doboka eleganamak. Dara, sikja alak derewoka waboka, saboka oboka, gal ak sam glabnemak. Bok winilinya sum era, alda embengaʾ suboka bukiyiwanamla,” hyok.

²⁰Wera Zebedeus alaʾ gel ara alja mab eblaboka Yesus ak yek. Yesus adyaʾ saramek sam oumuwoka giboka yokaʾ hnon molowanamna hyok.

²¹Wenyek Yesus adya, ”Genong o, anda hekaʾ ak senelam do?” aboka heibuk. Dara, gel genedya Yesus ak, ”Neyung o, anda dubnya dangoka wenewanasilim sum era, nadyaʾ penya mabo danara, ben hnonda anjaʾ sirikek sam hnon, ben hnonda anjaʾ waneng ek sam hnon, buknurum aboka lebnesilim,” hyok.

²²Dara Yesus adya sikenek lebsukaʾ ara, ”Ugunja molowolumaʾ ara, anyek molowabaʾ ara ugunda elgom ululum. Nadya igina kweboka gweknamna mek hmeiya era, ugumbabya or denesom de?” hyok. ”Numbabya or unuwanesibya,” hyek.

²³Dara Yesus adya sikenek, ”Aldib, ugunda den dara, denelum. Bok alda ban benera sirikek sam gom, waneng ek sam gom, buknamla anaʾ ara nadya or wenyhenggunusin. Bok ban anyagan buknemak nim era, nadyaʾ neyung bedya albeyok buknemak senelamla nim ok lebnesil,” hyok.

²⁴Wenyek, yok yuba doro diriga ban nang sagobadya nang edya anyek kebek dara, sikda Yohanes Yakobus ak malya lerak senewoka yu ganya bobek.

²⁵Anasa leboka, Yesus adya sikenek nidyaʾ yoululum aboka, ”Imik Neyung ak elgom ulumak nimi sikja bo usinaʾ dub ulumak nang era, sikja heik yokaʾ nim ek malya nenewoka igina kwellilisak. Heik yokaʾ nimi sikja yok-yok wa amba dub ulumak nang era, sikenek sokok nenellilisak.

²⁶Bok ugunuk dara, anaso ununaʾ ara hyak mem. Alda saaboka, ugun gangganek sam senenggomnya ulumnamna senewanalanya bera, alda oruknaʾ wa wenya dolul.

²⁷Nimi dibaʾ me anaba, alda arawanenokaʾ aboka yanggumok bok, alda alja araweisinyakanya, nimi nauba amba blebsununaʾ aboka al nonga doboka elekdonunaʾ aboka yeilimok. Anasa neik so, nimi hnon ugun gangganek sam, nara mennya danamna senewanalanya bera, men oruknaʾanya dolul,” hyok.

²⁹Wera sikda Yerikho heikek abaʾ ara, lanawoka bek dara, nimi nauba Yesus ak dobol yalamek.

³⁰Dara heng lum nang penya pikek sam bulurek. Sik penya nang edya wera Yesus ara pik enyek an uboka yabalamla an yuba kerek dara, sikja, ”Daud bedya me o, nuk angoo yadyek senewoka araweisiya e!” aboka yeiriwoka lelerek.

³¹Anasa, nimi nauba anyagan longomek nim edya dara, sikenek yuba gelegorurum aboka ebngaleklesik bok, sikda, ”Neyung o, Daud bedya me o, nuk angoo yadyek senewoka araweisiya e!” aboka hyak yeiriwoka lelerek.

³²Dara Yesus ara balamokaʾ ara sek loboka, sikenek ok an, ”Yoururum,” husuukanya, ”Ugunja dara, hekaʾ ak hubsulul senerum do?” wenyaboka heibsuk.

³³Dara sikja, ”Neyung, nunda henga gwelegoka eiriweisinim senenam!” herek.

³⁴Anasa, Yesus ara sikenek angoo yadyek senewoka, sikja heng era soruka salawosuk enyek, al wene salek enyek, sikja heng era eikaʾ darek. Dara sikda Yesus ak diriga birik.