Read Nalca MATIUS 27 Bible Online

MATIUS 27 - Nalca bible

MATIUS 27

¹Hyak lugunaʾ nonga gwelegel yabok dara, nidyaʾ Imik Neyung yuba wa gakaʾ dub nang eb, Yahudi soko dub nang eb dara, Yesus oboka dibnemab aboka seleb yuba sabdakoka garawek.

²Wera sikda Yesus ak gel heng adya goubeekanya, Roma nim dubnya Pilatus bek bo elegel byik.

³Wera Yesus amba yuba dil bilimoknya Yudas bera, Yesus ara seleb oboka dibnemak an yuba kebok dara, alda angoo salya ubsa senewok. Dara yuba dil bilimokaʾ amba aboka perak rupiah dengaʾ hnonok elegemekaʾ ara, Imik Neyung yuba wa gakaʾ dub nang eb, Yahudi soko dub nang ek sik dam nang lolonggol busuk.

⁴Dara Yudas bera, ”Nara malya unaʾ oroknya bek salyaʾ oblulum aboka yuba dibsaʾ ak, nara malya ubsa,” hyok. Bok sikda alak lebekja, ”Nera nunja de? Amba anjinya!” hyek.

⁵Anasa Yudas bera dengnaʾ domok rupiah era Imik Neyung e lomok sam salyaʾ bobok loboka, byuukanya, al nong ara henga ngangak geregoka galek elekdok.

⁶Dara, Imik Neyung yuba wa gakaʾ dub nang edya, ban rupiah era sik dam nang dobeekanya, lebnemekaʾ ara, ”Ban rupiah enera nim olumnaʾ rupiah. Nunja yub ek sam lelemlaʾ ara, Imik Neyung ek sam ara nenesonya nera beilinaʾ mem hyok,” hyek.

⁷Wenhyek dara, rupiah era, solowaka unuruwaʾ memen damba si silimak soko ek dekek. Dara, ”Ban soko era sekel yanggan nang ek somogan enyek soko lokna danasa lebab,” hyek.

⁸Ban unumekaʾ amba leboka, ban soko era wenebabya, ”Eneng deknaʾ soko,” alamak.

⁹Ban unuweknya nera, youmaʾ ununumnaʾ lelemoknya Yeremia bedya lebokja, ”Israeli nim edya alsamba aboka perak rupiah denga hnonok domek.

¹⁰Wenelesilnya bedya nak orugenyok sok sunuwoka, sikja ban rupiah enedya hein soko dekemek,” amoknya nera an gigiwok.

¹¹Wera Yesus ara bo balamekaʾ ara, Yudea mok soko dubnya Pilatus bek bo byik. Dara, Pilatus bedya Yesus ak, ”Anak Yahudi nang dubnya ululam de?” wenyaboka heibok. Wenyek Yesus ara, ”Alan anja seleb lelam an,” hyok.

¹²Bok Imik Neyung yuba wa gakaʾ dub nang eb, Yahudi sokok dub nang eb dadya, Yesus ak yok-yok damoka yana kiboka lelemek dara, alda yuba hnon mekaʾ doro sabnenggumok.

¹³Wera anasa, Pilatus bera Yesus ak, ”Anda yokaʾ-yokaʾ ara anak sam yana kilinjakaʾ ara eiyilam gom?” wenyaboka lebok.

¹⁴Bok Yesus ara yuba hyak mekaʾ doro sabnenggubuk enyek, Pilatus bedya dara seilinya senewok.

¹⁵Wera Israeli nim edya, hnon perob sum oka dan dara, gibnaʾ gigiro mok soko dubnya bera, nim adya lebnaʾ sunuwoka, henga geregamna nim era hnon henga lob lomok.

¹⁶Anasa ban salek era, nimi ben hnon alja si nera Barabas, alja ununaʾ edya nimi nidyaʾ ella ulumeknya bek, henga geregoka beiyimek.

¹⁷Wera anasa, nimi longowek dara, Pilatus bedya sikenek, ”Ugunja dara, heknyek nunsamba henga lob lobsulul senelum do? Barabas bek lob lobnesin gom, Yesus, Kristus alamaknya benyek lob lobnesin gom?” wenyaboka heibsuk.

¹⁸Pilatus bedya, ban wenyaboka leboknya nera, Yahudi dub nang edya Yesus ara sikja hman ganya boboka alak oboka dibnemab aboka doboka elegemekaʾ anasa, ella umokaʾ adya lebok.

¹⁹Wera Pilatus bera nimi yana lelesin ek anam bulumok salek, alja gel gedya momnya donaʾ beibukaʾ ara, ”Nara alsamba hnon omom so lendara enyek manabok anasa, anda malya unaʾ oroknya bemba yub enyek, neikaʾ denewoka sanaʾ ara mem loblom,” hyok.

²⁰Bok Imik Neyung yuba wa gakaʾ dub nang eb, Yahudi soko dub nang eb dadya, yok nim ek dukaʾ lolowoka, Barabas bek dara nunsamba henga lob lobnesilem, alda Yesus ak dara, dibaʾ oboka gal ak glabnemak henelum aboka yeiriwoka lelemek.

²¹Anasa, mok soko dubnya Pilatus bera sikenek, ”Ban penya nang danara, ugunja dara, heknyek nunsamba henga lob lobnesil senelum do?” wenyaboka heibsuk. Wenyek sikda, ”Barabas benyek nunsamba henga lob lobsilom,” hyek.

²²Dara onoʾ Pilatus bera, ”Wera Yesus, Kristus alamaknya bera, nadya dara, hekaʾ hubnamna do?” wenyaboka heibsuk. Anasa sikda, ”Alak dara, oboka gal ak glabnok,” hyek.

²³”Bok alak okoka oboka dibneseng malya unaʾ era hekaʾ ak ubok do?” wenyaboka lebok. Bok sikda hyak yeiriwoka, ”Alda oboka gal ak glabnok!” wenyaboka lelemek.

²⁴Anedya Pilatus bera albeyok dookanya, yok nim era nauba adya, mem aboka yuba seknamen danggubuk. Anasa alda nimi hnoum laga meka doboka, alja soruka meka elekdangoka lebokaʾ ara, ”Ban somoganamlaʾ ara nadya huka bobnenggunumna! Nera ugunja huka borowolum!” hyok.

²⁵Dara nimi nidyaʾ anyagan wekemek nim edya, ”Yo, Yesus somoganamlaʾ ara, nun an wen umab nim eb, nunja mab eimik liknemak nim eb dadya, huka bobab!” hyek.

²⁶Dara Pilatus bera, Barabas bera henga lob lobookanya, nimi nauba wekemekaʾ ak Yesus ara saboka ololulum aboka orugookanya, oboka gal ak glabnelum aboka doboka elegosuk.

²⁷Dara yin bonaʾ nang edya Yesus ara doboka, mok soko amba yuba san e senenggom e eremek bo yek dara, yok yin bonaʾ nang nidyaʾ hiboka Yesus ak akneb ganagoka longowek.

²⁸Dara sikda Yesus adya akleng era gwiriwoka, mouk dok bokaʾ akleng ongiyiwek.

²⁹Anya si heng adya Yesus adyaʾ huk ak gweboka gwaragiyiwek. Dara onoʾ gamaʾ dungunaʾ adya, Yesus adyaʾ sirik soruk ak sam beiyiboka, aljaʾ saramek sam kom lumugoka derewoka walamek. Anya lelemekja, ”Yahudi nim dubnya o, perob aboka gibjab!” aboka sene wenyalamek.

³⁰Dara Yesus ak gamalaʾ solob goluwoka, ikimek gamaʾ edya wisa golowom-golowom aro olomek.

³¹Anya Yesus ak hyak nauba malya geboka saboka obgogowek dara, mouk dok akleng ongiyimekaʾ ara gwiriwoka, onoʾ alja akleng yokaʾ ongiyiwek. Dara oboka glabnobaʾ aboka bo byik.

³²Dara Yesus oboka dibnobaʾ bo bek salek, Kirene mok ebnya alja si Simon bek eibek. Dara sikda benyek an dukaʾ lolom-lolom aboka, Yesus adya oboka glabnemek gal era, alak boblom aboka boyiwek.

³³Dara bo balameknya nera, mok soko si Golgota meinik sam, nunja yub edya dara, ”Nimi huk yanggol meinik,” alamek meinik sam bo byik.

³⁴Dara anyagan era, linggum mek adya powegemek mek enyek, Yesus ak delom aboka sik diniyiwek. Bok alda debyaawoka lobok.

³⁵Nen seleb dara, oboka glameekanya, yina bomdewoka, alja boksom dobnobaʾ aboka yina akleng bomdewek.

³⁶Unubgogowoka, yin bonaʾ nang era Yesus adya beʾ dakoka dobijek aboka diri ulumek.

³⁷Dara Yesus oboka glamek gal dubuk alja huk dameijek ara, sikja sondaʾ amba yana kiboka omek mininaʾ yuba, ”Yahudi nim dubnya Yesus ara an e,” an momnya donaʾ enyek weboka elegemek.

³⁸Dara onoʾ Yesus ab nimi hokaʾ donaʾ nanga penya neikaʾ, ben hnonda sirikek sam, ben hnonda waneng ek sam, oboka glabsik.

³⁹Dara Yesus oboka gal ak glamekaʾ pik an yaban nim edya dara, nganga gwakdewoka, Yesus ak derewoka walamek.

⁴⁰Sikja wenyalamekaʾ ara, ”Imik Neyung e golowoka beibnyekanya, nadya dara, lika winilya ok sobnamna alalamnya benyaʾ! Anya, anda aldib Imik Neyung me ulumen dara, wera oboka glanjakaʾ al ab, buru beiya yinggimenekanya, saaboka blebdalom!” wenyaboka walamek.

⁴¹Anasonya neneba, Imik Neyung yuba wa gakaʾ dub nang eb, yuba neksin nang eb, Yahudi dub nang eb dadyaʾ anaba, alak wenyaboka walamekaʾ ara,

⁴²”Nimi yok nim ek dara, merellilisil bok anasa, wera al damnya saaboka blebdamenggom! Alda aldib Israeli nim dubnya ululyebok dara, wera oboka glamak galak ab mereboka yinggilya enyek, nunda alak dib senewanamab.

⁴³Alda Imik Neyung dib senelamlakanya, nara Imik Neyung bedya me aldalamla. Wera anasa, Imik Neyung alja senemlyaʾ dara, laga blebel yabalyaʾ ak eibnob,” wenyaboka derelemek.

⁴⁴Hnonda Yesus ab neikaʾ oboka glasik nang edyaʾ anaba, neik so unu derewoka walarek.

⁴⁵Dara hyak yubyek dukdukanek nong enyek, mok soko nidyaʾ ara iniwoka gunaʾ ok dok.

⁴⁶Dara onoʾ sin dangoka henga wekel bununaʾ aboka dalaloblamla wenyek, Yesus ara yuba nauba bii aboka, ”Eli, Eli, lama sabakhtani?” Nunja yub era, ”Nadyaʾ Imik Neyung o, nadyaʾ Imik Neyung o, hekasa nak gwab lobnelem do?” aboka bii alamok.

⁴⁷Wenyek nimi wene nim anyagan seklemek nim era, unu gwekel yabokaʾ ak kebek nim edya dara, ”Alda Elia bek youblamla!” wenyabdek.

⁴⁸Onoʾ nimi ben hnon sik gangganek ab, berra aboka esaʾ anyek yu mekek sam hwiboka bo yookanya, gal benggenaʾ ak lomowoka Yesus adyaʾ sibamaʾ ak diniyiwok.

⁴⁹Bok yok nang edya danyek, ”Nera men ununggom, Elia bedya yeiniboka blebel yabelyaʾ anyek, eibnemab bar!” hyek.

⁵⁰Dara onoʾ Yesus ara hyak nauba ebngalogoka ngeboka ganya dibaʾ dubhina dakoka somogok.

⁵¹Ban salek era, Imik Neyung ek sam wiknelemek boksom akleng perobaʾ ara, imik abaʾ ara sokok gweldek dakok. Anya senenggom sougumaʾ dorogoka, girika nidyaʾ ara salyaʾ joboka lekdo yibuk.

⁵²Hnonda nimi somogomekaʾ, seleb soko lokomek nim beʾ nidyaʾ ara, pika bakdo yibuukanya, nim Imik Neyung geisa mabo bok somogomek nimi nauba era embengaʾ suboka bura yibek.

⁵³Wera Yesus ara seleb somogoka embengaʾ suboka bukok dara, ban nim Imik Neyung mab ulumek bok men somogomek nim era, sikba embengaʾ suboka Yerusalem geisa heikek wekel yalamekaʾ ak, nimi nauba eibik.

⁵⁴Dara yin bonaʾ nang dubnya beb, alja mab eb dara, sogoumaʾ warawokaʾ nidyaʾ unuru yibokaʾ ak eibek dara, hyak loka dabsuk. Anasa yin bonaʾ dubnya bedya, ”Aldib ban benera Imik Neyung bedya me ulumo e!” hyok.

⁵⁵Wera neikek ara, gelewa nauba mok so ab uboka Yesus ak kemero seklemek. Ban gelewa danara, hnonda Yesus ak Galilea mok ebaʾ ara arawoka neikaʾ yabalamek gelewa.

⁵⁶Gelewa dara, Maria Magdalena ge hnon, Yakobus beb Yusuf beb sikjaʾ genong Maria ge hnon, Zebedeus bedya mabo sikjaʾ genong geb, gelewa danyek seklemek.

⁵⁷Iniwonunaʾ aboka gunaʾ dakal yabok salek era, Yusuf be Arematea moka perobnya bera mok enyek an yeilimok. Albabya Yesus ak diriga bannya ulumoknya.

⁵⁸Dara alda Pilatus bek biniboka, Yesus adya beʾ dakoka dibnamna aboka molowok. Dara Pilatus bera, Yesus adyaʾ beʾ era, ”Benedya or dakoka dibnamla,” hyok.

⁵⁹Dara Yusuf bera, Yesus adya beʾ era dakoka, wenyek nekesa geisa boksom akleng edya nong ara wamiyiwok.

⁶⁰Anya Yusuf bera, alja orowek hoklomok girik lomok meinik sam doronggok. An unu doronggoka, senenggom girik edya pik ara gasa dangawoka serek loboka byuk.

⁶¹Bok Maria Magdalena geb, yok Maria geb dara, an dibokaʾ ak an mok so ab kemero bulurek.

⁶²Wera sek sum yeiniboka, ampum maboka gwelegok dara, Imik Neyung yuba wa gakaʾ dub nang eb Parisi nang eb dara, Pilatus bek biniboka,

⁶³lebekja, ”Neyung o, youmaʾ sondaʾ hwamnya bera anam embengaʾ ulumok salek era, hnon seleb wenyalamokaʾ ara, Liga winilya seleb mablye dara, embengaʾ suboka buknamna, alamok.

⁶⁴Anya, alja yuba doro diriga ban nang edya dobijekanya, sondaʾ anasa wera seleb embengaʾ suboka bukiyiwal hijek aboka, nimi yok nang ek lika winilya websiniwanalum aboka oruganesilim. Dara, youmaʾ sondaʾ lelemoknya nera, dolbalek so bok, eimik sondaʾ lebnesaknya nek dara, hyak okna deisilyek anasa,” aboka lebek.

⁶⁵Anasa Pilatus bera sikenek, ”Ugun dam nang or anyagan nimi yin bonaʾ nanga hnon boboka, hyak pero-pero keeboka welenokaʾ aboka meewoululum,” hyok.

⁶⁶Dara sikda Yesus diyimekaʾ ak sam biniboka, pika seregemek girik era gasa darawoka seregeekanya, Yesus beʾ nongok mekaʾ galanaʾ lobnokaʾ aboka, yin bonaʾ nanga weboka sekiyiwek.