Read Nalca MATIUS 3 Bible Online

MATIUS 3 - Nalca bible

MATIUS 3

¹Ban salek enyek, Yohanes Pembaptis ara Yudea sokok hwalek sam yeiniboka Imik Neyung yuba lelemok.

²Alja lelemokaʾ ara, ”Imik Neyung adya mek anam wenelemnesilaʾ ara oka yal bok anasa, ugunja malya unaʾ ak ab ganya dangawolulum,” alamok.

³Wera ban Yohanes enyek, nekoka Yesaya bedya ununumnaʾ dib lemokaʾ ara, ”Nimi ben hnon hwalek sam ab bii aboka, Wenelesilnya bemba ugunda pika yarawoka memelelulum, alsamba pika angawoka jaklelulum, aboka lelemla,” hyok.

⁴Yohanes bera alda unta pam honga akleng anyek ongolomok. Goukwa noronaʾ ara bokaʾ adya norolomok dara, denaʾ ara kweng ab bei lusa mek ab delemok.

⁵Nimi nauba Yerusalem heikek ab hnon, Yudea moka nidyaʾ nimi hnon, Yordan meka gemek sam soboka ulumek nimi nidyaʾ ok berem mok nim era, Yohanes bek yalamek.

⁶Anya, sikja malya unaʾ eib kweboka laga lelemek dara, Yohanes bedya Yordan mek ek dalasuk.

⁷Parisi nim eb, Saduki nim eb, nimi Yohanes bek meka dabsululaʾ aboka yalamek. Bok Yohanes bedya kemelemok enyek, nang enyek yekaʾ ak eibuk dara sikenek, ”Ugunda hyak malya unaʾ hwam nim ek ululum! Ugunuk ara heknedya Imik Neyung adya obnesilaʾ ak sam ab dara, blebdanalum asuk do?

⁸Ugunda malya unaʾ seleb eib kweboka ganya dangawoka lobek an beknaʾ enyek, wera laga gigiwoka ulululum.

⁹Ugunda Abraham bera nu nang yilaʾ ak anasa, nunda obnesilaʾ ak ab blebdanamab senenggom, mem. Ban girik danyeb danyek, Imik Neyung adya Abraham nimi yilaʾ nenewanamso anyek, ugunda bekoka seiniwanalum!

¹⁰Gal ara yarenga lelewoka weboka uka dabnamna senewoka orowek ya beibuk. Gala nidyaʾ perob doka mounggulumla gal era, weboka uk ak boboganamla,” hyok.

¹¹”Nak dara, malya unaʾ ak ab seleb ganya dangawak anaʾ dibaʾ amba, mek dem adya ok dalasin bok, nak berem eimik yanalanya bedya dara, alda ugunuk Imik Neyung Geisinya ab uk ab dadya, mek dibaʾ dabnesil. Nak dara or mek so bok, alak dara, hyak senenggomnya bek yanamla. Alja yan ongonaʾ anaba, nak dara doboka bobnenggunusinya.

¹²Alja gandum hamaʾ webnaʾ anasa aboka seb yaramdenaʾ ara alja soruk ok seleb ulumla. Gandum nong ak dara, denaʾ beilin ek mamagoka beibnamla bok, hamaʾ ak dara, hyak mekaʾ sarangnaʾ orok uk ek sam dabnamla,” hyok.

¹³Ban salek enyek, Yesus ara Galilea mok eb ara, Yordan mek inik sam bilimok. Wera anyek onob dara, Yesus ara Yohanes bek meka dabnenelem aboka molol yeilimok.

¹⁴Bok Yohanes bedya meka dabnenggununggen aboka Yesus ak, ”Nak danyek, neyung, anja meka dabnenesom. Bok wenyek dara, neyung anak nak an yalem!” hyok.

¹⁵Bok Yesus adya Yohanes bek ara, ”Nunja ban unulumab adya, Imik Neyung adya unuwanok senelamlaʾ ara an anasa, unulumab bok anasa, wera or meka dabnenelem,” hyok dara, Yohanes bedya Yesus ak meka dabok.

¹⁶Seleb meka dabok dara, Yesus ara mek lomok abaʾ ara goboka welok enyek, wene sab-sab im pika gaboka, Imik Neyung Geisinya ara, bek wining enesoʾ anyek alak bul yinggyuk ak eibuk.

¹⁷Anya imik sam ab yub adya Yesus anasa, ”Nadyaʾ wanaʾ me nera ban e, alja nadya ganya hekellilinel,” hyok.