Read Nalca MATIUS 22 Bible Online

MATIUS 22 - Nalca bible

MATIUS 22

¹Yesus ara nimi nauba longomek nim ek, onoʾ sununaʾ adya sunuwoka lebsukaʾ ara ban:

²”Imik Neyung adya wenelemnesil salek era, hogung ara banaso ak ubnamla, Mok soko dubnya alja me gela dobnamla bar aboka masa youmok.

³Anasa dubnya bedya alja wa wenaʾ nang ek, nimi masa del yanalum amna nim era yanokaʾ aboka el binisulum aboka boksuk. Bok yuba beiyimok nim era nunda yanggunumab aboka lobek.

⁴Anasemba, dubnya bera onoʾ yok wa wenaʾ nang ek nim el binilum aboka orugosuk. Anya, yanalum amna nim ek ara banyek wenyhenelumaʾ ara, Denaʾ youmnaʾ ara wera seleb dengewonunaʾ aboka ubna. Yem sapi ab, mesaʾ nauba gobenya sapi ab, pam danyek seleb oboka youmna. Anasa or yanamak ok amla henelum, hyok.

⁵Bok yub en beiyisuk nim edya danyek, yanamab senewanggumek. Sikda nidyaʾ ara sikja wa ganya dokol bilimek. Hnon nim era sikja wak sam bilimek, hnon nim era sikjaʾ bonaʾ memelamla ak sam wel bilimek.

⁶Alda yok hnon nim edya dara, ban yuba bo bilimek nim ek saboka oboka hyak dibaʾ obek.

⁷Wera dubnya bera anjaʾ wa wen nang ek unuwasak an yuba kebok dara, dubnya bera hyak yu ganya bobok. Anasa dubnya bedya yin bonaʾ nang ek unuwak aboka nekoka orugosuk dara, nang en nonga oboka, sikja heika nidyaʾ uka dabsik.

⁸Seleb dara, dubnya bera, alja wa wenaʾ nang ek anyagan yoululum aboka sikenek, Masa ak seleb youboka beiyimna bok, del yanalum amna nim ek dara, delyamenggom, orok.

⁹Wera anasa, ugunda senenggom pik gwandanyek sam biniboka, nim or salyaʾ nim ek nauba eboka bo yanalum.

¹⁰Dara wa wen nim era, dubnya bedya lemok sok sunuwoka, senenggom pikek sam byiikanya, nim or salyaʾ malya nim perob nim demen nim era nidyaʾ ebmamagek. Dara gela doboka denemak aboka, meemok e nera nim adya ok dibemok.”

¹¹”Wera dubnya bera yeilimek nim ek hogunga kemero yabalesuk ara, yeilimek nim gangganek sam ara, nimi ben hnon gela dobnamnaʾ amba ongolomak akleng ongowanggumokaʾ ak eibuk.

¹²Dara dubnya bedya benyek an, Hem o, anda hekasa perob akleng ek, ongowal henggonggom wekel yeililam do, aboka heibuk. Bok yeilimoknya bedya dara, yuba mekaʾ sab eleganggubuk.

¹³Dara dubnya bedya alja wa wenaʾ nang ek, Wera ugunda ban benyek alja yana soruka henga gouboka hyak gunaʾ nong ulumla ak sam bologol binilum. Dara alda anyaganyeb nauba engewoka si glengdarreb aboka gweklemnamla,” ara Yesus adya wenyhusuk.

¹⁴Anasa Yesus ara wenyaboka sunuwoka lebgogowokaʾ ara, ”Nimi nauba yoululum alalabok, mekaʾ ok weboka dolosil,” hyok.

¹⁵Wera Parisi nim era, Yesus ak hekaʾ huboka sunuwoka henga weboka youbnobaʾ aboka, sene yana benel byik.

¹⁶Anasa Parisi nim era, sikja yuba doro diriga ban nang hnon, Herodes bek sam ab nim hnon, Yesus ak sam bokek. Dara nim enedya Yesus ak, ”Neyung neklesilimnya o, neyung aldib ok unululamaʾ ara numba ella ulenjab. Neyung anda yuba neklesilim dara, nimi hogung ak keeboka neknenggulusilimikanya, yok nim edya perob seinilimaknya nera loboka, alda Imik Neyung adya senelamlaʾ anyek ok neklesilimaʾ anasa, pelelam.

¹⁷Anasa neyung, anda nuk banyek neknesilim: Nunja dolomab yub edya dara, mok soko dubnya Kaisar bek ara, mok soko amba dara, or rupiah deknemab gom, orok gom?” hyek.

¹⁸Bok Yesus ara sikda malya ganya boboka sene heimekaʾ anyek ella uboka, alja dara, ”Wei, ugunda hyak malya unaʾ hwam nim ek ululum! Ugunda hekasa nak heng dibaʾ weboka youbnenobaʾ aboka ulunulum do?

¹⁹Wera anasa ugunja dubnya bek deklelum rupiah hogung enyek, nak aabyandeneso!” hyok. Dara sikja Yesus ak rupiah hnonok elegek.

²⁰Wenyek Yesus adya, ”Banera heknedya si neb sununaʾ ab ulumla do?” aboka heibsuk.

²¹Wenyek sikja, ”Dubnya Kaisar benyaʾ,” hyek. Dara Yesus adya sikenek, ”Anasa wera ugunda dubnya bedyinya nera dubnya bek eleganalum bok, Imik Neyung adyinya nera Imik Neyung ak eleganalum,” hyok.

²²Wera Yesus ara wenyaboka leboknya nenyek kebek dara, sikda loka dabsuk. Anya sikda Yesus ak ara loboka byik.

²³Dara al on sum enyek, Saduki nim era, sikja dara, nimi seleb somoklomaknya nera embengaʾ suboka buknenggunuseng senewoka ulumek nim ek Yesus ak yek.

²⁴Anya Yesus ak, ”Neklesilimnya o, Musa bedya momnya dobok yub era, Nimi ben hnon gela domnelabok, alda me beibnenggonggom somoganamla dara, me beiblunuwolulaʾ aboka, alja weis edya lo bilya gel gera dobnamla aro momnya dobok.

²⁵Benedya alja hemyab era sekbadya nanga nemek. Yandonya bera gela dobok bok, me beilinaʾ loboka somogok. Dara, alja gel gera alja weis ana beremnya bedya dobok.

²⁶Bok beneba me beibnenggonggom somogok. Anasa sikda nidyaʾ winilinya bek abaʾ ara, nidyaʾ sekbadya neik so unubgiga byik.

²⁷Dara, sidyaʾ nong ara, gel geneba somogok.

²⁸Anasa sik sekbadya nang dara, neik gel gera seleb nidyaʾ nang domek bok anasa, nimi nidyaʾ eimik embengaʾ subnemak sum era, gel gera heknedya gel yokaʾ danamla do?” aboka heibek.

²⁹Wera anasa Yesus adya sikenek, ”Ugunda Imik Neyung yuba momnya dobokaʾ ab, Imik Neyung migib ab, elgom ululumaʾ adya, wera meknewoka leblum.

³⁰Dara, nim embengaʾ subnemak sum era, sikda nidyaʾ gela donaʾ loboka, imik heikek sam ulumak lero nang enesoʾ anyek salyaʾ ulumnemak.

³¹Bok nimi somoklomak nimi nidyaʾ embengaʾ suboka buknemak an yub era, bukuk sam momnya dobokaʾ ara eininggululum de? Imik Neyung adya lebokaʾ ara:

³²Nara Abraham bedya Imik Neyung ulumna, Ishak bedya Imik Neyung ulumna, Yakub bedya Imik Neyung ulumna. Wera, Imik Neyung ak dara, somoklomak nim edya Imik Neyung unggulumla. Alda nim embengaʾ ulumak nim edya Imik Neyung ulumla! wenyaro momnya dobok,” hyok.

³³Dara, nimi nidyaʾ longomek nim era, Yesus adya an wenyaboka neklesuk yub enyek keboka, sikda loka dasuk.

³⁴Wera Parisi nim edya, Saduki nim era, Yesus adya yuba doro sabnamenggom neneweisil an yuba kebek dara, sikda ebdanga mamagek.

³⁵Dara, sik gangganek yuba neksinya geremsengnya ben hnon, alja Yesus ak sene sunuwonunaʾ aboka heibok,

³⁶”Neklesilimnya o, unuwanalum an yuba momnya dobok ak sam ara, har yub erek senenggom damok yub ulumla do?” wenyaboka heibuk.

³⁷Anasa Yesus adya benyek an, ”Anda Imik Neyung ak anja ganya gebman adya hnon, anja nong unaʾ gebman adya hnon, anja ganya seininaʾ adya hnon, hyak wanaʾ nong ululom.

³⁸Ban yub enyek, hyak senenggom damok yub uboka dib nongnya nera an ulumla!

³⁹Dara onoʾ penenya bok al neik soʾ ara: Andam nang wanaʾ uldalalam sok, an kabo nim ek unuwoka wanaʾ ulusilom.

⁴⁰Dara, Musa bedya unuwanalum an yub eb, ununumnaʾ lelemek nang edya neklesik yuba nidyaʾ ara, ban penya yuba damok danyek, geklewoka lelemek,” hyok.

⁴¹Wera Parisi nim era anyagan anam longomek dara, Yesus adya sikenek heibsukaʾ ara,

⁴²”Ugunda Kristus, nimi blebsinaʾ dubnya bemba dara, hek huru seinilelum do? Alak dara, hek nang yilaʾ senelelum do?” aboka heibsuk. Anasa sikja dara, ”Nimi blebsinaʾ dubnya bera Daud nang yilaʾ,” hyek.

⁴³Wenyek Yesus adya, ”Wera anaso dara, Imik Neyung Geisinya pik uboka, Daud bera, hekasa nimi blebsinaʾ dubnya bek Wenelesilnya aboka lemok do? Wera Daud bedya lebokaʾ ara,

⁴⁴Wenelesilnya bedya nadyaʾ wenenanya bek lebokja: Anda nadyaʾ sirik soruk ak sam bulumen sok moruwoka, anjaʾ isaʾ nang era nadya anja yan damumduk sam bo bolol yanenggel, hyok.

⁴⁵Dara wera, Daud bedya blebsinaʾ dubnya benyek, Wenelesilnya hyok bok dara, alda hek pik uboka Daud nang yilaʾ ulumnamso do?” hyok.

⁴⁶Dara, nimi hnonok sibin anaba, Yesus ak yuba saaboka doro sabnenggubek. Anasa ban sum enyek ab moruwoka, Yesus ak ara, yokaʾ-yokaʾ hnon asaʾ ganya boboka heinggulumek.