Read Nalca MATIUS 7 Bible Online

MATIUS 7 - Nalca bible

MATIUS 7

¹”Ugumbabya Imik Neyung adya eimik yana leleweisilyek anasa, ugunda yok nim ek yana lelenaʾ ara mem.

²Ugunda hekaʾ huboka yok nim ek yana lelelelum sok, Imik Neyung anaba ugumbabya unu yana lelewanasil. Ugunja yok nim ek sunuwoka unululum sok, Imik Neyung anaba ugumbabya unu sunuwoka unuwanasil.

³Anja senenggom gal hyabdobaʾ heng ek ulunggelaʾ ara eibdanggonggom, yok nim edya mek heng soloknaʾ enesa hekasa anyek kemelelam do?

⁴Anja nauba gal siknaʾ ulunggel anasa, an kabo nang ek, Hem o, anja heng soloknaʾ dobnenggen, alalamaʾ ara, hekasa do?

⁵Anda sene bol nenelelamnya o! Anja nauba gal siknaʾ enyek men dobdamenekanya, anja henga pewagelya dara, wera an kabo edya alja heng soloknaʾ pe eiyiboka doboka boboganalam.”

⁶”Gam adya anak saaboka saboka obgelyek anasa, yokaʾ-yokaʾ hyak perobaʾ ara, gam ak eleknenggom, mem. Pam adya meilik ara yan ingib saboka malya nenewalyek anasa, pam ak eleknenggom, mem,” hyok.

⁷”Mololemun dara, dorowanalum. Elemun dara, eiriwanalum. Pika glorum-glorum alamun dara, pika baknesil.

⁸Anasa mololemeija nimi nidyaʾ ara, dorowanamak, elemeija nimi nidyaʾ ara, eiriwanamak. Dara, pika glorum-glorum alameija nimi nidyaʾ ara, siksamba pika baknesil.

⁹Ugun gangganek ara, nimi ben hnon alja me nedya neyung gwaneng eleganelom aboka, molowanamso dara, girik ak eleganamso de?

¹⁰Goma, hadyaʾ ak molowanamso dara, bagaʾ ak eleganamso gom?

¹¹Ugun malya unaʾ nim enyek babya, ugunaʾ mab ak ara, hyak perobaʾ anyek keeboka eleklelum. Anasa ugunja neyung imik heikek ululanya bera wanok! Alak anyek elegeisilom aboka mololemak nim era alda perobaʾ anyek eleganesil.”

¹²”Ugunja yok nim edya nuk pe unuweisinok senelelum sok, ugunja yok nim ek pe unulululum. Musa bedya unuwanalum an yub eb, nidyaʾ ununumnaʾ lelemek nang edya unulululum aboka lebsik yuba damok nong ara an,” hyok.

¹³”Uka delesil e pik eb ban pik eb dara, sabaʾ nauba adya, nimi nauba ara pik enyek an balamakaʾ anasa, ugunda dogob nong pikek ab uboka wekel yalalulum.

¹⁴Nim embengaʾ nenelesil pik era, nimi weknaʾ ak dogob nongaʾ ulumlakanya, ban pik eneba mekaʾ me ulumla. Anya nim ara mek ok eiyiboka weklemak,” hyok.

¹⁵”Sene sondaʾ anasa nunda ununumnaʾ lelemab nang aboka leldalamak nang ek ugunda keeboka ulululum. Sik nong ak dara, yu bei gam anasoʾ ak ulumakjok, ugunuk an domba hogunga beiyi yalamak.

¹⁶Ugunda sikda anaso ulumak senenaʾ ara, sikja ununaʾ ak anyeb eibnelum. Sabalaʾ gal adya dara, anggur dok gom, yok den gal doka hnon, moub eleganggunumso.

¹⁷Pe mesaʾ bleblamla gal ak ab perob gal doka moulumla. Anya, malya uboka eka lerelamla gal ak ab malya galdoka moulumla.

¹⁸Pe mesaʾ bleblamla gal edya dara, malya galdoka moubnenggunumso, onoʾ eka leremna gal edya dara, perob galdoka moubnenggunumso.

¹⁹Perob galdoka mounggulumla gala nidyaʾ ara, weboka uka dalamak.

²⁰Anasa, sene sondaʾ anasa ununumnaʾ lelemak nang eneba, sikja nong unaʾ edya, ugunda sikenek ella danalum,” hyok.

²¹”Nimi nak, Wenelesilimnya o, Wenelesilimnya o, alanyak nim era, nidyaʾ Imik Neyung wenesin heikek weknenggunumak bok, alda nadya neyung be imik heikek ululanya bedya unuwanok senelamlaʾ anyek unulumak nim ok weknemak.

²²Soko sidyaʾ daknamla sum era, nimi nauba nak yeiniboka, Wenelesilimnya o, Wenelesilimnya o, neyung anja si sibuka ununumnaʾ lenggulumouba de? Anya, Neyung o, Wenelesilimnya bedya si sibuka bisaʾ nauba yakoka, yokaʾ-yokaʾ lok so migib ununaʾ ara ununggulumouba de, wenyhenemak.

²³Bok nadya sikenek lebnesinaʾ ara, Ugunda naba elgom ulusin nim. Ugunda malya unaʾ ok ululum nim o, nak abaʾ ara men bululum! henemna,” hyok.

²⁴”Wei anasa, nimi nadya yuba keboka pe unulumak nim era, sikda geremsengnya e pe girik dubuk sam somoknya benesoʾ ak ulumak.

²⁵Wera bera e girik dubuk sam pe gasa somokaʾ adya, mok ab, kaboʾ dorogoka, mek iliwoka bobok sum era, e nera luka mabnenggumok.

²⁶Bok, heknedya nadyaʾ ban yub en keboka, pe ununggululanya bera, nimi ben hnon dongdanganaʾ adya, alja e salyaʾ mek weneng eilib somoknya benesoʾ ak ulumla.

²⁷Wera anadya moka yeiniboka, mek iliwoka, kaboʾ dorogoka e nenyek omok dara, e nera malya ura luka mamok. Anya hyak nauba soldowoka malya dangamok!” hyok.

²⁸Yesus ara Yahudi yuba neksin nang edya neklesik sok neknenggusuk. Alda senenggom nongaʾ ak nekesukaʾ anasa, wera Yesus ara seleb yuba leboka nekgogowousuk dara, anya alak kelemek nim era, hyak nauba loka dasuk.