Read Nalca MATIUS 25 Bible Online

MATIUS 25 - Nalca bible

MATIUS 25

¹”Imik Neyung wenesin heikek weknaʾ ara, mok soko hogung ara ban sununaʾ eneso ubnamlaʾ ara, nimi gobenya gelewa sagobadya, nenya dobnenggumek nim, wesaʾ diniwoka boboka gela dobnamoknya yanggalyaʾ ak pika dibnemab aboka bilimek.

²Ban gelewa gong danara, gelewa lambadya dara, geremseng bok, onoʾ yok lambadya dara, dongdang anaʾ gelewa.

³Lambadya dongdang anaʾ gelewa dara, uka wesaʾ ara bomek bok, uk mek ara bobnenggumek.

⁴Bok yok lambadya geremseng gelewa dara, uka wesaʾ bomeekanya, uk mek anaba bomek.

⁵Uka wesaʾ diniwoka bo diri ulumek bok, gela dobnamoknya bera mandewoka, men yangganaʾ orok adya, gelewa dara hogung ok uboka dibaʾ mabek.”

⁶”Dara, inimnek dukdukanek hnoum yuba kelemek enyek, neyung bera wera yanggal. Alak pika dil bululum al yabekaʾ ak kebek.

⁷Wenyan yuba keboka, gelewa dara, sikja wesaʾ beiyimekaʾ ara diniwek.

⁸Bok dongdang anaʾ so gelewa dara, geremseng gelewa ek lebekja, Nunja uk era saranggousununaʾ ul yabalaʾ anasa, ugunja uk mek enyek, nuk hnon elegosululum, aboka molowek.

⁹Bok geremseng gelewa edya dongdang anaʾ gelewa ek ara, Ousa era nunjinya nidyaʾ denghesilyek anasa, ugunuk eleganggunusab, orok! Alda ugumba deknaʾ ak eboka yok dekel bululum! hyek.”

¹⁰”Wera dongdang anaʾ so gelewa dara, deknaʾ ak sam eboka anam dekel balamek salek, gela dobnamoknya bera seleb yok. Dara geremseng gelewa orowek wesaʾ diniwoka diri ulumekaʾ ara, bera yanggok dara, neikaʾ benyeb ablaboka ek wekoka pik ara hyak gasaʾ seregok.”

¹¹”Wene salek era, dongdang anaʾ gelewa dara yek. Dara pik ara, seleb gasaʾ seregokaʾ anasa leboka, gelewa danadya, Neyung o, neyung o, pika nunsamba baksiya, aboka lelemek.

¹²Bok gela seleb do wekemoknya bedya gelewa enyek an lebokja, Ugunda nara elgom ulusin nim ek yalalum!” husuk.

¹³Anasa, Yesus ara wenyaboka sununaʾ en lebdakokaʾ ara, ”Dara, Imik Neyung yanggan sum era, heksum, hek jam ek yanamlaʾ ara elgom ululumaʾ anasa, sobaʾ pe diri ulululum,” hyok.

¹⁴”Nimi dibaʾ me yanggan sum era, mok soko hogung ara, ban sununaʾ eneso ubnamla. Nimi ben hnon binimookanya, alja bonaʾ unuruwaʾ beiyi balamokaʾ ara, alja wa wen nang ek yoululum hyookanya, sikenek kemero bo ulumnelum aboka lebgogowok dara, alda mok byuk.

¹⁵Dara, wa wen nang ek ara, sikja migib uboka webnesengaʾ sunuwoka wa elegosuk. Nimi ben hnon rupiah lambadya anaso bo ulumnenelem aboka lebok. Onoʾ penenya bek ara, alda penyaʾ rupiah bo ulumnenelem aboka lebok. Onoʾ ben hnonda hnonok rupiah anaso bo ulumnenelem aboka lebok. Wenyabgogowoka, rupiah damnya bera alda yokok sam byuk.

¹⁶Wera lambadya rupiah lemoknya bedya dara, alda biniboka, onoʾ yok lambadya rupiah dek sounuwoka dobok.

¹⁷Dara onoʾ penenya rupiah doboknya beneba, neik so sounuwoka onoʾ yok penya rupiah dobok.

¹⁸Bok ban hnonok rupiah domoknya bera, aljaʾ neyung bedya rupiah era, soko lokoka lomok doronggoka doknomok.”

¹⁹”Unumek salek era, eimik mande-mande aba balamok dara, sikja neyung wa damnya bera yeiniboka, alja wa wen nang eb neikaʾ huru welemak do senewoka einib einiwok.

²⁰Dara lambadya rupiah domoknya bedya yeiniboka, Neyung o, anja dara, lambadya rupiah ok elegenulum bok, nadya dara, onoʾ sounuwoka lambadyaʾ rupiah dob maksa, hyok.

²¹Dara wa damnya bera, an unumoknya wa pe bojam welemoknya bek an lebokaʾ ara, Anda hyak pewolum! Anda meknya neneba pe bojam welelamaʾ anasa, wera naubenya neneba or anak welemnelam aboka lebnenggen. Anya, nadyaʾ ek sam yamenekanya, nab neikaʾ denaʾ pe dero ulumnenam! hyok.”

²²”Dara onoʾ penenyaʾ rupiah elegemoknya ben yeiniboka, Neyung o, anja dara, nak ara rupiah penya ok elegonulum bok, nadya wera onoʾ penya dob sounuwasaʾ anyek, kendelom, hyok.

²³Dara wa damnya bedya benyek an, Anda hyak pewolum. Anda nadya wa pe bojam uboka wenya bek ululam. Anda meknya nek bojam welelamaʾ anasa, wera nadya anak senenggomnya nek welemnelam aboka lebnenggen. Anya, nadyaʾ ek sam yamenekanya, nab neikaʾ denaʾ pe dero ulumnenam! hyok.

²⁴Dara sidyaʾ nong ara, rupiah hnonok dema domoknya bedya yeiniboka lebokaʾ ara, Neyung o, anda hyak gasenya bek ululamaʾ ara ella ulunggen. Neyung, nadya anak eillilenggen dara, anja yokaʾ doka doknenggumna ak ab doka daklelamaʾ hnon, anja yokaʾ weboka mebnenggumnaʾ ak ab nonga dololamaʾ ak hnon eillilamna.

²⁵Anasamba leboka, nara lok anasa, anja rupiah era soko lomok sam doknel bisekanya, wera an bo yan anasa dobnelam, wenyaboka elegok.

²⁶Dara rupiah en damnya bedya rupiah doknomoknya bek an lebokaʾ ara, Anda hyak sulmalyaʾ hwam uboka, yu nongnya bek ululam! Anda nak ara, nadya yinaʾ doknenggumnaʾ ak ab daklamnaʾ hnon, hnonda nadya yokaʾ weboka, mebnenggumnaʾ ak ab nong dolomnaʾ ak okoka eillilenelem de?

²⁷Wera anda nak benesonya benyaʾ senenesom dara, nadya rupiah era, rupiah beilin ek sam beiyinesom dara, maknanya neb beiyinesengaʾ anyek dobnasinya.

²⁸Anasa wera benedyinya nera nidyaʾ alak an ululanya nera dobmunukanya, sagobadya rupiah ululanya bek an elek maklulum.

²⁹Anasa, yokaʾ-yokaʾ seleb yak ulumlya nim era, nauba sounuwoka eleganamlaʾ adya, nauba dangoka ulumnamla. Bok yokaʾ-yokaʾ orowek mekaʾ me ulumlya nim era, sikenek an ululenya nera dobnamla.

³⁰Anya ban meilinya bera gunaʾ ak sam doboka bobogolulum. Dara an unu boboganamlaʾ ak ara, nauba engewoka si glengdarreb aboka gweklemnamla! wenyamok,” hyok.

³¹”Nimi dibaʾ me alja nong senedyaʾ gebman yanggalya sum era, alja lero nanga nidyaʾ ara akneb ganagoka yanamlakanya, aljaʾ perob ekla bunaʾ ak sam dubnya senenggomnya geknebaʾ dangoka bulumnamla.

³²Dara yok-yok soko nimi nidyaʾ ara, al dam mamagal binimak. Dara alja, nim edya kambing domba pam ak boklemak sok unuwoka boknesil.

³³Wera domba pama nidyaʾ ara, sirikek sam bo mamaganamlakanya, kambing pam era waneng ek sam bob mamaganamla.

³⁴Dara dubnya bedya sirik ek sam nim ek lebnamlaʾ ara, Nadya neyung bedya perobaʾ nenewousuk nim ek anasa, youlululum. Ban soko en uyiwanggom salek enyek, ugunsamba orowek leboka beibsuk heik enyegan or weklulum.

³⁵Nara gwaneng ok unyok dara, ugunja denaʾ elegenulum. Nara mek ok ubnyok sum era, mek elegenulum. Nara sekel yangganya ulumsa sum era, ugunja perobaʾ leboka nak ugunja ek sam doro diyinulum.

³⁶Nara ongon aklenga garan ulumsa sum era, akleng elegenulum. Nara neiklamsa sum era, ugunja kemel yeiniboka ulunulum. Nara henga geregoka gasa ek sam beiyinyek dara, ugunja kemel biniboka aralanulum, wenyaboka lebnamla.”

³⁷”Wenyek pe ulumak nim edya dubnya bek lebnemakaʾ ara, Wenelesilimnya o, hek sum ek anda gwaneng ok unjok enyek, nunja eiyiboka denaʾ elegenjuba, goma, mek ok unjokaʾ enyek eiyiboka den meka elegenjuba do?

³⁸Hek sum ek Wenelesilimnya anda sekel yangganya ululumaʾ ak eiyiboka, ek sam doro diyinjuba do? Onoʾ hek sum ek Wenelesilimnya anda ongon aklenga garan ululumaʾ ak eiyiboka, ongon akleng elegenjuba do?

³⁹Hek sum ek Wenelesilimnya anda neiknaʾ salanjok gom, gasa ek sam henga geregoka beiyinjekaʾ ak eiyiboka, aranjuba do, wenyhenemak.

⁴⁰Bok, Wenelesilnya bedya sikenek lebnamlaʾ ara, Ugunda ban nidyaʾ ara, ugunja nimi malya nim ek, sikda nadyaʾ hemyab ek, unusulum dara, wera nera nasamba unululumaʾ, anasa lebna, henesil.”

⁴¹”Dara onoʾ alja waneng ek sam nim ek lebnamlaʾ ara, Ugunda hyak malya unaʾ hwam nim o, anyaganyebaʾ ara men bindowoululum! Hyak mekaʾ sarangganggunumla uk ek sam, Iblis ab alja lero nang emba aboka orowek beibuk ak bululum!

⁴²Nara gwaneng ok unyok sum era, ugunja nak denaʾ eleganggunulum. Onoʾ nara mek ok ubnyok sum era, mek eleganggunulumaʾ anasa, or uk ek sam binilum.

⁴³Nara sekel yangganya ulumsa sum era, ugunjaʾ ek sam doro dibnenggunulum. Nara ongon aklenga garan umsa salek era, ongon akleng ongowalom aboka eleganggunulum. Nara henga geregenyek suma hnon, neiknaʾ salanyok sum eneba, nak keeboka unggulunulum, wenyhenesil.”

⁴⁴”Dara ban malya unaʾ nim edya Wenelesilnya bek, Wenelesilimnya o, anda hek sum ek gwaneng ok, mek ok unjok do? Goma, sekel yangganya dangoka ululum gom, ongon aklenga orokaʾ ululum gom, neiknaʾ salanjok gom, henga geregoka gasa ek beiyinjekaʾ ara, hek sum ek eiyinjuba do?

⁴⁵Wenyhenemak enyek, dubnya bedya sikenek lebnamlaʾ ara, Ugunuk dib lebsin, Ugunda ban unu hyak bonaʾ garan nim ek aranggululumaʾ ara, wera nera nak aranggululumaʾ ara an, wenyhenesil.

⁴⁶Dara ban malya unulumek nim era, sobaʾ oka deregoka gweknaʾ ulmoubnaʾ heik ak weknamak bok, alda Imik Neyung ak pelemak nim era, embengaʾ ulmoublemnemak heikek wekel binimak,” aboka Yesus adya wenyhusuk.