Read Nalca MATIUS 24 Bible Online

MATIUS 24 - Nalca bible

MATIUS 24

¹Wera Yesus ara Imik Neyung ek ab goboka bok dara, alja yuba doro diriga ban nang era yeiniboka, ”Imik Neyung e somekaʾ anyek, anaso uru sobek aboka pe kendelom,” hyek.

²Anasa leboka Yesus adya sikenek lebokaʾ ara, ”Wei, ugunda ban nidyaʾ ara seleb eillililum de? Ban e nenyek denewoka ikoka sobek girik era hnon mekaʾ goʾ ubdabnenggunumlaʾ, nidyaʾ ara golob menegoka mabnamlaʾ anyek ulumla, ugunda an nadya lebnaʾ anyek dib senewanalum,” hyok.

³Wera Yesus ara Zaitun meinik biniboka bulumok dara, alja yuba doro diriga ban nang era alab neikaʾ sikbeyokaʾ yuba sabnobaʾ aboka yek. Dara sikda alak, ”Neyung o, nidyaʾ ban lelelamnya nera hek sum ek unuwanamlaʾ ak aboka neksilom,” hyek. Anya, ”Neyung, an yanalamaʾ beknaʾ dibaʾ ab, sidyaʾ daknamlaʾ beknaʾ ab dara, hek lok so beknaʾ ak lanawanamla do?” hyek.

⁴Wenyek Yesus adya sikenek, ”Ugunuk sondaʾ anasa bobnenewoka lebsijek anasa, pe keeboka ulululum.

⁵Dara eimik era, nimi nauba nadya si nek sibuka, Nara nimi blebsinaʾ dubnya bera an! wenyaboka, nimi nauba sondaʾ leboka malya nenewanasak.

⁶Dara ugunda eimik era, senenggom mal yuba hnon, wen mala lanawoka oldalamak an yuba kebnelum bok, ugunda lok ganya bobnenggunulum, mem. Wera yokaʾ-yokaʾ nidyaʾ ara unuru yabalemnelabok, an nidyaʾ sidyaʾ daknamlyaʾ sum era, anam ulumnamla.

⁷Wera yok mok soko nim edya, yok mok soko nim ek mala lanawoka oldalamnemak. Dara yok mok soko dub nang edya yok mok soko dub nang ek doluwoka olomnemak. Anya, yok-yok mok soko era, senenggom gwaneng okaʾ li lanawoka, senenggom sogoumaʾ nauba doroganamla.

⁸Ban nidyaʾ ara unuwanalabok, nera men eininaʾ dibaʾ, gela me bomnaʾ ak me juga gweklamla sok ak, unub einiwanamla.”

⁹”Anasa ugunuk dara, henga gouboka malya nenewoka dibaʾ obsinokaʾ aboka yok nim ek eleganesak. Ugunda nadya yuba donaʾ nim uboka nasamba ululumaʾ anasa, nidyaʾ soko nim edya ugunuk lek senewanesak.

¹⁰Dara ban salek era, nimi nauba yuba domeija bok dib senenaʾ ara dengaboka, waboka malya nenebdangoka obnelum aboka yuba dibdangdo yibinemak.

¹¹Nimi nauba sondaʾ anasa, nunda Imik Neyung adya ununumnaʾ len nang wenyabdangoka lanawanamaakanya, yok nim ek nauba malya nenewanamak.

¹²Malya unaʾ nauba danggiga balamlyaʾ adya, mok soko me oboka lelewanamlaʾ adya, nimi nauba ara wanaʾ uldan ganya era heibnamla.

¹³Bok ban unulamlyaʾ anaba sidyaʾ unuru daknamla sum eneba, ganya siklewoka ululenya benyek blebnamla.

¹⁴Dara, Imik Neyung adya wenelemnesilaʾ perob lero yanggan yub era, yok-yok mok soko nimi nidyaʾ kebnokaʾ aboka, sokok me nidyaʾ men leb elegeijebok, wera sidyaʾ dagalongnaʾ ara, eimik daknamla,” hyok.

¹⁵”Ugunda nimi ununumnaʾ lelemoknya Daniel bedya lemok sok, Malya nenelesil malya unaʾ era geisa perobaʾ ak seklamla eibmun dara, (Ugunda damok ara hekaʾ ak lebok ara pe seiniwoka ella danalum!)

¹⁶ban salek era, nimi Yudea moka ulumeija nim era mok soko meinik sam bik-bik al balanok.

¹⁷Nim eremaʾ dubuk sam ulumeija nim era, e lomok sam bonaʾ beiyimeijaʾ dobnobaʾ aboka weknaʾ mem.

¹⁸Nimi wak sam wa welemeija nim era, akleng arobaʾ beiyimeijaʾ dobnobaʾ aboka ek sam saaboka yangganaʾ mem.

¹⁹Ban unuwanamla salek enera, gelewa me anam bomeija nim eb, me anam mouma dinilemeija nim eb dara, sikda hyak okna danamla!

²⁰Ugunda moka denewanamla sum gom, Sabat mem sum gom, enyek banera lanawalyek anasa, ugunda heng uboka mololdalalulum.

²¹Ban yokaʾ-yokaʾ unuwanamlaʾ okna danamla sum era, hyak yokaʾ-yokaʾ nauba danasilaʾ damoka lanawanamlaʾ ara, soko uyimok salek ebaʾ ara wen hnon lananaʾ oroknya nek lanawanamla. Dara onoʾ eimik era, nenesonya nera hnon sounuwoka lanawanggunumla.

²²Imik Neyung ara unun salek enyek burumaʾ gebnaʾ orok dara, nimi ben hnon anaba gobdo blebnenggunumso. Bok Imik Neyung ara, alja nim emba leboka unuwanamna senemok salek era mekaʾ burumaʾ gebnamla.”

²³”Ban salek enyek, nimi ben hnonja ugunuk lebneladya, Nimi blebsinaʾ dubnya bera anyagan ulumlaʾ anyek kemel yoululum gom, Alda anyagono ulumla henesak dara, ugunda wenyhenesak nim ek ara, sikenek dib senenaʾ ara mem.

²⁴Dara eimik era, sondaʾ nimi blebsinaʾ dub nang eb, sondaʾ ununumnaʾ len nang eb nauba lanawanamak. Sikda nimi nauba malya nenewoka sondaʾ lebnobaʾ aboka, yokaʾ-yokaʾ senenggom beknaʾ eb, hyak lok soʾ ab, hogung ak laga nauba unura yibinemakaʾ adya, Imik Neyung ara hnon or senewanamso dara, nim Imik Neyung mab anaba sikenek dib senewanasiseng.

²⁵Ban yokaʾ-yokaʾ nidyaʾ ara lanan salek era anam bok, nara ugunuk men wenyhesinaʾ anyek, ugunda keblumaʾ anasa, pe ulululum.

²⁶Anasa nim adya ugunuk, Nimi blebsinaʾ dubnya bera wera hwalek sam ono ulumlaʾ bar kemel bululum henesak dara, ugunda dib senewoka kemel banaʾ ara mem. Gom, sikja ugunuk, Alda ban e lomok an ulumla henesakaʾ anaba, ugunda dib senenaʾ ara mem.

²⁷Dara, nimi dibaʾ me yanamlaʾ ara, ebnaʾ ak yali sam ab langam aboka kemban sam yebel yabalamlaʾ anasoʾ ak ubnamla.

²⁸Blol mana ulumna digum ara, nimi beʾ dakna wining, sam wining era, anyagan ourulumak,” hyok.

²⁹”Dara yokaʾ-yokaʾ nidyaʾ igin kwesinaʾ ara, seleb unubgogowanamla dara, eimik nong ara, Henga ara gunaʾ danamlakanya, walaʾ ara dilinaʾ yebnenggunumla. Guraʾ ara imik ab uboka sokok sam daka yingginimlakanya, imik sam ulumlaʾ migiba yakaʾ nidyaʾ ara dolubdangoka malya nenewanamla.

³⁰Ban unubgogowalyek ab danyek, nimi dibaʾ me yanggan beknaʾ era imik laga danamla. Wera ban sum enyek, nimi nidyaʾ sokok an ulumaknya nera, nauba engewanamak. Sikda nidyaʾ nimi dibaʾ me nera imik sam debaʾ ak senenggomaʾ anyek alja migib gebman ab yanggalyaʾ ak eibnemak.

³¹Dara nimi dibaʾ me nedya alja lero bedya poo anaʾ benggong yuba edya senenggomaʾ lebnamla dara, nim Imik Neyung mab ulumak nim era, im gokgoba nidyaʾ eboka bob mamaganalum aboka oruganesil,” hyok.

³²”Ugunda ara gal ek ab ban sununaʾ hnon ella danalum. Gal era hmoka siliwoka ul yaban dara, ugunja dara, wera doub salek oka danamla senelelum.

³³Anasonya neikek, yokaʾ-yokaʾ unuwanamlaʾ anyek eibnelum dara, wera nimi dibaʾ me yanggan salek era, seleb yenewal senewoka ella danalum.

³⁴Ban wen an likoka ulumak nim enera, nidyaʾ anam dengaboka somoganggumeija bok, unuwanamlaʾ nidyaʾ ara lanawanamlaʾ anyek, an wenyhenaʾ anyek, ugunda ella ulumnalum!

³⁵Anya, im ab soko ab dara, dengaro lobnalabok, nadya yub ek dara, dengaro lobnenggunumla,” hyok.

³⁶”Hek sum ek, hek jam ek Yesus yanggan sum era, imik heikek ulumak lero nang eneba elgom, Imik Neyung bedya me neneba elgom, alda Imik Neyung ok hnonok albeyokaʾ ella ulumla.

³⁷Nimi dibaʾ me yanggan sum mok soko hogung ara, Nuh be ulumok salek nimi nidyaʾ ulumekaʾ anaso ubnamla.

³⁸Nimi nidyaʾ meka si denggusuk salek era, nimi nidyaʾ meka dero gwanenga dero gela dobdangdo balamek. Unubdibigemekaʾ moruwoka, Nuh bera mek ekla bunaʾ ak wekok.

³⁹Dara nimi nidyaʾ ara, salyaʾ ulumek bok, meka si del yabasukaʾ nong ak eiyiboka, wera mek si del yabasil senewoka ella dek sok, anasonya neikek nimi dibaʾ me yanggan sum era anaso unuwanamla.

⁴⁰Ban sum era, nimi penya nang neikaʾ ak wa welerija dara, ben hnonda doboka, ben hnonda lobnamla.

⁴¹Onoʾ gelewa penya neikaʾ ak gandum soldererija dara, gela hnonda doboka, gela hnonda lobnamla.

⁴²Wenelesilnya be yanggan sum era, ugunda elgom ululumaʾ anasa, hyak pe keeboka diri ulululum.

⁴³Nimi ben hnon e damnya bedya, hokaʾ donaʾ nim era, ban salek enyek, nadya bonaʾ hokaʾ dol yanamak senewoka, welemnamso dara, bonaʾ dobnenggunusengaʾ anyek, ugunda ella dangoka beklemnelum.

⁴⁴Dara ugumbabya neikek, nimi dibaʾ me yanggan salek era, ugunda ban salek yanamlaʾ ara elgom anasa, ugunda pe keeboka diri ulululum,” hyok.

⁴⁵Dara Yesus ara onoʾ hnon lebokaʾ ara, ”Wera anaso dara, wa arawoka wenya bera, heknyek geremseng uboka pe bojam ulumnamla do? Anedya perob sum dalya dara, wa damnya bedya nim ek denaʾ deb elegosululaʾ aboka, dubnya bera anasonya bek sekiyiwanamla.

⁴⁶Dara, aljaʾ neyung be yanamla sum, ban wa oruga bililenya bera, wa pe welemlyaʾ anasa, dubnya bedya eiblya dara, wa welelenya bera perobaʾ dolul.

⁴⁷Wera anyek eiyiboka, wa damnya bedya dara, bojam uboka wa welelenya bek ara, alja yok-yok bonaʾ nidyaʾ bo ublulaʾ aboka benyek an eleganemlaʾ anyek, ugunda beklemnelum.

⁴⁸Bok wa wenya bera, yu hwam ok uboka, aljaʾ ganya lomok ab lebnesodya,

⁴⁹Maly, nadya neyung bera eimik ek yanamlaʾ anyaʾ, aboka, wa wen nang yok nang ek salyaʾ obyaboka, yu meka deregoka ganya uu alasil nim eb denaʾ neikaʾ deregoka ulumnemak dara,

⁵⁰wene salek, alja neyung ban salek enyek yanamlaʾ senewanggumlya salek enyek, yanamla.

⁵¹Yanamlakanya, wera ban malya uboka wa welelenya bera, malya uboka saboka obnamlakanya, sene bol nenenaʾ hwam nim hnoum boboganamla. Dara, malya unaʾ nim eb neikaʾ engewoka si glengdarreb aboka nauba gweklemnemak,” aboka Yesus adya wenyhusuk.