Read Nalca MATIUS 4 Bible Online

MATIUS 4 - Nalca bible

MATIUS 4

¹Wera Yesus ara bisaʾ dubnya Iblis adya sunuwolulaʾ aboka, Imik Neyung Geisinya adya hwalek oblyek sam bo byuk.

²Yesus ara gwaneng bunya yubyek inimnek moruwoka, lika denga hnonok uboka ebdobnya mekbadya (empat puluh hari) mabmorumok. Dara alda gwaneng ok nong ubok.

³Dara Iblis adya Yesus ak yeiniboka, ”Anda Imik Neyung me ulumen dara, banyan girik danyek gwanenga nenewanelam,” hyok.

⁴Anasa Yesus adya dara, ”Imik Neyung yuba bukuk sam momnya dobokaʾ ara, Nim ara gwaneng adya ok embengaʾ unggulumak bok, alda nidyaʾ Imik Neyung adya lelemla yub edya hnon embengaʾ ulumak,” hyok.

⁵Seleb dara, onoʾ Iblis adya Yesus ak boboknya nera, Yerusalem geisa heikek, Imik Neyung gibnaʾ e eremaʾ dubuk sam bo beil byuk.

⁶Dara Iblis adya Yesus ak, ”Anda Imik Neyung me ulumen dara, wera sokok sam sakdo doblingdanalam. Ban nenesa Imik Neyung yuba bukuk sam momnya dobokaʾ ara, Anda girika oluka dikgelyek aboka dara, Imik Neyung ara beiliwagenokaʾ aboka alja lero nang oruganamla,” hyok.

⁷Yesus adya Iblis ak ara, ”Bok onoʾ Imik Neyung yuba bukuk sam anaba hnon momnya dobokaʾ ara, Anda anja Wenelenggelnya Imik Neyung bek sunulyamanaʾ ara mem, wenhyok,” hyok.

⁸Dara onoʾ Iblis adya Yesus ak eboka boboknya nera, senenggom mok soko meinik sam biniboka, yok-yok mok soko nidyaʾ ab, sikja yokaʾ-yokaʾ perobaʾ ulumlaʾ nidyaʾ ak aawonunaʾ aboka bo bilimok.

⁹Anya Iblis adya Yesus ak lebnemokaʾ ara, ”Anda nak oumuwoka gibnenemen dara, ban mok soko nidyaʾ ara anak leboka eleganenggen,” hyok.

¹⁰Yesus adya Iblis ak, ”Satan o, anda hyak bilom! Imik Neyung yuba bukuk sam momnya dobokaʾ ara, Anjaʾ Wenelenggelnya, Imik Neyung bek giblemenekanya, alak ok arawoka welelom! wenhyok,” hyok.

¹¹Anya wera, Iblis ara Yesus ak ara lo byuk dara, Yesus ara, lero nang gong edya yeiniboka alak aralemek.

¹²Yesus ara, Yohanes Pembaptis bera seleb henga geregoka gasa ek beibek an yuba kebok dara, alda Galilea moka byuk.

¹³Yesus ara Nazaret heikek ara loboka, alda Zebulon Naftali sokok sam Galilea mek gemek sam Kapernaum heikek bindiwoka ulumok.

¹⁴Yesus adya ban unumoknya nera youmaʾ ununumnaʾ lelemoknya Yesaya bedya lemokaʾ anyek gigiwolulaʾ aboka ubokaʾ ara,

¹⁵”Zebulon soko Naftali soko o! Yordan meka gemek sam senenggom gwan mek pik banaʾ ak sam, Yahudi gom nim ulumak sokok Galilea o!

¹⁶Gunaʾ lomok sam ulumak nim edya, perob dilinaʾ yeblaʾ ara eibak! Nimi somoklomakaʾ ak sokok sam ulumak nim era dilinaʾ welera seklaʾ ak eibak!” amoknya nenyek gigiwok.

¹⁷Wera ban sum enyek moruwoka, Yesus ara Imik Neyung yub ara lero lelemokja, ”Imik Neyung adya, wera wenewanasil salek oka dalaʾ anasa, ugunda malya unaʾ ak ab loboka ganya dangawolulum!” aro lelemok.

¹⁸Yesus ara Galilea meka gem pik dongora yabalamok dara, nimi penya hadyaʾ dolorek nang eibsuk. Wera nang dara, ben hnonda Simon (yok si nera Petrus) beb, alja weis Andreas beb eibsuk. Sik penya nang era hadyaʾ dolorek nang ulurek anasa, hadyaʾ oumaʾ aklenga mek ak doroklorekaʾ ak eibsuk.

¹⁹Dara Yesus adya sik penya nang ek, ”Nara ugunuk nimi donaʾ nang nenewanesin anasa, ugunda nak diriga yoururum,” aboka ebsuk.

²⁰Dara penya nang era, kerek sab-sab sikjaʾ hadyaʾ oumaʾ akleng era anyagan loboka, Yesus ak munaʾ gobdo diriga birik.

²¹Wera neik mek gem era, Yesus ara anam yabalemookanya, onoʾ yok noungusuk penya nang hnon eibsuk. Nang dara, Zebedeus bedya mabo moumenaʾ Yohanes beb Yakobus beb eibsuk. Ban penya nang dara, sikjaʾ neyung beblaboka hadyaʾ oumaʾ aklenga mek ekla bunaʾ ak sam memelemek. Dara Yesus adya, ugunda nak yoururum aboka ebsuk dara,

²²wene sab-sab sikjaʾ neyung beb, hadyaʾ oumaʾ akleng ab, anyagan loboka, Yesus ak munaʾ diriga birik.

²³Galilea sokok ara Yesus nidyaʾ heikek yibiniboka, Yahudi nim edya yuba don ek sam yuba nekoka ura yabalesuk. Yesus adya Imik Neyung adya eimik era wenewanesil an perob yub enyek nekdo yabalesuk. Dara onoʾ hnonda nimi malya ulusuk nim eb, neiklemek nim eb, nauba hwelesuk.

²⁴Yesus ara anaso uboka unulamla an yub era mok soko me nidyaʾ oboka lelemok dara, nimi nauba alak yalamek. Nimi nidyaʾ ara igina kweboka, yok-yok neiknaʾ salalesuk nim era Yesus ak bo yalamek. Wera nimi nidyaʾ koma bulumek nim eb, bisaʾ goloklesuk nim eb, nonga heilisuk nim era, Yesus adya meriyisuk.

²⁵Dara ban salek era, nimi nauba Yesus ak yalamek. Wera hnon nim era Galilea sokok ab nimi hnon, Sagobadya Nauba Heikek ab nimi hnon, Yerusalem heikek ab nimi hnon, Yudea mok eb nimi hnon, hnonda Yordan meka gemek nimi hnon yeiniboka neikaʾ yabalamek.