Read Nalca MATIUS 5 Bible Online

MATIUS 5 - Nalca bible

MATIUS 5

¹Yesus ara nimi nauba alak sam yalamekaʾ eibuk dara, alda mok soko meinik sam welewok. Wera Yesus ara seleb bukumok salek, alja yuba doro diriga ban nang era alak yek dara,

²Yesus ara sikenek yuba nek einiwoka lebsukaʾ ara,

³”Nimi hnon, nara ganya garan denaʾ nim enyaʾ senewoka ulumak nim era, sikda Imik Neyung wenesin heikek ulumnemakaʾ anasa, pe ulumak!

⁴Igin ganya bolomak nim era, Imik Neyung adya sikenek ganya sangab eleganesil bok anasa, pe ulumak!

⁵Nimi ganya siklewoka namen ulumak nim era, Imik Neyung adya sikenek yoka unuwanasin amoknya nera gigiwoka unuwanasil bok anasa, pe ulumak!

⁶Nimi gwaneng ok anaso uboka, Imik Neyung adya senelelanya nenyek hyak unulunob senelemak nim era, Imik Neyung adya sikenek gigiwoka eleganesil bok anasa, pe ulumak!

⁷Nimi yok nim ek angoo yadyek senewoka aralasak nim era, Imik Neyung adya sikbabya lunuwoka angoo senewoka arawanasil bok anasa, pe ulumak!

⁸Nimi geisa ganya boboka ulumak nim era, Imik Neyung bek eibnemak anasa, pe ulumak!

⁹Nimi yuba sekoka hillilisak nim era, Imik Neyung adya ban ununanya nemba leboka pe laga nadya mabo henesilaʾ anasa, pe ulumak!

¹⁰Nimi Imik Neyung adya senelelanya nenyek pe unulumakaʾ amba igina kweboka gweklemak nim era, sikda Imik Neyung wenesin heikek ulumnamakaʾ anasa, pe ulumak!” hyok.

¹¹”Ugunda nasamba leboka yok nim edya ugunuk malya nenewoka, oboka, derewoka walasak dara, ugunda pe ululum.

¹²Ugun orokaʾ wenyek, ununumnaʾ lelemek nang eneba unu nauba olosik. Anasa, ugunuk neik so waboka obnesak dara, Wenelesilnya bedya ugunsamba deknaʾ beillilesilaʾ ara nauba anasa, ei-ei ganya boboka glololulum,” hyok.

¹³”Ugun nong ak dara, sokok garam ululum! Garam ara angawom anaʾ anyek denghen dara, onsok saaboka angawom henemso de? Perob gom anasa, nim adya bobogoka yan ingib sabneseng.”

¹⁴”Ugunda sokok an dilinaʾ ululum. Mok soko meinik sam soseng heik era, goʾ doknowamenggom ulumla.

¹⁵Nimi hnon wesaʾ diniwoka mek gokna hmeiya lomok sam goʾ doknowoka beilinggulumak. Alda nim e lomok sam ulumeija nimi nidyaʾ yeblesululaʾ aboka laga diniwoka beillilimak.

¹⁶Anasonya neikek, ugunja dilinaʾ era nimi yok nim edyaʾ hogung ek sam laga yeblelulum. Dara ban adya, nimi yok nim era ugunja pe unulumunaʾ anyek, eiyiboka pelemak aboka, ugunja neyung be imik heikek ululanya bek gigilemnemak.”

¹⁷”Ugunja dara, alda Musa bedya unuwanalum an yub eb, ununumnaʾ lelemek nang edya webek yub enyek, lubnunaʾ aboka yeilimok senewanggununulum. Anasa lubnunaʾ aboka yanggubsebok, alda damok anyek an lebokaʾ anyek gigiwonunaʾ aboka yasa.

¹⁸Ugunda banyek pe beknelum! Im ab soko ab anam denghenggumlya salek, momnya donaʾ hnonok gom, hngekom anaʾ sibin gom anaba, unuwanalum an yub ek ara mekaʾ denghenggunumla!

¹⁹Anasa wera, heknedya ban momnya dobok yuba danyek, hnonok mekaʾ sibin bleklamla dara, anya yok nim ek ugumba anaso unuwolulum aboka wenelesil dara, bera Imik Neyung wenesin heikek ara hyak mek nongnya danamla. Bok alda heknedya yok nim ek anaso unuwanalum aboka nim ak neklesil dara, Imik Neyung wenesin heikek sam senenggomnya danamla.

²⁰Anasa ugunda banyek seiniwoka beknelumaʾ ara, ugunda Yahudi yuba neksin nang eb, Parisi nang eb danyek, Imik Neyung senelamlaʾ ununaʾ ak sam ara, sikja dara mek so bok, ugunjinya nenyek nauba so danggunumla dara, wera aldib ugunda Imik Neyung wenesin heikek binggunulum!” hyok.

²¹”Nunjaʾ neyung yabo youmaʾ nang ek ban yub enyek nekesikaʾ ara, ugunda seleb ella ululum ara, Yok nim onaʾ ara mem; heknedya nim obnamla dara, albabya yana lelewanamak.

²²Bok wenyek dara, nara ugunuk ban lebnesin, Heknedya yok nim ek wabnesilnya bera, albabya yana lelewanamak; anya heknedya yok nim ek derewoka walamla dara, yana lelesinaʾ Yahudi dub nang edya yana lelewanamak. Heknedya yok nim ek leleladya, Malya unaʾ hwamnya, alamla dara, uka desin heikek doro bobogeisijek.

²³Anasa wera, nimi ben hnon, nara Imik Neyung amba gibnaʾ bonaʾ bo yalalabok, nimi ben hnonja alak yu ganya bomlyaʾ anyek unuwanyok bok aboka seiniwanamla dara,

²⁴Imik Neyung ak gibnaʾ bomlyaʾ ara uka daboka gibnaʾ oulyang ek yameb loboka, alak yu ganya bolenya beb neikaʾ hibdeijaʾ seleb danyek, wera saaboka Imik Neyung ak eleknaʾ ara or elegel yanamla.”

²⁵”Nimi ben hnon sondaʾ anasa anak yokaʾ aldib unuwok bar aboka yana lelesin ek ab yana lelewanalum aboka, yana kibnenggel dara, yana lelesin ek binggurumun salek enyek, pikek ab men ganya hekoka ek nim nenebdanarum. Ban nenyek unuwanggurumun dara, benedya an nong ara doboka yana lelesin nang ek eleganesil dara, onoʾ nang enedya doboka yin bonaʾ nang ek elegeisija dara, yin bonaʾ nang edya anak gasa ek henga geregoka beibnenjak.

²⁶Ugunda banyek pe seiniwanalum: Henga geregesijaʾ amba deknaʾ anyek pe senenya loboka hekoka dobnenggumen bok, henga gereknaʾ ek ab men henga lobnenggunenggelaʾ nong anyek, pe seiniwanalam,” hyok.

²⁷”Ugumba ella ululum yub era, yok nang gela salyaʾ salenggom mem hyokaʾ ak hnonok ella ululum.

²⁸Bok wenyek dara, nadya ugunuk banyek dib lebnesin, Nimi ben hnon yok gel salaweisinya senen ganya lomok bolomla dara, bera gel genyek seleb ganya lomok salalamla.

²⁹Anjaʾ sirik heng enedya eiyiboka malya ul eleklenggelya dara, wera heng era kweboka boboganalam. Dara nong yokaʾ ak hnonok leboka deng an dara perob bok, ugunja nong gekman uka desin heikek goksilyek aboka lebna.

³⁰Dara alda anjaʾ sirik soruk edya anak malya ul eleklenggelya dara, soruk era garabdangoka boboganalam. Nong gekman uka desin heikek gokgelyek anasa, soruk ak darasam leboka bobokdangoka ulumen dara, perob so ulumnesom,” hyok.

³¹”Yuba hnon ulumlaʾ ara, nimi hnon alja gel ge lobnamla dara, lobgen an momnya donaʾ doboka eleganamla.

³²Bok wenyek dara, nara ugunuk dib lebnesin, Heknedya alja gel gera meknenaʾ orok bok, lobna dara, gel gera onoʾ yoknya bedya dolomla dara, wera gel genyek malya unaʾ dangallilimla. Anya heknedya yoknya bedya lobna gel genyek dolomla dara, beneba malya ulumla,” hyok.

³³”Nunja neyung yabo youmaʾ nim ek sam yuba hnon ulumokaʾ ara, Hyak unuwanenggen amunjok lonaʾ mem an yuba hnon ulumla. Anda Imik Neyung saramek sam okoka hyak unuwanamna aboka lelelam dara, wera al gigiwoka unuwanalam.

³⁴ Bok wenera nara ugunuk dib lebnesin, Hyak dib unuwanamna aboka yokaʾ-yokaʾ si sibuka migibaʾ nenenaʾ ara mem. Wera im ara Imik Neyung ulumlaʾ ak anasa, imi si sibuka hnon, sokok ak dara, Imik Neyung adyaʾ yan doloknaʾ ak anasa, soko si sibuka hnon, Yerusalem heik ara senenggom dubnya bedya heik ek anasa, Yerusalem heika si sibuka hnon, anaso nidyaʾ si sibuka lenaʾ ara hyak mem.

³⁵

³⁶Ugunda hong doka hnonok sibin anaba, ugunja dara, mirin gom, kul honga nenewanggunusomaʾ anasa, nadya huk edya anaso dib unuwanggunumna anaʾ ara mem.

³⁷Yokaʾ-yokaʾ nauba dara, bisaʾ ak ab yalamla anasa, Yo gom, Orok gom, ok leblulum,” hyok.

³⁸”Ugunda yuba hnon ella ululumaʾ ara, henga soldowegeija dara, alba heng ak dirigolulum, si doluwegeija dara, alba si ak dirigolulum an yub ella ululum.

³⁹Bok wenyek dara, nara ugunuk ban dib lebnesin, Ugunuk malya ulusak nim ek lunuwoka sikbabya onggom, mem. Alda nim adya ugunuk sirik sum ak waboka obsija dara, waneng sum eneba or obsululum aboka elegolulum.

⁴⁰Nimi ben hnonja anja akleng enyek eleganesoʾ aboka, yana lelelesinya bek bo binenggel dara, ban akleng enyek doboka elegalom aboka lebnenggel dara, or yok akleng anaba eleganelam.

⁴¹Nimi ben hnon adya ugunuk mek mok so boro beibnenulum henelabok, ugunja dara, mok so boro beibnelum.

⁴²Nim adya ugunuk yokaʾ ulumlyaʾ anyek elegosululum aboka molowanasak dara, or eleganelum. Nimi hnon ugunja bonaʾ seʾ dobnamna aboka molowanasak dara, ugunja lek numok anaʾ ara mem,” hyok.

⁴³”Ugunda yuba hnon ulumlaʾ ara, Ugun kabo nim ek ara wanaʾ ulumunukanya, ugunja isaʾ nang ek ara lek ganya bololulum an yub ek ella ululum.

⁴⁴Bok wenera nadya ugunuk lebnesinaʾ ara, Ugunja isaʾ nang ek wanaʾ ulumunukanya, ugunuk lek senelesak nim emba heng uboka Imik Neyung ak mololelulum.

⁴⁵Anadya ugunda imik ululanya bedya mabo danalum. Anasa wera, Imik Neyung ara henga dingillilimla dara, hnonda pe ulumak nim emba hnon, onoʾ malya ulumak nim emba hnon, dingilamla. Dara moka yalamla dara, hnonda pe ulumak nim emba hnon, onoʾ malya ulumak nim emba hnon yalamla.

⁴⁶Anasa ugunda ugunuk an wanaʾ ulusak nim ok numbabya wanaʾ ulunob senelelum dara, hekasa Imik Neyung ara ugunja unululumaʾ sunuwoka perobaʾ eleganesuso do? Anaso ganya era mok soko amba rupiah molowoka dolomak nang eneba ganya en boboka unulumak.

⁴⁷Imik Neyung ak elgom ulumak nim eneba unulumak bok anasa, ugunda ugunjaʾ hemyab ok perob aboka giboka ulumnelum dara, pelelum de?

⁴⁸Ugunja neyung be imik heikek ululanya bera, hyak perob ok unulamla anasa, ugumbabya pe ganya kaboka perob ok unulumnulum,” hyok.